Núǹtiyɛ̀ɛ̀ma 21

révision en équipe 15-12-04

Weèdi kpɛ̰́ńtìnùka mɛ̀m̀pà yòǹ-pa hèbùdéèpa è há̰ yòǹ núm̀ma

¹ Kà Kɔ́yɔ̀ɔ é tuɛ̀ha é caka Mɔ̀yísì è yɔ̀: Ǹtɛ kpɛ̰́ńtìnùka a kó kɔ̰́ɔ̰́-ka Ìsìdàyɛ́dìpa: ² Kà nìi dontà núǹn k'ò yòǹ Hèbùdéè, ò té k'óò deha beé kàkɔ̀dì-dà, yeèhidí k'ó yɛ̀ɛ̀ núǹti é ka̰há ò dá bodá yècɛ̰́ɛ̰̀. ³ K'ò de kɔ́ɔ́ poòo é nɛɛ́ hḭn núǹn, o cɔ̰́ɔ̰̀di-dà ò kó yɛ̀ɛ̀-ma. K'ò mɛ̀ɛ de káá-ní poòo-dà é nɛɛ́ é hḭn núǹn, n'ɔ̀ɔ poòo-dà pà kó pɛ́ɛ́ é yɛ̀ɛ̀-ma. ⁴ K'òo dakpɛ̰́ǹn-dà ò pɛ̰ḭ poòo, k'yèe poòo ò pɛdà bíídahí yoo bíipohí, k'ò wáńtà kɛ̰hɛdi, ò kó héé-ma o dakpɛ̰́ǹn ye pooò n'ɛ̀ɛ bííhì, é ka̰há o cɔ̰́ɔ̰̀di. ⁵ Mɛ̀ɛkà, k'yè yònà ye núǹn hḭ́n: N dɔ́sí-ma n dakpɛ̰́ǹn nà n poòo nà n bííhí, n pú kpɛ̀i é yɛ̀ɛ̀ núǹti mɛhɛká, ⁶ ye wɔ̀ni, Weèdi yìhìka, o dakpɛ̰́ǹn yònà óò tóó-ma é táá ò dàna-nà o hɔ̰́ɔ̰̀ta cɔ̀di yoo ni dɔkú, é foǹta o toudí nà peǹfa. Mɛma, ò kó nɛɛ́ óò n'dehú-ma k'yé n'kɔ́ɔ́ yɔ̀ɔmá.

⁷ Kà nìdo yɛdáà o bíipoòta kà tà yòǹ núǹn, ta yɛ̀ɛ̀ma pú kó m'pɛ́ɛ́-nà núndapá kpɛ́ɛmá. ⁸ Kà mɛ̀ǹǹ tà dontà-ko è tà kádá, k'yè péé k'ò há̰ koò pú tà sɛdáà, ò yònà é tṵ́má tà yɛɛ-nà ta báàa-dà, ò pú yònà é tà yɛɛ-nà cà̰ǹn. K'ò hḭn mɛma, ò tà yetà-nà-á-ma. ⁹ K'ò mɛ̀ɛ tà dontà é kɔ̰́ɔ̰́ o bíitá-dà kà tá kádá, ò yònà é tà púsí o pa̰á̰ma ò cakú è yɔ̀ ó púsí-ma kú bookú-dà o bíipohí. ¹⁰ K'ò mɛ̀ɛ tà kádà o mɔ́nń-dà, è há̰ tṵ́mà tóò-ní poòo tɔɔ̀o, ò pú yònà é yakàda yècɛ̰́ɛ̰̀ ò de tà kɔ̰́nì-sa hḭ́ǹka: K'yé n'yònà dimá nà báatí nà dɔɔdí múnáma. ¹¹ K'ò pú tà kɔ̰́nì ye niì ye ta̰à̰kà, tà kó nɛɛ́-ma é yɛ̀dì o hɔ̰́ɔ̰̀ta è pú bodà yècɛ̰́ɛ̰̀, è pú m'bodà dící.

Yetáka nìi kó pa̰á̰-ka kà p'óò kɔ̀ù

¹² Kà nìi potà ò tɔɔ̀ɔ è kɔ̀ù, pà yònà è mɛ̀ɛ t'óò kɔ̀ù-ú-ma. ¹³ K'yè mɛ̀ɛ yetà-nà nìdo k'ò kɔ̀ù o tɔɔ̀o è de pú maàhu o kɔ̀ùpu, kà mmí Weèdi-dà héè k'yèe kú pa̰á̰mà é pa̰ná, n k'áa bɛka-á-ma bɛ̀m̀bɛ̀ni ò té kó cocí é taá sɔ̀ɔ-dí. ¹⁴ Kà nìi dɛ́há o tɔɔ̀ɔ kà mɛkatohiká yedáà k'òò kɔ̀ù nà seúma, kà nɛ mɛ̀ɛ t'óò kɔ̀ù. Bá k'ò cocí è taá sɔ̀di n dɔ̀hàdi cɔ̰̀ǹcɔ̰̀ni, kà n'ɔ́ɔ̀ dàta-ní óò kɔ̀ù.

¹⁵ Kà nìi potà o báàa yoo o yṵṵ́, pà yònà óò kɔ̀ù-ú-ma.

¹⁶ Kà nìi yódà o tɔɔ̀ɔ òò yɛdáà yoo òò sɔ̀di o hɔ̰́ɔ̰̀ta, kà p'òò cɛ̰ɛ̰́ kà p'óò kɔ̀ù. ¹⁷ Kà nìi yɔ̰́sáà o báàa yoo o yṵṵ́, pà yònà óò kɔ̀ù-ú-ma.

Kpɛ̰́ǹti nùka Weèdi hḭ́nà-ka kà pà potà nìdo òò pa̰à̰ bòdi.

¹⁸ K'yè yònà kà nìi pàdɛ́ɛ́ kɔ̰ǹti, k'òòcɔ̰́ potà o tɔɔ̀ɔ nàwɛ̰dí yoo òò ká̰ńtà tá̰à̰di, k'ò pú kpíi è há̰ dɔɔ́ è mɔn, ¹⁹ è té kó nɛɛ́ é yɛɛ̀ni é cèn nà ká̰ńtá̰à̰ni, pà pú kó pa̰á̰ yècɛ̰́ɛ̰̀ mɛ̀ǹǹ ò potà-ko. Há̰kà, ò yònà é bodá-ma ò de kó n'kpenì é pa̰á̰-pu tɔmú é tṵ́má bodá o teepàma dící.

²⁰ Kà nìi podí o núndeho poòo yoo dɔɔ̀o nà dɔ̀ɔ̀di òò kɔ̀ù ye pesá n'ɛ̀ɛ pesá, pà yònà é yeda-á-ma o kpɛ́mú. ²¹ K'yèe núndeho mɛ̀ɛ pa̰à̰ daadí nìcɔ̰́ yoo kàdɛ́ɛ́ è nɛɛ̀ kpíi, pà koò pú kó pa̰á̰ o dakpɛ̰́ǹn yècɛ̰́ɛ̰̀, mìì tee-sá, òò dontà nà dící-dà.

²² Kà daapá pàdɛ́ɛ́ kɔ̰ǹti è bòdà popóǹn, k'òo pɛutí yɛdì, k'yè há̰ p'óò pa̰à̰ mɛ́dó òcɔ̰́ǹ, pa mɛ̀ǹǹ pú naa-kó kó bodá dící-dà ye poòo dɔɔ̀ɔ k'óò fìta-cí sídàpa yìhìka. ²³ Àmá, k'yècɛ̰́ɛ̰̀ pa̰à̰ ye poòo, pà mɛ̀ɛ té kó pa̰á̰-sa-dà mɛ̀ǹǹ pú naa-kó: kà kṵ́mú-dà, k'ò mɛ̀ɛ té kpíí. ²⁴ K'ò pɔ́dà o nɔ̀ǹfa-dà, kà pá pɔ́dá o kpɛ́ɛfá. K'ò tɔ̰̀tà o nìni-dà, kà pá tɔ̰ɔ̰̀ta o kpɛ́ɛdí. K'ò bɔ́kádà o nɔ̀ku-dà, kà pá bɔ́kádá o kpɛ́ɛ́kú. K'ò mɛ̀ɛ bɔ́kádà o tàdi-dà, kà pà mɛ̀ɛ té bɔ́kádá o kpɛ́ɛdí. ²⁵ K'òò tɔ̀n ha̰mú-dà, kà p'óò tɔ̀n ha̰mú. K'òò pa̰à̰ bòdi-dà, kà p'óò pa̰á̰ bòdi. K'ò mɛ̀ɛ ò pa̰à̰ sá̰à̰ni-dà, kà p'óò pa̰á̰ sá̰à̰ni.

²⁶ Kà nìi potà o núndeho, poòo yoo dɔɔ̀o è pɔ́dà o nɔ̀ǹfa, ò yònà óò dèna-á-ma núǹti mɛhɛká k'ò pú m'bodà yècɛ̰́ɛ̰̀, o nɔm̀pɔ́dáfa kpɛ́mú. ²⁷ K'ò mɛ̀ɛ tɔ̰tà o nìni-dà, k'óò dèna núǹti, o niǹtɔ̰ɔ̰̀tadí kpɛ́mú.

²⁸ Kà nàfa kudà nìdo, dɔɔ̀ɔ yoo poòo, òò kɔ̀ù, pà yònà é fà kɔ̀ù nà tá̰à̰ka-dà. Fa màǹci pú yònà é dii, mɛ̀ɛkà fa yaǹn pú káá màcɔ̰́mà. ²⁹ Àmá, k'yè yònà ye nàfa de yɔ̀ɔ kuùhupú-dà nìpa, kà pá caka fa yaǹn ò pú fà púsí sukú, kà fà kùdà dɔɔ̀ɔ yoo poòo òò kɔ̀ù, pà kó fà kɔ̀ù nà tá̰à̰ka-dà é pɛ́ɛ́ é kɔ̀ù-nà fa yaǹn. ³⁰ Kà p'àá ò hédà è hḭ́n ó bodá yècɛ̰́ɛ̰̀-dà é dontá o fòùmu, ò yònà é bodá-ma p'òò békáà-sa wɛǹni. ³¹ Kà fà mɛ̀ɛ kudà dapàm̀bíitá-dà yoo sepàm̀bíitá è tà kɔ̀ù, ye kú pa̰á̰mà ma cɔ̰́ɔ̰̀di-dà pà kó tṵṵ̀na-má. ³² Kà fà kɔ̀ù òcɔ̰́ǹ kú núndeho-dà, poòo yoo dɔɔ̀o, fa yaǹn yònà é bodá ye núndeho dakpɛ̰́ǹn díimáàka púta̰a̰-dà, é yídá kà pá fà kɔ̀ù nà tá̰à̰ka.

³³ Kà nìi kpetà bíńtadá^a è tà foà yoo ò tà tṵṵ ò pú tà cḭ̀nà, kà nàfa yoo sa̰mmùǹta dɔdi ta mɛhɛká è kpíi, ³⁴ ye bíńdadá yaǹn kó bodá dící-dà mɛ̀ǹǹ tee-kó nɔtá é toó ye nɔkpíìta.

³⁵ Kà nìi nàfa kɔù tɔɔ̀ɔ kpɛ́ɛfá, pa dɛ́ɛ̀ka kó yɛda-á-ma mɛ̀ǹfà káà fòù-fa é totá fa dící, é yíí totá mɛ̀ǹfà kpíi-fá. ³⁶ Há̰kà, K'yèe nàfa de yɔ̀ɔ kuùhu-pú-dà tɔcí kà pà fà yá̰á̰, kà fa yaǹn há̰ pú fà púsí sukú, ò yònà é bodá nàfa-dà é tódá ye naàkpíìfa.

Kpɛ̰́ǹti nùka nɔtí túùpu hḭ́ǹka

³⁷ Kà nìi yódà nàfa è fà kɔ̀ù yoo è fà yɛdáà, ò yònà é bodá nɛ̀ci cìnùm̀-dà ye nàfa yaǹn. Kà hɔ̰̀fa-dà mɛ̀ɛ dɛɛ̀, k'ó bodá fa yaǹn hɔ̰̀ci cìnàhì.