1 Yoowaneesi 2

1 M-biyaamu, m ŋmà-ni tin bí nee án nín làá ŋá pu ní taa ŋá ikpitee. Ama ubɔ yaa jéetì ikpitinee, ti cáá un mɔ́tí ti-puee ti-Baa Unimbɔti cee. Úǹ di sá Yeesu Kriisitoo ibaamɔndaan. 2 U dū u-ba ki ŋá saraa ti-kpitii pu^a. Ama an kaa sá timbi kpitii ŋmaniŋma pu, an sá ki kpáaǹ binib kɔkɔwoooo kpitii pu ní.

3 Ti yaa kpáafí Unimbɔti marabee, niinee ní ti béetí yii ti nyí-u. 4 Un yaa bí yii: «M nyí Unimbɔti,» ama ní kaa ŋúb́ u-marabee sá unyimɔndaan, ibaamɔn kaa bí udaanni. 5 Ama sii un di yaa kpáafí Unimbɔti bɔtee, mimmee sii di néeń Unimbɔti tiŋman. An pu ní a béetí yii a bí Unimbɔtin. 6 Sii un di yaa lī yii a bí Unimbɔtinee, a máaǹ kí nīn còom̄ kii Yeesu u-ba nín nìn còom̄ puee.

7 M-nabineeŋkaamu, an kaa sá marapɔɔn ubɔ ní m gíti bíi ŋmà-ni, an sá marakpiki un ni nìn pée nyí doooo ŋkilkaaminee ní^b. An marakpikiuee di sá Unimbɔti bɔti tin ni nìn pée gbìl̄ee. 8 Nì míǹ kɔkɔee, u sá marapɔɔn ní m bíi ŋmà-ni. Ibaamɔn in bí mara un nyánní Yeesunee bí ni mun ni, kun puee dibɔmbɔndi bíi jītí ní ŋwalifimɔnti dɔ́miń ki ŋmíntì ti-pu.

9 Sii un di yaa bí yii a còom̄ ŋwalifin ní ki gbíntìi ná a-nabikee, a dáá gbíntìi bí dibɔmbɔndin. 10 Ama sii un di yaa néeń a-nabikee còom̄ ŋwalifin dee, a kpá kí yàntī ubɔ ń lítí. 11 Sii un di yaa ná a-nabikee, mimmee a bí dibɔmbɔndin ki còom̄, kaa nyí laakin pú a cée, kun puee dibɔmbɔndi yāntì a jɔ̀b̄.

12 M-biyaamu, m ŋmà-ni tin bí nee, kun puee Yeesu yindi pu ní ni ká ni-kpitii pɔ̄tam. 13 Bibaatiibi, m ŋmà-ni tin bí nee, kun puee ni nyí ti-Dindaan un nìn pée bí doooo ŋkilkaaminee. Binaacimpɔmbi, m ŋmà-ni tin bí nee, kun puee ni jáń ki pɔ́ɔkiǹ Sitaan.

14 Mbiyaamu, m ŋmàn̄-ni tin bí nee, kun puee ni nyí ti-Baa Unimbɔti. Bibaatiibi, m ŋmàn̄-ni tin bí nee, kun puee ni nyí ti-Dindaan un nìn bí doooo ŋkilkaaminee. Binaacimpɔmbi, m ŋmàn̄-ni tin bí nee, kun puee Unimbɔti bɔti bí ni-ni, ni pɔ̄ɔ̄ ki ŋúń ki jáń ki pɔ́ɔkiǹ Sitaan.

15 Ní taa nín̄ néeń duulinya nì tin u cááyee. Sii un di yaa néeń duulinyee, aa ŋūǹ kí nīn néeń Unimbɔti. 16 Kun puee tin kɔkɔ bí duulinyan, an dàkà yii mbimbikpitim kɔdeebi, nì nnimbitaataam, nì unil ń nīn néeń timɔn ki dàkà tigaajatee, tíǹ kɔkɔee kaa nyēeń ti-Baa Unimbɔti cee, an nyēeń duulinyan ní. 17 Ní duulinya nì u-nimbitaataam kɔkɔ jītí, ama un di yaa ŋáań min ní Unimbɔti lèe, udaan làá dāá nīn bí ní jaanjaan.

Kriisitoo nannanliu.

18 M-biyaamu, ŋyuntijoolkaa sèé. Kii ni nín gbìl̄ yii Kriisitoo nannanliu dòońee, kɔŋkɔnnee Kriisitoo nannanliibi tikpil pūtì kpáàa bāań. Míǹ pu ní ti béè yii ŋyuntijoolkaa sèé nee^c. 19 Ti-kansikin ní binannanliibi gbanti nyáń. Ama baa nìn sá ti-yab, kun puee bi yaa bàà nìn sá ti-yabee, ti-kɔkɔ bàà bímaan mbaantiim ní. An nín ŋá pu nee di dàkà tiŋan yii ti nì bin nìn bée, bi-kɔkɔ kaa nìn sá ti-yab.

20 Ama nimbee, ti-Dindaan circirdaan sītì ni-pu Circir Fam, an di yì-tì ní ni-kɔkɔ nyí ibaamɔn. 21 Míǹ puee, m yaa ŋmàn̄-ni tin bí neeyee, kaa sá yii naa nyí ibaamɔn, ni nyí-i, ki béè yii ibaamɔn poonee, baa kāntí nnyimɔn báà ŋubɔ.

22 Ŋma di sá unyimɔndaan an yaa kaa sá un néè yii Yeesu kaa sá Kriisitooyee? Udaan di sá Kriisitoo nannanliu kaa là Ubaati, kaa là u-Jipɔɔn mun. 23 Un di yaa kaa là Unimbɔti Jipɔɔn Yeesuee, kaa fōō u-Baa mun dee, ama un di yaa lì binib nimbiin yii Yeesu sá Ubaati Jipɔɔnee fōō Ubaati u-ba mun dee^d.

24 Míǹ puee, tin tin ní ni nìn pée gbìl̄ doooo ŋkilkaaminee, ní kpāafìmaan-tì ni-pɔbiliŋin. Sii un yaa kpáafì tin ní a pée gbìl̄ doooo ŋkilkaaminee, mimmee sii ŋá ubaanti nì ti-Baa Unimbɔti nì u-Jipɔɔn dee. 25 Dipoondi din Yeesu pōoǹ-tee di sá dimaŋfal din kaa cáá dikúntilee.

26 M ŋmàn̄ tin bí nee kí sòoǹ nì ni bin là kí ŋmàtiǹ-nee pu. 27 Ama nimbee, Yeesu sītì ni-pu u-Fam. An puee, an kaa ti bàlifī ubɔ ń dàkà-ni. Kun puee u-Famee di dàkà-ni tikɔkɔ, ní tin ní u dàkèe sá ibaamɔn, nnyimɔn kpá poon. Míǹ puee, ní kpāafìmaan u-Fam nín dàkà-ni puee, ni nì Yeesu ń nīn sá ubaanti.

28 M-biyaamu, ní nīn bí Yeesu cee, án nín làá ŋá pu ŋyunti ŋun u yaa láa páaǹnée, tí dāá nīn cáá kunyannyaau kí yūĺ u-nimbiin kí taa nín̄ cáá icoo daliŋkin u làá bàńee. 29 Míǹ puee, ni yaa nyí yii u sá deedeedaanee, béémaan yii un sá kamaa yaa nóó deedeeyee, Unimbɔti di fātìi màl̄ udaan mpɔm.