2 Peetroo 1

Kugbɔnliliitiiu kun

Peetroo

ŋmàn̄ee

Ijaam

1 Man Siimɔn Peetroo un sá Yeesu Kriisitoo kpambal ki sá u-tɔntɔnliu muee di ŋmàn̄ kugbɔŋu nee.

M ŋmàn̄-ku kí tīī nimbi bin fōō Unimbɔti bɔti ki kíí mbaantiim kii timbee. Yeesu Kriisitoo un sá Unimbɔti ki sá ti-Fiiliuee di ŋá míǹ ki tīī-ti, kun puee u sá deedeedaan. 2 Kii ni nín nyí Unimbɔti nì ti-Dindaan Yeesu Kriisitoo puee, ú ŋá-ni tiŋan kí tīī-ni ŋgbansɔŋfi tikpil.

Bin Unimbɔti lútì ki yíińee bɔti

3 Yeesu Kriisitoo pɔŋŋu tīī-ti ŋŋmam min ti ŋūǹ kí nīn bí ki nákáǹ Unimbɔtee, ki yāntì ti béè un yíiń-ti tí dāan̄ kí fōō u-nyooti nì u-ŋantee. 4 Míǹ mbaantiim ní u tí pōoǹ-ti apooŋkpaan ŋin jítiǹ tikɔkɔee, án nín làá ŋá pu ni yaa fōō ipoon gbantee, ní taa nín̄ cáá nnimbitaataam tikpitil pu kí wāŋkì, ama ní fōō mbimbim min náań nì Unimbɔti yamee. 5 An puee, kii ni nín fōō ki kííyee puee, ní pɔ́ɔm̀maan ni-ba kí nyàab̀ mbimbimɔntiim kí kūtì fookii pu. Ni yaa ká mbimbimɔntiimee, ní nyàab̀ dinyil kí kūtì, 6 kí pɔ́ɔm̀maan kí ŋúb́ ni-ba kí kūtì dinyil pu. Ni yaa ŋúń ki ŋúb́ ni-bee, ní nyàab̀ kimɔtii. Kimɔtii boonee ní nyàab̀ kí nīn tɔ́ Unimbɔti mmɔntiim. 7 Ni yaa tɔ́ Unimbɔti mmɔntiiminee, ní nīn néeń ni-nabiyaamu mun nóó Kriisitooyee kɔkɔ, boonee ní kí nīn néeń báà ŋma. 8 Mbimbimɔntiim min ni máaǹ kí nīn cááyee dee. Ni yaa cáá-mì ní mì wīikí ni-ni tikpilee, án di làá yàntī ní nīn béetí ti-Dindaan Yeesu Kriisitoo mmɔntiim kí nīn cá, ní kí nīn bí kii isufi in lòoǹ asubimɔntee. 9 Ama un kaa cáá an bimbimɔntiimee kaa ŋūǹ kí wāl̀ kí bà ndan Unimbɔti saŋŋu poon, ní ki pūtì kpáàa súntì yii Unimbɔti nìn fíntì u-pɔbilin kpitii kɔkɔ.

10 Kɔŋkɔnnee nnabiyaamu, ni nyí yii Unimbɔti lútì-ni ki yíiń-ni ní nīn sá u-yab ní. Ni yaa pɔ̄ɔntí ki gbíntìi nóó nsan gbantee, ni kpá kí jēetí tikpitilin. 11 Ní Unimbɔti ń dāá pɔ̄-ni nsan ní kɔ́ ti-Dindaan Yeesu Kriisitoo un sá ti-Fiiliuee Beel din kaa cáá dikúntilee ni sɔkɔmii.

12 M nín là yii ní ká tin m sòon̄ee pu ní m gbíntì ki téetí-ni múlmul, nì min kɔkɔ ni nìn pée nyí-tì ki yú ibaamɔn bɔti tin ni fōō ki kííyee poon ki ŋúb́ an píkée. 13 Ama m là yii m nín dáá bí nee, ḿ nīn pée cɔ́ an bɔti pu ki téetí-ni múlmul. 14 Kun puee ti-Dindaan Yeesu Kriisitoo tùkū-mi yii an kaa làá ti yúntí m làá kpú. 15 An puee m làá pɔ́ɔǹ nì m-pɔŋŋu kɔkɔ kí dàkà-ni nsàmbiyaamu mun ní ni làá dī kí nīn téetí an bɔti pu baabadal m-kúm boonee.

Bin ká Kriisitoo nyootee

16 Di sá yii ti-Dindaan Yeesu Kriisitoo dāantam nì u-pɔŋŋu bɔti tin ti sòon̄ ki tùkū-nee kaa sá mmaam min binib nyí bi-landɔkɔyin ki sòon̄ee. Timbi ti-ba di baasii ká-u nì ti-nimbiliŋ u nín sá ukpaan miŋyee. 17 Timbi nimbilin ní u-Baa Unimbɔti tīī-u jilma nì tinyool. Unimbɔti un sá ukpaan tinyooldaanee bí yii: «Un bí nee di sá m-Jipɔɔn un m néeńee, m-pɔbil sɔ̀m̀ u-pu.» 18 Timbi nì u di nìn bí circir jool pu ní Unimbɔti sòon̄ní míǹ yilpu^a.

19 An puee, ti baasii mɔ̄tìi fōō ki kíí Unimbɔti bɔnaatiliibi nín sòon̄ tiŋyee ní. Ní gíiǹ ni-landɔkɔi tibɔti gbanti pu, kun puee tì bí kii fitila nín yú dibɔmbɔndin ki wāĺ pu áli ŋwìiń ń dāá nyānní puee ní, ní Kriisitoo un sá kii utaafaaŋmalbijee ń dāá ŋmíntí ni-pɔbiliŋ. 20 Kí wàatēe, tin m là ní bééyee sèé: Ubɔ kaa ŋūǹ kí dū úǹ u-ba ciiŋŋu kí béé tibɔti tin Unimbɔti bɔnaatiliibi ŋmàn̄ ki ŋá kugbɔŋunee. 21 Kun puee tin kɔkɔ Unimbɔti bɔnaatiliibi lēe, tiba nì tiba kaa nyánní bi-làtamin, ama an sá Unimbɔti Fam di kpōotì-bi, ní bi fōō Unimbɔti paaŋŋu ki sòon̄ u-bɔti.