2 Kiimii mpō :chēēpyōōsōōy walak choo kipēētootēy nkōō Yēēsu. Chēēpyōōsōōchoochēē ku choo kiipkoontoochi :Yēēsu toomirmiirēy *chaa raacheen nkōō walak choo kiikuusoop nkōō kōrōōytiin choo kiiting'ēy. Chēēpyōōsōōchoochēē ku Maaryaa nyoo /kiikikuurēē Maktaleena nkōō kaarinee aka, nyoo kiipkoontoochi :Yēēsu toomirmiirēy tisap chaa raacheen choo kiiting'ēy. 3 Aka ku nyoo /kiikikuurēē Choowaan, cheepyoosoo chiitō aka nyoo /kiikikuurēē Yuusa nyoo kiiryoonchinii pāyit aka tōkōl nkōō kaa *Ērōōtē. Kiimii :mpō cheepyoosee aka nyoo /kiikikuurēē Susaana ākōō walak chaa chaang' choo kipēētootēy nkōō Yēēsu ākōō kiineetanichiich akupāyiisyootēērō tukuukwaak choo kiiting'ēy kuutōōrēt Yēēsu ākōō kiineetanichiich.

4 Kitas taay :piich chaa chaang' kupeera māng'oot chaa chaang' kupa wōloo mii :Yēēsu. Kii nēē tuuyō piich ku chaang'iit, kumwoochi :Yēēsu pichoochēē kārkēēyin kilē, 5 “Kiing'eet :pāliintēē aka pērēētuu ākoong'o, kuwō kitoot pareenyiin. Paani mii ku-isēē kāsur paree, kuchinchi :walak aree. Kutyakaatyak :piich choo kipēētii araanoonēē, akukwārchi keey :tāriit aku-am. 6 Kichinchi :walak woloo mii :korin, ku nēē mii kupiitsōōt, kuyoomō āmu maanyōōru :pēr choo yāmēy. 7 Kichinchi :walak wōloo mii :katōōy, kupiityō :katōōchoochēē aku-am pareek. 8 Kichinchi :kāsurēēk walak nyung'wēny choo kāroomēēn. Kupiityō :choochēē akunam par choo ēēchēēn.” Paani keewaang' :Yēēsu kumwooruuy ng'aleechoochēē, kumwa kilē, “Chiich nyoo ting'ēy iit, kusōwu.”

9 Aku kii nēē teep :kiineetanipō Yēēsu /kēēmwoochi kiyoo ng'uutuuy kārkēēyini, 10 kilēēchi :Yēēsu, “/Kiikēēchāmwook āsōwu kiyoo ung'aat akipō :Pāyunātoo Iriin. Piich walak kutēērēē ng'al tōkōl kārkēēyin kilēē paani siraat kilē,

11 Akanya ārārwook kiyi mwoorēy :kārkēēyini. Kāsuryoontēē ku ng'ālyoontoo Iriin. 12 Karkeey :piich walak nkōō aree oor nyoo kāchinchi :kōsur. Tēērēy ng'ālyoontēē, aku chōōnēy *:Syeetaani akusaree ng'ālyoontoonoonēē simeeran /ākēēsāru. 13 Ku paree yoo mii :korin ku karkeey nkōō piich choo tēērēy ng'ālyoon akutaak nkōō pāypooyō, akumānāmēy nyuun :pichoochēē ng'ālyoontoonoonēē kukaraam amātāsēy taay kuurānēy nyoo lōōw. Nēē nyōōru :ng'al choo kōrōōmēēn, kuuchuchuukiisyō. 14 Paree yoo mii :katōōy ku karkeey nkōō akwaaneek choo tēērēy ng'ālyoon, aku nēē mii kutāsēy taay, kuupkaat tukun chēpō ng'wēny, mōkōrnoonti ākōō lala nyēpō ng'wēny. Kiichēy :tukuuchoochēē tōkōl pichoochēē kimākiilyō. 15 Ku nyung'wēēk choo kāroomēēn ku akwaaneek choo nēē teer ng'ālyoon kunāmēy nkōō moo nyoo rēēl, akumurta ākōy kunam par.”

16 Kitas taay :Yēēsu kumwoochi kiineetanichiich kilē, “Moomii :chiich nyoo noomēy taayit akukara tēr, ntā kuuchuut kwērēroo kitōōk. /Kiinoomēy taayit /ākēētē yoo tōrōōr sikuulēpoochi piich choo chuutēy koot. 17 Kir nyuun nyoo ung'aat, /kēēng'oong'uuy. Ku kir nyoo tukoot, kutookuuy. 18 Āyāpchii iit nyuun kukaraam ng'al choo ātēērēy, āmu chiich nyoo pāyiisyēērēē kiyoo /kiikēētō /kēētāsinii walak, ku nyoo māpāyiisyēērēē, /kēēsārēē mpō kiyoo pkootēy kilē ting'ēy.”

19 Nēē mii pērēētuu aka kimii :Yēēsu ku-āmchinii piich lōkōōy, ku-itu :eeyeenyiin ākōō wēēchiikwaak. Kimaamuuk kunyōōru Yēēsu āmu kiikiiruruuchi keey :piich chaa chaang' yoo mii :Yēēsu. 20 /Kēēmwoochi Yēēsu kilē, “Mii :eeyēēng'uung' ākōō wēēchiikwook saang', akumārēy kunyōōruun.” 21 Kuwālchi :Yēēsu pichoochēē kilē, “Chiich aka tōkōl nyoo tēērēy ng'ālyoontoo Iriin aku-ir kilēē wōli mārtooy :Iriin, nyoonēē nyoo lēē eeyeenyaa ntā ku wēēchiichan.”

22 Nēē mii pērēētuu aka, kulaang' :Yēēsu ākōō kiineetanichiich mēēlii aka akumwoochi kiineetanik kiraang' mēēlii kutilta kamasta nyiinō aka. Kupēēchi keey. 23 Paani mii kutiltooy, kunam :rwoon Yēēsu. Kutākumii rwoon, kuchō :yoomēt nyoo nyikiis aku-ir pēr kuwasta keey kuusyoolchi mēēlii kuti paanta kuchuut :mēēlii araaray. 24 Paani keero :kiineetanik kilē mii :pēr kunyirēy mēēlii, kupa yoo kiimii :Yēēsu akuung'eet kilē, “Kiptaayaan, Kiptaayaan, kimii kēērookēy!” Kung'eet :Yēēsu akuupkoontō pērēēk ākōō yoomoonoonēē nyikiis. Kusiis :yoomee akutālāyiituuy :pērēēk kilē weel.

25 Paani kaakusiisyō pērēēk, kumwoochi :Yēēsu kiineetanichiich kilē, “Mii ānō kaaranēēng'woong'?” Kinam ng'aleechoochēē kuut kiineetanik. Kuuwāriisyō kwōng'uut akuteepa keey kilē, “Chiich nee :chiichi? Nku nēē ng'āloolchi mpō :yoomēt ākōō pēr kutēērēy.”

26 Kii nēē tilta :Yēēsu ākōō kiineetanichiich araaray, ku-it kōōroo Keeraasa nyoo kiikuurōōtinii yaar nkōō kōōroo Kalilaaya. 27 Kii nēē rēkuunō :Yēēsu mēēlii, kutuuyō nkōō chiich aka nyoo kiichōōnēē kōōroonoonēē nyoo kiikiikuu-iim *:toomirmiirēy chaa raacheen nkōō pērēētuus chaa chaang' akiimāting'ēy sira. Kiimāmāng'ēy :chiichoonēē kaaw. Kiimāng'ootēy kēpēnoot choo /kiikutupchinii piich. 28 Paani ka-it yoo kiimii :Yēēsu, kuunchō akuwiirchi keey ng'wēny, akupōl kumwoorēy kilē, “Yēēsu Wēēroo Iriin nyoo Tōrōōr, imārēēnoon nee? Āsoomiin kilē meenyariilaan.” 29 Kiimwoorēy :chiichoonēē kilēē nyoonēē, āmu kiipkoontō :Yēēsu *toomirmiir nyaa ra kuwēērō chiichoonēē. Kiikiikuu-iim :toomirmiiryoonoonēē chiichoonēē nkōō pērēētuus chaa chaang'. /Kiikiikēēriip chiichoonēē /akeerata āng'ōōpō kāriin kilē simēērip. Aku kiimuuk nyuun kung'āti āng'ōōchoochēē tōkōl akuwēēchi keey wōli pō suur kwēēn, āmu kiikupāyu *toomirmiirēy chaa raacheen.

30 Kuteep :Yēēsu chiichoonēē kilē, “/Kukuurēēniin ng'oo?” Kumwa kilē, “/Kukuurēēnoon ‘Luk.’ ” Kiimwa kilēē nyoonēē, āmu kiiting'ēy lukoo *toomirmiirēy chaa raacheen. 31 Kisaarsaar :lukoonoonēē Yēēsu kilē ma-oon akwaaneek kupa wōloo pēētii kunyārilēy ākōy.

32 Kiimii :ākwoot nyēpō nkurwēētiin nyoo kyookēētēē lakam nyoo kiilēēkitēē yoonēē. Kusoom :toomirmiirōōchoochēē raacheen Yēēsu kuchāmchi kupa kuchuut nkurwēētiinēchoochēē. Kuchāmchi :Yēēsu. 33 Kii nēē /kaakēēchāmchi, kupkaana chiichoonēē akupa kuchuut nkurwēētiinēchoochēē, kumwēr nkurwēētiinēchoochēē kuutang' sēēnkērēēr nyēpō araaray akupa kuchuut araarayta. Kutakus :pēr kuuwaang'.

34 Paani keero :māsowēēpō nkurwēētiinēchoochēē kiyoo ki-ira, kumwēr akupa kumwoochi piich tōkōl chēpō kōōroonoonēē kiyoo ki-ira. 35 Kupa :piichoochēē kuuro kiyoo kii-ira. Kii nēē it yoonēē, kuuro chiichoonēē kiikiikuu-iim *:toomirmiirēy chaa raacheen kutēpēē yoo kiimii :Yēēsu kuulaakaat akiikukaramiit. Kuuwāriisyō :pichoochēē tōkōl.

36 Kirarta :piich choo kiiro kiyoo ki-ira wōloo /kākiisooptō chiichoonēē kiiting'ēy *toomirmiirēy chaa raacheen. 37 Kii nēē teer :pichoochēē ng'aleechoochēē, kumwoochi Yēēsu kuwēēro kōōrēēng'waang', āmu kiikiikuwāriisyō nkōō kiyoo ki-ira. King'eeta :Yēēsu yoonēē akulaang' mēēli kumārēy kuwaraka kamasta nyiinō aka pō araaray. 38 Kuwō :chiichi kii-iimēy *toomirmiirēy chaa raacheen akusaarsaar Yēēsu kupa tōkōl. Kitay :Yēēsu, akilēēchi, 39 “Warakee kaaw akiiweemwaarta kiyoo kaa-iruun :Iriin.” Kuwō :chiichoonēē ku-amtaata nkōō kōōroonoonēē tōkōl ng'al choo kii-irchi :Yēēsu inyeentee.

40 Kii nēē waraka :Yēēsu kutaak :piich chaa chaang' āmu kiimii kukānyēy. 41 Nyoo matyaan, ku-itu :chiich nyoo /kiikikuurēē Chāyrō nyoo kii kāāntōōyiintoo *sinakōōki, kukutung'ō taayuu Yēēsu akusoom kuwō katanyiin. 42 Kiiting'ēy :poontoonoonēē laakweenyiin ākoong'o kipaat nyoolēē chēēto akiiting'ēy kēnyiis taman nkōō ārēēny. Kiimnyaanaat :laakwaanoonēē nyoo kiimii kumēērootēy. Kucham :Yēēsu kupa tōkōl.

Paani mii kupēētii, kuukiichaata :piich Yēēsu āmu kii chaang' :piichoochēē. 43 Kiimii :cheepyoosee aka yoonēē nyoo kiikiikumnyaan kēnyiis taman nkōō ārēēny kuupēērēy kērēti aku moomii :chiich nyoo kiimuuk kuusoop inyeentee. 44 Kichōōnō :cheepyoosoonoonēē Yēēsu lēt akutiing' tapanuu sireenyiin. Kukāriisyō :kērētiik kilē weel.

45 Kuteep :Yēēsu kilē, “Ng'oo nyi kātiing'ān?” Kii nēē tay chiitōkōl, kumwoochi :Pēētērō Yēēsu kilē, “Kiptaayaan, mēērōōtēy kilē keekiich keey :piich nkōō wōloo imii.” 46 Kuwālchi nyuun :Yēēsu kilē, “Ānkēt man kilē kātiing'ān :chiich, āmu ātēērēy kilē kēēsoop :kaamuukeenyuun chiich.”

47 Kii nēē ro :cheepyoosoonoonēē kilē māwung'ēē kiyoo ka-ira, kuchō nkōō koowāriisyō kupōōtānoonuuy akukutung' nkōō taayuu Yēēsu, akumwoochi kutēērēy piich tōkōl kiyoo ka-ir inyeentee kutiing' siraanoonēē pō Yēēsu nkōō wōloo kāsoptō kilē weel. 48 Kumwoochi :Yēēsu kilē, “Cheepyoosooni, kēēsop āmu kēētiirēēnoon keey. Ruutēē nkōō kaalya.”

49 Kutākumii :Yēēsu kung'āloolēy, kuchōōnō :chiich kaa Chāyrō akilēēchi Chāyrō, “Kaakima :chēētong'uung'! Meetee-iim koonēētiin.” 50 Kii nēē teer :Yēēsu ng'aleechoochēē, kilēēchi Chāyrō, “Mēēwāriisyō! Rana kipaat, sopēy chēētong'uung'.”

51 Paani ka-it :akwaaneek tōkōl kaa Chāyrō, ku maachāmchi :Yēēsu chiich aka tōkōl kuchuut kōyoonēē nkōō inyeentee king'ētu Pēētērō, Chowaana, Chēēmis, apootaa laakwee ākōō eeyeenyiin ākityōōn. 52 Kiimii :piich chaa chaang' kaayoonēē choo kiimii kuriirsōōt akuunchōōsōōt akipō meeraa chēēpoonēē. Kumwoochi :Yēēsu pichoochēē kilē, “Mooriirsōōt! Maama :laakwee, mii rwoon.” 53 Kiroorēchi :pichoochēē Yēēsu paani kamwa kilēē nyoonēē āmu kiinkēt man kilē kaakuma :laakwaanoonēē. 54 Kuwō :Yēēsu yoo kiimii :laakwaanoonēē, kunam ēēr akukuur kilē, “Laakwaani! Ng'eeta!” 55 Kuureer kusop :chēēpoonēē, kung'eet kilē weel kuuryoong'. Kumwoochi :Yēēsu pichoochēē kuutē laakwee kir ku-am. 56 Kikwōng'yō sikiipō laakwaanoonēē. Kikir :Yēēsu akwaaneek kumāmwoochi chiich aka tōkōl kiyoo ka-ira.