¹ Nɛ dá m'pa̰kú nìku yìhìka Weèdi kpɛ̰́ńtìnùka nɛ békú-sa, è kpɛ̀i nìpa nɛ dɛ́há. Kà nɛ hɔ̰n mɛma, nɛ pú kó dɛ́tá bootí nɛ Báàa mɛ̀ǹǹ péé-ko hḭ́ǹka pesá.

² K'à kó pa̰a̰ pɛ́íhí yècḭ́ḭ̀, a dá béń kà̰ǹkà̰ǹku é bekaná é bɛka a cɔ̰́ɔ̰̀di, é n'yònà yam̀pèǹtapá hɔ̰mpú Weèdi wɛmá biɔhà-nàmɔ̀ka mɛhɛká, nà cɔ̀ci bɛ́ɛ́cí. Pà hɔ̰n mɛma, è kpɛ̀i nìpa-dà é pà n'cóńtí. N nɛ cakú bemú-dà, pà yɔ̀ɔ dɛ́tápu-dà pa bootí. ³ Àmá fɔ̰́ń, k'à kó pa̰a̰ pɛ́íhí yècḭ́ḭ̀, a dá teha k'àa nɔ̀ǹcà̰nkú é n'yá̰á̰ a heukú pa̰kú-sa. ⁴ Á héé k'àa pa̰dí é n'sɔ̀di. Weèdi, a Báàa mɛ̀ǹǹ mádí-ko a pa̰à̰-sa sɔ̀sɔ̀ma mɛhɛká-dà k'áa bodá ye bootí.

⁵ Kà nɛ kó dɔa Weèdi, nɛ dá pa̰ná é n'yònà yam̀peǹtapá. Pà naanà é n'dɔń Weèdi è nɛ̀hi-í-ma Weèdi wɛmá biɔhà-nàmɔ̀ka mɛhɛká, nà cɔɔ̀cɛ̰̀ɛ̰̀ka è kpɛ̀i nìpa wɛǹni é pà dɛ́há. N nɛ cakú bemú-dà, pà yɔ̀ɔ dɛ́tápu-dà pa bootí. ⁶ Àmá fɔ̰́ń, k'à kpɛ̀i dɔa Weèdi, k'á dúú a nàmɔ̀ni mɛhɛká, é kpená cɔ̀di, é dɔa a Báàa, w'èè péé-ma ye sɔ̀sɔ̀dì-ní. Mɛnń mɛ̀ǹǹ mádí-ko a pa̰kú-sa sɔ̀sɔ̀ma mɛhɛká, ò k'áa bodá-ma ye bootí.

⁷ Kà nɛ kó dɔa Weèdi, nɛ dá sṵ́ná wɛmá é n'yònà mɛ̀m̀pà pú yá̰á̰-pa Weèdi hɔ̰mpú. Pà hɔ̰́ m'maàhu è toò pà kó wɛdá sàma-dà kà Weèdi é pà besí. ⁸ Nɛ dá pà tempa, mìì tee-sá Weèdi nɛ Báàa yá̰á̰-ma nɛ pɛnti-sá kà nɛ mum pú yè n'ɔ̀ɔ̀ cɔ̀haà. ⁹ Ǹtɛ nɛ yònà é n'dɔnkúma Weèdi:

¹⁴ Kà nɛ búúkú sḭ̀ḭ̀ma tɔɔ̀pa nɛ pa̰kú-ma, nɛ Báàa mɛ̀ǹǹ péé-ko hḭ́ǹka mɛ̀ɛ té kó nɛ deèda-á-ma nɛ kú sḭ̀ḭ̀ma. ¹⁵ Àmá, kà nɛ pú búúkú sḭ̀ḭ̀ma tɔɔ̀pa nɛ pa̰kú-ma, nɛ Báàa mɛ̀ɛ té pú kó nɛ deèda nɛ kú sḭ̀ḭ̀ma.

¹⁶ Kà nɛ té boú nùdi, nɛ dá bikàna yìhìka é n'yònà yam̀peǹtapá hɔ̰mpú. Pà hɔ̰́ fɔkàna yìhìka è kpɛ̀i é bɛka nìpa wɛǹni-dà è yɔ̀ pà boú nùdi. N nɛ cakú bemú-dà, pà yɔ̀ɔ dɛ́tápu-dà pa bootí. ¹⁷ Àmá fɔ̰́ń, k'à boú nùdi, k'á yudá a yìhìka, é ditá a yùti, ¹⁸ k'yé teha kà nìpa dá bantá è yɔ̀ a boú nùdi. A Báàa mɛ̀ǹǹ péé-ko ye sɔ̀sɔ̀di pesá yá̰á̰-ma. Mɛnń mɛ̀ǹǹ mádí-ko a pa̰à̰-sa sɔ̀sɔ̀ma mɛhɛká, ò k'áa kɔ̰́ɔ̰́-ma a bootí.

¹⁹ Nɛ dá makàna kpààti nɛ cɔ̰́ɔ̰̀di kpɛ́mú teǹka hḭ́ǹka. Ye pesá, súkápàsa nà wúńwúǹti kó tì dii-í-ma, yoo túùpa é pɔ́dá é dúú tì yódá. ²⁰ Àmá, nɛ́ makàna kpààti nɛ cɔ̰́ɔ̰̀di kpɛ́mú hḭ́ǹka mɛhɛká. Ye pesá, súkápàsa nà wúńwúǹti pú kó dii yècḭ́ḭ̀, túùpa mɛ̀ɛ pú kó nɛɛ́ pɔ́dá é dúú tì yódá. ²¹ Nìi kpààti péé-sa, o yàma hɔ̰́ m'péé-sa-dà.

²² Nɔ̀ǹci yòǹ wɔ̰̀ǹku ha̰wèta-dà. Kà cì pú mɔn, a wɔ̰̀ǹku wɛǹni-dà hɔ̰́ m'péé wenkú mɛhɛká. ²³ Kà cì há̰ mɔn, a wɔ̰̀ǹku wɛǹni-dà hɔ̰́ m'péé binìku mɛhɛká. Kà wenkú mɛ̀ǹkù péé-ku a mɛhɛká yòǹ binìku-dà, a binìku kó dɔ̀hà é wɛhika-á-ma.

²⁴ Òcɔ̰́ǹ pú kó nɛɛ́ é n'dehú dakpɛ̰́m̀ma pàdɛ́ɛ́ kpɛ́mú. K'ò pú sɛ̰ɛ̰́ òcɔ̰́, ò kó n'sɛ̰ɛ̰́-ma tɔɔ̀o. K'ò dàdi-nà òcɔ̰́, ò kó n'yɔ̰́sí-ma tɔɔ̀o. Nɛ pú kó nɛɛ́ é n'tṵ̀n Weèdi è tṵ́mà bɔ̀hɔ̀ta dící.

²⁵ Ye kú kpɛ́mú-dà tee n nɛ cakú-ma è tonà: Nɛ dá m'maàhu kà nɛ bɔ̀ti putì nɛ kó dii-sá nà nɛ kó yà̰à̰-sa é n'fòù-nà, yoo nà nɛ kó báá-sa, mìì tee-sá fòùmu ha̰tà-á-ma dimá, kà wɔ̰̀ǹku ha̰tà báatí. ²⁶ Nɛ́ seká nɛ̀hi, hì pú hɔ̰́ bɔdí, hì pú hɔ̰́ kɔ̰ṵ, hì mɛ̀ɛ pú káá bɔà. Nɛ Báàa mɛ̀ǹǹ péé-ko hḭ́ǹka-dà há̰ hì dinì! N'aá ha̰tà-á-ma nɛ̀hi sàma mɔ́ma. ²⁷ Nɛ woò mɔ́nń-dà kó nɛɛ́ o yaǹcɔ̰hàma mɛhɛká é tɔhìna o fòùmu daàka hḭ́ǹka, daadí nìcɔ̰́?

²⁸ Badà há̰ tee kà nɛ kó m'maàhu kà nɛ bɔ̀ti putì nà nɛ kó báá-sa? Nɛ́ seká foǹni míti péna kpɛ̰́ńkúma, nà pú dehú, nà mɛ̀ɛ pú dɛù báatí. ²⁹ N há̰ nɛ cakú-ma, bá wódo Sàdòmɔ́ɔ̀ n'ɔ̀ɔ káma ò de káá-ma wɛǹni, ò pú nɛɛ̀ é bádí báatí kà ti suukú é ta̰ntá ye pémú mùcɔ̰́. ³⁰ Weèdi mɛ̀nì sà̰nì-di foǹni míti ma kú bookú, mɛntí mɛ̀ǹtì péé-ti yenì è kó wáńtá é cɔ́dá ha̰mú, nì pú kó nɛ báná k'yé n'ka̰hà mɛma? Nɛ dandaní pú wɛhi báà cɛ̰́ma. ³¹ Nɛ bɔ̀ti dá m'putì kà nɛ békú nɛ cɔ̰́ɔ̰̀di è tonà: Ti kó dii badà? Ti kó yà̰à̰ badà? Ti kó báá badà? ³² Mii kú wɛnnì, mɛ̀m̀pà pú yá̰á̰-pa Weèdi-dà hɔ̰́ yè m'pɛnti wɔ̀ka wɛǹni. Àmá nɛ́na, nɛ Báàa mɛ̀ǹǹ péé-ko hḭ́ǹka yá̰á̰-ma è yɔ̀ n'ɛɛ̀ kpɛ̀i. ³³ Nɛ́ m'pɛnti cecemá nɛ kó hḭmpú é dúú Weèdi wóòti mɛhɛká, nà nɛ kó hḭmpú é n'coó, nì kó nɛ kɔ̰́ɔ̰́-ma ye kú dàhàka mìì sɔ̰́ńtà-sa wɛǹni. ³⁴ Nɛ bɔ̀ti dá m'putì nà kṵ́ńweǹni daadí kpɛ́mú. Kṵ́ńweǹni-dà yá̰á̰ ni dipú yɛtì-sa-ní. Daadí bá mɛ̀nì dɛ̀ɛ̀-di sànà ni wéékú-dà.