¹ Naa maˈantu dadema, yamu nu ngag libun, diadia subay petuudenen ki sawanen, adun su ngag laki ndaˈ pa pekpetuud tu taluˈ nu Megbebayaˈ, magak ilan mekpetuud dini Kristu pebian di melengas betad niu. Saˈ maˈnia, ndiˈ na niu kambat ilan ukitay mekatag di Gempia Petenday, ² puˈ mesimet ma nilan di pegbetaden niu ndaˈi melamug dun melaat mukaˈ tu kegbasa niu tu Megbebayaˈ. ³ Ndiˈ niu mpia pemilangay lengasan niu su gininisan kegimakay niu, su kenlenuˈlenuˈ niu dig buuk niu mukaˈ su keseluk niu pekayan binaal bulawan. ⁴ Iin sungkini gempia niu baalen lengasan niu sug delendeman niu, lengasan ndiˈ mpalin, maitaˈ dig betad mesumayaˈ mukaˈ ndiˈ mesasak. Kia, melagaˈ gupia di pegitaˈen nu Megbebayaˈ. ⁵ Maˈniin dema sug betad nu nga gembasa libun dengantu binaal nilan lengasan nilan. Suminalig ilan tu Megbebayaˈ, mukaˈ iini binaal nilan pekayan nilan, su kekpetuud nilan tu sawa nilan. ⁶ Maˈniini pigbetad ni Sara, puˈ iin, mikpetuud dini Abraham, sampay piningalanen dun gegalenen. Yamu nemun, mbaluy namu ngag bataˈ ni Sara, saˈ penggulaulaan niui kekesuun, mukaˈ ndaˈi gendekan niu, pia maikaˈ.

⁷ Mukaˈ yamu dema nu ngag laki, mituˈusan niu puˈ su ngag libun, melukaˈ pa dun diniu, kaas su kesenlangan niu, subay pegbesaanen su sawanen. Keduaˈen, mpeduma diniu su ngag libun begayan nu Megbebayaˈ ketubuˈ ndaˈi tamanen puun tu tulungen. Pegbesaan niu dailan dema, adun ndaˈi mekebelabag di kenenabi niu ditu Megbebayaˈ.

⁸ Naa, duun pai tituluˈu diniu, launan niu. Subay meksalabuuk amu dig delendeman niu sampay di ginaa niu. Pekpinetailay amu, puˈ lepeng mekpated namu. Peglinelaatay damu dema sampay diadia pebebaˈeneni ginaanen dig dumanen. ⁹ Su mekpelaat diniu, ndiˈ niu suliˈay melaat. Su mektampalaksa diniu, ndiˈ niu suliˈay tampalaksaay. Tumuˈ pa suliˈay niu gempia, puˈ iini ginggat amu dun nu Megbebayaˈ, puˈ adun pepianan niu su nga samataw niu, mukaˈ begayan pamu dema niin kepia. ¹⁰ Ndaˈ ba mesulat di Misulat Taluˈ nu Megbebayaˈ maˈniniˈ,

¹³ Naa maˈantu, saˈ menamal amu menggulaula melengas, ndaˈi getaw mekpelaat diniu. ¹⁴ Laak dagid pia pelegetan amu puun di kenggulaula niu mekesuun, leliagen damu. Ndiˈ amu mendek di getaw, ndiˈ amu dema melibuleng. ¹⁵ Sinangkaliˈ pa tanan, pegbesaay niu gusay si Kristu di ginaa niu buˈ delendeman niu, iin dai Kaunutan. Subay pegandam amu lelayun sumbag di getaw sumaak diniu saˈ taˈ mai suminalig amu dun tu Megbebayaˈ. ¹⁶ Laak subay pengmayaˈmayaˈ niu sembagay su samataw niu mukaˈ pegbesaan niu ilan. Pia taˈ alanduni penggulaulaan niu, baal niu di gempia delendeman, adun saˈ duuni getaw peksudiˈanen su gempia pegbetaden niu miksekat di keksalabuuk niu dini Kristu, mpiid dayun di kesudiˈen. ¹⁷ Puˈ saˈ upama iini mauyaˈan nu Megbebayaˈ mbianan niui peleget, tumuˈ pa pelegetan amu meksekat di kenggulaula niu di melengas, sabayaˈ nu kenggulaula niu melaat.

¹⁸ Puˈ si Kristu, minatay mainsan sabaˈ nu nga salaˈ ta, ndiˈ na kambat puliˈan. Minatay su mekesuun gumantiˈ di nga kanaˈ mekesuun, adun meksud ita tu Megbebayaˈ. Pinatay nu getaw sug lawasen, laak su gimuuden, ndaˈ patay. ¹⁹ Linaawan dayun nu gimuuden su nga gimuud mipikutan na, puˈ migwali dinilan. ²⁰ Ki nga gimuud kia, gimuud nu nga mimilas tu Megbebayaˈ ditu gendawan pa ni Noe dengantu. Pia miktigel su Megbebayaˈ dinilan saananen megelat di kegbiksuˈ nilan sia, mimilas ilan gupia sinegay pegbaalen ni Noe su gembagel sekayan. Sug walu tawan mikesakay tug butuk, migawen ilan di tubig. ²¹ Ki tubig kia, maˈantui tubig mbunag dinita, puˈ megawen naita miksekat di kebunag dinita pebian di ketubuˈ puliˈ ni Kristu. Naa, ki kebunag kia tubig, kanaˈ pegugas dig luud nug lawas ta, segaga iin sungkini kekpaingabang ta tu Megbebayaˈ, adun tetubuˈ daita di gempia delendeman ta. ²² Puˈ si Kristu, miditug langit sampay ditu gupid nu Megbebayaˈ dapit lintu, tandaˈ megbayaˈ tug lumaun sesuguˈen nu Megbebayaˈ getaw langit, mukaˈ tu ngag launan duma megbayaˈ, sampay tu tibaˈan meglekaunutan di nga ndiˈ maitaˈ.