Núǹtiyɛ̀ɛ̀ma 16

Réviser en équipe 14-12-04. Corrections après conseiller

Weèdi pɛ̰ḭ ni nìku dipú pà toò-pu màánì nà dayɛ̰́hí

¹ Kà Ìsìdàyɛ́dì nìku wɛǹni é yídá Èdím̀ é ta̰ntá càwenkú pà toò-ku Síǹ, kà kù péé Èdím̀ nà Sìnàyíì ye cɔhàka. Kù de ta̰ntà ye pesá ku cḭḭ̀dɛ́ɛmá dapíì-nùm̀ daadí-dà nà kù yɛɛ̀ni-má-ní Èsípútì teǹka mɛhɛká. ² Ye càwenkú mɛhɛká-dà, Ìsìdàyɛ́dì nìku wɛǹni de kɛ̰̀ḭ-nà-ma Mɔ̀yísì nà Ànɔ́ɔ̀. ³ Kà kú pà caka è yɔ̀: Yè de suu-ú-ma Kɔ́yɔ̀ɔ é ti n'kɔù-ní Èsípútì teǹka mɛhɛká, ti de hɔ̰́ n'kaàdi-sá è cɛ̰̀tà maǹ-kṵ́ḿpohí, è té dii dimá é yó wukàda. Kà n'aá ti tɛɛ̀-ní càwenkù mɛnkù kú mɛhɛká è kó kɔ̀ù ye nìkù mɛnkù kú wɛǹni kòni.

⁴ Ye kú dàhàka, kà Kɔ́yɔ̀ɔ é caka Mɔ̀yísì è yɔ̀: N kó héé kà dipú-dà é dɔɔ-ní nà hḭ́ǹka tafá kpɛ́ɛmá nɛ kpɛ́mú. Daàka wɛǹni, nìku té yɛ̀dì é kodá dipú mɛ̀mù kó kù n'sàà-pu daadí nìcɔ̰́ dimá. Mɛmá-dà, n kó kù bɛń-ma é dɛ́há kà kù kó tṵṵ̀na n kpɛ̰́ńtìnùka yoo kà kù pú kó kà tṵ̀na. ⁵ Dakɔɔ̀dí daadí, pà té mù kodá pà hɔ̰́ mù kokamá daadí nìcɔ̰́ cɔ̀ku màdɛ́ɛ́ é béná.

⁶ Kà Mɔ̀yísì nà Ànɔ́ɔ̀ é caka Ìsìdàyɛ́dìpa wɛǹni è yɔ̀: Yohokù mɛnkù, nɛ kó bantá-ma è yɔ̀ Kɔ́yɔ̀ɔ-dà nɛ denà-ní Èsípútì teǹka mɛhɛká. ^7-8 Ò kó nɛ pa̰a̰-á̰-ma-ní màǹci kà nɛ́ cécí, mìì tee-sá, ò yèkaà-á-ma kà n'ɔɔ̀ kɔ̰̀ǹti-nà. Ká̰ńweǹni ká̰ńyɛ̰̀ǹfa, ò kó tṵ́má nɛ pa̰a-á̰-ma-ní dimá kà nɛ́ dii é yó wukàda k'yé teha kà nɛ́ dɛ́há o wɛhimú sá̰pu. Tḭ́ńti héé m̀mɔ́ḿpa-dà kà nɛ kó ti kɛ̰̀ḭ-nà? Kà nɛ ti kɔ̰ǹti-nà, kà nɛ́ n'yá̰á̰ è yɔ̀ mɛnń-dà nɛ kɔ̰ǹti-nà-ma, tḭ́ńti pú dɛɛ.

⁹ Kà Mɔ̀yísì é caka Ànɔ́ɔ̀ è yɔ̀: Caka Ìsìdàyɛ́dì nìku wɛǹni è yɔ̀ kú hɛ́tá-ní Kɔ́yɔ̀ɔ pesá, mìì tee-sá, ò yèkaà-á-ma ku kɔ̰ɔ̰̀ka o hḭ́ǹka.

¹⁰ Anɔ́ɔ̀ wɛì-nà tḭ́ń wɔ̀ni Ìsìdàyɛ́dì nìku wɛǹni, kà kú fitá é coá càwenkú bɛ́ka, é cemá dɛ́há kà Kɔ́yɔ̀ɔ wɛhimú é foó-ní wɔ́ɔ̀di mɛhɛká.

¹¹ Kà Kɔ́yɔ̀ɔ é caka Mɔ̀yísì è yɔ̀: ¹² N yeèkaà-á-ma Ìsìdàyɛ́dì bííhí kɔ̰ɔ̰̀ka. Á hì caka è yɔ̀, yookù mɛnkù hì kó cécí màǹci-dà, ká̰ńweǹni ká̰ńyɛ̰̀ǹfa, kà hí dii dipú é dɛn dɛ́dɛ́í k'yé teha kà hí bantá è yɔ̀ mmí-dà héé Kɔ́yɔ̀ɔ hi Weèdi.

¹³ K'yé hḭn yohokú, kà dayɛ̰́kùkùhi hìcɔ̰́hì kú bookú é pɔ̰tá-ní é tɛ̀ni dáná bɛ̀m̀bɛ̀ni pà kpɛ̰́ḭ́-di pa fḭ́ḭná. Kà yèǹka é wentá, pà hɔ̰́tà ye teǹka wɛǹni dádí mam̀ti-dà. ¹⁴ Ye mam̀ti yɔ̀ɔ tḭ́ń wɔ̀ni, kà pá n'hɔ̰́tà nɛmú mùcɔ̰́mù dádí ye teǹka hḭ́ǹka è yònà tasíńtá̰a̰mú. ¹⁵ Kà Ìsìdàyɛ́dìpa éè dɛ́há, è békú pa tɔɔ̀pa è tonà: M̀mɔ́ńya̰-dà miì? Pà de békú mɛma mìì tee-sá pà de p'éè yá̰á̰. Kà Mɔ̀yísì é pà caka è yɔ̀: Dipú Kɔ́yɔ̀ɔ nɛ pɛ̰ḭ-pú-dà-ní è yɔ̀ nɛ́ dii. ¹⁶ Ǹtɛ ò nɛ hḭ́mpú: Bá mɛ̀ǹǹ dɛ̀ɛ̀ é kodá ò kó nɛɛ́ dii-sá k'yé ò n'sà daadí nìcɔ̰́. Nɛ́ kodá nìi yudí dítídìpa pànàhì kpɛ́ɛmá, é bedí nɛ hɔ̰́ɔ̰́tà kpɛ́ɛpá sá̰ma.

¹⁷ Kà Ìsìdàyɛ́dìpa é pa̰á̰ pà de pà hḭ́mpú. Kà pàcɔ̰́ é kou sàma, tɔɔ̀pa cɛ̰́ma. ¹⁸ Pà há̰ de hɔ̰́ beé-ma n'ɛ̀ɛ beésa bá mɛ̀ǹǹ dɛ̀ɛ̀-ko kodà-sa, é n'hɔ̰́tà mɛ̀m̀pà de koò-pa sàma de pú káá è ha̰tà. Mɛ̀m̀pà mɛ̀ɛ de koò-pa cɛ̰́ma yè de pú pà dóhéní. Bá mɛ̀ǹǹ dɛ̀ɛ̀ de hɔ́ kodá mìì k'óò n'sà-sà-dà dipú.

Weèdi kpɛ̰́ńtìnùka màánì hḭ́ǹka.

¹⁹ Kà Mɔ̀yísì é pà caka è yɔ̀: N'ɔɔ̀cɔ̰́ǹ dá sɔ̰́ńtá ye dipù háá-nà ká̰ńweǹni ká̰ńyɛ̰̀ǹfa. ²⁰ Mɛ̀ɛkà, kà pàcɔ̰́ é yeda pà pú besí Mɔ̀yísì, é sɔ̰́ńtá ye dipú háá-nà ká̰ńweǹni ká̰ńyɛ̰̀ǹfa. Kà bɛùka mɛ̀ɛ é mù dúú, kà mú́ pɛ̰̀ḭ. Ye wɔ̀ni, kà Mɔ̀yísì é mɔka-nà ye yam̀ma fɔ̰́ɔ̰́di. ²¹ Ká̰ńyɛ̰̀ǹci wɛǹni, kà pà té kodá pà kó dikamá k'yé pà n'sà daadí nìcɔ̰́ mɛhɛká. Kà wèǹku bii, kà mìì sɔ̰́ńtà-sa té daǹta.

²² Dakɔɔ̀dí, kà pá kodá bá mɛ̀ǹǹ dɛ̀ɛ̀ hɔ̰́ dii-sá k'yé ò n'sà daadí nìcɔ̰́, cɔ̀ku màdɛ́ɛ́. K'yèe hɔ̰́ɔ̰́hí kpɛ̰́m̀ma wɛǹni é tɛ̀ni é caka Mɔ̀yísì pà pa̰káàma. ²³ K'ó pà tɛ̰́ná è yɔ̀: Kɔ́yɔ̀ɔ de hḭ́mpú-dà, è yá̰á̰ ká̰ńweǹni yòǹ *damuhipàdi-dà Kɔ́yɔ̀ɔ cenà-di o kpɛ́mú. Nɛ́ béná mìì yòǹ-sa yé béná, é sɛhìna mìì yòǹ-sa yé sɛhìna. Mìì kó sɔ̰́ńtá-sa, kà n'ɛ́ɛ̀ hḭ́ná háá ká̰ńweǹni ká̰ńyɛ̰̀ǹfa

²⁴ Kà pá hḭ́ná ye mìì de sɔ̰́ńtà-sa háá ká̰ńweǹni ká̰ńyɛ̰̀ǹfa é n'yònà Mɔ̀yísì de hḭ́mpú. Bɛùka mɛ̀ɛ de pú yè dúú, yè mɛ̀ɛ de pú pɛ̰̀ḭ. ²⁵ Kà Mɔ̀yísì é pà caka è yɔ̀: Yè dii-nà yenì, mìì tee-sá damuhipàdi-dà, Kɔ́yɔ̀ɔ daadí. Yenì kpɛ́ɛ́dì, nɛ pú kó dɛ́tá yècḭ́ḭ̀ tapaàdi. ²⁶ Daàa kàkɔ̀dì mɛhɛká, nɛ té kó mù dɛ́há-ma é kodá. Há̰kà, dayeèhidí daadí, damuhipàdi-dà, mù pú kó m'péé.

²⁷ Nà mɛma, dayeèhidí daadí, kà Ìsìdàyɛ́dìpa pàcɔ̰́ baà é yɛɛ̀ni è toò pà kó dɛ́tá dipú-dà é kodá, mɛ̀ɛkà, pà pú dɛ́hà yècḭ́ḭ̀. ²⁸ Mɛmá-dà, kà Kɔ́yɔ̀ɔ é caka Mɔ̀yísì è yɔ̀: Háá nà wɔ̀ni m̀mɔ́ńni-dà nɛ baà kó n'sɔ̰ncí-ma è yení n hɔ̰́ɔ̰wencí nùka nà n kpɛ̰́ńtìnùka? ²⁹ Nɛ́ yá̰dá dɛ́dɛ́í è yɔ̀ n nɛ pɛ̰ḭ dayeèhidí è yɔ̀ nɛ té muhipa-á-ma, mií-dà tee dakɔɔ̀dí, kà n té nɛ pa̰a̰ daà-kàdɛ́ɛ́ kú dipú. Dayeèhidí daadí, bá mɛ̀ǹǹ dɛ̀ɛ̀-ko té kaàdi o hɔ̰́ɔ̰̀ta mɛhɛká, òcɔ̰́ǹ dá yɛɛ̀ni tapaàdi. ³⁰ Mɛmá-dà, kà Ìsìdàyɛ́dì nìku muhipú dayeèhidí daadí.

³¹ Kà Ìsìdàyɛ́dìpa é pa̰a̰ ye dipú yèdi è yɔ̀ Màánì. Mù de yònà tebíící-dà, è yòǹ wɛ́ɛ́, kà mu naakú yònà pɛ̰́ḿpɛ̰́ǹku pà pa̰à̰-ku ceèti.

³² Kà Mɔ̀yísì é wɛdá è yɔ̀: Ǹtɛ Kɔ́yɔ̀ɔ kɔ̰́ɔ̰̀-di nùdi: Nɛ́ ya̰tá màánì nɛ hɔ̰́ beé-nà-sa nìdo òcɔ̰́ daadí dipú, é hḭ́ná nɛ yaàbíiká kpɛ́mú, k'yé teha kà ká wáńtá dɛ́há dipú ò de nɛ diinì-pu càwenkú mɛhɛká ò nɛ denà-ní tḭ́ń daadí Èsípútì mɛhɛká. ³³ Kà Mɔ̀yísì é caka Ànɔ́ɔ̀ è yɔ̀: Toó-ní cɔ̀ta é taàa màánì kó n'sá̰à̰-nà nìdo òcɔ̰́ daadí dipú, é tà hḭ́ná Kɔ́yɔ̀ɔ yìhìka, k'yé teha k'ó n'sɔ̀di nɛ yaàbíiká kpɛ́mú. ³⁴ K'yé n'yònà Kɔ́yɔ̀ɔ de mà hḭ́mpú Mɔ̀yísì, kà Ànɔ́ɔ̀ é tódá ye cɔ̀ta é tà hḭ́ná múnáma totodí^a mɛhɛká, Weèdi kpɛ̰́ńtìnùka tá̰a̰dawɛhí yìhìka è kpɛ̀i é n'sɔ̀di ye dipú. ³⁵ Ìsìdàyɛ́dìpa de dii màánì é n'káá beeká púnàhì-dà é nɛɛ́ ta̰ntá teǹka nìpa de péé-ka. Pà de yon-kó-dà háá é yó nàa kànàáà teǹka nùdi.

³⁶ Beésa pà toò-sa Òmɛ́ɛ̀^b wɛhimú de yòǹ nìdo daadí nìcɔ̰́ màánì dipú-dà. Òmɛ́ɛ̀pa píta mɛ̀ɛ de sá̰à̰-nà beésa pà yún-sá-dà Èfáà.