UYesu iinaniya mu kigono ikya Sabato
3
1 UYesu iingiye kangi mu luholanilo, nayu mwadaada umunya liwoko ilinya liteela aali muumo. 2 Pakuva kyali kigono ikya Sabato, aVafwalisayo vamuvandaga uYesu ukuta valole ngana akumunaniya. Vaalimile ulo, pakuva vaatemulaga uwiimilo wa kumutaaha. 3 UYesu akumulongelaga umutamwa uyo iitigilaga, “Waadze, wiime pawutalo apa.” 4 Akuvawuudzaga aVafwalisayo avo iitigilaga, “Lwe luli kwi ulwikwidikwa ukulima ulunofu enewuli ukulima uluviifu, ukupoka uwuumi enewuli ukukoma pa kigono ikya Sabato?” Vasaahigile kiinu. 5 Neke uYesu alolage imbali dzonda ni ligooga, ahuguvalage wiimila wa numbula dzaawo ngʼiliitafu. Neke amulongelage umunya liteela atigilage, “Golose iliwoko lyako.” Iigolosaga iliwoko lyakwe, liiponaga. 6 Baaho aVafwalisayo viihumaga kwivala, viilonganaga na Vahelodea ulwa ngʼaasi iya kumukomela uYesu.Ililugu likumuniniila uYesu
7 UYesu na vanyigendwa vaakwe vaahegile apo, viihelelaga ku ngʼumbungʼumbu ya nyandza, ililugu likomi lya vaanu ukuhuma ku Galilaya likumuhelelelaga. 8 Avaanu vonda avo pe vaapuliike idza filole ifikomi fye álimile uYesu, vakumuhelelelaga ukuhuma ku Yelusalemu, ku Yudeya, ku Idumaya, ku Tilo na ku Sidoni,b na mu mwambu ya Yolodani. 9 Ililugu pe lyaginaga, uYesu akuvalongelaga avanyigendwa vaakwe ukutigila, vagelanidze uwaato uwudebe avedze pataali ngana ililugu likumubaniilidza. 10 Pakuva avananiidze voloofu, avatamwa viisuungʼilidzaga, ukuta vamupamye. 11 Avaanu vonda avaali ni mibepo imiviifu pe vamuweene uYesu, viiguwaga pa magulu gaakwe, viikoolaga viitigila, “Uveeve uli Muswamuve va Nguluvi!” 12 Neke uYesu agikaanidzage ukutigila gitane ukulonga ku vangi imola dzaakwe.
Avatume vanyikyumi na vavili viihaagulwa
13 UYesu iinwike ku kidunda, akuvakemeelaga ve avasakaga, neke vahegelelage ukwakwe. 14 Akuvahaagulaga avaanu vanyikyumi na vavili (12) akuvapeelaga ilitaawa vatume,c ukuta vavedzasage nu mwene, ukuta avatume kudalika. 15 Kangi akuvapeelaga uwutawulilwe uwa kulosa imibepo imiviifu. 16 Avanyikyumi na vavili avo ve avahaaguwe ve ava: uSimoni ye aapeeliilwe nu Yesu ilitaawa ilingi Petulo, 17 uYakobo nu Yohana avaswamuve va Sebedayo ve avapeeliye ilitaawa Bowanege, kwe kutigila Vaana va Libalamusi, 18 uAndeleya, uFilipo, uBatolomayo, uMatayo, uTomasi, uYakobo umuswamuve va Alufwayo, uTadayo, uSimoni uMukananayo,d 19 nu Yuda Isikalyote,e ye mwene pambele ye amusutuwe uYesu.
UYesu nu Belisebuli
20 Neke uYesu iingilage mu nyumba. Ililugu likomi liilundanaga, uYesu na vanyigendwa vaakwe viilemwaga nambe kuliya ifiliyo. 21 Avanyalukolo vaakwe pe vaaviye vápuliike imola idzo, viihegaga viihelelaga kumunyamula, pakuva vaatigiye iivedza águlwike lukwale. 22 Avawulanidzi va milagililwe avaahumile ku Yelusalemu viitigilaga, “Mwene uyu ali nave uBelisebuli,f umuvina va mibepo imiviifu. Mu ngufu dza uyo iilosehedza imibepo imiviifu.” 23 Neke uYesu avakemeelage avalongelage mu fihwananidzo atigilage, “USetano akwidaga wuli yumwene? 24 Ngana uwutwa wiitilange weene, apo uwutwa uwo siwiima. 25 Kangi avaanu va nyumba yimwinga pe víigalukiye, apo inyumba iyo siyiima. 26 Ngana uSetano iitilange yumwene, uwutwa uwo siwiima, wiivedza we wudugilo waakwe.
27 “Ulwa ndakyene lwe ulu, umuunu ye iikwingila mu nyumba ya muunu umunya ngufu, asiisweketula ifiinu fya nyumba ya muunu uyo kitatala amupinge tandi, neke pe asweketule ifiinu fyakwe.
28 “Ndakyene ndikuvalongela ndiitigila, avaanu vahadza viiwodzwa indzanangifu nu wulonga fivi wonda, 29 neke kangi umuunu ye akumulonga fivi uMubepo uMwimike, uyo asilaawodzwa mbeepali, pakuva ali ni ndzanangifu iya mbeepali.” 30 Aalongile ulo, pakuva vaatigilaga, “Ali nu mubepo umuviifu.”
Avanyalukolo va ndakyene va Yesu
31 Neke ungʼina na vanyalukolo vaakwe vafikage pe aawulanidzaga uYesu, viimage piivala, vamutumage umuunu amukemeele uYesu. 32 Ililugu lya vaanu liikalile límupiliime uYesu likumupulikidza, avaanu vakumulongelaga viitigilaga, “Lolage, uyuuwo na vanyalukolo vaako vali piivala, vakukutemula.” 33 UYesu iihigaga iitigilaga, “Uyuuva na vanyalukolo vangu ve va ani?” 34 Kangi iilolaga imbali dzonda ku vaanu avamupiliime iitigilaga, “Ava ye yuuva na vanyalukolo vangu. 35 Umuunu ye iilima dze iikeela uNguluvi, uyo iivedza ye munungʼu-vangu, ye muhaadza-vangu, kangi ye yuuva.”