¹ Diniu nga getaw mipemiliˈ sakup nu Megbebayaˈ,

Naan si Pedro, peneligan ni Isukristu, piwitan ku amu sulat kini, yamu nga minguliˈan tu ngag lain benwa, mipelak na tu nga prubinsya Ponto, Galacia, Capadocia, Asia, mukaˈ Bitinia. ² Puˈ puun tug daansamaˈ delendeman nu Gamaˈ ta Megbebayaˈ, pimiliˈ amu niin mpaas amu nug Balakat nu Megbebayaˈ. Iini mpaas amu dun, puˈ adun mbaal amu tantu piglegetawanen mukaˈ adun mekpetuud amu pagid dini Isukristu sampay maugasan amu nug duguˈen.

Naa, penenebiin ku tu Megbebayaˈ megiseg gusayi tulungen mukaˈ pianan ginaa mbianan niu.

³ Naa, mekpaladpalad ita ditu Megbebayaˈ, su pektemuyen nu Kaunutan ta si Isukristu mukaˈ su Gamaˈen dadema, puˈ su Megbebayaˈi migbegay dinita begu ketubuˈ pibian di kepetubuˈen puliˈ dini Isukristu miksekat di gembagel lelaaten. Bigayen dinita puˈ adun duuni pedetengen ta gembageli gatagen. ⁴ Pedetengen ta puˈ mpeduunan ita kepianan penenggiˈan duni pusakaˈ ginandamen tuˈu ditug langit, ki ndiˈ melapuk, ndiˈ melemuˈan mukaˈ ndiˈ mbeleng. ⁵ Yamuig bigayan dun, pegingaten amu nu Megbebayaˈ pibian di ginuungen sabaˈ nu kesalig niu, puˈ adun megawen amu. Saˈ sungu na melengkebig benwa, mbuasan na gupia ki kegawen dinita nu Megbebayaˈ.

⁶ Kaas, ki pedetengen niu kini, dedialay niu, pia pasiˈ maubaˈi ginaa niu nemun ndiˈ maiben, sabaˈ nu nga mbianan pa niu gininisan kengindan. ⁷ Iini pengindanan amu dun, adun peksimaˈen su kesalig niu, saˈ gempagen ba, saˈ gembabaw ba. Su kengindan di kesalig niu, maaˈ nu keksimaˈ dig bulawan, puˈ sug bulawan, saˈ peksimaˈen pebianen di gapuy adun mesuunan saˈ tantu, saˈ kanaˈen. Laak melagaˈ pa dig bulawani kesalig niu, puˈ sug bulawan, mpupus da. Yamu, saˈ mekebian amu di nga kengindan diniu, iinig deksuˈanen, penalan amu, megdedengeg amu mukaˈ pegbesaan amu, saˈ metuaˈ puliˈ dini si Isukristu. ⁸ Puˈ iin, pia ndaˈ niu siben maitaˈ, petailen niu. Pia ndiˈ na niu melabet, mituudan amu diniin. Kaas liliag amu dun gupia dig leliag ndaiˈ tamanen, ⁹ puˈ mekpalas tuˈui kesalig niu, saˈitada megawen amu.

¹⁰ Mendadi, ki nga getaw pimuunan nu Megbebayaˈ dengantu, pinemalan nilan penilungay ki keglegawen kini di getaw tu nga salaˈ, adun metukawan nilan sug bian nu Megbebayaˈ menggulaula dun. Pisuun nilan dayun tu nga getaw su ketulung diniu nu Megbebayaˈ nemun. ¹¹ Sigi nilan tukaway saˈ nanu mbuasay ki keglegawen mukaˈ kendutaˈi kebianen. Puˈ su nga kelegenay mbianan pa ni Kristu mukaˈ su kegdedengegen gupia dayun, pisuun pedaan dinilan nug Balakat ni Kristu mingapuˈ dinilan. ¹² Mibuasan dadema dinilan puˈ saˈ tinaluˈ nilan pedaan ki pisuun diniu nemun, kanaˈ gabang dinilan. Sinangkaliˈ pa tanan, iini miktaluˈ ilan dun pedaan, adun ebangan amu. Iin nai mektaluˈ dun diniu, su nga megukit Gempia Petenday, kig bigayan ginuung nug Balakat nu Megbebayaˈ pilusad dinilan nu Megbebayaˈ. Pia su nga sesuguˈen nu Megbebayaˈ getaw langit, mauyaˈan nilan gupia mesabut nilan su nga pisuun diniu nemun kini mekatag di kegawen ta.

¹³ Kaas sangkap na niuig delendeman niu, adun baalen niu su mauyaˈan nu Megbebayaˈ. Guut niu pa pagidig delendeman niu, sampay pepenggengeten niui pedetengen niu tu kepia diniu saˈ lumusad puliˈ si Isukristu. ¹⁴ Pekpetuud amu gupia tu Megbebayaˈ, mukaˈ ndiˈ niu begay su gayak niu meguit tug delendeman niu kinilawan, su gayak niu saˈ ndaˈ pa niu mesabut su metuud. ¹⁵ Segaga pegbetaden niu su ndaˈi melamug dun melaat di tibaˈan penggulaulaan niu, maaˈ da nu Megbebayaˈ, ndaˈi melamug dun melaat, su migenggat diniu sumakup diniin. ¹⁶ Puˈ ndaˈ ba mesulat di Misulat Taluˈ nu Megbebayaˈ, “Subay ndiˈ niu begay melamug di pigbetad niu ki melaaten, puˈ naan, ndaˈig betadu melaaten.”

¹⁷ Naa su Megbebayaˈ, kagina ingelanan niu iin Amaˈ saˈ menenabi amu tu niin, subay pegbesaan niu iin gupia sinegay niu megbebenwa pa dinig dibabaw lumbang. Puˈ gebii gendaw peglepengenen da ukumay su tibaˈan getaw mbantang tu gulaula nilan, puˈ ndaˈig lingken petailenen. ¹⁸ Keduaˈen, pegbesaay niu iin, puˈ misuunan niu saˈ likat amu niin di pigbetad niu ndaˈi gatagen pingumbilin diniu nu nga ginepuˈay, kanaˈ nu selapiˈ atawaka bulawani piglekat dun, puˈ kia, mpapas da. ¹⁹ Iin pasiˈi piglegawenen diniu, su melagaˈ duguˈ ni Kristu, sug binaal betang maaˈ nati karniru ndaˈi melaat dig lawasen. ²⁰ Puˈ su ndaˈ pa mbaali gekleb langit buˈ lupaˈ, daan na pigdelendem nu Megbebayaˈ si Kristu meglegawen dinita. Dayun nemun mibuasan na, adun mpianan amu. Mibuasan nemun kini, ki tampusan gebii buˈ gendaw kini. ²¹ Pebian dini Kristu mikpetuud namu ditu Megbebayaˈ, su mikpetubuˈ puliˈ dini Kristu mukaˈ pitaasen sampay ndaˈig lumabaw tug dengeganen. Kaas suminalig amu gupia tu Megbebayaˈ, mukaˈ pedetengen niu tuˈu puˈ penuudenen su nga pinasaden.

²² Naa, kagina dinunutan niu su metuud tituluˈan, miugasan namu di melaat pigbetad niu, kaas kanaˈ na duaˈduaˈig lelaat niu di nga samasakup niu. Maˈantu, subay gelaˈ niui ginaa niu di kekpinetailay niu. ²³ Puˈ migigetaw namu puliˈ pibian di taluˈ nu Megbebayaˈ, ki taluˈ ndaˈi kepupusen mukaˈ mekegbegay ketubuˈ. Kanaˈ namu bataˈ nu getaw gasalen matay, puˈ bataˈ namu nu ndiˈ matay. ²⁴ Maˈantu, ndaˈ ba mesulat di Misulat Taluˈ nu Megbebayaˈ,