2
Teliudani Melaat Betad
1 Kaas yamu, teliuday niuig launan dupangan niu, ndiˈ namu pegbalus, ndiˈ namu pektautau mekesuun, ndiˈ amu pengimbegu, sampay ndiˈ amu peglibak dig duma niu. 2 Sinangkaliˈ, maaˈ nu gembataˈ begu pegigetaw mauyaˈanen gupia dumuduˈ, gangut niu dun medengeg niu su taluˈ nu Megbebayaˈ, puˈ adun megisegi sinuunan niu di metuud mukaˈ megawen amu. 3 Puˈ ndaˈ ba mesulat di Misulat Taluˈ nu Megbebayaˈ, “Mibianan na niu sug lelaat nu Kaunutan.”
Pektemuyen su Tetubuˈ Batu
4 Pekpesempel amu di Kaunutan, su mektetubuˈ di ndaˈi tamanen. Iin, mpetanggiˈ dig batu pimilas sia nu getaw migbaal balay, puˈ ndaˈi gatagen daw. Iin sungkini mipemiliˈ nu Megbebayaˈ, puˈ gembagel gupiai gatagen. 5 Yamu dema, maaˈ damu nu tetubuˈ batu, kaas pekpetuud amu ditu Megbebayaˈ, adun mbaal amu niin balay diniwata, saˈitada ki pikumpungan nga sakupen. Megbelian amu dia da balay kia, pinaas nu Megbebayaˈ, adun pebian dini Isukristu pengilaken niu sug betang medawat nu Megbebayaˈ. Kig betang kiin, iin su kektamuy ta diniin. 6 Puˈ ndaˈ ba mesulat di Misulat Taluˈ nu Megbebayaˈ,
“Pektalentenay niu ini!
Duuni tinduˈu melagaˈ batu,
betangen ku diag benwa Sion baalen ku gentudan tug balay.
Adini getaw sumalig diniin, ndiˈ mekpelilu.”+\fr 2:6 \ft Kig batu pimilas nu getaw, guluganen si Isukristu, su pimilas nu nga getaw Judea, asa iini tinduˈ nu Megbebayaˈ tampusan metaas.
7 Kig batu kini, melagaˈ gupia diniu nga mikpetuud, laak mekatag tu nga ndaˈ pekpetuud dini Isukristu, ndaˈ ba mesulat di Taluˈ nu Megbebayaˈ,
“Kig batu pimilas nu nga megbaal balay, iini mibaal tampusan gempagen gintudan tug balay.”
8 Ndaˈ ba mesulat di sala sinulat di Misulat Taluˈ nu Megbebayaˈ,
“Meseknun nu nga getawig batu kini,
ki genduk mekepesulaub di getaw.”
Naa metuud. Duuni nga getaw, miseknun nilanig batu kia, puˈ ndaˈ mailan pekpetuud tu Gempia Petenday pimuun nu Megbebayaˈ. Kiai tinduˈan dinilan nu Megbebayaˈ.
9 Laak yamu pasiˈ, pimiliˈ amu nu Megbebayaˈ daniin bansa, ki ngag belian nu Tampusan Gadiˈ si Kristu, ki nasud pinaasen, ki nga tantu piglegetawanen. Tinduˈ amu niin megukit amu tu nga mekesalebuˈ penggulaulaan nu Megbebayaˈ. Inggat amu niin guaˈ di medelem, adun medelagan namu nu metuud. 10 Puˈ dengantu, kanaˈ amu sakup nu Megbebayaˈ, laak dagid nandaw, sakup namu niin. Dengantu, ndaˈ niu mbianay sug lelaaten. Nandaw, lilaatan namu niin.
Yamui nga Sesuguˈen nu Megbebayaˈ dinig Dibabaw Benwa
11 Naa, yamu nga petailen ku, penengiin ku diniu, kagina kanaˈ mamu dangen dinig lumbang kini, puˈ guliug da laak amu dini, naa ndiˈ niu begay su gayak niu kinilawan megbayaˈ di ginaa niu. Puˈ kia, megdaang lelayun dig delendeman niu, adun ndiˈ amu sia dumunut tu Megbebayaˈ. 12 Subay penemalan niu pegbetaday su melegdeng, adun pia pegdenaˈen amu nu nga ndaˈ pa pekpetuud, mailala nilan gusay puˈ gempiai pigbetad niu. Deksuˈanen ia, penalan nilan su Megbebayaˈ di gendaw lumusad puliˈ iin adun pengukumanen su tibaˈan getaw.
13 Maˈantu yamu, puun di kesakup niu tu Kaunutan, pekpetuud amu gusay tu ngag launan meglekaunutan dinig dibabaw benwa, tu tampusan gadiˈ si Cesar, puˈ ndaˈig labaw diniin, 14 mukaˈ tu nga gubirnadur, su nga pigwekilan nu gadiˈ kiin meksilut tu nga menggulaula melaat mukaˈ megenal tu nga menggulaula gempia. 15 Puˈ iini mauyaˈan nu Megbebayaˈ, pemaagen niu su nga medupang getaw di keglekuti nilan diniu. Mpemaag ilan saˈ maitaˈ nilan su mekesuun pigbetad niu. 16 Kagina biluy namu nu Megbebayaˈ di melaat gulaula niu, subay mektetubuˈ amu di ndaˈidunig lain mekegbayaˈ diniu. Laak dagid su kebeluy niu di salaˈ niu, ndiˈ niu baalay sikaw niu megdupang amu, puˈ sesuguˈen amu nu Megbebayaˈ. 17 Pegbesaay niu sug launan getaw, petail niu su nga samasakup niu, penemalay niu pegbesaay su Megbebayaˈ, mukaˈ pegbesaay niu dadema su tampusan gadiˈ.
Lendasan ta ki Kelegenay ni Kristu
18 Naa, yamu nu nga sesuguˈen, subay mekpetuud amu tu gegalen niu mukaˈ pepenggengeten niui kegbasa niu dinilan. Kanaˈ mpia pegbesaan laak su nga melilelaaten mukaˈ mesumayaˈ gegalen niu, subay su nga mekpeleget dadema diniu. 19 Deksuˈanen ia, pepianan amu nu Megbebayaˈ, saˈ metau amu mektigel di kegleget diniu kanaˈ niu tinibabaˈ. Pektigelen niu su kegleget diniu, puˈ pegdelendem niu su mauyaˈan nu Megbebayaˈ. 20 Puˈ gempia bamu enalen saˈ pektigelen niu laaki kelaneg diniu di tinibabaˈ niu, puˈ sabaˈ nu salaˈ niu? Ndiˈ lai. Laak saˈ pektigelen niu su nga kelaneg diniu nu nga gegalen niu, pia melengas pasiˈi penggulaulaan niu, naa kiin, pepianan amu dun nu Megbebayaˈ. 21 Tinduˈ amu nu Megbebayaˈ mektigel di kegleget diniu pia melengas dai penggulaulaan niu. Puˈ si Kristu, milegenan gumantiˈ ma diniu mukaˈ mingumbilin diniu lendasan, adun penunggilingan niu iin. 22 Iin, ndaˈ mainsan pekesalaˈ, ndaˈ dadema mainsan pegbalus. 23 Benaˈ piksudiˈan nu nga getaw, ndaˈen ilan suliˈay peksudiˈay. Benaˈ piglegetan nu nga getaw, ndaˈen ilan suliˈay pengetuay, segaga pisaligen su mpenggulaulanen tu Megbebayaˈ, su ndiˈ meksulamig saˈ mengukum. 24 Laak dagid si Kristu, piglegetan iin nu Megbebayaˈ sabaˈ nu nga salaˈ ta. Su nga salaˈ ta, iwiten ditu kurus pidumanen tug lawasen, adun mpemilang taig lawas ta minatay na, ndaˈ naig labeten tu salaˈ. Sinangkaliˈ pa tanan mektetubuˈ naita di kekesuun. Puun tu gangelen, miuliˈan namu. 25 Dengantu maˈniin amu nu petubuˈen paingalan dun karniru midalaˈ. Laak dagid nandaw minuliˈ namu di Megingat Karniru, puˈ iini megingat gupia diniu.