¹ देखा बाप नि आमना संगे कसा प्रेम करेल शे, कि आमी देव ना पोर म्हनावूत, आणि आमी शेतस बी: एनामुळे संसार आमले नई वयखत नई, कारण कि तेनी तेले बी नई वयख | ² प्रियसहोण, आते आमी देव ना पोर शेतस, आणि आते लागून हय प्रगट नई हुयन, कि आमी काय होसुत! ईतलच माहिती शे, कि जव तो प्रगट हुईन त आमी बी तेना सारखा होसुत, कारण कि तेले तसाच देखसुत जसा तो शे | ³ आणि जो कोणी तेना वर हय आशा ठेवस, तो स्वता ले तसाच पवित्र करस, जसा तो पवित्र शे | ⁴ जो कोणी पाप करस, तो व्यवस्था ना विरोध करस; आणि पाप त व्यवस्था ना विरोध शे | ⁵ आणि तुमले माहिती शे, कि तो एनासाठे प्रगट हुईना, कि पापस्ले हरण करी लेवो; आणि तेना स्वभाव मा पाप नई | ⁶ जो कोणी तेना मा सदा राहास, तो पाप नई करत: जो कोणी पाप करस, तेनी नई त तेले देखेल शे, आणि नईत तेले वयखेल शे | ⁷ ओ पोरसहोण, कोणाच बयकाळा मा नका एयज्यात; जो धर्म ना काम करस, तोच तेना सारखा धर्मी शे | ⁸ जो कोणी पाप करस, तो सैतान कळून श, कारण कि सैतान सुरुवात पासून पाप करत एयेल शे: देव ना पुत्र एनासाठे प्रगट हुईना, कि सैतान ना कामस्ले नाश करो | ⁹ जो कोणी देव पासून जल्मेल शे तो पाप नई करत; कारण कि तेना बीज तेना मा राहास: आणि तो पाप करी नई सकत, कारण कि देव पासून जल्मेल शे | ¹⁰ एनासाठे देव ना पोर, आणि सैतान ना पोर समजा मा येतस; जो कोणी धर्म ना काम नई करत, तो देव पासून नई, आणि नई त तो, जो आपला भावू संगे प्रेम नई ठेवस | ¹¹ कारण कि जो संदेश तुमी सुरुवात पासून आयका, तो हवू शे, कि आमी एक दुसरा संगे बैर ठेवोत ¹² आणि काईन सारखा नका बना, जो त्या दृष्ट पासून होता, आणि जेनी आपला भावू ले मारी टाकेल होता: आणि तेले कसा साठे मार? ह्या साठे कि तेना काम वाईट होतात, आणि तेना भावू ना काम धर्म ना होतात|| ¹³ ओ जवान कदी संसार तुमना वर बैर करत हुईन त आश्चर्य नका करज्यात | ¹⁴ आमले माहिती शे, कि आमी मोत ले पार हुईसन जीवन मा पौचेल शेतस; कारण कि आमी भावूस संगे प्रेम ठेवतस,: जो प्रेम नई ठेवस, जो मोत नि दशा मा राहास | ¹⁵ जो कोणी आपला भावू संगे बैर ठेवस, जो हत्यार शे; आणि तुमले माहिती शे, कि कोणताच हत्यारा मा कायम ना जीवन नई राहास | ¹⁶ आमी प्रेम ले एनाच कन वयख, कि तेनी आमना साठे आपला जीव दिटाका; आणि आमले बी भावूस साठे जीव देवाले पाहिजे | ¹⁷ पण जेना कोण कळे संसार नि संपत्ती शे आणि तो आपला भावू ले गरीब देखीसन तेना वर दया नई करान देखत, त तेना मा देव ना प्रेम कसा काय राईन? ¹⁸ ओ पोरसहोण, आमी वचन आणि जीपच कन नई, पण काम आणि सत्य ना व्दारे बी प्रेम करोत | ¹⁹ एनाच कन आमी समजसुत, कि आमी सत्य ना शेतस; आणि ज्या गोष्ट मा आमना मन आमले दोष दिन, त्या विषय मा आमी तेना समोर आपला आपला मन ले धाळस दि सकसुत | ²⁰ कारण कि देव आमना मन पासून मोठा शे; आणि सगळ काही माहिती शे | ²¹ ओ प्रियसहोण, कदी आमना मन आमले दोष नई देत, त आमले देव समोर धीर राहास | ²² आणि जे काही आमी मांगतस, ते आमले तेना पासून भेटस; कारण कि आमी तेनी आदन्यास्ले मानतस; आणि जे तेले आवळस तेच करतस | ²³ आणि तेनी आदन्या हय शे कि अमी तेना पुत्र येशू ख्रिस्त ना नाव वर विश्वास करोत आणि जस तेनी आमले आदन्या दीयेल शे त्याच प्रमाणे आपसा मा प्रेम ठेवोत | ²⁴ आखोत जो तेनी आदन्यास्ले मानस, तो एनामा, आणि हवू तेनामा सदा राहास: आणि एनाच कन, म्हणजे- त्या आत्मा कन जो तेनी आमले दियेल शे, आमले माहिती शे, कि तो आमना मा सदा राहास ||