Màtíyéè 8

Sèsíì kpekàna kɔ̰̀ǹn

¹ Sèsíì de cútà-ma-ní ta̰à̰di hḭ́ǹka, kà nìku dɔ́ɔ́di-dà ò tṵ̀n. ² Ye wɔ̀ni, kà kɔ̰̀ǹn òcɔ̰́ǹ óò hɛ́tá-ní, é hìu-ho o yìhìka è yɔ̀: Dakpɛ̰́ǹn, k'à kpɛ̀i, a kó nɛɛ́ n kpekàna-á-ma, ká n weka.

³ K'ó dɛɛ̀da o nɔ̀ku óò pḭ́ń è yɔ̀: N kpɛ̀i-í-ma, kpeka! Ye pesá n'ɛ̀ɛ pesá, k'òo kɔ̰̀ǹku é yɔ̀a, k'ó weka. ⁴ Ye wɔ̀ni, kà Sèsíì óò caka è yɔ̀: Besí sukú! A dá yetá mà ca-caka òcɔ̰́ǹ. Àmá, á taá é bɛka a cɔ̰́ɔ̰̀di dɔ̀hàdi yaǹn, é pa̰á̰ wekànamá dɔ̀hàdi Mɔ̀yísì kpɛ̰́ǹtinùdi hḭ́n á pa̰á̰-di é bɛka nìpa wɛǹni è yɔ̀ a kpekáà-á-ma.

Sèsíì kpekànà Hɔ̀dɔ́m̀ sósìpa kpɛ̰́ǹn òcɔ̰́ǹ kú núndeho

⁵ Sèsíì dúti-má Kàpɛ̀ɛ̀nàúm̀ yɔtí, kà Hɔ̀dɔ́m̀ sósìpa kpɛ̰́ǹn òcɔ̰́ǹ óò hɛ́tá-ho, óò cɔ̀hà è yɔ̀ óò tempa-nà. ⁶ K'ò yɔ̀: Dakpɛ̰́ǹn, n núndeho-dà dɔɔ́-ní hɔ̰́ɔ̰̀ta, è hɔ̀u è wéhèta dɛ́dɛ́í.

⁷ K'óò caka è yɔ̀: N kó taá-ma óò kpekàna. ⁸ Àmá, k'yèe sósìpa kpɛ̰́ǹn óò tɛ̰́ná è yɔ̀: N pú sànà á dúú n hɔ̰́ɔ̰̀ta, àmá á kɔ̰́ɔ̰́ nùdi sá̰à̰di n deho kó kpeka-á-ma. ⁹ N mɔ́ńǹ, n káá-ma yìkàǹyìkàpa mɛ̀m̀pà n nihí-pa, è mɛ̀ɛ té káá sósìpa n nihí-pa. Kà n cakáà òcɔ̰́ è hḭ́n tɔɔ̀ta, ò hɔ̰́ tɔɔ̀ta-á-ma. Kà n cakáà tɔɔ̀o è hḭ́n ya̰ní, k'ò té tɛ̀ni. Kà n mɛ̀ɛ cakáà n deho è hḭ́n pa̰á̰ miì, ò hɔ̰́ yè pa̰á̰-á̰-ma.

¹⁰ Sèsíì yèkaà-ma mɛma, é sɛda ye sósìpa kpɛ̰́ǹn wɛmá dɛ́dɛ́í, é caka mɛ̀m̀pà d'oò tṵ̀n-pá è yɔ̀: Mɔ́ma-dà n nɛ cakú-ma, bá Ìsìdàyɛ́dìpa mɛhɛká, n mum pú dɛ́hà dandansàdì mɛnì kú tɔɔ̀di. ¹¹ N nɛ cakú-ma, nìpa dɔ́ɔ́di kó wáńtá yɛɛ̀ni-í-ma-ní Weèdi yɛɛ̀kumá nà nì dɔkúma é tɛ̀ni kaàdi hḭ́ǹka wóòti mɛhɛká é pɛ́ɛ́ dii-nà Àbààhám̀, nà Ìsáákì, nà sàkɔ́pù. ¹² Àmá, mɛ̀m̀pà de yònà é dúú-pa Weèdi wóòti mɛhɛká, pà kó pà wɛ́í tapaàdi-dà yḭ́ḭ̀pu mɛhɛká. Ye pesá-dà pà kó toó-ma pa yuùka é hódí, é cécí-nà pa há̰ḿbící.

¹³ Ye kú dàhàka, kà Sèsíì é caka ye sósìpa kpɛ̰́ǹn è yɔ̀: N'àa dandaní kpɛ́mú, tón é kòǹ, a cɔɔ̀haà-sa kó pa̰á̰-ma. Ye wɔ̀ni ni cɔ̰́ɔ̰̀di mɛhɛká, k'yèe sósìpa kpɛ̰́ǹn deho é kpeka.

Sèsíì kpekànà mɔkàpa dɔ́ɔ́di

¹⁴ Kà Sèsíì é tadí Píyɛ́ɛ̀ hɔ̰́ɔ̰̀ta, é tɛ̀i è hɔ̰́tà Píyɛ́ɛ̀ pooò màa mɔn wɔ̰ǹtòǹti è dɔɔ́. ¹⁵ K'ó pḭ́ń o nɔ̀ku, k'yèe wɔ̰ǹtòǹti é yɔ̀ɔ, k'ó yídá óò pɛha dipú k'ó dii.

¹⁶ Weèdi dɔɔ tḭ́ń wɔ̀ni, kà pá toha-ní o pesá nìpa dɔ́ɔ́di kà wɛɛ̀kupá pà fá̰kápu. K'ó bɔhà ye wɛɛ̀kupá n'ɔ̀ɔ wɛmá, é yíí é kpekàna mɔkàpa wɛǹni. ¹⁷ Ma kú bookú-dà Weèdi wɛtɛ̰́náko Ìsàyíì wɛmà mɛmà de pa̰nà-ma. Ò de yɔ̀:

Ò toó ti weǹkɔ̀mu-dà

è toó nà ti dɔncí.

Mɛ̀m̀pà kpɛ̀i-pá é tṵṵ̀na Sèsíì yònà é hḭmpú

¹⁸ Sèsíì dɛ́hà-ma kà nìku ò yéńtà, k'ó caka o dapàm̀ma è yɔ̀ pá ka̰há baàdi sóìdi tɔɔ̀di. ¹⁹ Ye wɔ̀ni, kà Weèdi kpɛ̰́ǹtinùka biɔhànakó òcɔ̰́ǹ óò hɛ́tá-ho, óò caka è yɔ̀: Dakpɛ̰́ǹn, n kó n'àà n'tṵ̀n-ń-ma a kó yɛ̀ɛ̀-sa wɛǹni. ²⁰ K'óò tɛ̰́ná è yɔ̀: Dóócí káá-ma fɔ̰̀ɔ̰cí, kà nɛ̀hi káá yɛ̰tidí, àmá Niìfòùo bíitá pú káá ta kó dɔɔ́-sa é muhipa. ²¹ Kà tɔɔ̀o òcɔ̰́ǹ, o dapàm̀ma mɛhɛká yɔ̀: Dakpɛ́ǹn, n pa̰a̰ foóma ká n cedí taá é dáná-ní n báàa. ²² Kà Sèsíì óò tɛ̰́ná è yɔ̀: Ya̰ní é n tṵṵ̀na! Héé kpíípa kà pá dáná pa kpíípa.

Sèsíì nɛ̀hìnà yakùkùdi

²³ Kà Sèsíì é dìsi hà̰à̰pu hḭ́ǹka k'òo dapàm̀ma ò nɔɔ̀-nà. ²⁴ Ye pesá n'ɛ̀ɛ pesá, kà yakùkùdi é kpetá-ní ye baàdi hḭ́ǹka, kà nɛ́ɛsa̰nhí podì, è húdi-ho nɛ́ɛmá ye hà̰à̰pu mɛhɛká, háá kà mù kɔ́dí sṵ́nápu. Kà Sèsíì mɛnn dɔɔ́. ²⁵ K'òo dapàm̀ma óò hɛ́tá-ho, óò hèǹta è yɔ̀: Ti dakpɛ̰́ǹn, ti kó kpíí-ma, ti fḭ́hìna!

²⁶ K'ó pà béka è yɔ̀: Badà tee kà nɛ wani mɛma? Nɛ dandaní pú wɛhi báà cɛ̰́ma. Mɛmá-dà, k'ó yídá é wɛɛ́-nà kpeéma ye yakú n'ɛ̀ɛ baàdi nɛ́ɛmá, k'yè yɔ̀ cèù. ²⁷ K'yé pà dii pa wɛǹni, kà pà békú pa tɔɔ̀pa è toò: Nìi wodà mɛmà, báà yakú nà nɛ́ɛmá k'yòò you-nà toodí?

Sèsíì kpekànà daapá pàdɛ́ɛ́ wɛɛ̀kupá fá̰kápú-pa

²⁸ Kà pá ta̰ntá ye baàdi sóìdi tɔɔ̀di, Kàdàdáàpa teǹka mɛhɛká. Kà daapá pàdɛ́ɛ́ é yɛɛ̀ni híùka mɛhɛká, é tɛ̀ni o peètanàpu. Wɛɛ̀kupá-dà de pà fá̰kápú, kà pà sḭ̀ǹ dɛ́dɛ́í. Òcɔ̰́ǹ de koò pú hɔ̰́ teha é yɛ̀dì ye kú cɔ̀ku. ²⁹ Kà pá cetá è wɛì kpeéma è toò: A ti kpɛ̀i-nà badà Weèdi bidà? A tɛ̀ni è kó ti fá̰kápa-á-ma kà wɔ̀ni mum pú tɛ̀i-a? ³⁰ Yàá de hɔ̰́tà fa̰nkàdɔ́ɔ́di nìcɔ̰́nì-dà péé ye pesá è há̰ yè dɛu-nà cɛ̰́ma, è càu è pɛnti dimá. ³¹ K'yèe wɛɛ̀kupá é sɛ́uka Sèsíì è yɔ̀: K'à kó ti bɔhà, k'á ti hutá fà̰ǹkàtì mɛntì kú mɛhɛká. ³² K'ó pà caka è yɔ̀: Tɔɔ̀ta-nà. Kà pá yɛ̀ɛ̀ ye daapá padɛ́ɛ̀ka mɛhɛká é taá é dúú ye fà̰ǹkàti mɛhɛká. Mɛmá-dà, k'yèe fa̰nkàdɔ́ɔ́di wɛǹni é dɔtìna-ní n'ɛ̀ɛ sḭ́ńtáma, é n'káá-ho n'ɛ̀ɛ baàdi mɛhɛká, é kpíí fɛ́.

³³ Mɛ̀m̀pà de cɛ̰nti-pá ye fà̰ǹkàti, kà pá cocí é dúú yɔtí mɛhɛká é tɛ̀i é caka mìì de pa̰à̰-sa, nà mìì de tɛ̀ni-sá-ní ye daapá pàdɛ́ɛ́ wɛɛ̀kupá de fá̰kápú-pa. ³⁴ Ye wɔ̀ni, k'yèe yɔtí nìpa wɛǹni é yɛɛ̀ni é taá Sèsíì peètanàpu. P'òò dɛ́hà tíń wɔ̀ni, óò sɛ́uka è yɔ̀ ó yɛ̀dì pa teǹka.