Mendadi, kig libru kini, iini sinulat dun si Isus. Iin sug Bataˈ nu Megbebayaˈ, metaas pain di ngag launan bitang di gekleb langit buˈ lupaˈ, saˈ su kilawan, saˈ su nga pimuunan nu Megbebayaˈ dengantu, saˈ si Moises, pia su nga ndiˈ maitaˈ. Ndaˈiduni metaas pa diniin. Tinituluˈ dadema dini puˈ ki miuna betad nu getaw Judea, iini sinukli dun, su tituluˈan ni Isus. Kig begu pasad nu Megbebayaˈ pibian dini Isus, gembagel pa duni pantagen dig daan sabuten dinilan nu nga getaw Judea begudiin. Ki kegbelian ni Isus, gembagel pa duni pantagen di kegbelian nu ngag lain belian, puˈ pingilaken sug lawasen guliden tu Megbebayaˈ, adun iini mbaal bayad tu salaˈ mukaˈ limbung nug launan getaw. Kaas ki Tampusan Metaas Belian ta si Isus.

Tinituluˈ dini puˈ su nga suminakup ditu Megbebayaˈ, subay seligan nilan gusay su Megbebayaˈ sampay matengi gumul nilan, pegengagen nilan lelayun si Isus mukaˈ pektigelen nilan su tibaˈan kelegenay mbianan ta dinig dibabaw lumbang. Katapusanen dinig libru kini, duuni pigad mukaˈ tituluˈ.

Naa, saˈ su suminulat dig libru kini, Su Sulat tu nga Hebreo, ndaˈ mesuunay nu nga getaw, puˈ su ngalan nu suminulat dun, ndaˈ mesulat dini. Iini pingantap nu ngag duma menilung dig libru kini, mabuˈ suminulat dun si Apolos. Saˈ sug duma mektaluˈ, si Bernabe, si Lucas, si Pablo, saˈ si Priscila. Ndaˈ ta mesuunay. Pia su nga piwitan dun, ndaˈ ta mesuunay dadema, laak gempantek getaw Judea ilan, suminakup dini Isus, dayun piglegetan sabaˈ nu kekpetuud nilan diniin. Ki ngalan nug libru kini, Su Sulat tu nga Hebreo, iin su ngalan nu tingeban bansa nu getaw Judea begudiin. Iin dademai ngalan nu pikebitan nilan.