Núǹtiyɛ̀ɛ̀ma 18

Sètódóò taá Mɔ̀yísì dɔɔ̀pu.

¹ Kà Mɔ̀yísí cɛ̀ko, Sètódóò, màǹdìyá̰à̰ dɔ̀hàdi kpɛ̰́ǹn é yekà Weèdi de pa̰à̰-sa wɛǹni Mɔ̀yísì nà Ìsìdàyɛ́dì ni nìku kpɛ́mú, k'ó yekà Kɔ́yɔ̀ɔ de kù dènà-ma-ní kú bookú Èsípútì teǹka mɛhɛká. ² K'ó tódá Sèfòdáà, Mɔ̀yísì poòo ò de héè-ko-ní k'ó koní, ³ n'ɔ̀ɔ bííhí hi dɛ́ɛ̀ka. Tàcɔ̰́ kú yèdi-dà de dɛɛ̀ Kɛ̀ɛ̀sóm̀, mìì tee-sá ò de yɔ̀: N yòǹ cà̰ǹn-dà tenkà mɛnkà kú mɛhɛká. ⁴ Kà tɔɔ̀ta kpɛ́ɛdí tonà Èdìyèsɛ́ɛ̀, mìì tee-sá, ò de yɔ̀: N báàa Weèdi tɛ̀ni é n tempanà, é n fḭ́hìna Fàdàɔ̰́ɔ̰̀ nɔ̀ku mɛhɛká.

⁵ Kà Mɔ̀yísì cɛ̀ko Sètódóò, nà Mɔ̀yísì poòo, n'ɔ̀ɔ bííhí hi dɛ́ɛ̀ka é tɛ̀ni o pesá càwenkú mɛhɛká, Ìsìdàyɛ́dìpa de kpɛ̰́ḭ́-sa pa fḭ́ḭná è hɛ́dí-nà Weèdi ta̰à̰di. ⁶ K'ó tɔn è yɔ̀ pá caka Mɔ̀yísì è yɔ̀: Mmí, Sètódóò a cɛ̀ko-dà tɛ̀ni a pesá è nɔɔ̀-nà-ní a poòo n'ɔ̀ɔ bííhí hi dɛ́ɛ̀ka. ⁷ Kà Mɔ̀yísì é yɛɛ̀ni é tɛ̀ni é codá o cɛ̀ko é wɛ̰̀ḭ o yìhìka, é yídá óò bàsi-nà. Kà pá dɔa pa tɔɔ̀pa, é béka pa tɔɔ̀pa wɔ̰ǹkpeèti hḭ́ǹka, é yɔ̀ɔ é dúú o fḭ́ḭkú mɛhɛká. ⁸ Kà Mɔ̀yísì é caka o cɛ̀ko, Kɔ́yɔ̀ɔ de pa̰à̰-sa wɛǹni Fàdàɔ̰́ɔ̰̀ nà Èsípútì yam̀ma, Ìsìdàyɛ́dì kpɛ́mú, nà fḭ́ncí mɛ̀ǹcì de pà tɛ̀ni-cí-ní cɔ̀ku mɛhɛká kà Kɔ́yɔ̀ɔ é pà fḭ́hìna. ⁹ K'yé naaka Sètódóò nà suumá Kɔ́yɔ̀ɔ de pa̰à̰-ma wɛǹni Ìsìdàyɛ́dìpa é pà fḭ́hìna Èsípútì yam̀ma nɔ̀hi mɛhɛká. ¹⁰ K'ò yɔ̀: Kɔ́yɔ̀ɔ é n'yòǹ fa̰ntàko, mɛnń mɛ̀ǹǹ nɛ fḭ́hìnà-ko Fàdàɔ̰́ɔ̰̀ nà Èsípútì yam̀ma nɔ̀hi mɛhɛká, mɛnń mɛ̀ǹǹ fḭ́hìnà-ko o nìku Èsípútì yam̀ma núǹti mɛhɛká. ¹¹ N bantà-á-ma sá̰mà è yɔ̀ Kɔ́yɔ̀ɔ wɛhi-nà nìpa wàci wɛǹni. Ò bɛkáà-á-ma o wɛhimú Èsípútì yam̀ma de fá̰kápú tḭ́ń wɔ̀ni Ìsìdàyɛ́dìpa.

¹² K'ó pṵ́ná nɔtá kà ha̰mú é tà dii pápáí, é pa̰á̰-nà dɔ̀hàka tɔɔ̀ka Kɔ́yɔ̀ɔ kpɛ́mú. Kà Ànɔ́ɔ̀ nà Ìsìdàyɛ́dì kpɛ̰́m̀ma é tɛ̀ni, kà pá pɛ́ɛ́ é dii ye dɔ̀hàka dipú Weèdi yìhìka.

Sètódóò tɔ̀hìnà Mɔ̀yísì yàma

¹³ K'yé wentá, kà Mɔ̀yísì é kaàdi è kó síi-nà Ìsìdàyɛ́dì nìku ku kɔ̰ɔ̰̀ka hḭ́ǹka. K'yèe nìku é n'nɛɛ̀hi o yìhìka ká̰ńyɛ̰̀ǹfa háá nà yookú.

¹⁴ Mɔ̀yísì cɛ̀ko dɛ́hà-ma mɛma, óò béka è yɔ̀: Badà tee k'à hɔ̰n mɛma ye nìkù? Badà tee k'à kàdi a cɔ̰́ɔ̰̀di è kù sídí-nà kà kù nɛ̀hi àà ceí ká̰ńyɛ̰̀ǹfa háá nà yookú?

¹⁵ Kà Mɔ̀yísì óò tɛ̰́ná è yɔ̀: Nìku kɔ́dì-ní n pesà, è dɔ́sí é yekà Weèdi kó kù caka-sa-dà ku wɛkú hḭ́ǹka. ¹⁶ Kà wɛɛkú kùcɔ̰́kù péé pa cɔhàka, pà hɔ̰́ tɛ̀ni n pesá-dà kà n té pà síi-nà, é pà caka Weèdi kpɛ̰́ńtìnùka nà ni tencí.

¹⁷ K'òo cɛ̀ko óò caka è yɔ̀: A hɔ̰mpù kú bookù pú sudi. ¹⁸ A kó sɔ̰kàna-á-ma a cɔ̰́ɔ̰̀di, é pɛ́ɛ́-nà ye nìkù mɛ̀ǹkù kɔ́dì-kù-ní a pesá. Ye tɔmù àà wɛhikáà-nà-á-ma, a pú kó nɛɛ́ mù pa̰á̰ a cɔ̰́ɔ̰̀di. ¹⁹ Besí sá̰mà yaǹsṵ́hìnamá n k'áa kɔ̰́ɔ̰́-ma, kà Weèdi é n'àà m'péé-nà! Ní n'yòǹ mɛ̀ǹǹ kó n'wɛì-nà-ko Weèdi nà ye nìku yèdi. Fɔ̰́ń-dà té kó caka kù káá-ma wɛǹni Weèdi. ²⁰ Á pà wekàna Weèdi kpɛ̰́ńtìnùka nà ni tencí, é pà bɛka cɔ̀ku pà yònà é tṵṵ̀na-kú nà tɔná pà yònà é pa̰á̰-na. ²¹ Á baàta niìmɔ́mpá ye nìkù wɛnnì mɛhɛkà, mɛ̀m̀pà wani-pá Weèdi, kà pà pà dań, kà pà naanà wɛbeèdi, pà pú kó nɛɛ́ é dontá-pa kú yàma n'ɛ̀ɛ̀ yècɛ̰́ɛ̰̀, é pà kɔ̰́ɔ̰́ kpɛ̰́ǹti kà pá n'nihí nìpa hùhùkàka tòhèdi tòhèdi, kɔ̀ùta kɔ̀ùta, púnùm̀ nùm̀, píta píta. ²² Mɛmpá-dà té kó n'síí-nà nìku daàka wɛǹni ku kɔ̰ɔ̰̀ka hḭ́ǹka. Pà té dɔ̀hà wɛkú mɛ̀ǹkù pú kpenì-ku. Kà pà hɛ̰káà-ma wɛmá, kà pà té mà n'àà tɛɛ̀-ní. Ma kú bookú-dà a kó yakàda-má a totodí kà pá nì n'àà toó-nà. ²³ K'à hḭn mɛma, kà Weèdi a kɔ̰́ɔ̰̀ ye kú nùdì-dà, a kó nɛɛ́ púsí-ma ye nìkù k'yé n'àà n'yɔ́hu, kà ku mɔ́nkú té tṵ́má tón é kòǹ ku hɔ̰́ɔ̰́hí mɛhɛká nà wɛ̀ɛ̀di.

²⁴ Kà Mɔ̀yísì é tṵṵ̀na o cɛ̀ko tencí, é pa̰á̰ ò d'oò hḭ́mpú wɛǹni. ²⁵ Kà Mɔ̀yísì é ta̰si niìmɔ́mpá Ìsìdàyɛ́dì nìku mɛhɛká, é pà kɔ̰́ɔ̰́ kpɛ̰́ǹti kà pà kó n'nihí nìpa hùhùkàka tòhìdi tòhìdi, kɔ̀ta kɔ̀ta, púnùm̀ nùm̀ nà píta píta. ²⁶ Mɛmpá-dà de sídí-nà ye nìku daàka wɛǹni. Wɛkú mɛ̀ǹkù de pú kpenì-ku mɛmpá-dà de kù sídí. Kà pà de hɛ̰káà-ma wɛmá, kà pà té mà tɛɛ̀-ní Mɔ̀yísì pesá.

²⁷ Ye kú dàhàka, kà Mɔ̀yísì é héé o cɛ̀ko, k'ó tón é kòǹ o teǹka.