¹ Naa miksesinaay amu mukaˈ miksinualay amu. Taˈ mai puunanen? Iini pigenatanen, su gayak niu, puˈ kada sala tawan diniu, miksagaˈig delendemanen. ² Duuni mauyaˈan niu, laak ndiˈ niu malap. Naa kagina ndiˈ niu malap, munuˈ amu, adun niu malap. Miayak damu dema tu gimu, laak ndiˈ niu malap, kaas miksesinaay amu, miksinualay amu. Ndiˈ niu malap su mauyaˈan niu, puˈ ndiˈ niu penenebiin tu Megbebayaˈ. ³ Mukaˈ saˈ menenabi amu, ndiˈ amu begayan, puˈ ndiˈ mesugat su kenenabi niu. Ndiˈ mesugat su kenenabi niu, puˈ yamu laaki leliagen dun. ⁴ Kanaˈ amu meseligan getaw! Ndiˈ ba niu mesabut? Saˈ mayak laak ita tu kinilawan, mekuntra ta dayun su Megbebayaˈ. Saˈitada, adin su getaw mauyaˈanen megdunut tu melaat betad kekinilawanen, kuminuntra tu Megbebayaˈ. ⁵ Laung niu dun ki sinulat di Misulat Taluˈ nu Megbebayaˈ kini, ndaˈi pantagen? Ndaˈ ba mesulat, laung, “Su ginaa bigay nu Megbebayaˈ kanugdiin di nga getaw, melebian nai gayaken.” ⁶ Laak labi pa ki tulung nu Megbebayaˈ dinita, adun mpemilas ta su melaat gayak. Ndaˈ ba mesulat di Misulat Taluˈ nu Megbebayaˈ, “Su getaw mekpelabawlabaw, teliudan nu Megbebayaˈ, laak begayanen tulungen su mekpebabaˈ di ginaanen.” ⁷ Kaas pekpetuud amu tu Megbebayaˈ mukaˈ teliuday niu su Palin. Puˈ saˈ mpemilas su Palin, gubek dayun iin mekpelayuˈ diniu. ⁸ Pekpaingabang amu tu Megbebayaˈ. Iin dayuni mekpesempel diniu. Yamu nu nga mikesalaˈ, subay beleng niui melaat gulaula niu. Yamu nu nga megduaˈduaˈ dig delendeman, legdeng niu sug delendeman niu. ⁹ Peglekelibuleng amu sabaˈ di salaˈ niu, pengaduy amu dig biksuˈ niu di salaˈ niu. Sukliay niui ketawa niu di gaduy. Sukliay niu dadema sug leliag niu di piid. ¹⁰ Pebabaˈ niui ginaa niu di gedapan nu Megbebayaˈ. Petaasen amu niin dayun puˈ pedesunen amu niin.

¹¹ Naa uu Mingumpated, ndiˈ damu dema peglinibakay, puˈ adin su getaw libakenen su samasakupen mukaˈ pegdenaˈenen, iini pigdenaˈen su Misulat Palinta nu Megbebayaˈ. Naa, saˈ pegdenaˈen niu su Palinta nu Megbebayaˈ, kanaˈ namu mikpetuud dun, segaga mikpelabawlabaw amu tu Misulat Palinta nu Megbebayaˈ. ¹² Su Megbebayaˈ laaki mekpalinta di Palinta mukaˈ mukum dig launan ginukuman. Iin da laak demai mekegawen, mukaˈ mekebeleng di mikesalaˈ getaw. Saˈ maˈantu, yamu nga meglibak tug duma niu, kanaˈ bantang mengukum amu.

¹³ Yamu pa pagid nu nga miktaluˈ maˈniniˈ, “Lemaˈ atawaka denlag muliˈ ami daw tug lunsud. Megbenwa ami dia setaun menelapiˈ adun dumatuˈ ami daw gupia.” Yamu nu nga miktaluˈ dun, pektalentenay niu ini. ¹⁴ Ndaˈ niu suunayi mbianan niu lemaˈ. Ki kegbenwa ta dinig lumbang kini, maaˈ nu gabun, maitaˈ laak selingka dayun mbeleng. ¹⁵ Saˈ maˈantu, tumuˈ teluˈen niui maˈniniˈ, “Saˈ mauyaˈan daw nu Kaunutan, tetubuˈ pami mukaˈ penggulaulaan nami su maˈniniˈ atawaka su maˈnia.” ¹⁶ Laak dagid nemun mingangyaˈ amu mukaˈ minakabul pamu dig launan penggulaulaan niu lemaˈ denlag. Melaatig delendeman maˈnia! ¹⁷ Kaas saˈ upama mesuunan niu su gempia penggulaulaan niu, laak ndiˈ niu penggulaulaan, mikesalaˈ amu dayun.