Yiesu n ŋɔn tundl nba Saaba po
12
1 L bo tie *Saaba daal i,
g Yiesu pend kpaab n ninŋ g sua dii bie o.
G kom suol u *ŋuantieb k b ji togd dii g pind g ŋman.
2 *Farisiɛn-nba n la nnyan,
k b maad Yiesu :
" Diid,
a ŋuantieb suun tuona nba k l g cab g nil ń sun Saaba daal. "
3 G Yiesu ŋmiɛn’m :
" I g lii Yendu Kadaaɔg n,
naan buol nba k l diɛn g ŋɔn kom n bo suol *Dafiid yen u yegni k b sun yal nba aa ?
4 I g lii k u bo kua *Yendu-cend-buol-jounŋ n,
g tug *salg kpanu k wan yen u yegni ŋman,
k l yen bo g cab k wan yen u yegni kul sua ń ŋman ii ?
Yab yid Yendu salg kua n bo bu fid g ŋman l kpanu.
5 Bii i g lii *Moyis kadaaɔg n ninŋ,
g Saaba daal,
Yendu *salg-yidkab nba suun tuonn *jaanddeciɛɔnŋ n mɔno tu sun tuonn l daal,
k l biɛ g tie k b tien biid ii ?
6 Yen mɔni n maad’i,
siɛl be ne g yab g cie jaanddeciɛɔnŋ.
7 Yendu maad k u bua yab jie b lieb ninbaaɔg u,
k u g bua yab yid’o salg kaa,
i bo gii gbad maam ne niimn,
i bo kan jalg n ŋuantieb k b tien biid,
k b yen g biil siɛl.
8 Saaba be *Nifosaal Bija nuu n i. "
Yiesu paag jua nba k u nuu bo kpe
(Mark 3.1-6 ; Luk 6.6-11)
9 Yiesu n nyiɛ l buol g gad b *tintaann dieog n.
10 L sua g jua nne be l tintaann dieog n k u nuu kpe.
Ban bo bua k ban jalg’o nyan,
k b bual’o :
" L cab k ban teb nil *Saaba daal ii ? "
11 G Yiesu ŋmiɛn’m :
" I ninŋ ne,
ŋmaa n baa mɔg peyeonŋ kua,
l pieog ń baa buoug n ninŋ Saaba daal k u kan jiid g nyan’o i ?
12 Nifosaal g cie pieog uu ?
Lann l cab g nil ń tien ŋanm Saaba daal. "
13 L youg g Yiesu maad jua ŋann k wan tand u nuu,
k u tand,
k l nuu paag g guan g tie nyan nuulieog nyan.
14 *Farisiɛn-nba n nyiɛ,
k b taan g kal g bobn ban bu tien nand g kpi Yiesu.
15 Yiesu n bann nnyan,
k u nyiɛ l buol g gad siɛl po,
g yiɛnm bonciɛnn ŋuan’o,
k u paag b kul,
16 g kpaa’b k ban daa ŋaa sua ń gbad,
17 g Yendu *sogni Esaayi n bo maad Yendu lanbona nba ń fid g tien yen mɔni :
18 " N tuonsunn nba k n lugd’o n ne,
min bua yua,
k u mɔ sɔnŋd n pal n nyan.
N tan bu te’og n *Foŋanm
wan ŋɔn niib kul mamɔni sɔnu.
19 U tan kan kpaan maam,
u biɛ kan gii maad g tand.
Nil kan gbad k u maad sɔnjala po.
20 U gii la tibil nba jɔl u kan kɔnn’o.
U biɛ kan junn fidl nba g ŋanm g so,
saa yen youg nba k u tan bu te niib kul ń bann mamɔni sɔnu.
21 Niib kul tan baa daan u ninŋ i. "
Yiesu mɔg paalu g cie Sitaan
22 L po n pend k b baal yen jua nne Yiesu buol ;
*sanpola n bo ŋua’ɔg,
k u juan g biɛ muu.
G Yiesu paag’o k u ji fid g nyuan g biɛ maad.
23 K l yaa g lid niib nba bo be l buol nyan kul k b ji maad :
" U ne kaa baa tie *Dafiid Bija ii ? "
24 Ama *Farisiɛn-nba n gbad nnyan k b maad :
" U ne nuan kub *Bɛlsebuul paalu i,
yua tie sanpola bad,
g biel sanpola. "
25 G Yiesu bann b maalm,
g maad’b :
" Doug nba ninŋ g niib g taa mɔb,
b tu tan juod g yad i.
L doug g be,
lann i kaa l ŋaag g be,
g niib baa kɔn yen lieb lan fid gii sie.
26 L gii tie g *Sitaan n biel Sitaan,
lann Sitaan guan g kɔn yen u kua n nyan.
L bu tien nle i u ŋaag ń fid gii sie i ?
27 I gii yed k min nuan diɛ Bɛlsebuul paalu i g biel sanpola,
i *ŋuantieb diɛ ŋmaa paalu i g biel’b i ?
I ŋuantieb mɔno n bu ŋɔn i biid.
28 Ama l gii tie k n diɛ Yendu *Foŋanm paalu i g biel sanpola,
l ŋɔn g Yendu *bal pund i buol n nyan.
29 Nil kan fid g kua jua nba mɔg paalu ŋaag g fiel u tiɛd,
l gii g tie k u liid g lol l japaalug yen ŋui i kaa.
U gii lol’o nuan,
u bu fid g kua g baan u mɔgm kul g yaad yenn.
30 Yua g taa n po,
u tie n ninnand i.
Yua g tod’n k n taand mɔ,
u yad i.
31 L po n te k n maad’i,
nil gii biil Yendu,
lann i kaa nil gii sugd Yendu,
l daan bu fid g la sugl.
Ama nil gii sugd Foŋanm,
l daan kan la sugl.
32 Nil gii maad mabiid *Nifosaal Bija po,
l daan bu fid g la sugl,
ama nil gii maad mabiid Foŋanm po,
l daan kan ban g la sugl baa yaa youg.
33 I gii tuo g tiŋanŋ n luon luanŋana,
yin tuo g tibiiug mɔ luon luanbiid.
B band tiig u luana buol i.
34 Yinm waalaba ne,
i tie nibiid i,
i bu tien nle i g maad maŋanm i ?
G dugn nil pal n gbie yen yal,
u mɔb maad lann i.
35 Nimɔn n nyanŋ u pal n bonŋana g dugn u pal ŋan.
G nibiiug mɔ nyanŋ u pal n bonbiil g dugn u pal bi.
36 N maad’i,
Yendu n bu bu niib yaa daal,
yua kul bu dugn mafinfam nba k u maad,
yen yal po k u maad l maam.
37 G dugn l daal a maam n bu te ŋan la mɔni,
a maam n biɛ bu te ŋan luol mɔni mɔ. "
38 L youg g Yendu Kadaaɔg *gbanbanda yen *Farisiɛn-nba nne gaal maam g maad :
" Canbaa,
t bua k a tien siɛl g ŋɔn k a yaalidug bona nya Yendu buol i. "
39 G Yiesu guan g ŋmiɛn’m :
" Nibiid,
yab nba kpiɛd Yendu sɔnu kal g miɛd yaalidug bonn.
B yen kan la siɛl yaa yaalidug bonn,
l gii g tie Yendu n bo tien yal u *sogni *Sonas po i kaa.
40 Nyan Sonas n bo tien yentuna ŋantaa yen nyiɛd ŋantaa jankpel tug n ninŋ nyan,
nnyan i g *Nifosaal Bija mɔ bu tien yentuna ŋantaa yen nyiɛd ŋantaa tinpual n.
41 Yendu n bu bu niib yaa daal,
Niniif yab bu te yinm mɔlane niib ne i biid,
g dugn Sonas bo muand’b Yendu Laabaal k b lebd binbem o.
Yua nba yen be ne cie Sonas.
42 Yendu n bu bu niib yaa daal,
yanbaɔnŋ puobada bu fiil g te yinm mɔlane niib ne i biid,
k l maa u bo nyiɛ hal banfagl i,
g baal k wan cenŋ *Salomɔn yanfomaam.
Yua nba yen be ne yab g cie Salomɔn.
43 *Sanpol gii ŋua nil,
k b tan bel g yaan’o,
u tu gad gii waa *tinkuonŋ n ninŋ i,
g kpaan naan k u bu fuod.
U gii kpaan kpaan g luol,
44 wan maad k u bu lebd g ŋuan wan daan kpiɛ g ŋua nil nba i.
U gii guan l buol g sua g siɛl g be g bu pan’o,
45 wan guan g lebd g daan yiin u lieb banlile,
yab biɛ g cie wano mɔno,
b kul ń guan g ŋanm gii ŋua l nil.
L youg,
nil ŋann binbem ji baa bi g cie lan daan kpiɛ g tie nand.
Yinm mɔlane nibiid ne,
i binbem tan baa tie nnyan i. "
Yiesu ninjanm yen u naa
46 Yiesu biɛ daa bo maad yen niib i,
k u ninjanm yen u naa tan baal g sie cincann g kpaan k ban la’ɔg.
47 G sua nne tan maad Yiesu k u ninjanm yen u naa be cincann g bua’ɔg.
48 G Yiesu ŋmiɛn’o :
" Ŋmaa tie n naa i ?
B lɛ n tie n ninjanm i ? "
49 Lann i k u tand nuu u *ŋuantieb po g maad :
" N naa yen n ninjanm n nyan.
50 Yua suun n Baa nba be polu n bua yal,
wano n tie n ninja,
wano n tie n niipuo,
wano n biɛ tie n naa mɔ. "