Màtíyéè 7

Nɛ té dá n'síí tɔɔ̀pa

¹ Nɛ té dá n'síí tɔɔ̀pa, k'yé teha kà Weèdi mɛ̀ɛ té dá wáńtá nɛ síi-nà, ² è yá̰á̰, Weèdi kó wáńtá nɛ síi nɛ síkáàma-dà tɔɔ̀pa. Nɛ beé-nà-sa é pa̰a̰ tɔɔ̀pa, mií-dà Weèdi kó wáńtá beé-ma é nɛ pa̰a̰. ³ Badà tee k'à wáń mífa mɛ̀ǹfà péé-fa a kúcàa nɔ̀ǹfa mɛhɛká, àá pú dɛ́hà dabíidí mɛ̀nì péé-di a kpɛ́ɛfá mɛhɛká? ⁴ Ntɛ́ a kó hḭmà é caka a kúcàa è yɔ̀: Héé ká n deèda mífa mɛ̀ǹfà péé-fa a nɔ̀ǹfa mɛhɛká, kà dabíidí há̰ péé a kpɛ́ɛfá mɛhɛká? ⁵ Yam̀peǹtasà fɔ̰́ń! Cetá é deèda dabíidí mɛ̀nì péé-di a nɔ̀ǹfa mɛhɛká. Mɛma, a kó n'dìi-í-ma dɛ́dɛ́í é deèda mífa mɛ̀ǹfà péé-fa a kúcàa nɔ̀ǹfa mɛhɛká.

⁶ Nɛ dá kɔ̰́ɔ̰́ mɔhí mìì yòǹ-sa Weèdi kpɛ́ɛsá, hì kó nɛɛ́ é fitá-ma-ní nɛ bɛ́ka é nɛ dɔm. Nɛ mɛ̀ɛ dá wɛ́í nɛ pa̰a̰ká fà̰ǹkàti yìhìka, tì kó nɛɛ́ kà nɔ̀ṵ̀nà-á-ma é kà pɔ́u.

Mɛ̀ǹǹ cɔ̀haà-ko, ò kó dɛ́tá-ma.

⁷ Kà nɛ cɔɔ̀haà, pà kó nɛ pa̰a̰-á̰-ma. Kà nɛ pɛháà, nɛ kó dɛ́tá-ma. Kà nɛ potà cɔ̀di pà kó nɛ kpetá-ma, ⁸ è yá̰á̰, mɛ̀ǹǹ kú wɛnnì kó cɔhà-ko pà k'óò pa̰a̰-á̰-ma. Kà mɛ̀ǹǹ pɛnti-kó, ò kó dɛ́tá-ma. Kà mɛ̀ǹǹ potà-ko cɔ̀di, pà k'óò kpetá-ma. ⁹ Nɛ mɛhɛkà, nɛ woò mɔ́ńn-dà cedí é pa̰a̰ o bíitá tá̰à̰di kà t'òò cɔ̀haà pɛ̰́ɛ̰̀? ¹⁰ Yoo, t'òò cɔ̀haà num̀bíitá, k'ó tà kɔ̰́ɔ̰́ wàfa? ¹¹ Nɛ́na mɛ̀m̀pà yòǹ-pa niìsḭ̀m̀ma, nɛ nɔn-ń-ma è pɔ̰n nɛ bííhí mìì suu-sá, k'yàá bá síika-nà nɛ Báàa mɛ̀ǹǹ péé-ko hḭ́ǹka, ò kó pa̰a̰-má mìì suu-sá mɛ̀m̀pà yè n'ɔ̀ɔ̀ cɔ̀hu-pá!

¹² Nɛ kpɛ̀i kà tɔɔ̀pa é nɛ m'pa̰kú-sa, nɛ mɛ̀ɛ t'éè pà m'pa̰kú. Mɔ̀yísì kpɛ̰́ǹtinùka nà Weèdi wɛtɛ̰́nápa pɔ̀kàhi békú-sa-dà.

Há̰ńnùfɛ̰́hidí

¹³ Nɛ́ dúú nà há̰ńnùdi mɛ̀nì fɛ̰́hi-dí, è yá̰á̰ há̰ńnùdi mɛ̀nì kɔ́dì-nà-di sèm̀ma mɛhɛká pɛsì-í-ma, kà ma cɔ̀ku mɛ̀ɛ té pɛsì. Nìku dɔ́ɔ́di há̰ tṵnì-sa-dà è dúù. ¹⁴ Àmá, cɔ̀ku mɛ̀ǹkù kɔ́dì-nà-ku fòùmu mɛhɛká fɛ̰́hi-í-ma, kà ku há̰ńnùdi fɛ̰́hi. Nìpa cɛ̰́masí-dà há̰ kù tṵ̀nì è dúù.

Tepú nà mu bíiká

¹⁵ Nɛ́ pa̰á̰ yɔkàma nà mɛ̀m̀pà pú yòǹ-pa Weèdi wɛtɛ̰́nápa mɔ́mpá. Pà hɔ̰́ tɛ̀ni nɛ pesá è yòǹ-ń-dà pòpòù è yònà hɔ̰̀ci. Àmá pa mɛhɛká, kà pà yòǹ càkomɔtohiká. ¹⁶ Nɛ kó pà bantá pa pa̰á̰ma pesá-dà. Pà pú hɔ̰́ tɔ̰̀hì ka̰nka̰ká wɛɛná hḭ́ǹka. Pà mɛ̀ɛ pú tɔ̰hù sɔ̰ɔ̰̀ka poòma hḭ́ǹka. ¹⁷ Tesuupú hɔ̰́ pɛdá tebíisuuká-dà, kà tekpákpààpu é pɛdá tebíikpákpààka. ¹⁸ Tesuupú pú kó nɛɛ́ pɛdá tebíikpákpààka, tekpákpààpu mɛ̀ɛ té pú kó nɛɛ́ pɛdá tebíisuuká. ¹⁹ Tepú mɛ̀mù pú pɛní-pu wɛǹni tebíisuuká, pà kó mù cédá-ma é mù ká̰ńtá ha̰mú mɛhɛká. ²⁰ Ye kú hḭ́ǹka, nɛ kó bantá mɛ̀m̀pà pú yòǹ-pa Weèdi wɛtɛ̰́nápa mɔ́mpá pa pa̰á̰ma mɛhɛká-dà.

Mɛ̀m̀pà yòǹ-pa Sèsíì dapàm̀ma mɔ́mpá

²¹ Yè pú yòǹ mɛ̀m̀pà n yún-pá è toò: Teù, Teù, pa wɛǹni-dà wáńtà dúti hḭ́ǹka wóòti mɛhɛká. Àmá, mɛ̀ǹǹ pa̰kú-ko n Báàa mɛ̀ǹǹ péé-ko hḭ́ǹka dɔ́kàma-dà wáńtà dúti ti mɛhɛká. ²² N kó tɛ̀ni tḭ́ń daadí é síi-nà nìpa, sààpa kó nà n n'cakú-ma è toò: N Teù! N Teù! N'àa yèdi dɔ ti de tɛ̰́nì-ma wɛmá Weèdi de hḭ́n tí caka-má ni nìku-u? N'àa yèdi dɔ ti de bɔɔ̀haà-ma wɛɛ̀kupá nìpa mɛhɛká, é pa̰á̰-nà pɔ́ńtápa̰á̰ma dɔ́ɔ́di-i? ²³ Ye wɔ̀ni, n kó pà caka-á-ma è yɔ̀: N pú nɛ yá̰á̰ kàcɔ̰́kà bɛ́kà, ń nɛ mɔ́ńka n yìhìkà, nɛ́na mɛ̀m̀pà pa̰kú-pa sḭ̀ḭ̀ma.

Hɔ̰́ɔ̰́hi hìdɛ́ɛ́

²⁴ Ye kú kpɛ́mú-dà tee, mɛ̀ǹǹ kú wɛnnì bekù-ko n wɛmá, è pa̰kú mà hḭ́mpú, ò yònà yaǹfòùma yaǹn mɛ̀ǹǹ madí-ko-dà o hɔ̰́ɔ̰̀ta tá̰a̰beèdi hḭ́ǹka. ²⁵ Kà tafá é tɛ̀ni é dɔdi, kà kóńcí é sṵ́ná dɛ́dɛ́í, kà yakpekú é tà heé, tà pú dɔdi mìì tee-sá, pà de pṵ́dà ta makɔ̀dikú tá̰a̰beèdi hḭ́ǹka-dà. ²⁶ Há̰kà, mɛ̀ǹǹ kú wɛnnì bekù-ko n wɛmá, àá pú pa̰kú mà hḭ́mpú, ò yònà yíńtása-dà mìì maá-sa ye hɔ̰́ɔ̰̀ta tá̰mú hḭ́ǹka. ²⁷ Kà tafá é tɛ̀ni é dɔdi, kà kóńcí é sṵ́ná dɛ́dɛ́í, kà yakpekú é tà heé, kà tá dɔdi, é pɔ́-pɔ́dá pépédí.

Sèsíì biɔhànì nà kpɛ̰́ǹti nɔɔ̀ti

²⁸ Sèsíì cakáà-ma ye kú wɛmà wɛnnì é yɔ̀ɔ, k'yé dii nìku n'ɔ̀ɔ̀ de biɔhànì-ma kú bookú, ²⁹ mìì tee-sá, o kú biɔhànamá de pú yònà Weèdi kpɛ̰́ńtìnùka biɔhànapá kpɛ́ɛmá. Ò de pà biɔhànì nà kpɛ̰́ǹti nɔɔ̀ti-dà.