Núǹtiyɛ̀ɛ̀ma 15

Corrections après conseiller 21.01.05

Mɔ̀yísì nà Ìsìdàyɛ́dìpa deèn fḭ́hìnamá nɛ́ńyɛ̰̀ǹfa

¹ Ye kú dàhàka, kà Mɔ̀yísì nà Ìsìdàyɛ́dìpa é deèn nɛ́yɛ̰̀ǹfa é duntà Kɔ́yɔ̀ɔ è yɔ̀:

N kpɛ̀i é duntà Kɔ́yɔ̀ɔ-dà, mìì tee-sá, ò dii o wɛ̀ɛ̀tɔ̀pa ta̰à̰pu.

Ò ká̰ńtá sa̰ndáto n'ɔ̀ɔ sa̰ǹta dàmɛ́dì mɛhɛká.

² Kɔ́yɔ̀ɔ-dà yòǹ n nɔɔ̀ti nà n nɛ́yɛ̰̀ǹci yudí

Mɛnń-dà n fḭ́hìnà,

Mɛnń-dà yòǹ n Weèdi, kà n k'óò n'dùǹti

Mɛnń-dà yòǹ n báàa Weèdi,

N k'óò n'fa̰ntí-ma.

³ Kɔ́yɔ̀ɔ-dà yòǹ ta̰kpedo,

O yèdì Kɔ́yɔ̀ɔ ò sà-nà-á-ma.

⁴ Ò hutà dàmɛ́dì mɛhɛká Fàdàɔ̰́ɔ̰̀ ta̰à̰pu sa̰n-dawɛ́ɛ̀ti n'ɔ̀ɔ ta̰nìpa,

Kà kpà̰à̰ti dàmɛ́dì é dii Èsípútì ta̰kpeépa mɔ́mpá.

⁵ Kà nɛ́ɛsa̰nhí é pà dáná,

Kà pá níḿ háá nà teǹka è yònà tá̰à̰di.

⁶ Ó! Kɔ́yɔ̀ɔ, a nɔ̀ǹkàheukú bɛkáà ku nɔɔ̀ti wɛhimú sá̰á̰pu,

A nɔ̀ǹkàheukú cɛ̰́ńcí a wɛ̀ɛ̀tɔ̀pa.

⁷ A wɛhimú pú sá̰à̰nà mùcɔ̰́mù.

Mù hán a wɛ̀ɛ̀tɔ̀pa-dà.

K'àa fɔ̰́ɔ̰́di yídà, kà ni ha̰mú té pà cɔ́dá é n'yònà míti.

⁸ N'àa fohìdi yakpemú-dà nɛ́ɛmá makà-ma màmàhàka kpɛ́ɛmá,

kà nɛ́ɛ-sa̰nhí é madí è yònà maafá,

é yídá kà nɛ́ɛdatí é nɛɛ̀hi tem dàmɛ́dì mɛhɛká.

⁹ Ti wɛ̀ɛ̀tɔ̀pa de maàhu è tonà:

Ti kó pà bɔ̀hà-á-ma, é pà nɛ̀ǹta, é tódá pa kpààti, é totá ti yàma kpɛ̀kaàma.

Ti kó tɛ̀i é nɔ̀dì-í-ma ti sepɛ̰ɛ̰̀ká é pà kɔ̀ù.

¹⁰ Mɛ̀ɛkà fɔ̰́ń Kɔ́yɔ̀ɔ, k'á heé a yakú, kà dàmɛ́dì nɛ́ɛmá é pà dáná,

kà pá níḿ è yònà ha̰tá̰à̰ka nɛ́ɛsàma mɛhɛká.

¹¹ Ó! Kɔ́yɔ̀ɔ! Nìpa wàci mɛhɛká, m̀mɔ́ńfa-d'àà yònà?

M̀mɔ́ńfa d'àà tɛ̀i wenikú hḭ́ǹka,

Kà pà fà wani, kà fà sà-nà duntàma,

Kà fà kó nɛɛ́ é pa̰á̰ pɔ́ńtá pa̰á̰ma? ¹² A yodà a nɔ̀ǹkàheukú-dà,

Kà teǹka é nítá mɛ̀m̀pà de ti bɔhɔ̀ta-pá.

¹³ A fḭ́hìnà a nìku!

N'àa dɔ́kàma-dà a kù cɛ̰ǹ-ma.

N'àa kpeèti, k'à kù túdí è kù kɔ́dí-nà a tenwenká hḭ́ǹka. ¹⁴ Kà boocí tɔɔcí mà yèka è cèùdi. Kà wantafɔ̰̀di é hɔdá Fìdìsìtíìpa.

¹⁵ Kà Èdɔ́mù wóópa bɔ̀ti pudì,

Kà wantafɔ̰̀di é cɛ̰dí Mɔ̀ápù wóópa kà pà cèùdi,

Kà Kànánìpa wɛǹni wɔ̰̀ǹti é yá̰á̰ka.

¹⁶ Wantafɔ̰̀di nà bɔpùukú-dà kó dɔɔ-ní pa hḭ́ǹka.

A nɔ̀ta pa̰á̰sàma kó pà bàci-í-ma kà pá n'yònà tá̰à̰ka,

háá k'àa nìku a fḭ́hìna-ku é yɔ̀ɔ ka̰há kà pà pú n'nɛɛ̀ é wɛdá.

¹⁷ A kù kɔ́dí-nà Kɔ́yɔ̀ɔ, è kó taá kù kàna a ta̰à̰di hḭ́ǹka-dà.

Ye bɛ̀m̀bɛ̀nì-dà a dɔɔ̀haà-ma è kó m'péé,

é maá a hɔ̰́ɔ̰wentá. ¹⁸ Kɔ́yɔ̀ɔ, a kó n'wóó-ma k'yé n'kɔ́ɔ́ yɔ̀ɔmá!

¹⁹ Fàdàɔ̰́ɔ̰̀ n'ɔ̀ɔ ta̰à̰pu sa̰n-dawɛ́ɛ̀ti, n'ɔ̀ɔ sa̰nhí n'ɔ̀ɔ sa̰ndáápa de dúú-ma dàmɛ́dì mɛhɛká, kà Kɔ́yɔ̀ɔ é tɛ̰́ná-ní pa hḭ́ǹka ye dàmɛ́dì nɛ́ɛdí. Àmá Ìsìdàyɛ́dì bííhí mɛnhi de cèn tenkpeèka hḭ́ǹka-dà óò dèta. ²⁰ Kà Ànɔ́ɔ̀ potɔ̰ɔ̰̀ɔ̰ Mìdìyám̀, k'ò yòǹ Weèdi wɛtɛ̰́náko, é tóó béǹta, kà poòpa tɔɔ̀pa wɛǹni é tṵṵ̀na o dàhàka nà pa kpɛ́ɛ́hí kà pà béǹ è hɔu-nà. ²¹ Kà Mìdìyám̀ cɔ́hú nɛ́ńyɛ̰̀ǹfa pà dèǹ-fa è tonà:

Deèn-nà é duntà Kɔ́yɔ̀ɔ,

Mìì tee-sá, ò bɛkáà o wɛhimú-dà.

Ò ká̰ńtá dàmɛ́dì mɛhɛká sa̰ntepá nà pa sa̰nhí.

Pà pèǹtà Màdáà nɛ́ɛtohimá kà má naaka

²² Kà Mɔ̀yìsì é yíkàna Ìsìdàyɛ́dìpa kpà̰à̰ti dàmɛ́dì nùdi, kà pá coá Súù càwenkú bɛ́ka. Kà pá cèn daàa kàta̰a̰ càwenkú mɛhɛká, pà pú dɛ́tà nɛ́a. ²³ Kà pá tɛ̀i Màdáà, pà pú nɛɛ̀ é nìì nɛ́ɛmá mɛ̀mà de péé-ma ye pesá, mìì tee-sá, mà de tohi-í-ma. Mɛmá-dà tee, kà pà yún ye bɛ̀m̀bɛ̀ni è nì tonà Màdáà, mìì kpɛ̀i é n'yɔ̀-sa tohikú. ²⁴ K'yèe nìku é kɛ̰̀ḭ-nà Mɔ̀yísì óò béka è yɔ̀: Ti kó yà̰à̰ ba? ²⁵ Kà Mɔ̀yísì é kɔń-nà Kɔ́yɔ̀ɔ, k'óò bɛka tepú mùcɔ̰́mù kú dɔkú, k'ó kù bɔ́kádá é ká̰ńtá ye nɛ́ɛmá mɛhɛká kà má naaka.

Ye pesá-dà, Kɔ́yɔ̀ɔ de kɔ̰́ɔ̰̀-ma Ìsìdàyɛ́dìpa kpɛ̰́ńtìnùka nà pa hɔ̰́ɔ̰weḿma kpɛ́ɛká, ye pesá-dà mɛ̀ɛ tṵ́mà dɛ̀ɛ̀ ò de pà bɛń-ma. ²⁶ K'ó pà caka è yɔ̀: Kà nɛ n besí dɛ́dɛ́í mmí Kɔ́yɔ̀ɔ nɛ Weèdi, è pa̰kú mìì coó-sa n yìhìka, kà nɛ bekù n kpɛ̰́ńtìnùka è fòù-nà n hɔ̰́ɔ̰wencí, n pú kó nɛ hɛ́í-ní dɔnkú kùcɔ̰́kù n hɛ́i-cí wɛǹni Èsípútì yam̀ma hḭ́ǹka, mìì tee-sá, n yòǹ Kɔ́yɔ̀ɔ mɛ̀ǹǹ nɛ kpekànì-ko-dà. ²⁷ Ye kú dàhàka, kà pá ta̰ntá bɛ̀m̀bɛ̀ni pà toò-di Èdím̀, kà bínhí píì-hìdɛ́ɛ́ yè péé nà pṵ́ṵná púyehì. Kà pá tɛ̀i cá̰ńtá ye pesá é kpɛ̰́ḭ́ pa fḭ́ḭná è hɛ́dí nà nɛ́ɛmá.