Núǹtiyɛ̀ɛ̀ma 14

Corrections après conseiller 21.01.05

Fàdàɔ̰́ɔ̰̀ bɔ̀hàta Ìsìdàyɛ́dìpa.

¹ Kà pá m'péé ye Ètám̀ yɔtí, kà Kɔ́yɔ̀ɔ é caka Mɔ̀yísì è yɔ̀: ² Á caka Ìsìdàyɛ́dìpa è yɔ̀ pá fidí é tóní é tɛ̀ni é kpɛ̰́ḭ́ pa fḭ́ḭná bɛ̀m̀bɛ̀ni pà toò-di Píì-Hàìdɔ́tì yìhìka, kà nì péé Mìkìdɔ́dì nà dàmɛ́dì ye cɔhàka. Mií-dà nɛ kó m'péé-ma dàmɛ́dì nùdi, é n'coó-nà Bàá-Sèfɔ̰́ɔ̰̀^a. ³ Fàdàɔ̰́ɔ̰̀ kó m'maàhu è tonà Ìsìdàyɛ́dìpa fée-é-ma ye tenkà mɛhɛkà, è mɛ́mú càwenkú mɛhɛká è hàǹta. ⁴ N kó kpekàna-á-ma o toùka, k'ó yídá nɛ tṵṵ̀na é nɛ bɔhà. Àmá, mɛnń n'ɔ̀ɔ ta̰nìpa, n kó pà cɛ̰́ńcí-ma é bɛka n wɛhimú, k'yé teha kà Èsípútì yam̀ma é bantá è yɔ̀ mmí-dà héé Kɔ́yɔ̀ɔ. Kà Ìsìdàyɛ́dìpa é pa̰á̰ pà pà cakáà-sa wɛǹni.

⁵ Pà de cakáà-ma Èsípútì wódo n'ɔ̀ɔ sɔ̰̀ǹkànɔ̀ti è yɔ̀ Ìsìdàyɛ́dìpa yɛdì pa teǹka, kà pá cehèna pa yam̀màhàka pa hḭ́ǹka, kà pá caka pa cɔ̰́ɔ̰̀di è yɔ̀: M̀mɔ́ńya̰-dà ti pa̰à̰-ma ye pesà-ní? Baà tee kà tí héé Ìsìdàyɛ́dìpa kà pá ka̰há, é yee t'aa pà héé-ma kà pá ti m'pa̰kú ti tɔná? ⁶ Kà Fàdàɔ̰́ɔ̰̀ é dɔ̀hà o wóo-sa̰n-dawɛ́ɛ̀ku, é tóó-nà o ta̰nìpa kà pá tṵṵ̀na. ⁷ K'ó tóó Èsípútì ta̰à̰pu sa̰ndawɛ́ɛ̀ti wɛǹni bá mɛ̀ǹkù dɛ̀ɛ̀ nà ku ta̰a̰-nìpa wɛǹni. Ti mɛhɛká mɛ̀ǹtì kpenì-ti dɛ́dɛ́í de yòǹ kɔ̀ɔ-nàkɔ̀dì-dà. ⁸ Kɔ́yɔ̀ɔ de kpekànà-á-ma Èsípútì wódo, Fàdàɔ̰́ɔ̰̀ toùka. K'ó yíí è pà yɔ̀ yà̰pù. Pà de yɛtì Èsípútì è yá̰á̰-ma è yɔ̀ pà yɔ̀ɔ-nà núǹti. ⁹ Kà Èsípútì Sósìpa é tódá pa ta̰à̰pu sa̰n-dawɛ́ɛ̀ti, nà pa sa̰nhí, nà pa sa̰ndáápa é bɔhà Ìsìdàyɛ́dìpa é pà nɛ̀ǹta kà pà kàdi è hɛ́dí-nà dàmɛ́dì, Pí-Hàìdɔ́tì bɛ́ka, è wáń Bàá-Sèfɔ̰́ɔ̰̀.

¹⁰ Fàdàɔ̰́ɔ̰̀ pà tɔ́kàǹta-má, kà pá diìda óò dɛ́há, é n'hɔ̰́tà Èsípútì yam̀ma pà bɔ̀hàta-á-ma-ní. Kà wantafɔ̰̀sàdi é pà cɛ̰́dí, kà pá cemá tódá dawòka è yún Kɔ́yɔ̀ɔ. ¹¹ Kà pá béka Mɔ̀yísì è yɔ̀: Kpíifɔ̰̀ɔ̰cí de koò kɔ́ɔ́-ní Èsípútì mɛhɛká, k'á ti tɛɛ̀-ní càwenkú mɛhɛká kà ti kó kpíí-i? A ti pa̰à̰ badà ye pesà-ní é ti deèna-ní Èsípútì mɛhɛká? ¹² Ti d'aa cakú-sa dɔ-ní Èsípútì mɛhɛká è yɔ̀: Ti héé sɛ̰́ɛ̰́ɛ̰́, kà tí n'dehú Èsípútì yam̀ma. Pa kú dehàma pú tɔ̰ṵ-nà t'a kpíí-ma càwenkú mɛhɛká?

¹³ Kà Mɔ̀yísì é pà tɛ̰́ná è yɔ̀: Nɛ dá n'wani, cɛ̰ɛ̰́-nà nɛ cɔ̰́ɔ̰̀di yɔkàma é dɛ́há Kɔ́yɔ̀ɔ kó nɛ fḭ́hìna-má kú bookú yenì. Èsípútì yammà nɛ máá-pà yenì, nɛ koò pú kó tṵ́má pà dɛ́há daadí yènì. ¹⁴ Kɔ́yɔ̀ɔ-dà kó ta̰á̰ nɛ ta̰à̰pu, nɛ́na baà é cɛ̰ɛ̰́ nɛ cɔ̰́ɔ̰̀di sɛ̰́ɛ̰́ɛ̰́.

Kɔ́yɔ̀ɔ fità dàmɛ́dì é deèna cɔ̀ku.

¹⁵ Kà Kɔ́yɔ̀ɔ é caka Mɔ̀yísì è yɔ̀: Badà tee k'à n yún è yɔ̀ m'áa tempanà? Caka Ìsìdàyɛ́dìpa è yɔ̀ pá cɛ̰ɛ̰́ cɔ̀ku. ¹⁶ Fɔ̰́ń, á tódá a ya̰kú é kù yòda dàmɛ́dì hḭ́ǹka, é pṵtá cɔ̀ku, k'yé teha kà Ìsìdàyɛ́dìpa é cèn tenkpeèka é deèta. ¹⁷ Mmí mɛ̀ɛkà, n kó kpekàna-á-ma Èsípútì yam̀ma toòka, kà pá nɛ tṵṵ̀na é dúú. Ye wɔ̀ni, ká n bɛka n wɛhimú sá̰pu é cɛ̰́ńcí Fàdàɔ̰́ɔ̰̀ n'ɔ̀ɔ ta̰a̰-nìpa wɛǹni, n'ɔ̀ɔ ta̰à̰pu sa̰ndawɛ́ɛ̀ti é pɛ́ɛ́-n'ɔ̀ɔ sa̰ndáápá. ¹⁸ Ma kú bookú-dà n kó bɛka-má n wɛhimú Èsípútì yam̀ma kà pá́ bantá è yɔ̀ mmí-dà héé Kɔ́yɔ̀ɔ.

¹⁹ Kà Weèdi tɔntɔndikó mɛ̀ǹǹ de hɔ̰́ n'nihí-ko Ìsìdàyɛ́dìpa yìhìka é fitá é tón pa dàhàka, é pɛ́ɛ́-nà ye wɔ́ɔ̀di mɛ̀nì mɛ̀ɛ té de hɔ̰́ pà n'nihí-di, kà ní tón pa dàhàka. ²⁰ Kà ní tɛ̀ni é ca̰ká Èsípútì yam̀ma nà Ìsìdàyɛ́dìpa pa cɔhàka. Èsípútì yam̀ma bɛ́ka, kà nì yòǹ yḭ́ḭ̀pu, Ìsìdàyɛ́dìpa bɛ́ka kà nì tìi yèǹka. Ye yèǹka ka wɛǹni mɛhɛká, pa pàcɔ̰́pà pú tɔ́kánà pa tɔɔ̀pa.

²¹ Kà Mɔ̀yísì é yoòda o nɔ̀ku dàmɛ́dì hḭ́ǹka. Ye wɔ̀ni, kà Kɔ́yɔ̀ɔ é kpetá-ní yakpeekú weèdi yɛɛ̀ku-má-ní, kà kú tɛ̀ni é heé ye yèǹka ka wɛǹni, é totá ye dàmɛ́dì cɔ̀ku màdɛ́ɛ́, k'òo cɔhàka é kpɛí wáwákú, ²² k'yèe nɛ́ɛmá é hḭn maací Ìsìdàyɛ́dìpa cà̰ǹkamá nà pa heùma, kà pá cèn tenkpeèka óò dèta. ²³ Kà Èsípútì yam̀ma é tṵṵ̀na pa dàhàka, Fàdàɔ̰́ɔ̰̀ sa̰nhí, n'ɔ̀ɔ sa̰ndáápa, n'ɔ̀ɔ ta̰à̰pu sa̰ndawɛ́ɛ̀ti wɛǹni, ye wɛǹni k'yé tṵǹna é dúú dàmɛ́dì cɔhàka. ²⁴ K'yé n'wekàta, kà Kɔ́yɔ̀ɔ é wáńtá-ní Èsípútì ta̰nìpa, n'ɛ̀ɛ ha̰mú n'ɛ̀ɛ wɔ́ɔ̀di mìì de ca̰ncí-sa mɛhɛká, ye wɔ̀ni é buupa pa ta̰cèmu. ²⁵ K'ó cɔ̰ha pa ta̰à̰pu sa̰n-dawɛ́ɛ̀ti tàka kà kà feupù è dɔɔ̀-ní, kà pá hɛ̰ka cèmu. Ye wɔ̀ni, kà Èsípútì yam̀ma é kpákada è yɔ̀: Tí cocí é nátá-nà Ìsìdàyɛ́dìpa, mìì tee-sá, Kɔ́yɔ̀ɔ-dà ti tɔ̰ṵ-nà pa kpɛ́mú.

²⁶ Kà Kɔ́yɔ̀ɔ é caka Mɔ̀yísì è yɔ̀: Yoòda a nɔ̀ku dàmɛ́dì hḭ́ǹka, k'yèe nɛ́ɛ́mà é tóní é tɛ̀ni é dáná Èsípútì yam̀ma nà pa ta̰à̰pu sa̰ndawɛ́ɛ̀ti nà pa sa̰ndáápa.

²⁷ Kà Mɔ̀yísì é ca̰à̰na o nɔ̀ku ye dàmɛ́dì hḭ́ǹka. K'yé n'wekú-ní, K'yèe dàmɛ́dì nɛ́ɛmá é tóní ma yòǹti. Kà má m'bɔdì-ní, kà Èsípútì yam̀ma é fokadá cokemú. Àmá, kà Kɔ́yɔ̀ɔ é héé kà nɛ́ɛmá pà dii dàmɛ́dì cɔhɔ̀ka. ²⁸ K'yèe nɛ́ɛmá é tóní é dii Fàdàɔ̰́ɔ̰̀ ta̰à̰pu sa̰n-dawɛ́ɛ̀ti, nɔ̀ɔ sa̰ndáápa é pɛ́ɛ́-n'ɔ̀ɔ ta̰a̰-nìpa mɛ̀m̀pà de dúú-pa wɛǹni ye dàmɛ́dì mɛhɛká è bɔ̀hɔ̀ta Ìsìdàyɛ́dìpa. Bá p'oòcɔ̰́ de pú fḭ́tà. ²⁹ Há̰kà, kà Ìsìdàyɛ́dìpa mɛmpa de é cèn tenkpeèka hḭ́ǹka é deèta ye dàmɛ́dì. Pa kú pesá, K'yèe nɛ́ɛmá de hḭn maací pa cà̰ǹkamá nà pa heùma.

³⁰ Ye kú daadí-dà, Kɔ́yɔ̀ɔ de fḭ́hìnà-ma Ìsìdàyɛ́dìpa Èsípútì yam̀ma nɔ̀hi mɛhɛká, kà pá dɛ́há Èsípútì yam̀ma kpíípa ye dàmɛ́dì nùdi. ³¹ Kà Ìsìdàyɛ́dìpa é dɛ́há nɔɔ̀ti sàti Kɔ́yɔɔ̀ de ta̰á̰-nà-ti Èsípútì yam̀ma. Mɛmá-dà kà p'óò wampa é taàa pa dandanní mɛnń n'ɔ̀ɔ dapàǹn Mɔ̀yísì pa hḭ́ǹka.