¹ Naa uu Mingumpated, ndiˈ mpia melaun diniui mauyaˈanen mekpetuˈun di nga samasakup niu, puˈ su mekpetuˈun, saˈ pinenggiˈ melapang, metaas pai kengukum dun di nga kanaˈ mekpetuˈun. ² Launan ta, ita nu nga getaw, tatap ita melapang. Tumuˈ adin su getaw ndiˈ melapang di teluˈenen, puˈ ndaˈi kulang di kekesuunen. Mekesuun tantu puˈ metau mektigel di tibuuk lawasen adun ndiˈ megdupang. ³ Maˈniin betad kebayuˈ. Tembedan ta bukadu sug babaˈen adun mengnunut dinita. Genat nitu pia tandaˈ ta pengayay, meditu, laak sug bukadu, maikaˈ. ⁴ Su sekayan, damikian dadema. Pia gembagel gupiai sekayan, saˈ sembelen nu metikteg genus, mpelikuˈ nu maikaˈ bensalanen. Lumbukenen su pengayan dun, pia tandaˈi mauyaˈan nu meguit dun. ⁵ Naa kig dilaˈ ta, mesamaig betaden. Pia maikaˈ, mekenakabul gupia. Pegdelendem niu deliˈi gulangan. Su maikaˈ gapuy, meketutung dun pia meliwag gupiai gulangan. ⁶ Kig dilaˈ ta, maaˈ nu gapuy daan, puˈ mekepelaat di tibuuk lawas ta. Iini mekepeleep melaat dig delendeman ta mukaˈ mekelemuˈ dig launan betad ta. Genat kaikaˈay ta sampay matengi gumul ta, mekpelaat dinita. Iini pigenatan nug betaden, sug linaw gapuy. ⁷ Ndiˈ ba metuud, mayep nu getaw su gininisan metetubuˈ, manukmanuk, sampay su nga kumanap mukaˈ nga sedaˈ? ⁸ Laak sug dilaˈ ta, baa, ndaˈiduni mekayep dun. Melaat gupia, ndiˈ mekektigel di melaat, maˈniin mipenuˈ bulit. ⁹ Iini gemiten ta saˈ mekpaladpalad ita tu Megbebayaˈ, mukaˈ gemiten ta dadema saˈ tampalaksaan ta su samataw ta, pia iinig binaal maaˈ danu palas nu Megbebayaˈ. ¹⁰ Salabuuk daig babaˈ, laak dagid iini pigenatan nu kekpaladpalad mukaˈ tampalaksa. Uu Mingumpated, ndiˈ mpia maˈnia. ¹¹ Puˈ ndaˈiduni tebud mekegbegay duaˈ ginis tubig, melengas mukaˈ madaw, salabuuk laaki tebuden. ¹² Seginis gayu, ndiˈ memunga duaˈ ginis, mukaˈ ndaˈidunig dagat mesegukan metebang tubig.

¹³ Naa duun ba diniui metau megdelendem mukaˈ telisebuten? Saˈ upama duun, subay peksibaˈaneni pigbetaden mukaˈ penggulaulaanen su melengas, adun pesuunen di ngag dumanen puˈ su telisebutayen mukaˈ su tinawanen, mpaitaˈ di kesumayaˈen mukaˈ di tinawanen dadema. ¹⁴ Laak saˈ pinenggiˈ melibeguun amu gupia mukaˈ mesaku damu dema gupia, ndiˈ niu mpia ensagen su tinawan niu, puˈ pemelaun niu su tantu tinawan. ¹⁵ Kanaˈ nu Megbebayaˈi pigenatan nu tinawan niu kia, segaga tinawan kinilawan laak. Iini pigenatanen sug betad kinilawan mukaˈ su menenulay. ¹⁶ Puˈ adin su mekpetuˈun, mengimbegu mukaˈ mesaku, dia dademai kesasaw mukaˈ gininisan melaat gulaula. ¹⁷ Laak saˈ su getaw tinawanen bigay nu Megbebayaˈ, mekesuun, ndiˈ meksual dig dumanen, mesumayaˈ dadema, mesambat, sampay melilelaaten. Mukaˈ puun tu tinawanen sug launan gempia gulaula, puˈ ndaˈi pemiliˈanen dun su nga getaw. Mukaˈ kanaˈ tautau mekesuun. ¹⁸ Kig launan kepianan kini, pesamau dig beniˈ. Sug beniˈi pemulaan nu nga mikepegeksud tu pianan ginaa nug dumanen. Iin dayuni sengkuˈen, su kekesuun nu getaw.