2 Peetroo 2

Bin dàkà tinyimɔmbɔtee

1 Iyunti in jítèe poonee, bin nìn mɔ́ntí yii bi sá Unimbɔti bɔnaatiliibee nìn kɔ́ Unimbɔti nikitil kansikin. Míǹ mbaantiim ní bin dàkà tinyimɔmbɔtee mun làá tí kɔ́ ni mun kansikin. Bíǹ làá cáań tinyimɔmbɔti tin làá nàan̄ binibee ní kí dàkà, ní kí dū bi-kpiliu un fīī-bee kí fá kí yàntī Unimbɔti tafadaaldi ń jēetí bi-pu bí kpú kí céetí dicilpu. 2 Binib tikpil làá dāá nóó bi-bimbikpitim gbanti saŋŋu. Bi-yaŋyam puee, binib làá dāá nīn kpākantí mbaamɔn saŋŋu bɔti. 3 Bin dàkà tinyimɔmbɔtee là kí kīil̀-ni kí fōō ni-nimbiliŋ ní. Ama dooooyee ní un làá sòoǹ bi-bɔtee bɔ́ntì ki cí kí tɔ̄ u-tundi, un làá céetí-bee kaa dɔ̄ ki gèeǹ.

4 Di sá yii Unimbɔti kaa nìn tāaǹ ituun in nìn ŋá ikpitee ki cúú-i ki tɔ́ ditafadaaldi paaŋŋun. Bi bóob́-i nì ikusaka i kā dibɔmbɔndin ki cí daliŋkin Unimbɔti làá sòoǹ i-bɔtee. 5 Unimbɔti kaa nìn tāaǹ duulinyakpiki, ama u nìn cāntì nnyiŋgbeen dɔ́miń ki kúntì binikpitib kɔkɔ, ní ki fīī binib biluli ki kútì Noowa un nìn sòoǹ Unimbɔti bɔti tin bí deedeeyee ki tùkù binibee^a. 6 Unimbɔti nìn dáaĺ ntimu mun bi yíì Soodoom nì Goomoorayee yab tafal ki yāntì ŋŋmi dɔ́miń ki wùn̄-bi búkú buku. U ŋá míǹ kí dàkà u nín làá dāá dáaĺ binikpitib tafal puee ní^b. 7 Ŋyunti gbantee, Unimbɔti nìn fīī Looti baba ní, kun puee u nìn bí deedee, ní binikpitibee bimbim nì bi-digaŋgamiu nìn kɔ̄ntí Looti inimɔɔn^c. 8 Di sá yii Looti nìn kóò bi-kansikin, ki gbìl̀ ní ki kāntí baabadal ikpiti in bi ŋáańee. U nín nìn sá unimɔntee puee, an nìn kɔ̄ntí-u kunimbaau, ki páb́-u tikpil. 9 Míǹ puee ti-Dindaan nyí u nín dì pu ki nyāntí bin yú nì u deedeeyee dinimbinaamandi poonee, ní ki nyí u nín làá yóoń binikpitib laakin kí dāá dáaĺ bi-tafal ibɔsoon dalee. 10 Bin tafal Unimbɔti làá dāá dáaĺ tikpilee di sá bin dū bi-ba ki tīī bikɔdeekpitib ki kpèé Unimbɔti pɔŋŋu fámee.

An dàkà yii bin bɔti m bàà sòon̄ nì ni yii bi dàkà tinyimɔmbɔtee. Baa tɔ́ báà ubɔ nì ubɔ ní bi-pɔbiliŋ nyìm̀. Baa ti tɔ́ Tinyooldambi bin bí yilpuee gba, ama bi sìí-bi ní. 11 Ituun in cáá mpɔn ki jítiǹ bin dàkà tinyimɔmbɔti gbantee gba kaa bíi sòoǹ tibɔkpitil bi-pu ti-Dindaan nimbiin. 12 Binib gbanti ŋáań kii kumooun peelii in pée sá bí nīn cútí-i ki kùee ní. Bi sìí tin baa nyée. Bi làá dāá pée nàan̄ kí céetí-bi ní. 13 Bi nín yāntì binib jīǹ falaa miŋyee, an falaau ní Unimbɔti làá dāá gíiǹ kí téeǹ-bi. Bíǹ pɔɔsɔŋkil di sá bí nīn ŋáań tin kɔkɔ sá ntimbiilee ŋwiimpu. Naa ká yii binib gbanti yaa dɔ́miń ni nì bi ń jī tijinee, bi kɔ̄ntí-ni tijɔkɔndi nì icoooo? Ní an mɔ̄ǹ-bi bi nín kíiĺ binib puee. 14 Ní bi-nimbiliŋ máǹ bí ŋá tijɔkɔndi. Baa gì nì ikpiti diŋál, ní ki pīil̀ ki sàtī binib bin pɔ̀fì nnimbɔtisan poonee. Bi-landɔkɔŋu di pée sá yii bí ká animbil. Bi sá mbusudambi ní. 15 Bi fá nsammɔnti ní ki gáatì ki nóó Boosɔɔr jipɔɔn Balaam nín nìn là animbil ki dī nsaŋkpiti ŋuŋyee. 16 Ama Unimbɔti nìn wòon̄-u u nín kaa tɔ́-uee pu, di sá u nìn yāntì kimaŋ sòon̄ kii unilee ní ki pīiǹ digbaantundi din Balaam bàà nìn là kí tɔ̄ee saŋŋu^d.

17 Binib gbanti bí kii ibun in kaa cáá nnyimee, ní ki bí kii atagban ŋin kaa cáá ntaanyim kubuŋu cáá-ŋi ki yìiǹee. Mpaan ŋun Unimbɔti bɔ́ntì ki yóoǹ-bee nyóò ní, ki sá dibɔmbɔndi. 18 An nibee dàkà bi-ba ní ki sòoǹ anyɔɔbuŋkpaan ki ŋmàtíǹ binib ní ki sàtī bin pɔ́ɔǹ bi-ba ki nyáń ikpiti saŋŋu poonee ki yàntī bi fàtī ki gítí ikpiti saŋŋu poon. 19 Bi pòontí binib yii bi yaa ŋáań min bíǹ sòoǹee ní bi kāntí dibatɔl, ama ní bíǹ bi-ba sá ikpiti yumbui. Bi súntì yii unil sá kun kpòotī-uee yumbuu ní. 20 Bin di béè ti-Dindaan Yeesu Kriisitoo ti-Fiiliu, ki nyáń duulinya bimbikpitim poon, ní ki dāa fātìi gíti yāntì bi-bimbikpitimee cúú-bee, tin poon bi làá kɔ́ee dāa jítiǹ tin poon bi nìn bí dooooyee kpataaa. 21 Bidambi yaa kaa bàà béèmaan mbaamɔn saŋŋu, an bàà sɔ́ nì bí béé-ŋu, ní boonee kí dū-ŋu kí fá kaa ti tɔ́ maramɔntiibi bin Unimbɔti nìn tīī-bi bi ŋúb́ee. 22 Tin bāań-bi nee dàkà yii dilaŋkpandi nee sá mbaamɔn dee, yii: «Kibɔkɔ wūliŋkì ki fātìi gíiǹ ki ŋmɔ́^e», ní «Ugbeeti un bi fùl̄ee fātìi lítì tikpatin ki dɔ̄ ki bíntí.»