¹ Kaas, ita nga samasakup, subay mekpinetailay ita gusay. ² Ndiˈ niu selingaway pegdedialay niu dig balay niu su nga getaw ndiˈ niu mailala. Duuni minembaˈ tu sesuguˈen nu Megbebayaˈ getaw langit, laak laung nilan dun kilawan da. ³ Ndiˈ da niu dema selingaway ebangay niu su nga pinikutan, lepeng pinikutan damu dema. Pegdelendem niu su nga pilegetan, adun mebangan niu ilan, puˈ duunig lawas niu melemu dadema melegenay.

⁴ Naa, su kegawid niu duayan, subay pegbesaan niu, launan niu. Ndiˈ amu mpia menlelingay, puˈ ukumen nu Megbebayaˈ su nga medusa mukaˈ su nga menlelingay. ⁵ Subay ndaˈ dademai gayak niu tu selapiˈ. Subay pemilangen niu sukal da su misukat niu saˈ melaun saˈ maikaˈ, puˈ ndaˈ ba pektaluˈ su Megbebayaˈ, “Ndiˈu yaˈa belengan, ndiˈu da yaˈa dema teliudan.” ⁶ Kaas gembageli kesalig ta tu Megbebayaˈ, mukaˈ ndiˈ naita mpiid mektaluˈ puun tu Misulat Taluˈ nu Megbebayaˈ, laung,

⁷ Naa, su nga miuna kaunutan niu, pegdelendem niu ilan, su nga mikpetuˈun diniu taluˈ nu Megbebayaˈ. Pegdelendem niu gusay su pigbetad nilan sampay su kepatay nilan. Penunggilingay niu dayun su kesalig nilan dini Isus. ⁸ Puˈ si Isukristu, ndaiˈ kepalinen, genat kanugdiin sampay nemun, mukaˈ di ndaˈi gikteben. ⁹ Kaas ndiˈ niu pektalentenayig lain tituluˈan, su mekepetalin di kekpetuud niu. Tumuˈ pa pepegenen ta su ginaa ta puun tu tulung nu Megbebayaˈ, sabayaˈ di kedunut ta tu nga tinituluˈan di kegelig. Puˈ su ngag duminunut tu nga tinituluˈan kia, ndaˈ mpepagen su ginaa nilan puun tu kedunut nilan dun.

¹⁰ Naa, ita nga mekpetuud dini Isus, duunig betang ta tu gentudan gilak. Laak kia, ndaˈi pegbayaˈ nu nga mektamuy diag lepintaw nu getaw Judea maan ilan dun. ¹¹ Naa, sug betad nu Tampusan Metaas Belian nu getaw Judea, uitenen sug duguˈ nu petubuˈen diag dialem sugud nug lepintaw paingalan nilan dun su Tampusan Meˈelig Sugud, adun pengilaken dia. Pengilaken dia adun maugasani salaˈ nu nga getaw Judea. Sug lawas nu petubuˈen, uitenen ditug liu nu pegbebelayan nilan, adun tutungen. ¹² Si Isus pelum, iini milegenan dun dadema diag liu nu syudad, adun petelimaˈenen su tibaˈan getaw ditu Megbebayaˈ mekpuun tug daniin duguˈ. ¹³ Kaas ndiˈ ta na seligan sug betad nu getaw Judea mekanu, segaga seligan ta si Isus mukaˈ meksaliunung ita di kepiidanen. ¹⁴ Puˈ ndiˈ metulayuni kaindegen su pegbenwanan ta dinig lumbang. Pedetengen ta pa su pegbenwanan ta tantu ditug binayaˈ gebii buˈ gendaw. ¹⁵ Kaas, baalen ta gusay ki gilak pegenal tu Megbebayaˈ pebian dini Isus, gitunganen su pengilak nu nga getaw miglegintuud dun puˈ si Isus, iini Kaunutan. ¹⁶ Ndiˈ dadema niu selingaway pepianay su ngag duma niu, mukaˈ mektinebangay amu, puˈ lepeng ia tu gilak leliagen dun su Megbebayaˈ.

¹⁷ Mukaˈ pektalentenay da niu dema su nga meguit diniu, mukaˈ dunutay niu su suguˈan nilan diniu, puˈ ilani megingat di kebetang niu gebii gendaw, puˈ ilani mekesembag dun tu Megbebayaˈ. Saˈ mekpetuud amu dinilan, gempia ginaa nilan di keguit nilan diniu. Saˈ ndiˈ niu ilan petuuden, melayuˈi ginaa nilan di keguit nilan diniu. Saˈ maˈantu, taˈ mai gabang nilan diniu?

¹⁸ Yami pelum, penenebiay niu ami gusay. Misuunan nami ndaˈi pegbiksuˈan nami, puˈ mauyaˈan nami penggulaulaan nami lelayun su gempia. ¹⁹ Penengiin ku diniu, kelelaat, penenebiin niu tu Megbebayaˈ, ndiˈ maiben suguˈenu niin mpuliˈu ditu niu.

^20-21 Naa su Megbebayaˈ, pitubuˈen puliˈ su Kaunutan ta si Isus. Si Isus, iin su tampusan metau megingat dinita nga karnirunen, puˈ pikulaˈanen duguˈ su kepatayen, mikpuun tug begu pasad ndaˈi gikteben. Penenebiin ku pa ditu Megbebayaˈ su megbegay pianan ginaa di nga sakupen, pesengkapen amu niin dig launan tinawan, adun penggulaulaan niu tantu su mauyaˈanen. Penenebiin ku dadema baalen amu niin nga sakupen metau megbaal tug leliagen dun gupia pebian di tulung ni Isukristu, su gempia penalan di ndaˈi gikteben. Amen.

²² Naa, penengiin ku diniu, yamu kepetedan ku, telimaˈ niu su tituluˈan ku diniu kini di gempia ginaa, puˈ gempelek dai sinulatu diniu kini. ²³ Aaw, pesuun ku pa padun diniu puˈ si Timoteo su mimated dinita, biluyan na di pinikutan dun kaas, saˈ ndiˈ melangan, tundug dinaan saˈ mangayu meguliug dia niu.

²⁴ Saˈ mesuˈat, sambay niau tu nga kaunutan niu sampay su tibaˈan piglegetawan nu Megbebayaˈ dia niu. Sinambay damu dema nu nga samasakup ta begu dateng dini genat tug Italia.

²⁵ Kinii taman penenebiin ku, mbianan niu lelayun su tulung nu Megbebayaˈ, launan niu.