Núǹtiyɛ̀ɛ̀ma 20

révision en équipe 15-12-04. Corrections après conseiller

Weèdi Hɔ̰́ɔ̰wencí nùka píta nì kɔ̰́ɔ̰̀-ka Ìsìdàyɛ́dìpa

¹ Ǹtɛ wɛmá Weèdi de cakáà-ma Ìsìdàyɛ́dìpa: ² Mmí-dà Kɔ́yɔ̀ɔ, a Weèdi mɛ̀n'àà dènà-di-ní Èsípútì teǹka mɛhɛká, a de péé-sa è yòǹ núǹn.

³ A dá n'káá tɔɔ̀sa yècɛ̰́ɛ̰̀ k'yè yòǹ a weèdi, mmí bààsí.

⁴ A dá pa̰á̰ wàfa yoo tɔɔ̀sa yècɛ̰́ɛ̰̀ éè yòhèna-nà niìya̰ mìì péé-sa hḭ́ǹka yoo teǹka yoo nɛ́ɛmá mɛhɛká. ⁵ A dá hìu wàci fɔ̰̀ka, a mɛ̀ɛ pú yònà é cì dùǹtà, mìì tee-sá mmí Kɔ́yɔ̀ɔ a Weèdi, n káá yandamú-dà. N hɔ̰́ yɔ̰́ń-ma toòka báàpa mɛ̀m̀pà yeéè̀-pa n wɛmá, é héé k'yèe toòka yɔ̰́ḿma é dɔdi pa bííhí hḭ́ǹka, nà pa yaàbíita̰á̰ka nà nàhiká hḭ́ǹka. ⁶ Há̰kà, mɛ̀m̀pà n dɔ́sí-pa è tṵ̀n n hɔ̰́ɔ̰wencí nùka, n hɔ̰́ pà pa̰á̰-ma suumá háá wɔ̀ǹci tòhìdi mɛhɛká.

⁷ A dá n'yún Kɔ́yɔ̀ɔ, a Weèdi yèdi héhécíma. Kà mɛ̀ǹǹ nì yún-kó héhécíma, n pú k'óò pṵ́tá ye kú pa̰á̰mà mɛhɛkà.

⁸ A té deǹta nɛ damuhipàdi daadí é nì muhipa è yá̰á̰ nì yòǹ n kpɛ́ɛdí-dà. ⁹ A té deha daàa kàkɔ̀dì, é pa̰á̰ a tɔná wɛǹni. ¹⁰ Àmá, dayeèhidí daadí yòǹ muhipàdi-dà Kɔ́yɔ̀ɔ a Weèdi kpɛ́mú. A pú yònà é pa̰á̰ tɔmú mùcɔ̰́mù ye kú daadì: Fɔ̰́ń n'àa bííhí, n'àa núndehèpa, n'àa nɔtí é pɛ́ɛ́-nà cà̰ǹn mɛ̀ǹǹ péé-ko a hɔ̰́ɔ̰̀ta mɛhɛká. ¹¹ A pú yònà é deha, mìì tee-sá daàa kàkɔ̀dì mɛhɛká-dà Kɔ́yɔ̀ɔ de pa̰à̰-ma teǹka nà hḭ́ǹka nà dàmɛ́dì é pɛ́ɛ́-nà mìì yè péé-sa wɛǹni. Há̰kà, dayeèhidí, k'ó muhipa. Mɛmá-dà tee kà Kɔ́yɔ̀ɔ é nì kóná é nì kpáhìna o kpɛ́ɛdí.

¹² Ní n'cunì a báàa n'àa yṵṵ́ k'yé teha k'àa wɔ̰ǹni é dɔ̀hà é dɛuka teǹka Kɔ́yɔ̀ɔ, a Weèdi a pɔ̰n-ká kú mɛhɛká.

¹³ A dá yetá é kɔ̀ù nìdo.

¹⁴ A dá yetá é n'káá poòo yoo dɔɔ̀o é tṵ́má yɛ̀ɛ̀ dɔɔ́-nà poòo tɔɔ̀o yoo dɔɔ̀o tɔɔ̀o.

¹⁵ A dá yetá é yódá.

¹⁶ A dá báńta é cɔ̰ha a tɔɔ̀o yèdi.

¹⁷ A dá pa̰á̰ bìnɔ a tɔɔ̀o kpɛ́ɛsá wɛǹni hḭ́ǹka: O hɔ̰́ɔ̰̀ta, o poòo, o núndehàpa, o nàfa yoo o sa̰mmùǹta, bá tɔɔ̀sa yècɛ̰́ɛ̰̀ mìì yòǹ-sa o kpɛ́ɛsá.

¹⁸ K'yèe nìku wɛǹni you kà tafá kɔ̰ǹti, kà hɔ̰yèm̀bíifá kɔǹ. Kà ku wɛǹni é dɛ́há tayḭkàdakú, k'yèe ta̰à̰di toó yúkú. Mɛmá-dà kà kú wampa, é nɛɛ̀hi nà dɛùma è cèùdi. ¹⁹ Kà kú caka Mɔ̀yísì è yɔ̀: A mɔ́nń ti wɛɛ́-nà-ní, ti k'áa besí-ma. Weèdi mɔ́nní dá ti n'wɛì-nà, kà mɛma dɔ, ti kó kpíí-ma.

²⁰ Kà Mɔ̀yísì é kù tɛ̰́ná è yɔ̀: Nɛ dá n'wani, mìì tee-sá Weèdi tɛ̀ni è kó nɛ bɛń-ma, kà nɛ́ nì n'wani k'yé teha kà nɛ dá pa̰á̰ sḭ̀ḭ̀ma.

²¹ K'yèe nìku nɛɛ̀hi-ní nà dɛùma, kà Mɔ̀yísì mɛnn é hɛ́tá-ho ye wɔ́ɔsàdi Weèdi de péé-di kú mɛhɛká.

Kpɛ́ǹti nùka dɔ̀hàdi cɔ̰̀ǹcɔ̰̀ni hḭ́ǹka

²² Kà Kɔ́yɔ̀ɔ é caka Mɔ̀yísì è yɔ̀: Ǹtɛ a kó cakamá Ìsìdàyɛ́dìpa: Nɛ mɔ́mpá dɛ́hà-á-ma n nɛ wɛɛ̀-nà-ma-ní hḭ́ǹka. ²³ Nɛ́ n'tṵ̀n mmí cɔ̰́ɔ̰̀di. Nɛ koò dá pa̰ka wúdo wàci yoo díimáàti kpɛ́ɛ́cí é cì kpáhìna nɛ weèka.

²⁴ Nɛ́ n madí tá̰à̰ti dɔ̀hàdi cɔ̰̀ǹcɔ̰̀ni, nɛ kó m'pa̰kú-di kú hḭ́ǹka nɛ hɔ̰̀ci, nɛ bɔhí, nà nɛ nɛ̀ci pṵ́náma dɔ̀hàka nà sɛdàma kpɛ́ɛká. Bɛ̀m̀bɛ̀ni wɛǹni n kó ta̰kadá-dí kà nɛ́ n duntà, n kó tɛ̀ni-í-ma-ní é nɛ kóná. ²⁵ Kà nɛ kó n madí tá̰à̰ka dɔ̀hàdi cɔ̰̀ǹcɔ̰̀ni-dà, nɛ dá nì madí nà tá̰a̰kpɛ́hàka, mìì tee-sá kà nɛ kà kpɛ́háà nà nɛǹku nɛ koò pú kó nɛɛ́ kà deha-nà n kpɛ́mú. ²⁶ Nɛ dá pa̰á̰ bɛ̀ka n dɔ̀hàdi cɔ̰̀ǹcɔ̰̀ni è té dìsi-nà, k'yé teha kà nɛ dá n'dikù kà pà mádí nɛ fɛ̀ci.