1 Min Pɔl yen Silas^a yen Timote n da kadaaɔg ne g tien yinm Kristo-yab nba be Tɛsaloniik,

g tie t Baa Yendu yen t Yonmdaan Yiesu Kristo yab.

Yendu ń yad yedŋanm i po,

g te k i yam ń gii dua.

2 T tiend Yendu balg i kul po youg kul,

g biɛ tiɛn i po youg kul t jaandi n ninŋ.

3 T Baa Yendu buol,

t tiɛn yin dug u po nand g suun tuona,

g tiɛn i buam n te k i fid g sun tuona nba yen pakɔnn,

g biɛ tiɛn i *dindann n cie nand t Yonmdaan Yiesu Kristo n ninŋ.

4 Yinm nba tie t naataani,

t ban g Yendu buad’i g biɛ lugd’i k yin gii tie u yab.

5 G dugn *Laabamann nba k t bo muand’i,

t bo g muand’i maam kukua kaa,

t bo ŋɔn *Foŋanm paalu mɔ.

Foŋanm n bo tod’ti k t muand’i l Laabamann g biɛ ŋɔn k t pala paa l po.

Youg nba k t bo be i buol,

yinm mɔno ban tin bo be nand k l tod’i

6 k i ŋmaa tinm yen t Yonmdaan taabuod n ninŋ.

Yen yin bo l be cicagciɛnm n nand kul,

k i tuo g gaal l Laabamann yen pamann nba g Foŋanm tien.

7 Maseduann yen Akaayi Kristo-yab kul la i buol i g bann ban baa be nand.

8 Nnyan i g niib gbad Yonmdaan maam k l ji g tie Maseduann yen Akaayi yab kua kaa,

ama kaannaa kul niib gbiɛ yin dug Yendu po nand k l ji g bual k tin maad siɛl l po.

9 Niib kul maad yin bo tuo g gaal’ti nand youg nba k t bo baal i buol,

yen nand nba k i bo yie g g pug yennaankad,

g ji guan g pug Yendu nba tie miɛldaan yen mɔni,

10 g ji guu k u Bija Yiesu ń nya polu po g baal.

Wano i g Yendu te k u yied kpienm siign k wan fid g fiel’ti wano Yendu mutuol nba baad ne ninŋ.