Núǹtiyɛ̀ɛ̀ma 19

révision en équipe 15-12-04

WEÈDI PA̰À̰ MÚNÁMA NÀ ÌSÌDÀYƐ́DÌPA

Ìsìdàyɛ́dìpa ta̰ntà Sìnàyíì ta̰à̰di

¹ Nà Ìsìdàyɛ́dìpa yɛɛ̀ni-má-ní Èsípútì teǹka mɛhɛká, pa cḭḭ̀ta̰á̰ma dacecedí daadí-dà pà de ta̰ntà-ma Sìnàyíì càwenkú. ² Pà de yídà Hèdèfìdím̀-dà é ta̰ntá ye Sìnàyíì càwenkú mɛhɛká, é tɛ̀i é kpɛ̰́ḭ́ pa fḭ́ḭná è coó-nà ye ta̰à̰di. ³ Kà Mɔ̀yísì é dìsi ye ta̰à̰di è kó peèta-nà Weèdi.

Kà Kɔ́yɔ̀ɔ óò wɛɛ́-nà-ní ye ta̰à̰di yóòfa, óò caka è yɔ̀: Ǹtɛ a kó caka-sá Sàkɔ́pù yaàbíiká, Ìsìdàyɛ́dìpa. ⁴ Nɛ mɔ́mpá dɛ́hà-á-ma n hḭmpú Èsípútì yam̀ma, nà n nɛ tókáàma é nɛ tɛɛ̀-ní n pesà, k'yé n'yònà túfa hɔ̰́ tókamá fa bíiká fa fɛ̀ɛ̀ti hḭ́ǹka. ⁵ Sá̰mà-ní, kà nɛ yeèkaà n wɛmá, è teháà n múnáma, nɛ kó n'yòǹ n kpɛ́ɛpá-dà, òcɔ̰́ǹ mɛ̀ɛ̀ pú kó nɛ n'sá̰à̰-nà nìku wɛǹni mɛhɛká. Teǹka wɛǹni yòǹ n kpɛ́ɛká-dà. ⁶ Nɛ́na-dà mɛ̀ɛ kó n'yòǹ n dɔ̀hàka yam̀ma, é n'yòǹ nìku mɛ̀ǹkù weni-kú è púsí n tɔmú. Mɛmá-dà, a kó caka-á-ma Ìsìdàyɛ́dìpa.

⁷ Kà Mɔ̀yísì é cútá-ní ye ta̰à̰di hḭ́ǹka, é tɛ̀ni é tíká Ìsìdàyɛ́dì kpɛ̰́m̀ma, é pà caka Kɔ́yɔ̀ɔ ò cakáà-sa-ní wɛǹni. ⁸ K'yèe nìku wɛǹni é teha nùdi nìcɔ̰́ è yɔ̀: Ti kó pa̰á̰-ma Kɔ́yɔ̀ɔ hḭ́mpú wɛǹni.

K'ó tón é taá caka Kɔ́yɔ̀ɔ ye nìku tɛ̰́ńkáàma. ⁹ Kà Kɔ́yɔ̀ɔ óò caka è yɔ̀: N kó tɛ̀ni-ma-ní a pesá wɔ́ɔsàdi mɛhɛká é tɛ̀i é n'àà wɛì-nà k'yèe nìkù you, k'yé teha kà kù baà n'àà n'dań.

K'ó tṵ́má tɛ̰́ná-hɔ̰ Kɔ́yɔ̀ɔ ye nìku de hḭ́mpú.

Ìsìdàyɛ́dìpa yònà é pa̰kamá sɔ̀do é peèta-nà Weèdi

¹⁰ Kà Kɔ́yɔ̀ɔ é tṵ́má caka Mɔ̀yísì è yɔ̀: Tón é taá é caka ye nìkù è yɔ̀ kú wekàna ku cɔ̰́ɔ̰̀di yenì nà ká̰ńweǹni, é pɔ̀sì-nà ku báatí. ¹¹ Pa sɔ̀do é n'yɔ̀ɔ kà pá nà n ceí data̰á̰di daadí, mìì tee-sá ye kú daadí-dà n kó cútá-ma-ní nìku wɛǹni yìhìka, Sìnàyíì ta̰à̰di hḭ́ǹka. ¹² Á bedí nìku kó tɛ̀ni é sá̰á̰-sa ta̰à̰di fɔ̰̀di, é kù caka è yɔ̀: Nɛ pú yònà é dìsi ye ta̰à̰dì yoo é nì hɛ́tá! Mɛ̀ǹǹ kú wɛnnì kó nì hɛ́tá-ko, pà yònà óò kɔ̀ù-ú-ma. ¹³ Ye kú yaǹn, pà pú yònà óò pḭ́ń, tá̰à̰ka-dà pà yònà óò ká̰mu-má yoo óò tɔ̰na peǹci óò kɔ̀ù. Kà nɔtá mɛ̀ɛ dɛɛ̀, ma kú tɔɔ̀ma-dà pà baà yònà é tà hḭn-má. Hɔ̰yèm̀bíifá kó kɔń tḭ́ń wɔ̀ni-dà pà kó nɛɛ́ é hɛ́tá-ma-ní ni pɛdí.

¹⁴ Kà Mɔ̀yísì é cútá-ní ye ta̰à̰di hḭ́ǹka, é tɛ̀ni é héé k'yèe nìku é wekàna ku cɔ̰́ɔ̰̀di, é pɔkàda ku nɛǹti. ¹⁵ K'ó tṵ́má caka ye nìku è yɔ̀: Háá nà kàdɛ́ɛ́ ta̰di, nɛ sɔ̀do é m'bii. N'ɔɔ̀cɔ̰́ǹ mɛ̀ɛ dá tɔ́ká poòo.

Weèdi cútà-ní Sìnàyíì ta̰à̰di hḭ́ǹka

¹⁶ Ye data̰á̰di ká̰ńyɛ̰̀ǹfa, pà you kà tafá kɔ̰ǹti ye ta̰à̰di hḭ́ǹka, è yḭ̀kù dɛ́dɛ́í, kà yúudadí nì dádí. Ye wɔ̀ni-dà hɔ̰yèm̀bíifá kɔń-ma sàma, k'yèe nìku wɛǹni foòtaàka é bekàdà ku fḭ́ḭná mɛhɛká. ¹⁷ Kà Mɔ̀yísì é kù dèna-ní ku fḭ́ḭná mɛhɛká, é kù nɛ̀hìna ta̰à̰di fɔ̰̀di kà kù kó peèta-nà Weèdi.

¹⁸ Yúkú-dà de dádí Sìnàyíì ta̰à̰di, mìì tee-sá, Kɔ́yɔ̀ɔ de cútà-ní ha̰mú mɛhɛká-dà ni hḭ́ǹka. Ye yúkú de yíhú-ma-ní è yònà ha̰sàmu kpɛ́kú, k'yèe ta̰à̰di sa̰m̀pu kpeéma ni wɛǹni. ¹⁹ K'yèe hɔ̰yèm̀bíifá é dɔ̀hà è kɔǹ kpeéma, kà Mɔ̀yísì wɛì-nà Weèdi kà n'ɔ̀ɔ̀ tɛ̰́nì kà ni boòku yònà tafá kɔ̰ǹni.

²⁰ Mɛmá-dà, kà Kɔ́yɔ̀ɔ é cútá-ní é nɛɛ̀hi Sìnàyíì ta̰à̰di yóòfa hḭ́ǹka, é yíí Mɔ̀yísì, k'ó dìsi óò hɔ̰́tá-ho. ²¹ Kà Kɔ́yɔ̀ɔ é caka Mɔ̀yísì è yɔ̀: Cútá é taá caka sukú ye nìkù è yɔ̀ kù dá mɔkàdà é hɛ́tá-ní ye ta̰a̰dì è kpɛ̀i é n dɛ́há. Kà kù hḭn mɛma, ku nìpa dɔ́ɔ́di kó kpíí-ma. ²² Bá dɔ̀hàka yam̀ma mɛ̀m̀pà n hɛ́ɛ́kú-pa, pà yònà é wekàna-á-ma pa cɔ̰́ɔ̰̀di, kà n dá kɔ̀ù pa pàcɔ̰́.

²³ Kà Mɔ̀yísì é tɛ̰́ná Kɔ́yɔ̀ɔ è yɔ̀: Ye nìkù pú kó nɛɛ́ é dìsi-ní Sìnàyíì ta̰à̰di, mìì tee-sá, a mɔ́nń-dà ti caka pópóí è yɔ̀ tí beé nìku kó tɛ̀ni é sá̰á̰-sa ni fɔ̰̀di, a nì cenà a cɔ̰́ɔ̰̀di kpɛ́mú-dà.

²⁴ Mɛmá-dà, kà Kɔ́yɔ̀ɔ é tṵ́má caka Mɔ̀yísì è yɔ̀: Tón é cútá é tɛ̀i nà Ànɔ́ɔ̀ kà nɛ́ dìsi-ní. Há̰kà, dɔ̀hàka yam̀ma nà ye nìkù pú yònà é mɔkàdà é dìsi-ní n pesá, kà n dá yetá kɔ̀ù pa pàcɔ̰́.

²⁵ Kà Mɔ̀yísì é cútá é tɛ̀i é mà caka ye nìku.