Yiesu n maad u ŋuantieb yal Farisiɛn-nba po
12
1 L youg l sua g niib tigl tuda tuda,
g ŋmaad lieb,
g Yiesu ji cil g maad u *ŋuantieb k nne :
" Suol man i kua yen *Farisiɛn-nba dibina,
lann n tie b munafigi nba k b mɔg.
2 Siɛl g wuo g tan kan wuod.
Siɛl biɛ g tie ŋasiil g sua tan kan bann.
3 Lann n te k yin maad yal kul bunbɔnn n ninŋ,
b tan bu gbad yensiig n.
K yin sɔb g maad yal kul lɔdg n,
b tan bu kpaand niib kul siign ninŋ.
I maad man g daa jie
4 Yinm,
n dɔnn-nba,
n maad’i,
daa jie man yab nba bu kpi nil,
g yen ji kan fid g tien siɛl l puol po.
5 N bu ŋɔn’i yin baa jie yua nba.
I jie man nil kuum puol po yua nba bu fid g lu’ug muu nba so g kan ban g junn n ninŋ.
Ɛɛn,
n maad’i,
i jie man wano.
6 B g kuad nɔnbid banmu g gaan ligli waam nne ii ?
Yen l yaa kul,
Yendu g suni baa yend po.
7 Baa i yud mɔno,
Yendu ban l dugl.
Daa jie man,
i cie nɔnbid kul.
8 N maad’i,
yua nba maad niib nunŋ n ninŋ,
k u tie n yua,
min *Nifosaal Bija mɔ tan bu maad Yendu *malɛg-nba nunŋ n ninŋ,
k n ban’o.
9 Ama yua nba yie niib nunŋ n ninŋ,
k u g tie n yua,
n mɔ tan bu yie k n g ban’o Yendu malɛg-nba nunŋ n ninŋ.
10 G nil nba kul bu maad mabiid Nifosaal Bija po,
l daan bu la sugl,
ama nil nba yiin *Foŋanm fam,
l daan kan la sugl.
11 Youg nba k b bu gad yen’i Suif-nba *tintaann died n ninŋ,
b buuddanm yen b yikodanm buol,
i daa jaad man i kua,
g kpaan yin bu kɔn i kua po nand,
lann i kaa yin bu maad yal.
12 K l maa Foŋanm bu ŋɔn’i l youg mɔno,
yin bu maad yal. "
Tinŋ n ninŋ ne ŋalman
13 G niib siign ninŋ,
yend maad Yiesu :
" Canbaa,
maad n ninja k wan bɔgd’n t baa faal. "
14 K u maad’o :
" Ŋmaa n kaan’n k n gii bu i buud i,
lann i kaa k n gii bɔgd i faal i ? "
15 K u biɛ maad’b :
" I ceg man !
Suol man i kua yen ŋalman buam.
K l maa nil gii bua wan gii mɔg mɔgm nba kul,
lann kaa bu fid g guul u miɛl. "
16 Lann i k u pua’b makpanjam g maad :
" Nil nne n bo be g tie mɔgd,
k u bonkukuod tien hal bonciɛnn.
17 K u ji tan mali mali k u bu tien nle ?
K u g mɔg wan bu bil u bonkukuod naan nba.
18 G ji maad :
“ N ban min bu tien yal nba :
n bu bed n bunbɔa,
g guan g maa bunbɔciɛnd,
g taan dii yen min mɔg bona nba kul g ŋuun.
19 N gii tien nnyan,
n ji bu maad n kua k nne :
Diid a,
a mɔg bondikal bonciɛnn g bu di hal bina nba yab.
Kal gii fei,
gii di g nyu,
gii tie jaanm. ”
20 Ama g Yendu maad’o :
“ A g mɔg yam !
Dinne nyiɛɔg ne mɔno,
a miɛl bu junn.
K ŋan ji taan taan yal ne kul i,
l ji baa tie ŋmaa yal i ? ”
21 L tie nnyan i,
daan nba kpaan ŋalman u kua po,
g yen g kpaan k wan gii mɔg Yendu buol yaa mɔgm. "
22 G Yiesu biɛ maad u *ŋuantieb :
" L po n te k n maad’i.
Daa tun g mali i miɛl po yin bu di yal,
yen i gbannand po yin bu liɛ yal.
23 K l maa miɛl n cie jied,
g gbannand mɔ cie tiɛd.
24 Diid man kinkaad.
B g buul,
b biɛ g yend.
B g mɔg bunbɔa,
b biɛ g mɔg bunbuna.
G Yendu yen dinŋ’b.
I g cie bonyugda ii ?
25 I ninŋ ne,
ŋmaa i,
k u maalciɛnm po,
u bu fid g te u miɛl ń fagd baa waam nne g pugn i ?a
26 Nnyan,
l gii tie k i g mɔg paalu bonn nba tie bonbig po,
bɛ po i k i fabn yal nba tenn po i ?
27 Diid man tiidi n kped nand g tien puug.
B g suun tuonn,
b biɛ g luug tiɛd mɔ.
Ama n maad’i,
g bad *Salomɔn nba bo mɔg bonciɛnn mɔno bo g ban g liɛ tiɛd k l ŋan nyan tiidi ne ninŋ baa tiyenŋ nyan.
28 Yendu gii lanŋ muaɔg n tiidi nba be dinne,
g wonn k b won bu cua g kuun muu n ninŋ,
bɛ po i k u kan lan yinm nifoi i ?
I *dindann g yab baa waam nne.
29 Yinm,
i daa kpaan man yin baa di yal,
lann i kaa yin baa nyu yal.
I daa ŋmad man i yam l po.
30 Yab nba g dug Yendu po n mɔg l yanbani.
Yinm nuan,
i Baa Yendu ban k l bona kul ne tie payiɛnu i po.
31 Lann,
daa cind man g tuo Yendu *bal o,
g yal nba tenn kul,
u bu pugn’i.
32 I daa jie man,
yinm Yendu buolu nba g yab,
k l maa i Baa Yendu cegn g bu din’i bal.
33 Kuad man yin mɔg yal g te tali ligli.
Nyal man ligkɔla nba kan cad g bil man i mɔgm Yendu *ŋaag,
naan buol k l kan biɛl,
g naayig kan fid g jan,
g kuutuul mɔ biɛ kan fid g mua.
34 K l maa i mɔgm n be naan nba,
i maalm mɔ be l buol i. "
Bobn man gii guu Nifosaal Bija guanu
35 Yiesu biɛ maad u *ŋuantieb :
" Liɛ man i tuonsuntiɛd,
g son i fida gii kub,
36 gii tie nyan naasenm nba guu youg nba k b canbaa bu nya puobiɛnn g kpen nyan.
U tan gii kpen g tien kafala,
ban luod gann l youg mɔno.
37 L baa tie pamann i l naasenm po,
youg nba k b canbaa bu kpen g sua k b nyuan.
Yen mɔni n maad’i,
wano mɔno bu liɛ tuonsuntiɛɔg g te k ban kal,
k wan te yua kul jied.
38 U gii kpen yɔugsiiug,
lann i kaa kuutonmɔni g la’b nnyan,
l baa tie pamann i l naasenm po.
39 Ŋanm g cenŋ man ne :
Ŋaagdaan bo gii ban naayig n bu baal nyiɛɔg yaa youg nba,
u bo kan ŋaa wan kua u ŋaag n.
40 Lann,
mɔ ń baan man gii guu,
k l maa *Nifosaal Bija tan bu baal yin g mali k u bu baal youg nba i. "
41 G Piɛr bual’o :
" Yonmdaan,
t yaa po i k a pua makpanjam nba ne bii niib kul po i ? "
42 G Yonmdaan maad :
" Tuonsunn nba k u canbaa guun’o u tuonsunlieb,
k wan gii tien’m jied ban bua yaa youg nba,
l tuonsunn gii ceg,
g biɛ cenŋ u canbaa maam,
43 k u tan kpen yaa daal g sua k u ŋanm g suun u tuonn,
pamann baa tie l tuonsunn yal i.
44 Yen mɔni n maad’i,
u canbaa bu tug u mɔgm kul g guun wano i.
45 Ama l gii tie k l tuonsunn maad u pal n ninŋ k u canbaa daa kan kpen mɔlane,
g ji suol naasenm yen sipaanm nba tie u tuonsunlieb g pua,
g di,
g nyu,
g guog daam,
46 u canbaa tan bu kpen wan g guu yaa daal,
yen youg nba k u g ban i,
g pua g pad pad’o,
nyan ban tu tie nibiid nand nyan.
47 Tuonsunn nba ban u canbaa n bua yal,
g yen g bobn siɛl,
g g tien yal nba g canbaa bua,
b bu pua’ɔg bonciɛnn.
48 Ama yua nba g ban u canbaa n bua yal,
g tien yal nba dagd yen puad,
b kan pua’ɔg bonciɛnn.
Yua nba k b tie’og bonciɛnn,
b tan bu bual’o l po bonciɛnn.
Yua nba k b piɛn’o bonciɛnn,
b tan bu ŋanm g bual wano i bonciɛnn.
Niib bu paad yen lieb Yiesu po
49 N baal yen muu i tinŋ po ne,
g biɛ sun k l bo suol o.
50 Fala be g guu’n k n bu kua l n nyan ban tu jiid nyuncinn n nyan,
k n yam g dua baa waam nne,
saa yen l kul n tan bu tien g gbenn.
51 I mali k n baal yen manu i niib siign tinŋ ne po ii ?
N n,
n maad’i,
n baal yen paadu i.
52 Lan cil mɔlane g ji gii saa,
ŋaag nba ninŋ g niib tie banmu,
b bu paad yen lieb,
bantaa ń kɔn yen banle,
g banle ń kɔn yen bantaa.
53 Bibaa ń kɔn yen u bija,
g bija mɔ ń kɔn yen u baa.
Binaa ń kɔn yen u bipuo,
g bipuo mɔ ń kɔn yen u naa.
Salnaa ń kɔn yen u sipuog,
g sipuog mɔ ń kɔn yen u salnaa. "
Bann man bona nba tie mɔlane niimn
54 G Yiesu pugn g maad niwulug :
" I gii la g tawalgbaɔnŋ nyiɛ puol,
i tu maad l youg mɔno,
g taag yin,
k u kon tu baa.
55 Faalu gii nyiɛ yanbaɔnŋ,
i tu maad g tuntounŋ baa be,
lan kon tien nnyan.
56 *Munafigidanm !
I tu diid tinŋ n,
g yaad g diid polu po g ŋɔn daal n baa tie nand.
K l ji tien nle i k i ji kan fid g bann mɔlane bona nba tie ne niimn i ?
Tuod man g gbad lieb maam
57 L tien nle i k yinm mɔno g ban yal nba dagd yen yin tien i ?
58 Fin yen nil gii mɔg maam k u saa yen’a buuddanm buol,
ŋan tuod yin gbad i lieb maam g sua k i daa paa sɔnu po,
lann i kaa u bu dad g gad yen’a buuddaan buol i,
ban juab’a,
g te sijenm,
k ban luon’a dansalg.
59 N maad’a,
a gii ŋaa k b luon’a l buol,
a kan nya saa yen youg nba k a bu pa l kul,
g kan tenn baa kuug. "