11 “Múfuunyiliilwe ngana avaanu vakuvaliga, vakuvapumusa nu kuvalonga wuviifu mu wudesi wiimila wa neene. 12 Mukeelage nu kuheeya, pakuva uNguluvi ávaviikiye uluwonolo lwenyo lukomi kukyanya. Pakuva avavidzi navo avavalonguwe unyeenye ndeeni kye vaapumwiswe.

13 “Unyeenye gwe muunyo ku vaanu va nyi. Neke kangi umuunyo ngana gúhuukile, gwisopwa kiki, ukuta gunoge kangi? Umuunyo ndawuli ugo gungaya malimo, apo gwivagila ukutaagwa kwivala gulivatwage na vaanu.

14 “Unyeenye lwe lumuli ku vaanu va mwe naanyi. Uwudzenge úwudzengiilwe pakyanya pa kidunda, wiilemwa ukufihwa. 15 Kangi avaanu vasiikunga itala neke vagubikile ni ndiilo, nda haamu, vakuyiviika pa kinenevekelo, ukuta yivamulikage vonda avali mu nyumba. 16 Ndeeni nu lumuli lwenyo, luvamulikage avaanu ukuta vagiwonage imigendele gyenyo minofu, ukuta vamupeelage indolo uDadiinyo ye ali kukyanya.

17 “Mutanage ukuhoodza ukutigila, ndaadzile mu kuhedza imilagililwe gya Mose,^g enewuli idzaasimbiilwe na vavidzi. Lolage, sindaadzile mu kuhedza, nda haamu, ndaadzile mu kukwilidza dzonda idzo idzaasimbiilwe. 18 Ndakyene ndikuvalongela ndiitigila, ukufikila ikyanya ni nyi pe fiiyagaanika, sikookali nambe kadelemusi kamwinga akadebe ka milagililwe akalaayagaanika, ukufikila fyonda ifili mu milagililwe pe fíkwiliye. 19 Umuunu ye avedzaga ye iidzumba nambe lulagi lumwinga mu ndebe idzi, nu kuvawulanidza avangi, ukuta navo vadzumbe, uyo ahadza iitambulwa mudebe hiilo ku wutwa wa kukyanya. Neke kangi ye iigendela indagi idzo nu kuvawulanidza avangi ukudzigendela, ahadza iitambulwa mukomi ku wutwa wa kukyanya. 20 Lwe lwene ndikuvalongela unyeenye ukutigila, ngana amalimo geenyo ga wugolofu gasiilutila pa ago ga Vafwalisayo na vawulanidzi va milagililwe, apo musiliingila nambi ku wutwa wa kukyanya.

21 “Múpuliike ukutigila, avanyakataali vaalongeliilwe ululagi ulwitigila, ‘Utanage ukukoma,’^h apo umuunu ye avedzaga ye akumukoma umuyagwe, iivagila ukuhigwa. 22 Neke kangi uneene ndikuvalongela ndiitigila, umuunu ye avedzaga ye akumuviipila umuyagwe, ahigwage. Kangi umuunu ye avedzaga ye akumuliga umuyagwe iitigila, ‘Uveeve munya madzimu,’ iivagila ahigwage ni kiwungu. Kangi umuunu ye avedzaga ye akumukemeela umuyagwe iitigila, ‘Ve mupuvaave,’ iivagila uluhigo lwa kutoodzwa ku mooto ugusiidzima mbeepali!ⁱ

23 “Wiimila wa idzo, ngana wiitawula uwusembe kwa Nguluvi pa kiteekelelo mu tembeli, neke kangi wiiwuke ukutigila, umuyago ali ni nongwa naave, 24 uwuleke uwusembe uwo baaho pa kiteekelelo. Uhelele tandi ukiiteepule nu muyago uyo, neke upiluke utawule uwusembe waako uwo.

25 “Kangi ngana kuli muunu ye akukutaaha ku kiwungu, waangupe ukwiteepula nave pe uli mu ngʼaasi. Ngana usilimile ewo, ahadza akukusindika kwa muhidzi, nave akukusindika kwa muvina va vakolokolooni, uyo ahadza akukusopa mu ndinde. 26 Ndakyene ndikuvalongela ndiitigila, usilaahuma umo ukufikila pe wiivedza úhombile fyonda fye wiidzigilwa!

27 “Múpuliike ululagi ulwitigila, ‘Utanage ukudumula uwutoolane.’^j 28 Neke kangi uneene ndikuvalongela ndiitigila, umuunu ye avedzaga ye akumulola umwayuuva pa kumudoboka, iivedza ádumuwe uwutoolane nave mu numbula yaakwe. 29 Ngana iliiho lyako likukuhulila ulime indzanangifu, ulikopole nu kulitaaga. Kiba ukayadze akapagwa ka muvili kamwinga mu muvili gwako, kileka umuvili gwako gonda gukatoodzwe ku mooto ugusiidzima mbeepali. 30 Kangi ngana iliwoko lyako likukuhulila ulime indzanangifu, apo ulidumule nu kulitaaga. Kiba ukayadze akapagwa ka muvili kamwinga mu muvili gwako, kileka umuvili gwako gonda gukatoodzwe ku mooto ugusiidzima mbeepali.

31 “Kangi múpuliike ululagi ulwitigila, ‘Umugoosi ye avedzaga ye akumugotola umudala vaakwe, amupeelage ihaate ya kumugotola.’^k 32 Neke kangi uneene ndikuvalongela ndiitigila, ye avedzaga ye akumugotola umudala vaakwe pe asimwibiite mu wudumuli-noolane, akumuhambusa umudala vaakwe ukuvedza mudumuli-noolane. Kangi ye avedzaga ye akumutoola umudala umugotole, umugoosi uyo nave iivedza mudumuli-noolane.

33 “Kangi múpuliike ukutigila, avanyakataali vaalongeliilwe ululagi ulwitigila, ‘Utanage ukuyiiga wudesi, neke kangi ukwilidzage uluyiigo lwako lwe úyiigile kwa Mutwa Nguluvi.’^l 34 Neke kangi uneene ndikuvalongela ndiitigila, utanage ukuyiiga nambe padebe. Pe wiiyiiga, utanage ukutambula kukyanya, pakuva kukyanya uko, kye kideego kya wutwa kya Nguluvi. 35 Pe wiiyiiga, utanage ukutambula inyi, pakuva inyi, pe peene pe iiviika uNguluvi amagulu gaakwe.^m Pe wiiyiiga, utanage ukutambula uwudzenge wa Yelusalemu, pakuva uwudzenge uwo, wa Mutwa Mukomi.ⁿ 36 Kangi mutanage ukuyiigila imituwe gyenyo, pakuva mwilemwa ukuhambusa nambe lufwili lumwinga mu fwili dzeenyo ukuvedza mbalafu, enewuli niitu. 37 Lino, ngana mwikwidikila, mutigilage, ‘Eena,’ enewuli ngana mwikaana, mutigilage, ‘Nambi.’ Ngana mwikoongeledza madzwi agangi, ago giihuma kwa Setano.

38 “Kangi múpuliike ukutigila, avanyakataali vaalongeliilwe ukutigila, ‘Liiho pa liiho, ni liino pa liino.’^o 39 Neke kangi uneene ndikuvalongela ndiitigila, utanage ukumulumbila mukole umuunu ye akukulimila imbiifu. Nda haamu, umuunu ye akukudzagula uludzeedze ulwa kundiyo, umupituhidzage nu lwa kungʼigi. 40 Kangi, ngana umuunu iisaka uhigwe, ukuta anyamule igwanda yaako, umulekelage ni likoote lyako. 41 Kangi, ngana umuunu akukugagiilidza ukunyamula ikitegulo kyakwe^p ukufikila ulugendo lwa kivalilo kimwinga, ugendage ni kitegulo ikyo fivalilo fivili. 42 Kangi, ngana umuunu akukunyilika kiinu, umupeelage. Ngana umuunu iisaka ukwadzimya ukuhuma ukwako, utanage ukumukaanila.

43 “Kangi múpuliike ukutigila, avanyakataali vaalongeliilwe ululagi ulwitigila, ‘Umwendage umuyago,’^q na vaanu viilonga ukutigila, ‘Umusuulage umunya wukava vaako.’ 44 Neke kangi uneene ndikuvalongela ndiitigila, muveendage avanya wukava veenyo, nu kuvalapangilila kwa Nguluvi vonda avakuvapumusa, 45 ukuta muvedzage vaana va Dadiinyo ye ali kukyanya. Umwene akuvavalihidza ilidzuwa avaanu vonda, avagolofu na vahosi. Kangi iitoonyehedza indoonya ku vaanu avagolofu na vahosi. 46 Ngana mukuveenda avo avakuveenda unyeenye swe, mulaanukila uluwonolo luki? Na vahaki-pembe^r vasiilima ndeeni? 47 Ngana mukwihungila ye mwídzeeliye ngʼaani, mwilima kiki íkilutiye ku vangi? Ongo, avaanu avasikumufuuwa uNguluvi navo vasiilima ndeeni? 48 Lino muvedzage vakwilifu, ndawuli uDadiinyo ye ali kukyanya kye mukwilifu.