Pāyuuy :Yēēsu pērēētuu Sapaato
Maarkō 2:23-28; Luuka 6:1-5
12
1 Nēē mii pērēētuu aka nyēpō *Sapaato, kupuntoorō :mpō Yēēsu paraa nkaanu. Paani mii kupēētii, ku-am :piri kiineetanichiich. Kutoowu kupaak mēsiisēpō nkaanu aku-am. 2 Paani keero *:Parisaay ku-irēy kilēē nyoonēē, kumwoochi Yēēsu kilē, “Roo kee, āmu nee taku-irēy :kiineetanikuuk kir nyoo tāyēy :ng'ātuut /kee-ir mu pērēētuu *Sapaato?” 3 Kuwālchi :Yēēsu kilē, “Toomō asooman kir nyoo kii-ir :Tāwuti ākōō piich choo kiimii tōkōl paani kyaam :piri? 4 Kiiwō :Tāwuti *Kōpō Iriin /kēētē makatiin choo /kiikuchāmchinii *tis ākityōōn ku-am ama inyeentee ntā ku piichiich chu kiimii tōkōl. 5 Ntā toomō asooman :akwaan nkōō ng'ātuut chēpō *Muusa kilē /kuchāmchinii *tis ku-ir pāyit mu *Kōpō Iriin nkōō pērēētuu *Sapaato āmoomii chiich nyoo mwoorēy kilē kāput ng'ātuut? 6 Āmwoorwook kilē mii :kir nyoo ōōw yi kusiir *Kōpō Iriin. 7 Tākoonkēt :akwaan kiyoo ng'uutuuy siruut chēpō Iriin paani mwoorēy kilē, ‘Āchāmēy /keeriira piich kisiir /kee-ir kōrōs.’† Man ntā koonkēt :akwaan kiyoo mwoorēy ng'aleechu, ntā kāmoong'āloolēē nyaa ra piich choo māting'ēy ng'ālyoon. 8 Pāyuuy *:Wēēroo Chiich pērēētuu *Sapaato.”Kuusoopiisyēy :Yēēsu mu pērēētuu Sapaato
Maarkō 3:1-6; Luuka 6:6-11
9 Paani keewaang' :Yēēsu kumwoorēy kilēē nyoonēē, kung'eetee yoonēē akuwō sinakōōkii aka. 10 Kiimii kōyoonēē :chiitō aka nyoo kiirarak :ēēru. Kuteep *:Parisaay choo kiimii yoonēē Yēēsu kilē, “Ara chāmwēēch :ng'ātuut /kēēsoop chiich nkōō pērēētuu *Sapaato?” Kiiteep :pichoochēē kilēē nyoonēē āmu kiimārēy kilē kuutoomchi Yēēsu ng'al /tākēērwoochi. 11 Kuwālchi :Yēēsu pichoochēē kilē, “Ntā ting'ēy :chiich nkōō akwaan keecheenyiin akichinchi kēpēn nkōō pērēētuu *Sapaato, māng'usuuy? 12 Karaam :chiich kusiir keecha. Kunyuun oo, chāmwēēch :ng'ātuut kee-ir kir nyaa karaam nkōō pērēētuu *Sapaato.”
13 Paani keewaang' Yēēsu kumwa ng'aleechoochēē, kumwoochi chiichoonēē kiirarak :ēēru kilē, “Chuula ēēruu.” Kii nēē chuul :chiichoonēē ēēruu, kusop akukaramiit kilēē nyiinō aka. 14 Kii nēē ro :Parisaayichoochēē kiyoo ka-ira, kupēēchi keey akupa kuwas wōloo pārtooy Yēēsu.
Kwoopchinii :Yēēsu piich ng'al chēpō man
15 Kii nēē teer :Yēēsu ng'al choo kiimii :pichoochēē kusātēy, kuwēērō yoonēē. Kituup :piich chaa chaang'. Kuusoop piich tōkōl choo kiimnyoonchootēēn. 16 Kumwoochi :Yēēsu pichoochēē kukir keey kimapa kumwoochi chiich aka tōkōl kilē ng'oo :inyeentee. 17 Kii-ira nyoonēē sikuusilta :kir nyoo kiimwoorēy :Iriin kupunuunō *ōōrkooyoon *Isaaya kilē,
18 “Nyi ku kipāyityoonteenyuun nyoo kyoolēwēn,
nyoo āchāmēy ākoopāypāychinii.
Ātēnii Toomirmiiryeenyuun
aku inyeentee :nyoo āpchinii piich ng'al chēpō man.
19 Mākwiintoonēy ntā kupōlootō,
amākuursyootēy nkōō araa oor.
20 Mā-ilēy yaasyaan nyaa ng'uruukoot,
amēēmiisēy ma nyoo mii kumēērootēy.
Aku-irēy nyuun ākōy ku-ira :man.
21 Inyeentee nyi irēy piich mu ng'wēny kunyōōru pārooyin /kēēsāru.”†
/Kēētoomchinii Yēēsu ng'al
22 Kiimuti :piich Yēēsu chiich nyoo kiikoroot amāng'āloolēy āmu kiiting'ēy *toomirmiir nyaa ra. Kuusoop :Yēēsu chiichoonēē, kimararta chiichoonēē akung'alaal. 23 Paani keero :piich tōkōl choo kiimii yoonēē kiyoo kii-ir :Yēēsu, kukwōng'yō akuteep keey kilē, “Ara *Wēēroo Tāwuti :chiichi?”
24 Kii nēē teer *:Parisaay ng'aleechoochēē, kumwa kilē, “Ōōnēy :chiichi *toomirmiirēy chaa raacheen, kupāyiisyēērēē kaamuuka nyēpō *Pēēlsēpuul pāytooyiintoo *toomirmiirēy chaa raacheen.” 25 Āmu kiinkēt :Yēēsu kiyoo kiipkootēy :pichoochēē, kumwa kilē, “Kōōr aka tōkōl nyoo poorsōōt :piichiich kuputēē āmoomii kaaw nyoo ryoong'ēy nēē mii pēēsyoot. 26 Ku nēē pooryēērō *Syeetaani ku-oon chaachiich oo, kuuryoong'ēy :pāyuunāteenyiin kilē nee? 27 Ku nēē āpāyiisyēērēēyaa kaamuuka nyēpō *Syeetaani ā-ōōnēy *toomirmiirēy chaa raacheen oo, kuutēnii ng'oo nyuun piikwook kaamuuka ku-oon toomirmiirōōchoochēē? Apee nyuun akaapaateepa piikwook kumwoorwook man. 28 Wōloo nyuun nēē āpāyiisyēērēēyaa Toomirmiir nyoo Tiliil a-oon *toomirmiirēy chaa raacheen, kung'uutuuy kilē kiiku-itwaak :Pāyunātoo Kaa Iriin.
29 Ntā muukēē kilē nee kuchuut :chiich kōpō nyakan aku-āpō tukuuchiich nēē toomō kurat chiichoonēē kupōk tākuumuuk nyuun ku-āpō tukuuk?”
30 Kitas taay :Yēēsu kumwoochi Parisaayichoochēē kilē, “Chiich aka tōkōl nyoo moomii kamastanyuun, ku sāsoon. Ku chiich aka tōkōl nyoo mēētoorētoon keeruma, kuusārēētēy. 31 Āmwoorwook kilē, /kunyōōchinii chiich aka tōkōl kaat nyoo ka-ir ng'ōōki akimwaartaareenaan kir nyaa ra. Ku chiich nyuun aka tōkōl nyoo kamwaartaara kir nyaa ra Toomirmiir nyoo Tiliil, /kumākunyōōchinii chiichoonēē kaat. 32 Chiich aka tōkōl nyoo kang'alaala *Wēēroo Chiich nyaa ra, /kēēnyōōchinii kaat. Wōloo nyuun chiich aka tōkōl nyoo kang'alaala Toomirmiir nyoo Tiliil nyaa ra, ku /mākunyōōchinii kaat nkōō pērēētuusyēchu ntā ku pērēētuus choo pkoonēy.
33 Keet nyaa karaam, ku nāmēy lokoreechiich choo kāroomēēn. Ku :keet nyaa ra, ku nāmēy lokoreechiich chaa raacheen. Kunyuun oo, /kisōwuunēē keet lokoreechiich choo nāmēy. 34 Akwaan kipaang'ōōy! Muuktooy ānō amwa :akwaan ng'ālyoon nyaa karaam akaapka raacha? Āmu ng'al tōkōl choo ting'ēy :chiich mu moonyiin, kumwoorunēē kuutiinyiin. 35 Irēy :chiich nyaa karaam tukun choo kāroomēēn choo pkoonēē moonyiin, ku-ir :chiich nyaa ra tukun chaa raacheen choo pkoonēē moonyiin. 36 Āmwoorwook man kilē nkōō pērēētuuni pō lēt paani /kuurwoochinii piich, ku rārtooy :chiich aka tōkōl akipō ng'ālyoon nyaa ra nyoo kiimwa. 37 Nkōō pērēētuunoonēē pō lēt, ku ng'alēēkuuk choo kiimwaa chu tyookiin ntā kuratin.”
Ng'woonchinii :piich choo tāyēy Yēēsu
38 Kumwoochi *:Parisaay walak ākōō koonēēt chēpō ng'ātuut Yēēsu kilē, “Koonēētiin, kumāriin i-irweech kir nyēpō kwōng'uut nyoo ng'uutwēēch kilē iting'ēy kaamuuka nyoo chōōnēē wōloo mii :Iriin.” 39 Kuwālchi :Yēēsu pichoochēē kilē, “Kipng'ōōkiin choo tāyēy Iriin :chu mārēy kilē /kēēng'uuti kir nyēpō kwōng'uut. Ng'ālyoon kipaat nyēpō kwōng'uut nyoo /kung'uutinii pichoochēē ku nyoo kiipō *ōōrkooyoontoo Iriin Choona. 40 Kilēē paani kiimii :Choona moopō koorookwō pērēētuus sōmōk, kutēpēē nyuun mpō *Wēēroo Chiich kēpēn pērēētuus sōmōk. 41 Nkōō pērēētuuni pō lēt paani /kiirwoochinii piich, kuuryoong'ēy :piich chēpō Ninaawi akuurwoochi piich choo mēērānēy Iriin āmu kii nēē āmchi :Choona akwaaneek kuwāliisyō. Āmwoorwook man kilē mii yēēnyi aniinee :nyoo ōōw kusiir Choona. 42 Nkōō pērēētuuni pō lēt paani /kiirwoochinii piich, kuuryoong'ēy :cheepyooso nyoo kiipāytooy kōōroo Syeepa akuurwoochi choo mēērānēy Iriin āmu kichōōnō :cheepyoosoonoonēē wōloo lōōw akuchō kuteer ng'alēēpō ng'oroomnyoo Sōlōmōōn. Āmwoorwook man kilē mii yēēnyi aniinee nyoo ōōw kusiir Sōlōmōōn.”
Ra kitya nēē ōōchi keey :toomirmiir nyaa ra chiich
43 Kitas taay :Yēēsu kumwa kilē, “Nēē /ku-oon *toomirmiir nyaa ra kuwēērō chiich, kumānootēy mu suur kwēēn kuwāsootēy wōloo muung'ēē. Ku nēē mānyōōru, 44 kumwoochi keey kilē, ‘Kaykay awaraka wōli kyoomii.’ Nēē waraka nyuun, kunyōōruuy wōli kiimii ku tiliil akukaraam āmoomii :chiich nyoo māng'ēy. 45 Nkōō yoonēē, kuwēētii kumāruuy toomirmiirēy walak tisap chaa raacheen kusiir inyeentee, akupa kimāng' :tōkōl pōōrpō chiichoonēē. Nēē ir nyuun kilēē nyoonēē, kurāyiituuy :chiichoonēē kusiir taay. Irēē nyuun kilēē nyoonēē mpō nkōō wōloo mii :piich choo mēērānēy Iriin.”
Choo tuupchō nkōō Yēēsu
Maarkō 3:31-35; Luuka 8:19-21
46 Paani kiitākumii :Yēēsu kung'āloolchinii piich, ku-itu eeyeenyiin ākōō wēēchiikwaak. Kupka kuuryoochēērō saang' āmu kiimārēy kung'alaal ākōō Yēēsu. 47 Kumwoochi :chiitō aka Yēēsu kilē, “Mii :eeyēēng'uung' ākōō wēēchiikwook saang' akumārēy kung'ālooluun.” 48 Kuwālchi :Yēēsu kilē, “Ng'oo eeyeenyaa? Aku ng'oo wēēchiichan?” 49 Kuumuut kiineetanichiich akilē, “Pichu tōkōl mii yi ku eeyeenyaa aku wēēchiichan. 50 Chiich aka tōkōl nyoo irēy kilēē wōli mārtooy :Paapeenyuun nyoo mii kipsēnkwēt, ku wēēriinchan, chēētanchan aku eeyeenyuun.”