Mádíkì 10

Dayedàma nà poyedàma

¹ Kà Sèsíì é yídá ye pesá, é taá Sùdéè tempáàku mɛhɛká, é tɛ̀i é deèta-nà Sùùtɛ̰́ɛ̰̀ kóńkú sóìdi tɔɔ̀di. Kà nìku dɔ́ɔ́di é tṵ́má peèta o pesá, k'ó cetá è pà biɔhànì Weèdi wɛmá, ò baà hɔ̰́ n'hɔ̰mpú. ² Kà Fàdísìpa pàcɔ̰́pà é tɛ̀ni o pesá è kpɛ̀i óò bɛń. Kà p'óò béka è yɔ̀: Weèdi kpɛ̰́ńtìnùka pɛ̰ḭ-ḭ́-dà nìdo nùdi è yɔ̀ ó bɔhà o poòo? ³ K'ó pà tɛ̰́ná è yɔ̀: Mɔ̀yísì nɛ kɔ̰́ɔ̰̀ kpɛ̰́ǹti nùdi m̀mɔ́ni-dà ye hḭ́ǹka? ⁴ Kà pà yɔ̀: Mɔ̀yísì pɛ̰ḭ nùdi è yɔ̀ kà nìi kó bɔhà o poòo, k'óò wà̰hà pɔ̀kàta mɛ̀ǹtà cakú-ta è yɔ̀ òò yedáà-á-dà, ye wɔ̀ni óò bɔ̀hà. ⁵ Kà Sèsíì é pà caka è yɔ̀: Nɛ tokpekú kpɛ́mú-dà tee Mɔ̀yísì de nɛ kɔ̰́ɔ̰̀-ma ye kú kpɛ̰́ǹtì nùdì. ⁶ Àmá nà cetáma-ní, yè de pú yòǹ mɛma. Weèdi de pa̰à̰ tḭ́ń daadí niìya̰ wɛǹni, nì de pa̰à̰ dɔɔ̀o nà poòo-dà. ⁷ Ye kú kpɛ́mú-dà tee, dɔɔ̀o té kó yíí-ma é héé o báàa n'ɔ̀ɔ màa, é taá daàdi n'ɔ̀ɔ poòo, ⁸ pa dɛ́ɛ̀di kà pá hḭn nìdo òcɔ̰́^a. Pà koò pú kó n'yòǹ ye wɔ̀ni nìi pàdɛ́ɛ́, àmá òcɔ̰́. ⁹ Yè yòǹ-mà mɛma, nìi dá yetá é yaàta Weèdi múnà-sa. ¹⁰ Pà kṵn tḭ́ń wɔ̀ni hɔ̰́ɔ̰̀ta, k'òo dapàm̀ma é tṵ́má óò béka ye wɛmá hḭ́ǹka. ¹¹ K'ó pà tɛ̰́ná è yɔ̀: Kà nìi bɔɔ̀haà o poòo è tóò tɔɔ̀o, ò cɔ̰hú dɔɔdí-dà o pocecedó pesá. ¹² Kà poòo mɛ̀ɛ yedáà o dɔɔ̀o è taá è tóò tɔɔ̀o, ò mɛ̀ɛ té cɔ̰hú dɔɔdí-dà o dacecedó pesá.

Sèsíì kónà bííhí

¹³ Kà nìpa é m'pení-nà-ní bííhí Sèsíì pesá è kpɛ̀i ó cɔ̰ná o nɔ̀hi hi hḭ́ǹka é hì kóná, k'òo dapàm̀ma é yeda è pà kɔ̰̀ǹti-nà. ¹⁴ Sèsíì dɛ́hà-ma miya̰, k'yé ò dɔnka k'ó caka o dapàm̀ma è yɔ̀: Héé-nà kà bííhí é tɛ̀ni n pesá. Nɛ dá hì kpaná mìì tee-sá, Weèdi wóòti péé mɛ̀m̀pà hì yònà-pa kpɛ́mú-dà. ¹⁵ Mɔ́masí-dà n nɛ cakú-ma. Kà mɛ̀ǹǹ pú teháà-ko Weèdi wóòti o hḭ́ǹka é n'yònà bíitá, ò pú kó nɛɛ́ é dúú ti mɛhɛká. ¹⁶ Ò wɛdà-ma mɛma é yɔ̀ɔ, é tóó-ní ye bííhí é hì hòpu-nà, é cɔ̰mu o nɔ̀hi hi hḭ́ǹka, é hì kóná.

Sèsíì nà káma yaǹn òcɔ̰́ǹ

¹⁷ Sèsíì de kpɛ̀i é cɛ̰ɛ̰́ tḭ́ń wɔ̀ni cɔ̀ku, kà nìdo òcɔ̰́ǹ é tɛ̀ni o pesá è cokù-ní, é tɛ̀ni é hìu o yìhìka óò béka è yɔ̀: Dakpɛ̰́nsudó, n kó pa̰á̰ badà é dɛ́tá fòùmu mɛ̀mù bá yɔ̀ɔpú? ¹⁸ Kà Sèsíì óò caka è yɔ̀: Badà tee k'á n yíí sudó? Nìdo òcɔ̰́ǹ kɔ́ɔ́ è sudi, Weèdi cɔ̰́ɔ̰̀di bààsí. ¹⁹ A yá̰á̰-dà-ma Weèdi hɔ̰́ɔ̰wencí nùka mɛ̀ǹkà hḭ́n-ká: A dá yetá é kɔ̀ù nìdo, a dá yetá cɔ̰ha dɔɔdí, a dá yódá, a dá n'centì è cɔ̰hú tɔɔ̀o yèdi, a dá yetá dii tɔɔ̀o tàkecí, á n'cuunì a báàa n'àa màa^b. ²⁰ K'yèe káma yaǹn óò tɛ̰́ná è yɔ̀: Dakpɛ̰́ǹn, n tṵnà-á̰-ma ye kú nùkà wɛnnì nà n dapàǹku wɔ̀ni. ²¹ Kà Sèsíì óò wáńtá, óò sɛda, óò caka è yɔ̀: Niìi yècɔ̰́-d'àà dóńtà. Tɔɔ̀ta, é taá yɛda a káá-sa wɛǹni, é tóó ye dící é cì totá pɛ́íhí. K'à hḭn mɛma, a kó ya̰dá dɛ́tá-ma káma Weèdi pesá. K'à pa̰à̰ miya̰ è yɔ̀a, k'àá ya̰ní é n tṵṵ̀na. ²² Ye káma yaǹn yeèkaà-ma mɛma, k'òo yàma yɔ̀ kɔ̰̀, k'ó yídá é ka̰há mìì tee-sá, ò de káá káma-dà sàma.

²³ Kà Sèsíì é wáńtá wáńtá o dapàm̀ma mɛ̀m̀pà de ò yéń-yéńtà-pa é pà caka è yɔ̀: Yè kó n'dɔǹ-ń-ma sàma nà káma yam̀ma kó hḭmá é dúú Weèdi wóòti mɛhɛká. ²⁴ K'yé dii o dapàm̀ma nà wɛmá ò de pà cakáà-ma. K'ó sɔ̰kadá wɛmá é pà caka è yɔ̀: N dóòpa-nà! Yè kó n'dɔǹ-ń-ma nà nìi^c kó dúú-ma Weèdi wóòti mɛhɛká. ²⁵ Káma yaǹn dúúma Weèdi wóòti mɛhɛká kó n'dɔǹ-ń-ma é ha̰tá bɔnamáku kó yɛ̀ɛ̀-ma yáafá bòdi. ²⁶ K'yé dɔ̀hà é dii o dapàm̀ma, kà pà békú pa tɔɔ̀pa è tonà: Kà mɛmá-dà, wod'àá kó dɛ́tá fḭ́táma? ²⁷ Kà Sèsíì é pà wáńtá è yɔ̀: Nìpa kó hɛ̰ka-sá pa̰á̰pu, Weèdi k'éè pa̰á̰-ma, mìì tee-sá nì pú hɛ̰kú yècɛ̰́ɛ̰̀. ²⁸ Kà Píyɛ́ɛ̀ óò caka è yɔ̀: Ǹtɛ, tḭ́ńti héè-ma-ní niìi wɛǹni é tɛ̀ni áa tṵṵ̀na. ²⁹ Kà Sèsíì óò tɛ̰́ná è yɔ̀: N nɛ cakú mɔ́ma-dà. Kà nìi yíì è hédà o hɔ̰́ɔ̰̀ta, yoo o kúcàpa, yoo o potɔ̰ɔ̰̀pa, yoo o báàa, yoo o màa, yoo o bííhí yoo o yɛ̀ka nà n kpɛ́mú nà Weèdi wɛmá kpɛ́mú, ³⁰ ò kó dɛ́tá-ma pemà mɛmà kú mɛhɛká, ò héè-sa-ní cɔ̀kumá kɔ̀ùta. Ò kó dɛ́tá-ma hɔ̰́ɔ̰́hí, nà kúcàpa, nà potɔ̰ɔ̰̀pa, nà mààpa, nà bííhí, nà yɛ̀ka, é pɛ́ɛ́-nà fá̰kápàma. Kṵ́ńweǹni daadí, k'ó wáńtá dɛ́tá fòùmu mɛ̀mù bá yɔ̀ɔpú. ³¹ Nìpa dɔ́ɔ́di mɛ̀m̀pà yòǹ-pa cecepá yenì kó wáńtá hḭn dèǹdèma-dà, kà nìpa dɔ́ɔ́di mɛ̀m̀pà yòǹ-pa dèǹdèma yenì é wáńtá hḭn cecepá.

Sèsíì cakú ta̰á̰ma o kṵ́mú n'ɔ̀ɔ yá̰ńtáma

³² Sèsíì n'ɔ̀ɔ dapàm̀ma kà pá n'tṵ̀n cɔ̀ku è póńti Sèdìsàdɛ́m̀, k'ò nihí yìhìka, k'òo dapàm̀ma bɔ̀ti pudì, kà wantafɔ̰̀di káá mɛ̀m̀pà de pà tṵ̀n-pá. K'ó tṵ́má tódá ye o tɔntɔdipá píì-pàdɛ́ɛ́ kà pá cɛ̰tá bɛ́ɛ́kú pa cɔ̰́ɔ̰̀di pesá, k'ò kpɛ̀i é pà caka mìì de k'óò tɛ̀ni-sá-ní. ³³ K'ò yɔ̀: Ǹtɛ kà ti póńti Sèdìsàdɛ́m̀. Ye pesá-dà pà kó taá cɛ̰ɛ̰́-ma Niìfòùo bíitá, é tà tàa dɔ̀hɔ̀ka kpɛ̰́m̀ma nà Weèdi kpɛ̰́ńtìnùka biɔhànapá nɔ̀hi mɛhɛká, kà pá deèna nùdi sídàma mɛhɛká è yɔ̀ pá tà kɔ̀ù, ye wɔ̀ni é tà tàa mɛ̀m̀pà pú yá̰á̰-pa Weèdi nɔ̀hi mɛhɛká, ³⁴ Kà pá tà dɛhí, é tṵ́ha ta hḭ́ǹka, é tà podí dáàfa, é yɔ̀ɔ tà kɔ̀ù. Data̰á̰di daadí, kà tá yá̰ńtá-ní.

Sàákì nà Ìsá̰à̰ Sèbèdéè bííhí cɔhɔ̀ma

³⁵ Kà Sèbèdéè bííhí, Sàákì nà Ìsá̰à̰ é hɛ́tá-ní Sèsíì pesá é tɛ̀ni è yɔ̀: Ti dakpɛ̰́ǹn, ti kpɛ̀i á ti pa̰á̰ ti k'áa cɔhà-sa-dà. ³⁶ Kà Sèsíì é pà béka è yɔ̀: Nɛ kpɛ̀i ń pa̰á̰ badà nɛ kpɛ́mú? ³⁷ Kà pà yɔ̀: Ti kpɛ̀i k'à wáńtà kàdi a wóosàti mɛhɛká, k'á héé kà tí n'kaàdi àà pɛ̀di-nà-á-ma, òcɔ̰́ a hiòma, tɔɔ̀o a cà̰ǹkamá. ³⁸ Kà Sèsíì é pà tɛ̰́ná è yɔ̀: Nɛ pú yá̰á̰ nɛ cɔɔ̀hu-sá. Nɛ kó nɛɛ́ toó-dà wèéwèdo n kó toó-ko? Náńkú pà kó n diá-ku, nɛ kó nɛɛ́ kù dii-í-dà? ³⁹ Kà p'óò tɛ̰́ná è yɔ̀: Ti kó nɛɛ́-ma. K'ó pà caka è yɔ̀: Mɔ́ma-dà nɛ wɛdà-ma è yɔ̀ nɛ kó nɛɛ́ é toó wèéwèdo n kó toó-ko, é dii náńkú n kó dii-kú, ⁴⁰ àmá mìì héé-sa mɛ̀ǹǹ kó n'kaàdi-kó n hiòma yoo n cà̰ǹkamá, mmí pú kɔ̰́nì ye kú kààkà. Weèdi-dà kà kɔ̰́nì nì kà dɔ̀haà-pa kú kpɛ́mú. ⁴¹ O dapàm̀ma píta tɔɔ̀pa yeèkaà-ma miya̰, kà pá mɔka-nà Sàákì nà Ìsá̰à̰ fɔ̰́di. ⁴² Mɛmá-dà, k'ó pà yíí pa wɛǹni é pà caka è yɔ̀: Nɛ yá̰á̰-dà è yɔ̀, ti dìi-pà è pà toò boocí wóópa, pà hɔ̰́ n'wódí pa nìpa hḭ́ǹka nà kpeèti-dà. Mɛ̀m̀pà mɛ̀ɛ hɔ̰́ n'yòǹ-pa nɔɔ̀ti yam̀ma boocí mɛhɛká hɔ̰́ n'nɔɔ̀ǹta tɔɔ̀pa-dà. ⁴³ Há̰kà, yè pú yònà é n'yòǹ mɛma nɛ cɔhɔ̀ka. Múńdìkaà, kà n'ɔɔ̀cɔ̰́ǹ kpɛ̀i é n'yòǹ kpɛ̰́ǹn nɛ mɛhɛkà, ò yònà é n'yòǹ nɛ deho-dà. ⁴⁴ Kà nɛ mɛ̀ǹǹ kpɛ̀i é n'yòǹ-ko cecedó nɛ cɔhɔ̀kà, k'ó hḭn tɔɔ̀pa wɛǹni núǹn, ⁴⁵ è yá̰á̰ Niìfòùo bíitá pú tɛ̀ni è kpɛ̀i pá deha ta kpɛ́mú, àmá tà tɛ̀ni è kpɛ̀i é deha nìpa kpɛ́mú-dà, é kɔ̰́ɔ̰́-nà ta fòùmu é dontá nìku dɔ́ɔ́di.

Sèsíì dìhìnà Bàtìmɛ́ɛ̀

⁴⁶ Kà pá ta̰ntá Sèdìkóò yɔtí. Sèsíì yɛ̀tì tḭ́ń wɔ̀ni ti mɛhɛká n'ɔ̀ɔ dapàm̀ma kà nìku dɔ́ɔ́di ò tṵ̀n, kà yɔ̀ǹn òcɔ̰́ǹ kàdi cɔ̀ku bɛ́ɛ́kú è cɔ̀hu. Ye yɔ̀ǹn yèdi-dà de dɛɛ̀ Bàtìmɛ́ɛ̀, k'òo báàa kpɛ́ɛdí héé Tìmɛ́ɛ̀. ⁴⁷ Ò yèkaà-ma kà pà yɔ̀ Sèsíì Nàsàdɛ́tì kóoó-dà kɛ̰hɛdi, k'ó cemá cetá è dedì è tonà: Sèsíì, *Dàfítì bidà, n kɔń séèma. ⁴⁸ Kà nìpa dɔ́ɔ́di ò kɔ̰̀ǹti-nà, òò wɛ́dì-nà è tonà ó kpḭ́ḭ́, k'ò mɛ̀ɛ é dɔ̀hà é dedí kpeéma è yɔ̀: Dàfítì bidà, n kɔń séèma. ⁴⁹ Kà Sèsíì é nɛɛ̀hi è yɔ̀: Ò yíí-nà-ní. Kà p'óò yíí, óò caka è yɔ̀: Pa̰a̰ a kpɛ́ɛtí é yíí-ní, w'àà yún-ń-ma. ⁵⁰ Mɛmá-dà, k'ó cemá é wɛ́í-ho o tókésàdi, é fékédá é nɛɛ̀hi-hɔ̰, é tɛ̀ni feǹ-fem̀ma Sèsíì pesá. ⁵¹ Kà Sèsíì óò béka è yɔ̀: A kpɛ̀i m'áa pa̰á̰ ba? K'óò tɛ̰́ná è yɔ̀: N dakpɛ̰́ǹn, n kpɛ̀i á n dihìna-á-ma. ⁵² Kà Sèsíì óò caka è yɔ̀: Tɔɔ̀ta, a dandaní-d'àà kpekànà. Ye wɔ̀ni n'ɛ̀ɛ wɔ̀ni, k'ó cemá é diìda. Ò dìdà-ma, é cemá n'tṵ̀n Sèsíì cɔ̀ku hḭ́ǹka.