¹ Naa, yamu nu nga medatuˈ, pektalentenay niu ini. Subay mengaduy amu, mektenlis amu, puˈ mbianan pa niui kelegenay ditug binayaˈ gebii buˈ gendaw. ² Megelaˈ pa mbeleng su nga gimu niu. Eketen dadema nu nga metetubuˈ su penepeten niu. ³ Iluman pa sug bulawan niu mukaˈ su selapiˈ niu, puˈ ndaˈ niu legaay di kegabang niu dig duma niu. Su kailum duni tuˈus di kepinget niu, kaas belengen amu maaˈ nu getaw gelaˈen aanay nu gapuy sug lawasen. Teguˈen niu su laung niu dun gimu niu nemun di tampusan gendawanen kini, laak iini mitaguˈ niu tantu, ki ginukuman diniu. ⁴ Ndaˈ niu biaday su nga tinindanan niu mengimbaal dig lupaˈ niu. Midengeg na nu Megbebayaˈ su gangit nilan dig limbung niu. Sug dinangat dadema nu nga tinindanan niu meglegani dia niu, tilimaˈ nu Megbebayaˈ su ginuungan kiin Kaunutan. ⁵ Melengas gupiai kegbenwa niu dinig lumbang kini, mituyangan amu di mauyaˈan niu. Yamui maaˈ nu petubuˈen pilembuˈ gupia nu gapuˈen adun mpia na titiˈen, puˈ minuyaˈ nai ginukuman diniu. ⁶ Inukuman niu su nga mekesuun getaw lagaˈ na ginaaneni salaˈ nilan. Binunuˈ niu ilan dayun, laak ndaˈ amu nilan pengetuay.

⁷ Kaas Mingumpated, ki kelegenay niu, tigel niu sampay mateng puliˈ su Kaunutan ta si Isus. Bentayay pa daan niu deliˈ su nga meglupaˈ, puˈ miktigel ilan megelat di pendupiˈ. Miktigel dailan dema di kegelat nilan di gembagel sengkuˈ nilan. ⁸ Yamu pa pagid, subay mektigel amu di kelegenay niu dinig lumbang. Pepegenen niuig delendeman niu tu pekpedetengen niu, puˈ sungu na lumusad puliˈ su Kaunutan ta si Isukristu.

⁹ Mukaˈ Mingumpated, ndiˈ niu pegdenaˈayig duma niu, adun ndiˈ amu ukuman dun nu Megbebayaˈ. Pegdelendem niu puˈ mesempel na su mengukum, saˈitada sungu mateng, puˈ maˈniin dia na bisuangan. ¹⁰ Pegdelendem niu dadema su nga pimuunan nu Kaunutan mukaˈ pigwekilanen megukit taluˈen kanugdiin. Baal niu ilan lendasan di kektigel nilan di kelegenay nilan. ¹¹ Piningalan ta dinilan liliag, puˈ mikektigel ilan. Pegdelendem niu pagid si Job. Maˈantu dademai kektigel ni Job di kelegenayen. Deksuˈanen, pipianan gupia nu Kaunutan, puˈ su Kaunutan, melilelaaten tu sakupen mukaˈ gempetail gupia.

¹² Taman taluˈu diniu, Mingumpated, saˈ masad amu, ndiˈ mpia saˈ sumapa amu. Pia sembayan sug langit atawaka sug lupaˈ, ndiˈ amu sapa. Maˈantu saˈ mengakuˈ amu, pengekuˈen niu da, saˈ mengendiˈ, pengendiˈen niu da, adun ndiˈ amu ukuman dun nu Megbebayaˈ.

¹³ Saˈ duun diniui milegenan, subay menenabi tu Megbebayaˈ. Saˈ duun diniui gempiai ginaanen, subay penalanen su Megbebayaˈ dig bebat. ¹⁴ Duun ma diniui pegladu? Subay sebiinen su nga kaunutan di pikumpungan niu, adun penenebian nilan iin mukaˈ ududen nilan diniini maikaˈ lana. Puˈ saˈ penenebian nilan mukaˈ ududan nilan, naa mekpaingabang ilan tu Kaunutan ta si Isukristu. ¹⁵ Mukaˈ saˈ dunutan di kesalig ki kenenabi nilan, iini mauliˈan dun, puˈ peneguliˈan nu Kaunutan ta mukaˈ pedesunenen dadema su nga salaˈen. ¹⁶ Kaas saˈ duun diniui pegladu, subay peginukitay amu di salaˈ niu, mukaˈ diadia penenebianeni ngag dumanen, adun mauliˈan. Puˈ ki kenenabi nu mekesuun getaw, ginuungan, kaas gembageli sugda dun. ¹⁷ Pegdelendem niu deliˈ su sala ginepuˈay ta si Elias. Naa si Elias, getaw maˈniin dinita. Duuni gendaw pinenabinen gupia ndiˈ megdupiˈ. Genat itu, ndaˈ pegdupiˈ sampay telu taun buˈ ginengaˈ. ¹⁸ Pinenabinen dayun adun dumupiˈ pelum. Migdupiˈ gupia maˈniin mipukaˈ sug langit, binunaganen sug lupaˈ dupiˈ, puˈ mintubuˈ gupia su nga gininisan pimula dig lupaˈ.

¹⁹ Mukaˈ Mingumpated, saˈ duun diniui mikpetuud na tu Kaunutan ta si Isukristu, saˈ tekaw metalin di melaat, benaˈ duun dayunig duma niu megabang dun sampay mekepuliˈ ditu metuud, naa melengas. ²⁰ Puˈ pektalentenay niu ini, maˈantu adin su getaw ebanganen su mikesalaˈ adun megbiksuˈ mukaˈ meksikesuun, megawen da su ginaa nu mikesalaˈ, kaas ndiˈ matay di kepatay ndaˈ nai tamanen. Mukaˈ pepedesunenen su nga salaˈ nu mikesalaˈ, melaun salaˈi pedesunen.

Daal daitu. Santiago