Kitēēpēy :Chowaana Koopootiisāniin nēē Yēēsu ku Meesaaya
11
1 Kii nēē waang' :Yēēsu kumwoochinii kiineetanichiich taman nkōō ārēēny ng'aleechoochēē, kung'eetee yoonēē akuwō kuunēētiisyootō aku-amtaata lōkōōy choo kāroomēēn nkōō wōloo māng'ēy piich mu kōōroonoonēē. 2 Kiteer :Chowaana Koopootiisāniin nyoo kiirataat ng'al choo kiimii ku-irēy :Yēēsu. Paani kateer kumwoochi kiineetanichiich ārēēny kipa kuteep Yēēsu kilē, 3 “Inyēēn *Meesaaya nyi kiimwoorēy *ōōrkooy kilē mii kuchōōnēy, ntā mii :aka nyoo tākēēkānyoonuuy?” 4 Kuwālchi :Yēēsu kilē, “Apee ākoopoomwoochi Chowaana kir nyoo kaateer akaaroo. 5 Mārārtooy :piich choo kōryootēēn, kupēētii :choo ng'woolyootēēn, kusopsōōt :piich choo kiisir :pōōrwēy, kuteertooy :piich choo miinyootēēn, /kiikeeng'eeta meerat piich choo kiikumēērō /ākiikēē-āmchi choo mēēmuukēy keey lōkōōy choo kāroomēēn. 6 Kunyuun oo, pēēruuroot :chiich nyoo tiirēēnoon keey.”King'āloolēē :Yēēsu Chowaana
7 Paani mii kupēēchinii keey :kiineetanipō Chowaana, kumwoochi :Yēēsu pichu kiimii yoonēē akipō Chowaana kilē, “Paani kyaapa suur kwēēn wōloo kiimii Chowaana oo, kyoopkootēy kilē kaapaaroo chiich nyaa neen? Kii chiich nyoo āpēy :yoomēt aka tōkōl? 8 Nee nyi kyaapaaroo? Ara kii chiich nyoo kiilaak sirōōy choo tānkusēēn? Acha sōō! Piich choo lookēy sirōōy choo lēē choochēē /kēēnyōōrchinii kooriipō pāytooy. 9 Ara kyaapaaroo nee? Kii *ōōrkooyoontoo Iriin? Man, kii ōōw chiichi kusiir mpō *ōōrkooyoon. 10 Inyeentee nyi ng'āloolēē :Iriin mu siruut kilē, ‘Āyooytooy chiinyuun kuuntoroor kusātuun aree.’† 11 Āmwoorwook man kilē, moomii :chiich ng'wēny nyoo ōōw kusiir Chowaana Koopootiisāniin. Aku chiich nyuun nyoo mātookuunoot nkōō Pāyuunātoo Iriin ku ōōw kusiir Chowaana.”
Kiitay :piich chaa chaang' Chowaana ākōō Yēēsu
12 Kitas taay :Yēēsu kumwa kilē, “Kung'eetee kitoowu :Chowaana Koopootiisāniin ku-amtaata lōkōōy choo kāroomēēn ākōy paannyēēnyi, ku kiityam :piich chaa raacheen kupooryēērō Pāyuunātoo Iriin kupēt. 13 Kiing'alaala ng'aleechu :siruutēpō *Muusa ākōō chēpō *ōōrkooy ākōy kuwō kuchō Chowaana. 14 Ki nēē āmuukēy aran, ku Chowaana nyuun ku *Eliicha nyi kiing'oor *:ōōrkooyoontō kilē chōōnēy. 15 Chiich nyoo ting'ēy iit, kuteer.
16 Karkeey :piich choo lēē chu ākōō nee kēny? Karkeey :pichu ākōō laakōōy choo kātēpi kaaptuum akumwoochi :walak walak kilē, 17 ‘Kakukuutwaak kuurēēru kumaanyaal, kēēlē kēētuumwook tuumwēy chēpō riirat, kumooriiryō.’
18 Kii nēē chō :Chowaana nyoo kiimaapāyēy keey amaarēēsyēy kitya, kumwa :piich kilē, ‘Ting'ēy *toomirmiir nyaa ra.’ 19 Ku kii nēē āchōōn *:Wēēroo Chiich apay keey ākoorēēsyō, kumwa :piich kilē, ‘Acha! Kimoo :nyi, kipōōkityoon aku choorwoo kwāriipō *kōōti ākōō kipng'ōōkiis.’ Choo tuupēy ng'aleechu kusōwuuy ng'oroomnyoo Iriin.”
Ng'woonin nyoo nyōōruuy :kōōrootinā choo maaran Yēēsu
20 Kiitilchi :Yēēsu kiirwook kōōrootin chu kii-ira ng'al chēpō kwōng'uut āmu maawāliisyō ntā kung'aang'ta ng'ōōkikwaak. Kumwa nyuun kilē, 21 “Ōchēy pichu pō Koorasiin ākōō Peetsaayta! Tyaan :ng'woonin nyoo mii kukānyoonwook. Ntā kii piich chēpō Tiirō ntā ku chēpō Siitōn chu /kiiku-irchi ng'aleechoochēē pō kwōng'uut kiiku-irwaak, tākuikuwāliisyō kēny. Tākiikuulaak maaraareen akutēpi areen kung'uutu kilē kiikuwāliisyō nkōō rāyiityō nyoo kiiting'ēy. 22 Lēyyē, āmwoorwook man kilē ānyōōruuy siitēt nyoo siirēy nyoo nyōōruuy :piich chēpō Tiirō ākōō Siitōn paani tilchinii :Iriin kiirwook piich. 23 Akwaan :pichu pō Kaaparnaam, āpkootēy kilē āpēētii kipsēnkwēt? Acha sōō! /Kuwiirchinook ma nyēpō ākōy. Ntā /kiiku-ira Sotom ng'aleechu pō kwōng'uut chu /kiiku-ir mu kōōrēēng'woong', ntā tākumii Sotom ākōy paannyēēnyi. 24 Āmwoorwook man kilē ānyōōruuy siitēt nyoo siirēy nyoo nyōōruuy :piich chēpō Sotom paani tilchinii :Iriin kiirwook piich.”
Pēēruurootēēn :choo /kiikēēng'oong'chi kaamuukaa Iriin
25 Kumwa :Yēēsu kilē, “Āmwooruun kōōnkēy Paapa Iriin nyoo ipāytooy im ākōō ng'wēny, āmu kiiwung'ee tukuuchu pō man piich choo pkootēy kilē nkēt akung'āroomō, akiing'oong'chi piich choo āpēy keey ng'wēny. 26 Man, Paapa, lēē nyoonēē :wōloo imārtooy.”
27 Kitas taay :Yēēsu kumwa kilē, “Kikōōnān :Apoonyuun tukun tōkōl. Aku moomii :chiich nyoo nkēt Wēērii kung'ētu Paapaan, amoomii :chiich nyoo nkēt Paapa kung'ētu Wēērii ākōō :piich choo lēwēnēy Wēērii kung'oong'chi.