UYesu akuvakalafya amagulu avanyigendwa vaakwe
13
1 Ikyaka kya Paasaka pe kyali kisinaa kifika, uYesu aludzeeliye ukutigila, umusika gwakwe ugwa kuhega pe naanyi apa kuhelela kwa Daadiye, gúfikile. Umusika gonda uYesu pe aali pe naanyi, aveendile avaanu vaakwe, lino aaheliye kuvawoneesa uwukwilifu wa wende waakwe.2 UYesu na vanyigendwa vaakwe, vaali víikalile mu kuliya ikyakuliya ikya pa kyamihe. USetano aali ámukoofiidze uYuda umuswamuve va Simoni Isikalyote, ukuta amusutule uYesu. 3 UYesu aadzeeliye ukutigila, uDaada áviikile ifiinu fyonda paanyi pa wutawulilwe waakwe, kangi ukutigila aahumile kwa Nguluvi, nave iipiluka kwa Nguluvi. 4 Neke alekage ukuliya, awopolage umugolole, anyamulage ikikwindo, iipinyage mu kigudi. 5 Iisopaga ululenga mu kikalavilo, neke avangage ukuvakalafya amagulua avanyigendwa vaakwe nu kupolosa ni kikwindo kye iipinyile.
6 UYesu pe aafikile pa Simoni Petulo, uPetulo akumulongelaga iitigilaga, “Mutwave, wiisaka ukuungʼalafya amagulu?” 7 UYesu akumuhigaga iitigilaga, “Uveeve usiludzeeliye lwe ndiilima lino, neke kangi uhadza ukuludzeela pambele.” 8 UPetulo akumuhigaga iitigilaga, “Usikuungʼalafya amagulu nambi!” UYesu akumuhigaga iitigilaga, “Ngana sindikukukalafya, apo usili mihanganile naane.” 9 USimoni Petulo akumuhigaga iitigilaga, “Mutwave, ngana dzili ewo, utane ukuungʼalafya amagulu geene, nda haamu, naga mawoko pamwinga nu mutuwe.” 10 UYesu akumuhigaga iitigilaga, “Umuunu ye ákaliive, asiisakulwa ukukalava kangi,b nda haamu, kukukalafya amagulu geene. Uyo mwelu umuvili gonda. Unyeenye muli veelu,c neke kangi si nyivonda.” 11 UYesu amudzeeliye ye ahadza akumusutula, lwe lwene aatigiye, “Unyeenye muli veelu, neke kangi si nyivonda.”
12 UYesu pe aaviye ámalile ukuvakalafya amagulu avanyigendwa vaakwe, iifwalaga kangi umugolole gwakwe, iipilukaga apoono pe iikalile, akuvalongelaga iitigilaga, “Múlufikile lwe ndívalimiye unyeenye? 13 Unyeenye mukuungʼemeela, ‘Muwulanidzi,’ nu, ‘Mutwa,’ ulu lwe lwene, pakuva ndeeni kye ndigenda. 14 Neke lino, ngana uneene ye ndili Mutwa nu Muwulanidzi veenyo, ndívakaliifye unyeenye amagulu, ndeeni mwisakulwa ukwikalafya amagulu yuunye mwa yuunye. 15 Ndívawoneesiidze ikihwananidzo ukutigila, na yuunye mwilimilage ngita uneene kye ndívalimiye unyeenye. 16 Ndakyene ndikuvalongela ndiitigila, umulimila-vangi asili mukomi ukulutila umutwa vaakwe, kangi umulongodzi-mola asili mukomi ukulutila ye akumutuma. 17 Ngana mudzeele idzo, apo uNguluvi ahadza akuvafuunya ngana mukudzilimila.
18 “Idzo dze ndiilonga, sindiilonga ulwa nyeenye nyivonda. Ndívadzeeliye avo ve ndívahaaguwe. Neke kangi idzo dziisakulwa, ukuta amadzwi agaasimbiilwe mu Wusimbe uWiimike gakwile ukutigila, ‘Yula ye aaliilasaga naane ikyakuliya, ápitwike ukuvedza mutavangwa vangu.’d 19 Ndikuvalongela dzonda idzi umusika ugu pe dzisinaa dzihumila, ukuta umusika pe dzíhumiye, mwali mufuuwe ukutigila, uneene ye mwene.e 20 Ndakyene ndikuvalongela ndiitigila, umuunu ye avedzaga ye akumwanukila ye ndímutumile, akuundzanukila uneene. Kangi ye akuundzanukila uneene, akumwanukila uDaada ye áanumile.”
UYesu iilonga ulwa kusutulwa kwakwe
21 UYesu pe aaviye álongile idzo, iinyengʼemalaga hiilo mu numbula yaakwe, iilongaga pa weelu iitigilaga, “Ndakyene ndikuvalongela ndiitigila, yumwinga umwenyo ahadza akuusutula.” 22 Neke avanyigendwa vaakwe vavangage ukwilola ku miiho, pakuva vasaadzeeliye ye ani ye akumulonga. 23 Umunyigendwa vaakwe yumwinga ye eendwaga hiilo nu Yesu, aali íikalile biihi nave. 24 Neke uSimoni Petulo amusinidzage umunyigendwa uyo, amulongelage atigilage, “Umuwuudze ukutigila, ye ani ye akumulonga umwesu.” 25 Neke umunyigendwa uyo amwegamilage uYesu pa mambaga, amuwuudzage atigilage, “Mutwave, ye ani uyo?”
26 UYesu akumuhigaga iitigilaga, “Ye uyo ye ndihadza ndikumupeela ikipiidza kya mukaate kye ndídzabile mu kitonga.” Neke adzabage ikipiidza kya mukaate nu kumupeela uYuda umuswamuve va Simoni Isikalyote. 27 UYuda pe aanukiye ikipiidza kya mukaate ugo, uSetano akumwingilaga. UYesu akumulongelaga iitigilaga, “Lwe wiisaka ukululima, ululime kisaatu!” 28 Neke kangi mu avo aviikalile mu kuliya ikyakuliya, sikwali umuunu ye alufikile ukutigila, kye kiki uYesu ámulongiye ewo uYuda.
29 Pakuva uYuda ye mwene ye aakoleelaga ibogolo ya magoobeli, avangi vaahoodzaga ukutigila uYesu ámulongiye ukutigila, akagule ifiisakulwa mu kyaka, enewuli avapeele ikiinu avahangala. 30 Umusika guugo, uYuda pe aaviye áanukiye umukaate ugo, iihumaga kwivala. Umusika ugo, yaali kilo.
UYesu akuvapeela avanyigendwa vaakwe ululagi ulupiya
31 UYuda pe aaviye áhumile kwivala, uYesu akuvalongelaga avanyigendwa vaakwe iitigilaga, “Lino gúfikile umusika gwa kuvilatulwa indolo dza Muswamuve va Muunu, ni ndolo dza Nguluvi wugendela mwa Muswamuve. 32 Ngana indolo dza Nguluvi dzívilatuliilwe wugendela mwa Muswamuve, uNguluvi ahadza iivilatula indolo dza Muswamuve,f kangi ahadza iilima baaho na baaho.
33 “Nye vaanaanye! Ndiivedza naanye musika mudebe hela. Ngita kye ndavalongiye avalongodzi va Vayahudi, lino ndikuvalongela na yuunye. Mulaanemula, neke kangi mulaalemwa ukwadza kwe ndigenda. 34 Lino ndikuvapeela ululagi ulupiya ukutigila, mwiyendage, ngita uneene kye ndíveendile unyeenye, ndeeni na yuunye mwiyendage. 35 Ngana mukwiyenda, apo avaanu vonda vahadza viidzeela ukutigila, unyeenye muli vanyigendwa vangu.”
UYesu iilonga ukutigila uPetulo ahadza akumukaana
36 USimoni Petulo akumuwuudzaga uYesu iitigilaga, “Mutwave, wiihelela kwiya?” UYesu akumuhigaga iitigilaga, “Kwe ndiihelela, uveeve wiilemwa ukuuniniila lino, neke kangi uhadza ukuuniniila pambele.” 37 Neke uPetulo amuwuudzage atigilage, “Mutwave, kye kiki ndiilemwa ukukuniniila lino? Uneene ndihadza ndikwitawula wiimila waako, nde kuvedzage kufuwa!” 38 UYesu akumuhigaga iitigilaga, “Petulo, ongo, wiisunga wiitawule wiimila wangu, nde kuvedzage kufuwa? Ndakyene ndikukulongela ukutigila, indzogolo pe yisinaa yivika, wiivedza úungʼaanile nyakadatu ukutigila usiindzeeliye.”