Pɔl n cind g diɛn kadaaɔg nba g tie
TIMOTE
Fuondi
1
1 Min Pɔl n da kadaaɔg ne.
Yendu t *Fietua yen Yiesu Kristo,
yua k t daan u ninŋ,
n cab’n mɔb k n tie Yiesu Kristo *sundu.
2 N fuond’a Timote,
fin nba tie n bimɔnŋ *dindann n.
T Baa Yendu yen t Yonmdaan Yiesu Kristo ń yad yedŋanm a po,
g te’a pasiɛdl yen yam nba dua.
Pɔl maad Timote k wan suol u kua yen faaɔgdanm tundl
3 Nyan min daan saa Maseduann g maad’a nand nyan,
i be Efɛs.
Siɛb be l doug n g diɛ tundfann g ŋɔnŋ niib.
Bel’b k ban daa tie nnyan.
4 Maad’b ban ŋaa b kpelug yen b yaajanm yaa yaajanm sana nba g mɔg juog nyan.
Mɔniɛɔg i kaa,
l g pugd siɛl Yendu tuonn nba po k t suun yen *dindann.
5 N maam ne bua lan fiin buam i,
buam nba nya papienn n ninŋ yen maalŋanm n ninŋ yen binbem nba dagd dindann n ninŋ.
6 Siɛb ŋaa l sɔnu i,
g bod g kua mafinfam n ninŋ.
7 B yi b kua Yendu *Mɔmaam gbanbanda i,
g yen g ban ban maad yal,
g bual ban pua pal g maad k b ban yal.
8 T ban g Yendu Mɔmaam ŋan,
l gii tie k t tug g sun yen tuonn lan bual nand.
9 Tin ŋanm g gbad bonyenn.
Yendu Mɔmaam g nyuan yab tuag Yendu sɔnu kaa.
L nyuan yab g cɔln u Mɔmaam yen yab yie u Mɔmaam i,
g nyuan tondanm yen biiddanm,
g nyuan yab g cɔln Yendu g bual yal nba tie Yendu yal,
g nyuan yab kpi b baa-nba yen b naa-nba,
yen nikpiila kul.
10 Yendu Mɔmaam nyuan jab yen puob nba tie cunconm i,
g nyuan jab nba dua yen lieb.
L nyuan nikuada i,
faaɔgdanm yen yab polg ŋalaaci.
L nyuan yab l yie mamɔni tundl kul i.
11 L tundl n be *Laabamann nba ninŋ g Yendu tug g kubn’n.
L ŋɔnŋ Yendu yudand i.
U buol i,
g bonŋana kul nya.
Pɔl tiend Yendu balg yen wan jie’og ninbaaɔg
12 N tiend t Yonmdaan Yiesu Kristo balg,
wano nba tie’n paalu k n bu sun u tuonn.
U la k n dagd yen wan gii dug n po i,
g tie’n l tuonn,
13 min nba bo biid u sann,
g ŋɔnŋ’o fala,
g sugd’o.
Ama g Yendu yen jie’n ninbaaɔg,
g dugn n bo suun yen yanbɔnm i,
n bo g mɔg *dindann.
14 Ama t Yonmdaan tie’n *ŋalbalg nba g mɔg po,
g tie’n dindann yen buam nba be Yiesu Kristo n ninŋ.
15 Min bu maad yal ne tie mɔni i,
l dagd yen nil ń tuo l maam yen u pal kul :
Yiesu Kristo baal ŋanduna ne ninŋ k wan fiel biiddanm i,
min n be liig biiddanm kul siign.
16 G Yendu jie’n ninbaaɔg,
min nba be liig biiddanm kul siign,
g Yiesu Kristo ŋɔn u pasɔnŋl n ninŋ.
G dugn u bo bua g niib nba tan baa dug u po ń la n buol i,
g gaal u maam,
g la *miɛl nba kan ban g gbenn.
17 Yendu n tie bad nba fo youg kul g kan ban g kpe,
g sua biɛ g nyuan’o.
U tie Yenduyend i.
Dondl yen yudand ń gii tie u yal,
mɔlane saa yen youg nba g mɔg juog.
*Amɛnn.
18 N big Timote,
n bu te’a mɔbonn ne,
nyan Yendu *sogni-nba n bo maad yal a po siɛnyoug nyan.
A bu nyii l maam po i g ŋanm g kɔn kunkɔnn nba dagd,
19 gii diɛ dindann,
a pal n ninŋ ń gii ŋan.
Siɛb yie g g cenŋ b pala n maam i,
g buon b dindann.
20 Imene yen Alɛksandr mɔ tie l nibuolu i.
N daan tug banm i g cab *Sitaan k ban la fala g ŋaa Yendu sann biilu.