4 Neke kangi uYuda Isikalyote, yumwinga va vanyigendwa va Yesu, ye ahadza akumusutula uYesu pambele, atigilage, 5 “Kye kiki amafuta matalamu ago gasigudziidzwe idinaali^a magana gadatu (300), neke amagoobeli ago vapeelwe avahangala?” 6 UYuda asaalongaga ewo wiimila wa kuvasungukila avahangala, nda haamu, pakuva aali muhiidzi. Uyo ye mwene ye aakoleelaga ibogolo ya magoobeli. Aahiidzaga amagoobeli agaasopwaga umo. 7 UYesu akumuhigaga uYuda iitigilaga, “Mumuleke, áviikile amafuta matalamu ago ukufikila lino, ukuta agugelanidze umuvili gwangu pa kigono ikya kusiilwa kwangu. 8 Avahangala muli navo ifigono fyonda, neke kangi uneene musili naane ifigono fyonda.”

9 Suwe ililugu likomi lya Vayahudi lyadzeeliye ukutigila umwene ali uko, nalyo liikwadzaga, si wiimila wa Yesu hela, nda haamu, nu kumuwona uLasalo nave, ye ádzulubwiswe nu Yesu ukuhuma ku wulungu. 10 Neke kangi avateekedzi avakomi vasakulage ulukaani lwa kumukomela uLasalo nave, 11 pakuva aVayahudi voloofu vavalekile avalongodzi vaawo wiimila wa mola ya kudzulubuswa kwa Lasalo, vakumufuuwaga uYesu.

12 Ikigono ikyafudiike, ililugu likomi lya vaanu lyadzile ku lukeelanilo lwa kyaka kya Paasaka, lyapuliike ukutigila uYesu ali mu ngʼaasi, iikwadza ku Yelusalemu. 13 Neke linyamulage amahandzo ga makindo, lihelelage kumwanukila. Liiyooyaga liitigilaga,

14 UYesu akuyiwonaga indzanambunda, iihovaga ngita kye lúsimbiilwe mu Wusimbe uWiimike ukutigila,

17 Lino ililugu lya vaanu ilyali pamwinga nu Yesu, pe amukemeelaga uLasalo ukuhuma mu mombwe nu kumudzulubusa ukuhuma ku wulungu, lyolelelaga imola idzo. 18 Lwe lwene avaanu voloofu vaaheliye kumwanukila uYesu, pakuva vaapuliike ukutigila álimile kimanyilo ikyo. 19 Neke aVafwalisayo valonganage veene vatigilage, “Lolage, twilemwa ukulima kikivedzaga! Avaanu vonda vakumuniniila umwene.”

20 Lino vaali koovali na Vagiliki mu vaanu avo avaaheliye ku Yelusalemu kwifuunya kwa Nguluvi mu kyaka kya Paasaka. 21 AVagiliki avo viihelelaga kwa Filipo ye aahumile ku wudzenge wa Betisayida mu mugoola gwa Galilaya, vakumunyilikaga viitigilaga, “Mutwave, twinyilika tumuwone uYesu.” 22 UFilipo iihelelaga kumulongela uAndeleya imola idzo, neke vonda vavili vahelelage kumulongela uYesu.

23 UYesu akuvahigaga iitigilaga, “Gúfikile umusika gwa kuvilatulwa indolo dza Muswamuve va Muunu. 24 Ndakyene ndikuvalongela ndiitigila, ngana imbeyu yisinaa yisiilwa pa muganga, ngita umuunu ye áfuwe, siyiimela, neke kangi, ngana yisiilwe, yiimela nu kuveleka ifiveleko fyoloofu. 25 Umuunu ye akuweenda uwuumi waakwe alawuyadza. Neke kangi umuunu ye akuwusuula uwuumi waakwe mwe naanyi umu, alawupoka nu kwanukila uwuumi uwa mbeepali. 26 Umuunu ye avedzaga ye akuunovela iligendwa, lwisakulwa aaniniilage. Kangi pepavedzaga pala pe ndigenda, pe peene pe iivedza nu mulimila-vangi vangu. UDaada ahadza akumuginiya umuunu ye akuuniniila.

27 “Lino inumbula yangu yínyengʼemiye hiilo. Ndilonge kiki? ‘Ve Daada, uumoke mu kivalilo kya mumuko iki.’ Ndiilemwa ukulapangila ewo, pakuva ndaadzile ukuta ndigendele umusika ugu. 28 Ve Daada, uvilatule indolo dza litaawa lyako.”

Neke isawuti ukuhuma kukyanya yitigilage, “Muswamu-vanguave, ndídzivilatuwe, kangi ndiigina ukudzivilatula.” 29 Ililugu lya vaanu avaali apo, vaapuliike isawuti ukuhuma kukyanya, viitigilaga, “Ilibalamusi líbalamwike.” Avangi viitigilaga, “Umunyamwandza va Nguluvi álongile nave.” 30 UYesu akuvalongelaga iitigilaga, “Isawuti ye múpuliike, si wiimila wa neene, nda haamu, wiimila weenyo. 31 Lino gúfikile umusika gwa kuvahiga avaanu va mwe naanyi umu. Lino umutemi va mwe naanyi umu uSetano, ahadza iidagilwa kwivala. 32 Neke kangi uneene, pe ndiivedza ndíinwiswe ukuhuma mwe naanyi,^g ndihadza ndikuvakongola vonda, ukuta vaadze ukwangu.” 33 UYesu aalongile ewo, ukuwoneesa imifwile giki gye ahadza iifwila.

34 Ililugu lya vaanu ilyo likumuhigaga uYesu liitigilaga, “Twímbile mu Wusimbe uWiimike ukutigila, uMesiya iivedza muumi mbeepali.^h Lino kye kiki wiilonga ukutigila uMuswamuve va Muunu munya kwinuswa? UMuswamuve va Muunu uyo ye ani?” 35 UYesu akuvahigaga iitigilaga, “Ulumuli pooluli pamwinga naanye umusika mudebe hela. Mugendage mu lumuli ulo umusika gwe pooluli, ukuta ikiisi kitane ukuvalema, pakuva umuunu ye iigenda mu kiisi asiidzeela kwe iihelela. 36 Mulufuuwage ulumuli umusika pe pooluli, ukuta muvedzage vaana va lumuli.” UYesu pe aaviye álongile idzo, iihegaga apo, akwifihaga, ukuta vatane ukumuwona.

37 Nde luvedze uYesu aali álimile ifimanyilo fyoloofu pa miiho gaawo, napo kangi vasamufuuwaga. 38 Lwali ewo, ukuta ilidzwi lye aalongile umuvidzi Isaya likwile ukutigila,

39 Wiimila wa ulo, vaalemiilwe ukufuuwa, pakuva uNguluvi aalongile wugendela wa Isaya ukutigila,

42 Napo kangi, avalongodzi voloofu va Vayahudi vamufuuwaga uYesu. Neke kangi wiimila wa Vafwalisayo, vasaalongile pa weelu ukutigila vámufuuviilwe, pakuva voogopaga ukudagwa mu nyolanilo. 43 Avalongodzi avo vaakeeliye hiilo ukuginikwa na vaanu, ukulutila ukuginikwa nu Nguluvi.

44 Neke uYesu iinusage isawuti atigilage, “Umuunu ye akuufuuwa, asikuufuuwa uneene hela, nda haamu, akumufuuwa na ye áanumile. 45 Kangi uyo ye áambwene uneene, ámuweene na ye áanumile. 46 Uneene ndáadzile mwe naanyi ngita lumuli, ukuta nayula ye akuufuuwa, atane ukusigala mu kiisi.

47 “Ye akugapulika amadzwi gangu, neke kangi asikugagendela, uneene sindimuhiga, pakuva sindaadzile pe naanyi apa ukuvahiga avaanu, nda haamu, ndáadzile mu kuvapoka. 48 Napo kangi, umuunu ye akuungʼaana uneene pamwinga na madzwi gangu, ali nave uva kumuhiga. Amadzwi ge ndílongile, ge geene agalamuhiga pa kigono ikya wusililo. 49 Pakuva sindilongile mu wutawulilwe wangu yuune, nda haamu, uDaada ye áanumile, ye mwene ye áandagiidze ulwa kulonga na kye ndiilonga. 50 Kangi ndiidzeela ukutigila, ululagi lwakwe lukuvapeela avaanu uwuumi uwa mbeepali. Neke luluvedzaga lwe ndiilonga uneene, ndiilonga lwe áandongiye uDaada ukutigila ndilonge.”