¹ Diniˈa Filemon,

Naa naan si Pablo, mipirisu mau sabaˈ nu kekpetuudu dini Kristu Isus. Sug dumau si Timoteo, mimated dinita.

Piwitan ka nami sulat, yaˈa petailen sambat nami mukaˈ limbang nami megukit Gempia Petenday. ² Piwitan nami dadema su pikumpungan nu nga sakup ni Kristu diag balay mu, sampay su mimated dinita si Apia, mukaˈ si Arquipo, duma ta dadema megukit Gempia Petenday.

³ Penenebiin ku tu Gamaˈ ta Megbebayaˈ mukaˈ tu Kaunutan ta si Isukristu, begayan amu niin tulung mukaˈ pianan ginaa.

⁴ Naa Filemon, kada kenenabiu mekatag diniˈa, mekpaladpaladu tu Megbebayaˈ, su pektemuyen ku. ⁵ Puˈ miukit na dinaan ki kepetail mu tu kelaun piglegetawan nu Megbebayaˈ mukaˈ su kesalig mu tu Kaunutan si Isus. ⁶ Iini penenebiin ku puun tu keksalabuuk ta di kekpetuud ta, megisegi kesabut ta di kelaun kepepia dinita ni Kristu, miksekat di keksalabuuk ta diniin. ⁷ Puˈ petailen ku mimated, liliagu gupia ditu kepetail mu tu samasakup mu, miamuˈu dun gupia. Puˈ su kelaun piglegetawan nu Megbebayaˈ, pinleliag puun diniˈa.

⁸ Naa maˈantu, kagina samasakup ita ni Kristu, duuni pegbayaˈu sumuguˈu sia diniˈa di gempia mu baalen. ⁹ Laak pia maˈantu, kanaˈ suguˈ ini, puˈ menengiu laak diniˈa, puun tu kekpinetailay ta nga sakup, asa naan si Pablo pigwekilan ni Kristu Isus, mukaˈ mipirisu dau dema nemun sabaˈ nu kekpetuudu diniin. ¹⁰ Kaas, penengiin ku laak diniˈa, kini si Onesimo, lepeng bataˈu di keksalabuuk ta dini Kristu, saˈ mesuˈat lelaatay mu iin. Puˈ si Onesimo kini, su saanan ku dini pirisuan, inukitan ku Gempia Petenday, kaas suminakup. ¹¹ Naa metuud, begudiin ndaˈi gatagen diniˈa. Laak nemun, gembageli gabangen diniˈa, gembagel dademai gabangen dinaan.

¹² Mendadi iin, su petailen ku gupia, pauliˈen ku na diniˈa. ¹³ Mauyaˈan ku sia, sumala pa dini naan megbenwa, adun iini gumantiˈ diniˈa megabang dinaan selian ku mpirisu sabaˈ nu kegukitu tu Gempia Petenday. ¹⁴ Laak ndiˈu yaˈa tegelen di gempia mu baalen, puˈ iin sungkini mauyaˈan ku, senguˈen mu tuˈu su penengiin ku diniˈa puun tu gempia delendeman mu, kanaˈ puun tu tegel. Kaas pegelatan ku pai sembag mu.

¹⁵ Puˈ si Onesimo, mabuˈ iini misuay dun diniˈa ndaˈ maiben, puˈ adun mekepuliˈ pelum diniˈa, dayun ndiˈ na mekpesuay diniˈa. ¹⁶ Puˈ nemun, kanaˈ mu na sesuguˈen laak iin, puˈ petailen dadema mimated diniˈa puun tu kesakup niu duaˈ dini Kristu. Naan, petailen ku gupia iin, labi pa mbantang petailen mu nemun, kanaˈ laak sesuguˈen mu puˈ samasakup mu dadema ditu Kaunutan ta!

¹⁷ Kaas saˈ pemilangen mau tantu limbang mu miksekat di kekpetuud ta, su kenembaˈ mu diniin, pelepeng mu tu kenembaˈ mu dinaan. ¹⁸ Saˈ duun pa pagidi salaˈen diniˈa atawaka gutangen, delendem mu danaan salaˈ mukaˈ danaan gutang. ¹⁹ Pirmaan ku ini, naan si Pablo, biadan ku diniˈa. (Asa ndaˈu tegyung diniˈa puˈ duun dadema siai gutang mu dinaan. Puˈ kanaˈ ba naani migukit diniˈa adun mialap mu na su ketubuˈ ndaˈi tamanen?) ²⁰ Kaas, Mingumpated, kelelaat diniˈa, begay mu dinaan ki penengiin ku kini diniˈa mekatag dini Onesimo, puun tu kesakup mu tu Kaunutan ta. Puˈ saˈ begay mu, leliagenu dun dayun, puˈ mikpated ita di keksalabuuk ta dini Kristu!

²¹ Naa suminulatu diniˈa, puˈ misuunan ku ki penengiin ku diniˈa kini, petuuden mu, kampuˈ nu ndaˈu mpeksaak diniˈa. ²² Mukaˈ padun, pengendamay mau sugudu ditug balay mu, puˈ pedetengen ku mekepuliˈu diniu, puun dadema tu kenenabi niu, launan niu.

²³ Naa si Epafras, dumau mipirisu sabaˈ nu kekpetuud ta dini Kristu Isus, mipenambaya niin, ²⁴ sampay si Marcos, si Aristarco, si Demas mukaˈ si Lucas, ngag dumau dini megukit tu Gempia Petenday.

²⁵ Naa penenebiin ku tu Kaunutan si Isukristu, begayan amu niin tulungen, launan niu.

Daal daitu. Pablo