Núǹtiyɛ̀ɛ̀ma 22

révision en équipe 15-12-04. Corrections après le conseiller

¹ Kà pà sɛ́ńtà túùdo yèǹka k'ò cúu bòdi bonkú è kó dúú yódá, kà p'òò potà òò kɔ̀ù, mɛ̀ǹǹ ò kɔ̀ù-ko pú yetà. ² Àmá, k'yè hɔ̰́tà wèǹku yɔ̀ɔ yɛm̀pu-ní, mɛ̀ǹǹ ò kɔ̀ù-ko pa̰à̰ yetáma-dà. Kà pà cɛ̰ɛ̰́ túùdo, ò yònà é bodá-ma ò yóò-sa. K'ò mɛ̀ɛ kɔ́ɔ́ yècɛ̰́ɛ̰̀ è kó bodá, kà p'óò yɛda k'ó hḭn núǹn. ³ Kà túùdo yódà nàfa yoo sa̰mmùǹta yoo hɔ̰̀fa, kà p'èè dɛ́hà o nɔ̀ku mɛhɛká k'yè káà fòù, ò yònà é bodá ò yódà-sa cɔ̀ku màdɛ́ɛ́-dà.

Kpɛ̰́ǹti nùka tɔɔ̀ɔ nɛm̀mu hḭ́ǹka

⁴ Kà nìi héè o nɔtí kà tì dúú è dii tɔɔ̀ɔ yoǹku yoo o pɛ́ɛ̀sɔ̰ná, ò kó bodá yoǹku yaǹn, o yoǹku diisuumá-dà yoo o pɛ́ɛ̀sɔ̰ná tebíisuuká.

⁵ Kà nìi tɔɔ̀n poòma túti k'yèe ha̰mú sóńtà è dii pɛ̰́ɛ̰̀yɔ̀ka bobohí yoo kà kà mum pú kɔ̰ṵ yoo o yɛ̀di dití wɛǹni, ò kó bodá-ma yɛ̀di yaǹn.

⁶ Kà nìi kɔ̰́ɔ̰̀ o tɔɔ̀ɔ díící yoo nɛm̀mu è yɔ̀ w'éè n'ɔ̀ɔ̀ sɔ̀na, kà p'èè yódà o hɔ̰́ɔ̰̀ta, kà pà dɛ́hà ye túùdo, ò yònà é bodá-ma ò yóò-sa ye màdɛ́ɛ́. ⁷ Kà pà há̰ p'óò dɛ́hà, ye hɔ̰́ɔ̰̀ta yaǹn yònà ó hɛ́tá-ma-ní Weèdi pesá é tɛ̀ni é yoòda o nɔ̀ku é wɛ̰́ha ni yìhìka è yɔ̀ ò p'éè pḭ́ń. ⁸ Kà nìpa pàdɛ́ɛ́ kɔ̰ǹti nɔtí kpɛ́mú, k'yé n'yònà nàfa, sa̰mmùǹta, bɔtá yoo hɔ̰̀fa, yoo pà kɔ̰̀ǹti báakú kpɛ́mú, yoo nɛǹku kùcɔ̰́kù kú kpɛ́mú kà kù fée, pà dɛ́ɛ̀ka yònà é taá kà Weèdi-dà é pà síi-nà. Kà mɛ̀ǹǹ pú naa-kó, k'ó bodá tɔɔ̀ɔ pà kɔ̰̀ǹti-sá kú hḭ́ǹka ye cɔ̀ku màdɛ́ɛ́.

⁹ Kà nìi hḭ́nà o tɔɔ̀ɔ sa̰mmùǹta yoo nàfa yoo hɔ̰̀fa yoo bɔtá yoo nɔtá bá mɛ̀ǹtà dɛ̀ɛ̀, kà tà kpíi yoo pà tà bɔ́kádà yoo pà tà yódà kà nìì pú yá̰á̰ mɛ̀ǹǹ tà yódà-ko, ¹⁰ mɛ̀ǹǹ tà hḭ́ḭ́-ko yònà é wɛ̰́ha-á-ma Weèdi yìhìka è yɔ̀ ò pú tà pḭ́ń. Ye wɔ̀ni, nɔtá yaǹn yònà é teha-á-ma o wɛ̰́hàdi, é héé ò dá bodá yècɛ̰́ɛ̰̀. ¹¹ Há̰kà, k'ò héè kà pà tà yódà o hɔ̰́ɔ̰̀ta mɛhɛká, ò kó bodá-ma ta yaǹn. ¹² Kà nɔsḭ̀ǹta-dà tà cɛ̰ɛ̰́ é tà cɛ̰tà cɛ̰tà, ò yònà é tóó-ní ta mìì sɔ̰́ńtà-sa-dà é tɛ̀ni éè bɛka. Mɛma, ò koò pú kó bodá yècɛ̰́ɛ̰̀.

¹³ Kà nìi penà o tɔɔ̀o nɔtá, kà tà bɔ́kádà yoo tà kpíi kà ta yaǹn yè kɔ́ɔ́, mɛ̀ǹǹ tà pènà-ko yònà é tà bodá-ma. ¹⁴ Kà ta yaǹn mɛ̀ɛ yè péé, mɛ̀ǹǹ tà pènà-ko pú kó bodá yècɛ̰́ɛ̰̀. K'ò mɛ̀ɛ de tà bànà kà pà k'óò bodá dífa-dà, mɛnfá cɔ̰́ɔ̰̀di-dà ò kó n'sà-ma.

Kpɛ̰́ǹti nùka tɔɔ̀ka Weèdi dɔ́kàma hḭ́ǹka nà nìpa fòùmu

¹⁵ Kà nìdo yehènà sepàǹn mɛ̀ǹǹ pú yá̰á̰-ko dɔɔ̀ɔ, òò dɔɔ́-nà, k'ò de mum pú káá dacɛ̰ǹni, ò kó bodá-ma o cɛ̀kàti, ye wɔ̀ni óò kádá. ¹⁶ K'òo báàa mɛ̀ɛ ò n'ɔ̀ɔ̀ yeéè-nà, ò baà kó bodá-ma sepàǹn mɛ̀ǹǹ pú yá̰á̰-ko dɔɔ̀o cɛ̀kàti dífa baà hɔ̰́ n'sá̰á̰pu.

¹⁷ Kà poòo yòǹ hɔ̰́ɔ̰̀ɔ̰^a nɛ cɔhàka, kà n'ɔ́ɔ̀ dèda óò kɔ̀ù.

¹⁸ Kà mɛ̀ǹǹ dɔɔ́-nà-ko nɔtá, kà n'ɔ́ɔ̀ kɔ̀ù.

¹⁹ Kà nìi pa̰à̰ dɔ̀hàka wàci fɔ̰̀di, kà n'ɔ́ɔ̀ kɔ̀ù. Mmí Kɔ́yɔ̀ɔ cɔ̰́ɔ̰̀di-dà nɛ kó m'pa̰kú-ma dɔ̀hàka.

²⁰ Nɛ dá diá cà̰ǹn mɛ̀ǹǹ péé-ko nɛ cɔhàka náńkú, nɛ mɛ̀ɛ dá ò dii-nà tàkací, mìì tee-sá nɛ mɛ̀ɛ té de yòǹ cà̰ma-dà Èsípútì teǹka mɛhɛká. ²¹ Nɛ dá diá náńkú kpíipoòku nà kpíibíitá. ²² Kà nɛ pà dià náńkú, kà pà kɔń è n yíí, n kó yekà-á-ma pa dawòni é tɛ̀ni é pà tempanà. ²³ N fɔ̰́di kó yídá-ma, ká n héé kà pá nɛ kɔ̀ù nà sepɛ̰ɛ̰̀dí ta̰à̰pu mɛhɛká, kà nɛ poòpa é hḭn kpíipoòti, kà nɛ bííhí é hḭn kpíibííhí.

²⁴ Kà nɛ banà dící nɛ bookú kóoó, k'ò yòǹ séńtɔ̀ǹn, nɛ dá yetá pa̰ná bàmàtepá tɔɔ̀pa hɔ̰mpú, è yɔ̀ ó cɔ̰ná dífa n'ɔɔ̀ bànà-fa hḭ́ǹka.

²⁵ Kà nɛ ta̰ntà nɛ tɔɔ̀ɔ tókédi è nɛɛ̀ ò bànà dífa, kà nɛ́ nì n'ɔ̀ɔ̀ tɛ̰́ná kà weèdi mum pú dɔdi, ²⁶ mìì tee-sá ni cɔ̰́ɔ̰̀di-dà ò káá-ma è dánì o wɔ̰̀ǹku. Kà nì kɔ́ɔ́, ò kó dáná m̀mɔ́ńya̰-dà é dɔɔ́? K'ò kɔń è n yíí, n k'óò besí-ma é tɛ̀ni óò tempanà, mìì tee-sá n yòǹ Weèdi mɛ̀nì kɔǹ-di-dà séèma.

²⁷ Nɛ dá n tèe, mmí nɛ Weèdi, nɛ mɛ̀ɛ dá nɔda mɛ̀ǹǹ yòǹ-ko nɛ bookú kpɛ̰́ǹn.

²⁸ Kà nɛ kɔ̰ṵ nɛ dití, è tɔ̰̀hì nɛ tebíiká, nɛ té dá yóka é n tɛɛ̀-ní mìì yòǹ-sa n kpɛ́ɛsá.

Nɛ́ n cená nɛ Pɔ̀ɔpá wɛǹni, pà yòǹ n kpɛ́ɛpá-dà.

²⁹ Ma cɔ̰́ɔ̰̀di-dà nɛ kó hḭmá nɛ nɛ̀ci nà nɛ hɔ̰̀ci. Ye bíidacecedí té kó pa̰á̰ daàa kàyehì-dà nà ni màa, daniìdí daadí, kà nɛ́ nì nà n pa̰á̰ dɔ̀hàdi.

³⁰ Nɛ kó n'yòǹ niìwempá-dà n kpɛ́mú. Kà nɔsḭ̀ǹta cɛ̰tà cɛ̰tà nɔtá yɛ̀di mɛhɛká, nɛ dá cécí ta màǹci. Nɛ té cì kɔ̰́ɔ̰́ mɔhí.