Mádíkì 11

Pà codà Sèsíì è yònà wódo Sèdìsàdɛ́m̀

¹ Pà pàtì tḭ́ń wɔ̀ni Sèdìsàdɛ́m̀, è beé-nà yɔbíící pà toò-ci Bɛ̀tìfàséè nà Bètàníì, kà cì pɛ̀ɛ-nà òdífùna ta̰à̰di, kà Sèsíì é tɔn o dapàm̀ma pàdɛ́ɛ́, ² é pà caka è yɔ̀: Taá-nà yɔtì mɛ̀ǹtì péé-tì nɛ yìhìkà. Kà nɛ tɛ̀i è tì dúú, nɛ kó dɛ́há-ma sa̰mmùm̀bíidí k'òcɔ̰́ǹ mum pú nì dáá daadí yènì, kà nì pḭ́dí. Nɛ́ nì pḭ́tá-ní é nì ya̰à̰ní. ³ Kà nìi nɛ békáà è hḭ́n: Badà tee kà nɛ nì pḭ́ḭ́kú? Kà n'ɔ́ɔ̀ tɛ̰́ná è yɔ̀: Teó-dà nì kpɛ̀i. Ye wɔ̀ni, ò kó héé-ma kà nɛ́ nì tɛɛ̀ní miì sá̰ńsá̰kù. ⁴ Kà pá ka̰há, é tɛ̀i é dɛ́há sa̰mmùm̀bíidí kà nì pḭ́dí tapaàdi cɔ̀ku bɛ́ɛ́kú, hɔ̰́ɔ̰̀ta tàcɔ̰́tà kú há̰ńnùdi, kà pá cemá nì pḭ́tá-ní. ⁵ Nìi pàcɔ̰́ mɛ̀m̀pà de péé-pa ye pesá, kà pá pà béka è yɔ̀: Nɛ pa̰kú badà ye pesà-ní? Badà tee kà nɛ pḭ́ḭ́kú ye sa̰mmùm̀bíidì-ní? ⁶ Kà pá pà tɛ̰́ń-tɛ̰́ná Sèsíì de pà hḭ́mpú-ní, ye wɔ̀ni k'yèe nìpa é pà hédá kà pá nì ka̰há-nà. ⁷ Kà pá nì dɛ̀di é nì tɛɛ̀ní Sèsíì pesá, é tɛ̀ni tódá pa tóhòka é pohà ni hḭ́ǹka, k'ó dìsi é kaàdi. ⁸ Kà nìpa dɔ́ɔ́di é pitá pa tóhòka cɔ̀ku hḭ́ǹka, kà tɔɔ̀pa é pitá fa̰à̰ti pà bɔdi-tí-ní foǹni mɛhɛká. ⁹ Mɛ̀m̀pà de péé-pa o yìhìka nà mɛ̀m̀pà de tṵ̀n-pá o dàhàka, kà p'òò dùǹti kpeéma è tonà: Weèdi yèdi é wɛhika! Kónáma é m'péé-nà mɛ̀ǹǹ pení-ko-ní nà Bateó yèdi. ¹⁰ Weèdi é kóná wóòti mɛ̀ǹtì pení-ti-ní, ti yàdo Dàfítì kpɛ́ɛtí. Weèdi yèdi é wɛhika hḭ́ǹka sàka mɛhɛká ¹¹ Kà Sèsíì é ta̰ntá Sèdìsàdɛ́m̀, é tɛ̀i é dúú Weèdi hɔ̰́ɔ̰̀ta mɛhɛká, é cɔ́dí mìì de pa̰kú-sa wɛǹni. Ò cɔ́ɔ́-ma mɛma é yɔ̀a, è hɔ̰́tà weèdi dɔdi, k'ó taá Bètàníì n'ɔ̀ɔ tɔntɔndipá píì-pàdɛ́ɛ́.

Sèsíì nɔdáà ka̰nka̰mú

¹² Ye kú kṵ́ńweǹni, kà pá n'yɛtì Bètàníì, kà kòni é cɛ̰ɛ̰́ Sèsíì. ¹³ K'ó dɛ́há nà dɛùma ka̰nka̰mú kà mù káá fa̰à̰ti sukú, k'ó taá é dentá k'ò kó dɛ́tá bíiká. Àmá, ò mù hɛ́tà-ma-hɔ̰, é tɛ̀i é n'hɔ̰́tà fa̰à̰ti cɔ̰́ɔ̰̀di-dà. Ka̰nka̰ká wɔ̀ni de dɔ. ¹⁴ Ye wɔ̀ni, k'ó wɛɛ́-nà ye tepú è yɔ̀: Òcɔ̰́ǹ koò pú kó dii a bíiká daadí yènì. K'òo dapàm̀ma é mà yèkà.

Sèsíì bɔ̀haà tantam̀ma Weèdi hɔ̰́ɔ̰̀ta mɛhɛká

¹⁵ Kà pá ta̰ntá Sèdìsàdɛ́m̀, é tɛ̀i kà Sèsíì é dúú Weèdi hɔ̰́ɔ̰̀ta mɛhɛká, é cetá è bɔ̀hu mɛ̀m̀pà de yɛɛ́-pa nà mɛ̀m̀pà de don-pá ta mɛhɛká. K'ó wé-wétá mɛ̀m̀pà de ceèni-pá dící tábídìpa nà mɛ̀m̀pà de yɛɛ́-pa pàǹdɔ̀ka kààhi. ¹⁶ Ò de pú héù kà p'oòcɔ̰́ǹ tohú nɛǹku kùcɔ̰́kù è dèèku-nà Weèdi hɔ̰́ɔ̰̀ta mùǹku mɛhɛká. ¹⁷ Ye kú dàhàka, k'ó cetá pa biɔhànapú è yɔ̀: Pà pú wa̰tà Weèdi wɛmá mɛhɛká è yɔ̀, Weèdi hḭ́n ni hɔ̰́ɔ̰̀ta kó n'yòǹ Weèdɔɔ̀pu kpɛ́ɛtá-dà boocí wɛǹni kpɛ́mú dò? Àmá kà nɛ́na há̰ tà kpáhìnà túùpa peètadí. ¹⁸ Kà dɔ̀hɔ̀di kpɛ̰́m̀ma, nà Weèdi kpɛ̰́ńtìnùka biɔhànapá é yekà ò de pa̰à̰-sa, kà pà pɛnti pà kó hḭmpú óò kɔ̀ù. Pà há̰ de ò wani-í-ma, mìì tee-sá nìku wɛǹni de ò yítà pókàta-dà n'ɔ̀ɔ biɔhànamá kpɛ́mú. ¹⁹ Kà yohokú yodá, mɛnń n'ɔ̀ɔ dapàm̀ma kà pá yɛ̀dì ye yɔtí mɛhɛká.

Weèdɔɔ̀pu nà dandaní kó nɛɛ́ pa̰á̰-sa

²⁰ K'yé weka ká̰ńyɛ̰̀ǹfa, kà pá n'kɛ̰hɛdi é ta̰ntá ye ka̰nka̰mú pesá, k'òo dapàm̀ma é n'hɔ̰́tà mù kpɛí pépédí háá nà mu cɛ̰̀ǹci. ²¹ Kà Píyɛ́ɛ̀ é deǹta mìì wontà pa̰à̰-sa é caka Sèsíì è yɔ̀: Dakpɛ̰́ǹn, wáńtá ye tepú a wontà nɔdáà-pu kà mù kpɛí. ²² Kà Sèsíì é pà tɛ̰́ná è yɔ̀: Ní n'dań-nà Weèdi. ²³ Mɔ́ma-dà n nɛ cakú-ma! Kà n'ɔɔ̀cɔ̰́ǹ cakáà ta̰à̰di è hḭ́n: Hikàda ye pesà é taá dɔdi dàmɛ́dì mɛhɛká, k'ò pú káá mamahàma o yàma mɛhɛká, àmá k'ò dań è yá̰á̰ è yɔ̀ ò wɛdà-sa kó pa̰á̰-ma, yè mɛ̀ɛ baà kó pa̰á̰-ma. ²⁴ Ye kú kpɛ́mú-dà tee n nɛ cakú-ma è tonà: Nɛ kó cɔhà-sa wɛǹni nɛ weèdɔɔ̀pu mɛhɛká, nɛ́ n'dań è yɔ̀ n'ɛɛ̀ dɛ́tà-á-ma, nɛ mɛ̀ɛ k'éè dɛ́tá-ma. ²⁵ Kà nɛ nɛɛ̀hi è pa̰kú weèdɔɔ̀pu, è dèǹtà è yɔ̀ nɛ káá màcɔ̰́mà n'ɔ̀ɔ̀cɔ̰́ǹ, kà nɛ́ bútá dàhàka ye yaǹn sḭ̀ḭ̀ma k'yé teha kà nɛ Báàa mɛ̀ǹǹ péé-ko hḭ́ǹka mɛ̀ɛ té nɛ deèda nɛ sḭ̀ḭ̀ma. [ ²⁶ Àmá, kà nɛ yení tɔɔ̀pa sḭ̀ḭ̀ma dàhàka bútápu, nɛ Báàa mɛ̀ǹǹ péé-ko hḭ́ǹka mɛ̀ɛ té pú kó nɛ deèda nɛ kú sḭ̀ḭ̀ma.]

Pà békú Sèsíì o nɔɔ̀ti péé-nà-sa-ní

²⁷ Ye kú dàhàka, kà pá tón Sèdìsàdɛ́m̀. Pà tɛ̀i-má, k'ó dúú Weèdi hɔ̰́ɔ̰̀ta mùǹku mɛhɛká è cèǹtì, kà dɔ̀hàka kpɛ̰́m̀ma, nà Weèdi kpɛ̰́ńtìnùka biɔhànapá, nà Sùwífùpa yɔtí kpɛ̰́m̀ma é tɛ̀ni o pesá. ²⁸ Kà pá tɛ̀ni óò béka è yɔ̀: Wodà a pɛ̰ḭ nùdi k'à pa̰kú-nà ye kú niì-ní? Wod'àà pɛ̰ḭ nùdi k'à yè pa̰kú? ²⁹ K'ó pà tɛ̰́ná è yɔ̀: N kó nɛ béka békàma màcɔ̰́-dà. Kà nɛ n tɛ̰́nà n nɛ békú-sa, ye wɔ̀ni n kó nɛ caka-á-ma mɛ̀ǹǹ n pɛ̰ḭ-kó nùdi kà n pa̰kú miì-ní. ³⁰ Wodà de tɔn-ní Ìsá̰à̰ k'ò cómù? Weèdi-dà nkɛ́ɛ̀ nìpa? N caka-nà-ní. ³¹ Ye wɔ̀ni, kà pá nɔhìnà pa cɔ̰́ɔ̰̀di pesá, é caka pa tɔɔ̀pa è yɔ̀: Kà ti hḭ́n Weèdi-d'òò tɔn-ní, ò kó ti béka-á-ma è yɔ̀: Baà tee kà ti pú teháà o wɛmá? ³² Kà ti mɛ̀ɛ tɛ̰́nà è hḭ́n: Nìpa-d'òò tɔn-ní, heì! 9(Pà de wani nìku-dà, mìì tee-sá ku wɛǹni de yá̰á̰-ma è yɔ̀ Ìsá̰à̰ de yòǹ Weèdi wɛtɛ̰́náko mɔ́nń-dà.) ³³ Mɛmá-dà kà pá tɛ̰́ná Sèsíì è yɔ̀: Ti pú yá̰á̰. Ye wɔ̀ni, k'ó pà caka è yɔ̀: Kà mɛmá-dà, mmí mɛ̀ɛ té pú kó nɛ caka mɛ̀ǹǹ ǹ pɛ̰ḭ-kó nùdi kà n m'pa̰kú miì-ní.