Núǹtiyɛ̀ɛ̀ma 17

14-12-04 réviser en équipe. Corrections après conseiller

Nɛ́ɛmá yɛɛ̀ni tá̰a̰beèdi mɛhɛká

¹ Kà Ìsìdàyɛ́dì nìku wɛǹni é yídá Síǹ càwenkú mɛhɛká, é n'yònà Kɔ́yɔ̀ɔ de kù hḭ́mpú. Kà kú bátá bɛ̀m̀bɛ̀ka dɔ́ɔ́di é nɛɛ́ ta̰ntá bɛ̀m̀bɛ̀ni pà toò-di Hèdèfìdím̀, é tɛ̀i kpɛ̰́ḭ́ ye pesá ku fḭ́ḭná. Há̰kà, ye bɛ̀m̀bɛ̀ni, de pú káá nɛ́a kà kù kó nìì. ² Mɛmá-dà, kà kú cetá Mɔ̀yísì nùdi baápu è yɔ̀: Ti pa̰a̰-ní nɛ́ɛmá kà tí yà̰à̰! Kà Mɔ̀yísì é kù tɛ̰́ná è yɔ̀: Baà tee kà nɛ n pɛnti-nà kɔ̰ǹni? Baà tee kà nɛ bɛǹ ma kú bookú Kɔ́yɔ̀ɔ?

³ Kà nɛ́yà̰a̰kú é kù cɛ̰dí dɛ́dɛ́í, kà kù kɔ̰̀ǹti-nà Mɔ̀yísì è toò: Baà tee k'á ti deèna-ní Èsípútì mɛhɛká, è kó héé kà nɛ́yà̰a̰kú é ti kɔ̀ù, tḭ́ńti nà ti bííhí, nà ti nɔtí?

⁴ Kà Mɔ̀yísì é kɔń-nà Kɔ́yɔ̀ɔ è yɔ̀: Ntɛ́ n kó hḭmà ye nìkù mɛnkù kpɛ́mú? Yè kaá cɛ̰́masí-dà kà kú n ká̰mu tá̰à̰ka é n kɔ̀ù.

⁵ Kà Kɔ́yɔ̀ɔ óò caka è yɔ̀: Cèn Ìsìdàyɛ́dì nìku cɔhɔ̀ka é ta̰si pa kpɛ̰́m̀ma pàcɔ̰́, kà nɛ́ n'nɔɔ́. Á tódá a ya̰kú a de potà-nà-ku Ǹnídì kóńkú nɛ́ɛmá, é nihí yìhìka. ⁶ Ǹtɛ, n kó nɛɛ̀hi-í-ma a yìhìka ta̰à̰di pà toò-di Hɔ̀dɛ́pù ni tá̰à̰di nìcɔ̰́nì kú hḭ́ǹka. Á tɛ̀i nì potá, nɛ́ɛmá kó yɛɛ̀ni-í-ma-ní ni mɛhɛká k'yèe nìkù é yà̰à̰. Kà Mɔ̀yísì é mà pa̰ná Ìsìdàyɛ́dì kpɛ̰́m̀ma nɔ̀ǹci mɛhɛká.

⁷ Mɛmá-dà k'ó pa̰a̰ ye bɛ̀m̀bɛ̀ni yèka kàdɛ́ɛ́ è yɔ̀: Màsáà nà Mɛ̀dìbáà. Màsáà de kpɛ̀i é n'yɔ̀ bɛḿma-dà, mìì tee-sá ye pesá-dà pà de bɛń-ma Kɔ́yɔ̀ɔ è yɔ̀: Kɔ́yɔ̀ɔ baà péé-dà ti cɔhàkà, nkɛ́ɛ̀ ò yè kɔ́ɔ́? Mèdìbáà mɛni de kpɛ̀i é n'yɔ̀ Kɔ̰ǹni-dà, mìì tee-sá ye pesá-dà Ìsìdàyɛ́dìpa d'oò kɛ̰̀ḭ-nà-ma.

Àmàdɛ́kìpa tɔ̰ṵ-nà Ìsìdàyɛ́dìpa

⁸ Kà Àmàdɛ́kìpa é tɛ̀ni é dɔdi ta̰à̰pu Ìsìdàyɛ́dìpa bɛ̀m̀bɛ̀ni pà toò-di Hèdèfìdímù. ⁹ Mɛmá-dà, kà Mɔ̀yísì é caka Sòsùwéè è yɔ̀: Ta̰si daapá mɛ̀m̀pà kó nɛɛ́ ta̰á̰-pa ta̰à̰pu ti kpɛ́mú, é taá é ta̰á̰-nà Àmàdɛ́kìpa. Ká̰ńweǹni, n kó taá é n'nɛɛ̀hi ta̰à̰ta hḭ́ǹka-dà, è púsí Weèdi ya̰kú.

¹⁰ Kà Sòsúwéè é pa̰á̰ Mɔ̀yísì d'oò hḭ́mpú, é taá dɔdi Àmàdɛ́kìpa ta̰à̰pu. Kà Mɔ̀yísì nà Ànɔ́ɔ̀, nà Húdì, kà mɛmpa é dìsi ta̰à̰ta hḭ́ǹka. ¹¹ Kà Mɔ̀yísì de yòu o nɔ̀ku hḭ́ǹka, Ìsìdàyɛ́dìpa-dà de hɔ̰́ n'kpenì-nà Àmàdɛ́kìpa. K'ò mɛ̀ɛ de kù yɔ̰̀tà teǹka, kà Àmàdɛ́kìpa té pà n'kpenì-nà. ¹² Kà Mɔ̀yísì nɔ̀hi é yɔ̀ɔ yá̰a̰ka, kà pá tódá tá̰à̰di óò hḭ́ná, k'ó kaàdi. Ànɔ́ɔ̀ nà Húdì, kà pà púsí o nɔ̀hi, òcɔ̰́ o nɔ̀ǹheukú, tɔɔ̀o o nɔ̀ǹcà̰nkú. Mɛmá-dà, k'òo nɔ̀hi de yòu hḭ́ǹka háá kà Weèdi é yɔ̀ɔ dɔdi. ¹³ Kà Sòsùwéè é sɛɛ̀da dɛ́dɛ́í Àmàdɛ́kì n'ɔ̀ɔ nìku wɛǹni, é pà kɔ̀ù nà sepɛ̰ɛ̰̀dí.

¹⁴ Kà Kɔ́yɔ̀ɔ é caka Mɔ̀yísì è yɔ̀: Yè wà̰ta pɔ̀kàta mɛhɛká, k'yé teha kà nɛ́ yè n'dèn. Á caka Sòsúwéè è yɔ̀ n kó fɛ́úwá-ma Àmàdɛ́kìpa, k'òòcɔ̰́ǹ koò dá deǹta pa kpɛ́mú fòùku mɛhɛká. ¹⁵ Kà Mɔ̀yísì é madí dɔ̀hàdi cɔ̰̀ǹcɔ̰̀ni, é nì pa̰a̰ yèdi è yɔ̀: Kɔ́yɔ̀ɔ-dà yòǹ n nɛɛ́ma yudí. ¹⁶ K'ò yɔ̀: Àmàdɛ́kìpa potà kṵnnɔ̀ǹfa é dɔdi Kɔ́yɔ̀ɔ ta̰à̰pu. Ye kpɛ́mú, ò baà kó pà n'tɔ̰ṵ-nà-á-ma k'yé n'kɔ́ɔ́ yɔ̀ɔmá.