6 Avawulanidzi va milagililwe avangi aviikalile baaho, viidzumaga vakwiwuudzaga mu numbula viitigilaga, 7 “Kye kiki uyu akumulonga fivi uNguluvi? Ye iiwodza indzanangifu yumwinga swe, ye Nguluvi!” 8 UYesu aaviye álufikile lwe vakwingʼulandza, iitigilaga, “Kye kiki mwihoodza ewo mu numbula dzeenyo? 9 Luli kwi ulupeefu, ukumulongela umunya liteela ukutigila, ‘Úwodziidzwe indzanangifu dzaako,’ enewuli, ‘Wiime, utegule iliteefu lyako, ugendage’? 10 Neke kangi muludzeelage ukutigila, uMuswamuve va Muunu^a ali nu wutawulilwe wa kuwodza indzanangifu mu nyi umu.” Neke amulongelage umunya liteela atigilage, 11 “Wiime! Tegule iliteefu lyako, uhelelage ku kaaya yaako.” 12 Umutamwa uyo iikwimaga, iitegulaga iliteefu lyakwe, iihegaga pa miiho ga vonda. Avaanu avaalundiine apo viidzumaga hiilo, vakumupeelaga indolo uNguluvi viitigila, “Imola ngita idzi tusinaa tulolaga apoono!”

13 UYesu aaheliye kangi ku ngʼumbungʼumbu ya nyandza ya Galilaya. Ililugu lya vaanu likumuhelelelaga, neke awulanidzage. 14 Pambele pe iihelela pawutalo, akumuwonaga uLevi^b umuswamuve va Alufwayo, íikalile pe aailundahidzila ipembe.^c Iitigilaga, “Uuniniilage.” Neke baaho uLevi iimage, amuniniilage. 15 UYesu iikalile ku nyumba ya Levi iiliilasa ifiliyo na vahaki-pembe voloofu, avanya ndzanangifu na vanyigendwa vaakwe, pakuva avaanu voloofu ngita avo vamuniniilaga. 16 Avawulanidzi va milagililwe avangi va kiwungu kya Vafwalisayo,^d pe vamuweene uYesu iiliilasa na vahaki-pembe na vahosi, vakuvawuudzaga avanyigendwa vaakwe viitigilaga, “Kye kiki iiliilasa na vanya ndzanangifu na vahaki-pembe?” 17 UYesu pe aapuliike idzo, akuvalongelaga iitigilaga, “Avasiivawa umuvili vasiisakula ukuhelela kwa muyavi-migoda, nda haamu, va vatamwa swe. Luli ewo, sindaadzile mu kuvakemeela avakwiwona vagolofu, nda haamu, avo avakwiwona vanya ndzanangifu, ukuta vamupitukile uNguluvi.”

18 Avanyigendwa va Yohana uMudzabisi na Vafwalisayo viiviikilaga ngʼaani.^e Avaanu avangi viihelelaga kumuwuudza uYesu viitigilaga, “Kye kiki avanyigendwa va Yohana na Vafwalisayo vakwiviikila ngʼaani, kuno avanyigendwa vaako viiliya?” 19 UYesu iipilusaga iitigilaga, “Ávalaaliikwe nu mutoodzi ku noolane vakwiviikila ngʼaani wuli pe vali pamwinga nu mutoodzi?^f 20 Neke kangi gulaadza umusika gwe alaahedzwa umutoodzi, apo pe peene pe valiiviikila ngʼaani. 21 Sikwali umuunu ngana ali nu mwenda umulovela úgudeemwike, ye iipabika ikipabiko ikipiya mu mwenda ugo. Ngana alime ewo, ikipabiko ikyo kihadza kiideemula umwenda ugo, nago guhadza gwideemuka hiilo ukulutila pa kutala. 22 Sikwali umuunu ye iisopa idifwayi^g imiya mu bogolo idza ngwembe indovela. Ngana vasope, ibogolo dziipwefuka, idifwayi yiikwitika, ibogolo nadzo dziikwanangika. Nda haamu, avaanu vaavisopa idifwayi imiya mu bogolo imiya.”^h

23 Ikigono kimwinga kya Sabato, uYesu na vanyigendwa vaakwe vaahelanidzaga mu migunda gya ngana. Avanyigendwa vaagendaga viipulula inyoodzo dza ngana.ⁱ 24 AVafwalisayo pe vaaweene avanyigendwa viipulula ingana viidzumaga hiilo, neke vamulongelage uYesu vatigilage, “Lolage! Kye kiki avanyigendwa vaako viilima amalimo mu kigono ikya Sabato ululi mwiko mu milagililwe gya Mose?”^j 25 UYesu akuvahigaga iitigilaga, “Ongo, musinaa mwimba kye aalimile uDawudi pe aali nu musale pamwinga na vayagwe? 26 UDawudi iingiye mu nyumba ya Nguluvi,^k pakataali mu figono fya muteekedzi umuvina^l uAbyatali, neke aliyage imikaate imiimike nu kuvapeela avayagwe. Imikaate igyo viidikwaga ukuliya avateekedzi swe!”^m 27 Kangi uYesu akuvalongelaga iitigilaga, “ISabato yaaviikiilwe wiimila wa vaanu, avaanu si wiimila wa Sabato. 28 Apo uMuswamuve va Muunu ye Mutwa va Sabato.”