Kugbɔmpeepeekaau kun
Yoowaneesi
ŋmàn̄ee
Dimaŋfal bɔti
1
1 Ti ŋmàn̄ kugbɔŋu nee kí tùkù-ni dimaŋfal bɔti. Dimaŋfal gbantee nìn pée bí doooo ŋkilkaamina ní. Ti gbìl̄ dì nín nìn sòon̄ puee, ki wál̀-dì nì ti-nimbiliŋ, ki máań-dì nì ti-ŋalii mun. 2 Dimaŋfal gbanti nyáń mpaampiin pu, ní ti ká-dì. An pu ní ti sòoǹ ki tùkù-ni dimaŋfal din kaa cáá dikúntilee bɔti. Dì nìn bí ti-Baa Unimbɔti cee ní u nyántì-dì ki dàkā-tib. 3 Míǹ puee tin tin ti kée nì tin ti gbìl̄ee ní ti cáa bíi tùkù ni mun, án nín làá ŋá pu ti nì ni kɔkɔ ń kpántí ubaantee. Kun puee timbi nì ti-Baa Unimbɔti nì u-Jipɔɔn Yeesu Kriisitoo ŋá ubaanti. 4 Ti ŋmà kugbɔŋu nee án nín làá ŋá pu ti-pɔbiliŋ ń mɔ̀tīí pīil̀ee.Unimbɔti sá ŋwalifi ní
5 Dinyɔɔbundi din ti gbìl̄ Yeesu cee ki cáa tùkù-nee di sá yii Unimbɔti sá ŋwalifi, ní dibɔmbɔndi kpá u-ni báà fiii. 6 Míǹ puee, ti yaa bí yii ti nì u ŋá ubaanti ní ki gbíntìi còom̄ dibɔmbɔndinee, ti mɔ́ntí, taa dī ibaamɔn. 7 Ama ti yaa dī ŋwalifi saŋŋu kii Unimbɔti u-ba nín sá ŋwalifi puee, niinee ní ti nì ti-nabiyaamu ŋáań ubaanti, ní u-Jipɔɔn Yeesu fatikuu fíntí ti-pɔbiliŋ circir ki lèekī ti-kpitii kɔkɔ.
Tí fá tikpitil
8 Ti yaa bí yii taa cáá ikpitee, mimmee ti bíi kíiĺ ti-ba ní ibaamɔn kaa bí ti-ni. 9 Ti yaa bīitì ti-kpitii pu, Unimbɔti sá deedeedaan ki cáá ibaamɔn ki làá dū ti-kpitii kí pɔ̄-ti, kí fíntí tin kɔkɔwoooo bí ti-pɔbiliŋin kaa ŋān̄ee, tí nīn bí circirc. 10 Ama ti yaa bí yii taa ŋá ikpitee, mimmee ti yíì Unimbɔti unyimɔndaan dee. An dàkà yii u-nyɔɔbundi kaa bí ti-pɔbiliŋin.