¹ Naa naan si Santiago, sesuguˈen nu Megbebayaˈ mukaˈ nu Kaunutan ta si Isukristu. Suminulatu diniu nga suminakup diniin mipelak di tibuuk benwa. Iini penenebiin ku, gempiai ginaa niu.

² Naa Mingumpated, saˈ mbianan niu ki nga kelegenay, pia taˈ kelegenayay dun, subay leliagen amu dun. ³ Puˈ suunan niu ki nga kelegenay, gindan di kesalig niu. Mukaˈ suunan da niu dema saˈ mbianan na niu mukaˈ megiseg pai kesalig niu, meglegintau namu gupia mektigel di kelegenay. ⁴ Subay penemalan niu tigelay su kelegenay niu. Mukaˈ saˈ ndiˈ amu lumukas dun, ndiˈ dayun megengkan ki kekpetuud niu. Mukaˈ mengganget gupiai kekesuun niu. Ndaˈi kulang di kekpetuud niu tu Megbebayaˈ. ⁵ Laak saˈ duun diniui getaw kulang di tinawanen, kaas ndiˈ metau memiliˈ tu gempia penggulaulaan, subay penenebiinen tu Megbebayaˈ su kulangen, puˈ iin, metawal dig launan getaw mukaˈ ndiˈen pelengilengiin su menengi dun. Megbegay dun dayun su Megbebayaˈ. ⁶ Laak dagid su getaw kulangi tinawanen, saananen menenabi, subay dunutan nu kesaligen, ndiˈ megduaˈduaˈig delendemanen dun, pia maikaˈ. Adin su megduaˈduaˈig delendemanen, pesamau ditu nabek dig dagat puˈ pekseseguliˈ dulukay nu genus. ⁷ Adin diniui mengmaˈantu, kanaˈ begayan nu Kaunutan, ⁸ puˈ su getaw maˈantu, megduaˈduaˈig delendemanen, ndaˈ dademaig lumbuk delendemanen tug launan baalenen.

⁹ Naa su nga pubri suminakup na tu Kaunutan ta si Isukristu, diadia subay leliagen dun su kekpetaas dun nu Megbebayaˈ, puˈ bataˈ na nu Megbebayaˈ. ¹⁰ Su ngag datuˈ suminakup dadema, diadia subay leliagen saˈ pebebaˈen nu Megbebayaˈ, puˈ su kedatuˈen, ndaˈig labeten tu kebataˈ dun nu Megbebayaˈ. Petanggiˈ ta sug datuˈ dig bulak nu sigbet. ¹¹ Ndiˈ ba metuud, saˈ subangi gendaw, tuiagi pedes dayun, pedesan gupia su sigbet kaas melawes? Melupuˈ dayun sug bulaken mukaˈ mbeleng naig lengasanen. Maˈniin dademaig datuˈ getaw. Sinegayen menamal meksukat, metekaw dain mbeleng.

¹² Naa, adin su getaw mbiananen su kelegenay laak sumalig pa tu Megbebayaˈ, gembagel paig leliagen. Maˈantu, saˈ mbiananen su kengindan di kekpetuuden mukaˈ ndiˈ mpalin, begayan dayun ketubuˈ ndaˈi tamanen, su ketubuˈ pinasad nu Megbebayaˈ begay tug launan getaw mekpetail diniin. ¹³ Laak saˈ mpegdaangan su getaw pengindanan, ndiˈ mpia teluˈen puˈ su Megbebayaˈi pigenatan nu kengindan, puˈ kanaˈ mpegdaangan su Megbebayaˈ mukaˈ kanaˈ dadema iin megdaang tu getaw adun medupang. ¹⁴ Puˈ saˈ mpegdaangan su getaw, iini megdaang dun su melaat gayaken. Egaken nu gayaken di kedupang, maˈniin mitaban tu gayaken. ¹⁵ Saˈ mbaluy dayun sug delendemanen, mekesalaˈ. Mukaˈ saˈ menamal mekesesalaˈ, deksuˈanen, matay di ndaˈi gikteben.

¹⁶ Kaas, uu Mingumpated petailen ku gupia, ndiˈ niu melimbunganig lawas niu puˈ su Megbebayaˈ dawi megdaang tu getaw. ¹⁷ Puˈ su Megbebayaˈ, iinig begayen dinita, su ndaˈi gikteben dig lengasan. Mukaˈ ndaˈiduni melengas, iini migay dun, su miwat tu tibaˈan tuiag diag langit. Pia su nga pektiag diag langit, mpalin, puˈ megbulibud, laak dagid ndiˈ mpalin su Megbebayaˈ, meseligan gupia, ndiˈ mekpedelem. ¹⁸ Puun tu mauyaˈanen, binataˈ ita nu Megbebayaˈ pebian di kegukit dinita tu metuud, adun baalenen itai miuna di ngag launan biwaten baalenen puliˈ.

¹⁹ Naa uu Mingumpated petailen ku, pektalentenay niu ini, launan niu. Subay menamal amu mekineeg, meliang amu laak petaluˈ, mukaˈ kanaˈ amu sempaun. ²⁰ Puˈ su gangit nu kilawan, ndiˈ mekenggulaula tu kekesuun delendeman nu Megbebayaˈ. ²¹ Kaas subay beleng niu sug launan melaat betad niu mukaˈ launan dupangan niu. Pekpetuud amu tu Megbebayaˈ. Pektalentenay niu di pianan ginaa su taluˈ nu Megbebayaˈ dinawat na niu. Saˈ metuudan amu dun, megawen amu puun dia.

²² Kaas subay dunutan niu su taluˈ nu Megbebayaˈ. Puˈ saˈ kineegan laak niu mukaˈ ndiˈ niu dunutan, melimbungan niuig lawas niu. ²³ Puˈ saˈ duuni getaw pekineeganen su taluˈ nu Megbebayaˈ, laak ndiˈen dunutan, pesamau di getaw mimagalungan, maitaˈen su tantu palasen. ²⁴ Pegbentayanen gupia su palasen, laak saˈ melinged, melingawanen dayun su kaitaˈen tu palasen dia pagalungan. ²⁵ Laak saˈ duuni getaw penilungenen gupia su melengas palinta nu Kaunutan mukaˈ penemalanen pektalentenay, kanaˈ mekineeg dun laak, puˈ dumunut dun dadema. Pepianan dayun nu Megbebayaˈ dig launan penggulaulanen. Puˈ ki palinta kia, mingganget na tantu mukaˈ iini mekepeliu di getaw tu melaat gulaulanen migbalud diniin.

²⁶ Naa, saˈ duun diniui getaw laungen megbasa gupia tu Megbebayaˈ, laak ndiˈ metau megbegduˈ di peneluˈenen, ndaˈi pantagen su kegbasanen, mukaˈ milimbunganenig lawasen. ²⁷ Iinig betad nu getaw mektamuy tantu tu Gamaˈ ta Megbebayaˈ mukaˈ ndaˈi kulang di kektamuyen di pegitaˈen nu Megbebayaˈ, ebanganen su nga gidu mukaˈ su ngag balulibun milegenan. Mukaˈ dema pegliaunen gupia sug dupangan nu kekilawan dinig lumbang kini.