Kaarana nyēpō kāāntōōyiintoo luk nyēpō Rooma
7
1 Paani keewaang' :Yēēsu ku-āmchi piich ng'aleechoochēē, kuwō ākōy Kaaparnaam. 2 Kiimii nkōō pērēētuusyēchoochēē :kāāntōōyiin aka nyēpō lukoo pooryoot nyēpō Rooma nyoo kiiting'ēy kipāyityoontēēnyiin nyoo kiichāmēy. Kiimnyaan :kipāyityoontoonoonēē nyoo kiilēēkit kima. 3 Paani kateer :kāāntōōyiintoonoonēē akipō Yēēsu, kuuyooytō kāāntōōyik walak chēpō Yāwuutik kipa kung'āloolchi Yēēsu kuchō kuusoopchi kipāyityoonteenyiin.4 Kii nēē it :kāāntōōyichoochēē wōli mii :Yēēsu, kusaarsaar kumwoochi kilē, “Nēē mii :chiich nyoo rookēē /kēēsāru, ku chiipō Rooma, 5 āmu chāmēy :chiichi piichooch. Kiikutēēkwēēch mpō :inyeentee *sinakōōki.”
6 Kucham :Yēēsu kuwō nkōō kāāntōōyichoochēē. Paani kiiriik ku-it kaa kāāntōōyiintoonoonēē pō luk, kuuyooytō :kāāntōōyiintoonoonēē choorweeyiichiich kuutorooyta akumwoochi Yēēsu kilē, “Kiptaayaantaani, amee-iim keey āmu mēērookēē ataakin mu katanyuun. 7 Aku mēērookēē āchō ānyōōruun. Aku mwaara ng'ālyoon kipaat kusop :kipāyityoontēēnyuun. 8 Kaamwaa kilēē nyoonēē āmu mii :piich choo ēēchēēn kusiir aneen akimii :piich choo āpāytooy mpō. Nēē āmwoochi chiich kilē ‘Wiyō,’ kuwēētii ntā nēē āmwoochi aka kilē ‘Chōōnō’ kuchōōnēy. Ku nēē āmwoochi mpō kipāyityoontēēnyuun kilē ‘Ira kiyi’ ku-irēy.” 9 Kii nēē teer :Yēēsu ng'alēēpō chiichoonēē, kukwōng', kuwaraka akumwoochi piich chaa chaang' choo kiituupēy inyeentee kilē, “Āmwoorwook kilē, toomō aroo *Israayeeliin aka tōkōl nyoo ting'ēy kaarana nyoo lēē nyēpō chiichi.”
10 Paani kāwārākiisyō :pichoochēē /kiikiiyooytooy, kipa kunyōōru ōōtwookiintoonoonēē kiimnyoonēy ku kaakusop.
Kuung'ēētēē :Yēēsu meerat laakwaa cheepyooso nyoo kii lēē mōsōk
11 Nēē mii lētuun, kuwō :Yēēsu ākōō kiineetanichiich ākōō piich walak chaa chaang' kuutang' kōōroo Nayiin.
12 Kii nēē paanta ku-it :Yēēsu koopoor nyēpō māng'ootonoonēē, kutuuyēērō piich choo kiikālāpēy muusyoon nyēpō murēn nyoo kii wēērii ākoong'o nyēpō cheepyooso nyoo lēē mōsōk. Kiimii :piich chaa chaang' chēpō māng'ootonoonēē ākōō cheepyoosoonoonēē. 13 Kii nēē ro :Yēēsu cheepyoosoonoonēē, kuriira nyoo kāng'woochi akumwoochi cheepyoosoonoonēē kilē, “Cheepyoosooni, mēēriirēy!” 14 Nēē ityō, kuwō :Yēēsu akutiing' kiptaraanchee nyoo kiimii :muusyoontēē. Paani kātiing' :Yēēsu kiptaraanchaanoonēē, kuuryoonchō :pichu kikālāpēy muusyoontēē. Kilē :Yēēsu, “Wēēri, koomwooruun kilē, ng'eeta!” 15 Paani kamwa :Yēēsu kilēē nyoonēē, kung'eet :wēēroonēē kilē weel kutēpō ng'wēny akung'āloolchi piich choo kiimii yoonēē. Kinam :Yēēsu laakwaanoonēē akuutē kaamee.
16 Kuuwāriisyō :piich tōkōl choo kiimii yoonēē akuuloosu Iriin kumwoorēy kilē, “Kaakutooku aniinee *:ōōrkooyoon nyoo tōrōōr nkōō kwēēnuunyoon. Kaakung'uutwēēch aniinee :Iriin kaamuukeenyiin.”
17 /Kikyaamtaata ng'aleechoochēē kuyāmu kōōroo Chuuteeya tōkōl ākōō kōōrootin choo kiilēēkitēē kōōroonoonēē.
Kitēēpēy :Chowaana Koopootiisāniin nēē Yēēsu ku Meesaaya
18 Paani kapa :kiineetanipō Chowaana Koopootiisāniin kumwoochi Chowaana ng'al tōkōl choo kiiku-iraanu :Yēēsu, kukuur :Chowaana kiineetanichoochēē ārēēny 19 akuuyooytō kupa wōloo mii :Kiptaayaan. Kimwoochi kipa kiteep kilē, “Inyēēn *Meesaaya nyi kiimwoorēy *:ōōrkooy kilē mii kuchōōnēy, ntā mii :aka nyoo tākēēkānyoonuuy?”
20 Kii nēē it :kiineetanichoochēē wōli mii :Yēēsu, kumwoochi Yēēsu kilē, “Kēēyookwēēch :Chowaana Koopootiisāniin keeteepeeniin kilē, ‘Inyēēn *Meesaaya nyi kiimwoorēy *ōōrkooy kilē mii kuchōōnēy, ntā mii :aka nyoo tākēēkānyoonuuy?’ ” 21 Kii nēē itēy wōloonēē, ku kiimii :Yēēsu kuusoopēy piich choo mnyoonchootēēn nkōō kōrōōytiin aku-oonēy *toomirmiirēy chaa raacheen kupeera pōōrwēyiipō piich. Ku-ir mpō piich chaa chaang' choo kōryootēēn kuumararta.
22 Paani kāmwoochi :kiineetanichoochēē pō Chowaana Koopootiisāniin Yēēsu kiyoo kateep :Chowaana, kuwālchi :Yēēsu kilē, “Apee ākoopoomwoochi Chowaana kiyoo kaaroo akaateer. Mārārtooy :piich choo kōryootēēn, kupēētootēy :choo ng'woolyootēēn, kusopsōōt :choo kyaam :kōōnchēryoontō, kuteertooy :choo miinyootēēn, /kiikeeng'eeta meerat choo kiikumēērō /ākiikēē-āmchi choo mēēmuukēy keey lōkōōy choo kāroomēēn. 23 Kunyuun oo, pēēruuroot :chiich nyoo tiirēēnoon keey.”
King'āloolēē :Yēēsu Chowaana
24 Paani kaakupēēchi keey :pichoochēē kiiyooytooy :Chowaana, kumwoochi :Yēēsu piich akipō Chowaana kilē, “Paani kyaapa suur kwēēn wōloo kiimii Chowaana oo, kyoopkootēy kilē kaapaaroo chiich nyoo lēē nee? Kii chiich nyoo wiilēy :yoomēt aka tōkōl? 25 Nee nyi kyaapaaroo? Ara kii chiich nyoo kiilaak sirōōy choo tānkusēēn? Acha sōō! Piich choo lookēy sirōōy choo lēē choochēē akumāng'iisyēy nkōō ātēp nyēpō lala /kēēnyōōrchinii kooriipō pāytooy. 26 Ara kyaapaaroo nee? Kii *ōōrkooyoontoo Iriin? Man, kii ōōw :chiichi kusiir mpō *ōōrkooyoon. 27 Inyeentee nyi ng'āloolēē :Iriin mu siruut kilē, ‘Āyooytooy chiinyuun kuuntoroor kusātuun aree.’† 28 Āmwoorwook man kilē, moomii :chiich nyoo kiinam :cheepyooso nkōō ng'wēny nyoo ōōw kusiir Chowaana. Aku nyuun, chiich nyoo mātookuunoot nkōō Pāyuunātoo Iriin ku ōōw kusiir Chowaana. 29 Kiiteer :piich chaa chaang' ākōō mpō piich choo kikwārootēy *kōōti kiyoo kiimwoochi :amtaar nyēpō Chowaana, /akeepaatiisan. Kucham :pichoochēē kilē pō man ng'alēēpō Iriin.
Kiitay :piich chaa chaang' Chowaana ākōō Yēēsu
30 Aku kiitay nyuun *:Parisaayiik ākōō koonēēt chēpō ng'ātuut kiyoo mārēy :Iriin kilē ku-ir :akwaaneek, akutay mpō /keepaatiisan. 31 Akarkeeyiita nee nyuun pichu? 32 Karkeey :pichu nkōō laakōōy choo kātēpi kaaptuum akumwoochi :walak walak kilē, ‘Kakukuutwaak kuurēēru kimaanyaal, kēēlē kēētuumwook tuumwēy chēpō riirat, kumooriiryō.’
33 Kiichō :Chowaana Koopootiisāniin nyoo kiimaapāyēy keey kitya amārēēy *tiipaay, amwaakwaan kilē, ‘Ting'ēy *toomirmiir nyaa ra.’ 34 Ku kii nēē āchōōn *:Wēēroo Chiich apay keey ākoorēēsyō, areer amwaakwaan kilē, ‘Acha! Kimoo :nyi, kipōōkityoon aku choorwoo kwāriipō *kōōti ākōō kipng'ōōkiis.’ 35 Piich choo tuupēy ng'aleechu kusōwuuy ng'oroomnyoo Iriin.”
Ku-iilēē :cheepyooso nyoo kii kipng'ōōkiyoon kēēlyēēpō Yēēsu mwaar
36 Nēē mii lētuun, kumwoochi *:Pārisooyiin ākoong'o Yēēsu kipa ku-āmiisyō katanyiin. Kucham :Yēēsu kuwō nkōō chiichoonēē.
37 Paani kateer :cheepyoosee aka nyoo kiilēē kipng'ōōkiyoon nyoo kiimāng'ēy kōōroonoonēē kilē kiimii :Yēēsu ku-āmiisyēy nkōō kaa Pārisooyiintoonoonēē, ku-āp sētoo mwaar nyoo ng'uutooy nyaa anyiny. 38 Paani ka-it kōyoonēē, kuuryoong'ō pataruu Yēēsu, kuriichi yoo lēēkitēē kēēlyēēchiich akuriir. Kitāchi :lōōkik kēēlyēēpō Yēēsu kunuryō. Nēē ityō, kumiisa :cheepyoosoonoonēē puutēchiich lōōkik nkōō kēēlyēēpō Yēēsu. Āmu kiimārēy kung'uutu kilē kiikoonyit Yēēsu, kuchuuchun kēēlyēēpō Yēēsu akuu-iila mwaar.
39 Paani keero :Pārisooyiintoonoonēē pō kata kiyoo ka-ira, kilēēchi keey, “Ntā kāting'ēy :chiichi kaamuuka nyoo chōōnēē wōloo mii :Iriin, ntā kaakusōwu kilē kipng'ōōkiyoon :cheepyoosooni.” 40 Kung'alaal :Yēēsu kilē, “Siimnyōn! Mii :kir nyoo āmārēy āmwooruun.” Kilē :Siimnyōn, “Koonēētiin, mwoorwoon nyuun.” 41 Kumwoochi :Yēēsu kilē, “Kiing'eet :chiich aka, kuupēsēēnchi piich ārēēny rōōpiyō. Kiipēsēēnchi aka chaa chaang', kuupēsēēnchi aka choo ng'ērin. 42 Nēē mii lētuun, kimaakumuuk pichoochēē ārēēny kuraayta rōōpiyēēk, kunyōōchi kaat :chiichoonēē pichoochēē ārēēny. Ātēēpiin nyuun kilē oo, ng'oo nkōō :pichoochēē ārēēny nyoo chāmēy chiichoonēē kitya?” 43 Kuwālchi :Siimnyōn kilē, “Āpkootēy kilē nyi /kikuupēsēēnchi rōōpiyō chaa chaang'.” Kilēēchi :Yēēsu, “Keemwaa man!” 44 Kuwarak keey :Yēēsu kuurō cheepyoosoonoonēē, akumwoochi Siimnyōn kilē, “Keeroo cheepyoosooni mii yi? Kaakuu-uunō lōōkichiich kēēlyēēchuuch akuupuukō puutēchiich. Paani kaa-itu katang'uung', ku maakōōnoon pēr ā-uuntoorō tēērit nkōō kēēlyēēchuuch.” 45 Kumwoochi :Yēēsu :Pārisooyiintoonoonēē kilē, “Meemuuk :inyēēn itaakaan kilēē wōloo cham /kēētooktooy too. Nku kung'eetee ku-itu :cheepyoosooni yēēnyi kumii kukutung'ēē taayuunyuun akichuuchunēy kēēlyēēchuuch kung'uutu koonyit. 46 Maa-iilee :inyēēn mwaar mētinyuun, wōloo nyuun kee-iila :cheepyoosooni kēēlyēēchuuch.
47 Kunyuun oo, chamat nyoo ōōw nyoo kaakung'uutwoon :cheepyoosooni, kung'uutuuy kilē /kaakēēnyōōchi kaat ng'ōōkiichiich chaa chaang' choo kāting'ēy. Aku chiich nyuun nyoo pkootēy kilē /kākunyōōchi kaat ng'ōōki choo ng'ērin kipaat choo ting'ēy, kung'uutuuy choomnyoot nyoo mining'.”
48 Kumwoochi :Yēēsu cheepyoosoonoonēē kilē, “/Kaakēēnyōōwuun kaat ng'ōōkiikuuk.”
49 Paani kateer :piich choo kiimii ku-āmiisyēy nkōō Yēēsu ng'aleechoochēē, kuteep keey kilē, “Chiich ng'oo :chiichi muukēy kunyōōchi piich kaat ng'ōōkiikwaak?”
50 Kumwoochi :Yēēsu cheepyoosoonoonēē kilē, “Wiyō nkōō kaalya. /Kaakēēsāruun āmu kēētiirēēnoon keey.”