12
Su Megbebayaˈi Gamaˈ ta
1 Naa ita dema, kagina maˈantui kesalig nu nga miuna mekpetuud kanugdiin, lepeng piglidungan ita nu melaun getaw miglegintuud puˈ meseligan su Megbebayaˈ. Kaas sug betad ta mekebelabag di gempia bianan ta mukaˈ su salaˈ tatap ta baalay, melengas belengen ta. Maaˈ nug lekis ki kegleketubuˈ ta pa dinig lumbang. Subay menamal ita gubek sampay mateng ita ditu gengayan ta. 2 Selian ta gubek, subay penemalan ta pekimanay si Isus, puˈ iin su puunan nu kesalig ta mukaˈ iini mikpengganget dun di ginaa ta. Kagina leliagen dun si Isus tug deksuˈan nu mbiananen, miktigel di kelegenayen dia kurus, mukaˈ pimilangen ndaˈig lagaˈen su piidanen. Migingkud dayun ditu gupid nu gingkudan nu Megbebayaˈ dapit lintu.
3 Mendadi, pegdelendem niu gusay ki mibianan ni Isus su saananen dini pa lumbang, puˈ adun ndiˈ melayuˈi ginaa niu mukaˈ ndiˈ amu lumukas sumalig dun. Iin, miktigel gusay di kesigi diniin nu nga mikesalaˈ getaw. 4 Puˈ sinegay niu sumagaˈ di melaat betad, ndaˈ pa niu mbianay matay amu sabaˈ nu kesagaˈ niu dun. 5 Mabuˈ milingawan na niu su tinituluˈ nu Megbebayaˈ diniu nu ngag bataˈen. Ndaˈ ba mesulat di Misulat Taluˈen maˈniniˈ,
“Ki mbataˈ, pektalentenay mu su tituluˈan diniˈa nu Kaunutan.
Ndiˈ melayuˈi ginaa mu saananen memaag diniˈa.
6 Puˈ adini petailen nu Kaunutan, tituluˈenen,
mukaˈ launan pemilangenen bataˈen, pemaagenen.”
7 Saˈ maˈantu, saˈ duuni kelegenay niu, pektigel niu, pelepeng niu tu tituluˈan nu gamaˈ niu, puˈ su kelegenay niu, mpaitaˈ dun diniu puˈ pemilangen amu nu Megbebayaˈ bataˈen. Duun bai gembataˈ kanaˈ tituluˈen nu gamaˈen? 8 Kaas saˈ upama ndiˈ amu metituluˈ nu Megbebayaˈ, kanaˈ amu tantu bataˈen, bataˈ nu sumbang laak, puˈ metituluˈ nu Megbebayaˈ sug launan bataˈen. 9 Saˈ su nga gamaˈ ta dinig lumbang, metituluˈ ita nilan, kaas pegbesaan tailan. Subay labi pa telimaˈen ta su tituluˈan dinita nu Gamaˈ ta di ginaa. Metubuˈ ita dayun di ndaˈi gikteben. 10 Tinituluˈ ita nu gamaˈ ta dinig lumbang ndaˈ maiben lepeng tu kemilang nilan gempia. Su Megbebayaˈ pasiˈ, tituluˈen daita dema niin adun mpianan ita mukaˈ adun malap ta dadema su kekesuunen. 11 Su pektituluˈ dinita, laung ta dun mekelayuˈ ginaa, masiˈ pianan ginaa. Laak deksuˈanen ia meksikesuuni getaw tinituluˈ mukaˈ melinawi ketubuˈen.
Nga Tituluˈan mukaˈ Pegad
12 Kaas, ndiˈ niu peglukaˈlukaˈayi kesalig niu. Ndiˈ amu penlukasen dun. 13 Penemalay niu dunutay su tantu bianan, adun ndiˈ niu mbelebagan su ngag duma ndaˈ pa mpanteki kekpetuuden. Sinangkaliˈ pa tanan mekenggangeti kesalig nilan. 14 Peksalabuuk amu gikteb nu megaga niu. Penamal damu dema meksikesuun, puˈ ndaˈi mekaitaˈ tu Kaunutan Megbebayaˈ saˈ kanaˈ mekesuun. 15 Peglengilam amu, adun ndaˈidun diniui meketeliud tu tulung diniin nu Megbebayaˈ. Peglengilamay niu dadema su pegbetaden niu sia mekesesalaˈ, puˈ mbuus megleep meglegalin tu ngag duma niu. 16 Subay ndaˈidun diniui medusa atawaka tuliud tu Megbebayaˈ maaˈ ni Esau kanugdiin. Puˈ si Esau, bisan iini gulangbataˈ, pigbelesen ditu ngudanen su pegbayaˈen tu kegulangbataˈen di salaˈaanan. 17 Misuunan niu, genat nitu saˈ mauyaˈanen na penenebian nu gamaˈen lepeng tu pegbayaˈen, miteliudan dayun. Pinemalanen sia penengiay, laak ndaˈen puliˈ megaga malapi pigbelesen, bisan lamugen mengaduy sabaˈen menengi dun.
18 Naa yamu kepetedan ku, mikpesempel namu tu Megbebayaˈ. Laak su mibianan niu mekpesempel dun, kanaˈ maaˈ nu kekpesempel diniin nu nga getaw Israel kanugdiin. Kanaˈ nu maitaˈ mukaˈ nu mbatik niui pisempelan niu, saˈitada, sug bentud Sinai tandaˈ minitaˈ nu nga getaw Israeli gembagel ligaˈapuy, medelem gupia, mukaˈ metikteg buligut. 19 Su nga getaw Israel, duun dademai midengeg nilan metenug bugyung mukaˈ tingeg genat tug langit. Benaˈ midengeg nilan su tinaluˈen, inubug nilan gupia, ndiˈ nailan puliˈ teluˈan maˈantu. 20 Puˈ ndaˈ nilan megaga su pinalintanen, laungen, “Pia metetubuˈi mekpuleg tug bentud kini, subay betuun sampay matay.” 21 Kagina mekesalebuˈ gupia su minitaˈ nilan, mindek ilan gupia. Pia si Moises su kaunutan nilan, tinaluˈen puˈ mindek gupia, sinaaban.
22 Laak dagid, yamu pasiˈ, iini mipesempelan niu, sug bentud Sion, saˈitada, su syudad ditug langit pesangay ta tu Jerusalem. Kiai pegbenwanan nu tantu Megbebayaˈ. Mipesempelan niu dadema su nga sesuguˈen nu Megbebayaˈ getaw langit, ndiˈ mbilangi kelaunen. 23 Mikepesempel damu dema tug lumpuk nu nga penganay bataˈ nu Megbebayaˈ meglekebibu ditug langit. Su ngalan nilan, daan na misulat ditu. Midepet namu tu Megbebayaˈ, su mukum tu tibaˈan getaw. Mikepesempel damu pagid tu nga mekesuun getaw minatay na, kaas mingganget nai kekesuun nilan. 24 Si Isus dademai mipesempelan niu, su migbaal begu pasad dinita nu Megbebayaˈ, adun mekesalabuuk ita diniin. Puˈ sabaˈ nu kepatay ni Isus kini, tinulung ita nu Megbebayaˈ. Pimesik diniu sug duguˈ ni Isus, ki gempia pa dig duguˈ ni Abel kanugdiin, puˈ kia, tuˈus laak puˈ subay suliˈan su mikpatay diniin.
25 Kaas, kagina maˈantui mibianan niu, petubuday niu ndiˈ niu pemilasen su mektituluˈ nandaw genat tug langit. Kanugdiin, saˈ mipauk su nga getaw Israel mekineeg dini Moises, su mikpetenday dinilan pimuun nu Megbebayaˈ dinig lumbang, mibianan nilani gembagel pelabuˈ. Labi pa ndiˈ ta mpegliaw su ginukuman nu Megbebayaˈ, saˈ teliudan ta su mektituluˈ dinita genat tug langit. 26 Kanugdiin mikegyugig lumbang sabaˈ nu tingeg nu Megbebayaˈ. Nandaw miktaluˈ su Megbebayaˈ, “Kegyugen ku pa puliˈ mainsan sug lumbang, kanaˈ laak nug lupaˈ, pia sug langit.” 27 Naa su tinaluˈen kia, “Puliˈ mainsan,” maˈananen adinig bitangen mekegyug, uaˈenen, adun mbilin da su Keglekaunutan nu Meglegawen ndiˈ mekegyug. 28 Kaas mekpaladpalad ita tu Megbebayaˈ, puˈ bigayen ita sumalabuuk ita tu nga miuna sumakup di Keglekaunutanen, su ndiˈ mekegyug mukaˈ ndiˈ mpupus. Mengadap ita diniin gusay mbantang tu mauyaˈanen, penemalan tain pegbesaay, lemugan ta dadema gendek. 29 Puˈ su Megbebayaˈ, maaˈ nu gapuy sigi meket sampay mpupus su kuminuntra diniin. Melaat gupiai ginaanen ditu mimilas diniin.