Hɔ̀dɔ́m̀pa 5

Sèsíì-dà ti múnà-nà Weèdi.

¹ Weèdi ti dìi-má kpɛ́mú niìcoópa ni yìhìka nà ti dandaní kpɛ́mú, wɔ̀nì mɛnì ti péé wɛ̀ɛ̀di mɛhɛká-dà nà mɛní, nà ti Teó Sèsí-Kídísì kpɛ́mú. ² Mɛnń-dà kpetà cɔ̀ku kà Weèdi ti pa̰a̰ ni pa̰á̰suumá è yɔ̀pu kpɛ́mú ti taà dandaní o hḭ́ǹka. Ye pa̰á̰suumá hḭ́ǹka-dà ti tasí-ma kà yaǹnaakú ti sṵ́nà, mìì tee-sá ti dań è yɔ̀ Weèdi kó wáńtá ti totá-nà ni wɛhimú. ³ Mìì dɔ̀haà ha̰tà-sa miya̰, yè naa-á-ma sàma nà ti yon-má náńkú. Ti há̰ yá̰á̰-ma è yɔ̀ náńkú-dà kɔ̰́nì mùyɔ̰, ⁴ kà mùyɔ̰ kɔ̰́nì nɛdáma bɛḿma mɛhɛká, é yídá kà nɛdáma tɔhɛ̀nì daḿma. ⁵ Ye kú daḿmà há̰ pú báńtí, è yá̰á̰ nà ni Sèdi nì ti pɛ̰ḭ-dí-dà, Weèdi sṵ́nà-ma ni dɔ́kàma ti yàma mɛhɛká.

⁶ Ti de mun káà kɔ́ɔ́ tḭ́ń wɔ̀ni kpeèti, kà Kídísì-dà é tɛ̀ni kpíí tḭ́ńti niìsḭ̀m̀ma kpɛ́mú, wɔ̀ni Weèdi de hḭ́nà-di. ⁷ Yè dɔǹ-ń-ma, è yɔ̀ nìi teha é kpíí niìcoóko fɛ̀ùdi. K'yè púdí òcɔ̰́ǹ kó nɛɛ́ é pa̰á̰-ma datí é kpíí niìsudó kpɛ́mú. ⁸ Àmá, ǹtɛ Weèdi bɛkáà-ma kú bookú ni dɔ́kàma ti hḭ́ǹka: Ti de káà yòǹ niìsḭ̀m̀ma, kà Kídísì é kpíí ti kpɛ́mú. ⁹ Dɔ̀hàdi ò pa̰à̰-di ti kpɛ́mú-dà ti kpáhìnà sá̰mà niìcoópa Weèdi yìhìka. Mɛ̀ɛkà, ò kó tṵ́má ti fḭ́hìna-á-ma Weèdi fɔ̰́di mɛhɛká. ¹⁰ Ti de yòǹ Weèdi kà̰à̰tɔ̀pa-dà, kà ni bíitá kṵ́mú é hédá kà ní tón é ti naaka-nà. Ti há̰ tón é naaka-mà nà mɛní sá̰mà, ti yá̰á̰-ma sukú è yɔ̀ nì kó ti fḭ́hìna nà ni bíitá fòùmu. ¹¹ Mìì múńtà ha̰tà-sa, yè ti naa-á-ma Weèdi yìhìka, nà ti Teó Sèsí-Kídísì héè-ma kà tí naaka sá̰mà nà Weèdi.

Àdám̀ nà Kídísì pa̰à̰-sa nìpa fòùmu mɛhɛká.

¹² Nìi òcɔ̰́-dà tee kà sḭ̀ḭ̀ma é dúú-ní fòùku mɛhɛká, mɛnń-dà Àdám̀. É yídá kà sḭ̀ḭ̀ma é tɛɛ̀-ní kṵ́mú. Mɛmá-dà kà kṵ́mú hadì nìpa wɛǹni, mìì tee-sá pa wɛǹni pa̰à̰ sḭ̀ḭ̀ma-dà. ¹³ Kà Weèdi é nɛɛ́ kɔ̰́ɔ̰́ kpɛ̰́ńtìnùka Mɔ̀yísì, sḭ̀ḭ̀ma de yɔ̀ɔ péépu-dà fòùku mɛhɛká. Kpɛ̰́ńtìnùka há̰ de mun kɔ́ɔ́ tḭ́ń wɔ̀ni, kà Weèdi pú kaǹ nìpa sḭ̀ḭ̀ma. ¹⁴ Nà mɛma, é cɛ̰ɛ̰́-nà Àdám̀ háá nà Mɔ̀yísì wɔ̀ni, kṵ́mú de bɛkáà-á-dà mu kpeèti sá̰pu. Mù de hadì-í-dà nìpa, bá nà mɛ̀m̀pà de pú pa̰à̰-pa sḭ̀ḭ̀ma è yònà Àdám̀ mɛ̀ǹǹ de pú tṵnà-ko Weèdi hḭ́mpú.

Àdám̀ de yòǹ mɛ̀ǹǹ kó tɛ̀ni-kó-ní yohènamá-dà. ¹⁵ Àmá Àdám̀ sḭ̀ḭ̀ma ceń-nà-á-ma pa̰dí Weèdi ti pɛ̰ḭ-dí fàdà. Mɔ́masí, nìdo òcɔ̰́ kú sḭ̀ḭ̀ma-dà tee nìpa dɔ́ɔ́di kpíi-má. Àmá Weèdi pa̰a̰fàdàdi wɛhi-í-ma é mà ha̰tá. Ye pa̰dí, Weèdi nì pɛ̰ḭ fàdà nìku dɔ́ɔ́di nà nìdo òcɔ̰́ kú kpɛ́mú-dà, Sèsí-Kídísì. Mɛní-dà mɛ̀ɛ héé. ¹⁶ Weèdi pa̰dí tɛɛ̀hu-nà-sa-ní ceń-ma nà nìdo òcɔ̰́ kú sḭ̀ḭ̀ma kpɛ́ɛsá. Nìdo òcɔ̰́ kú sḭ̀ḭ̀ma-dà tee kà Weèdi sídàma é tɛ̀ni, háá é yó tanà pa toòka yɔ̰́ḿma. Àmá Weèdi pa̰a̰fàdàdi mɛni, hɔ̰́ kpáhìna nìpa niìcoópa-dà Weèdi yìhìka, nà pà baà pa̰à̰-sà sḭ̀ḭ̀ma dɔ́ɔ́di. ¹⁷ Mɔ́masí-dà, nìdo òcɔ̰́ kú sḭ̀ḭ̀ma-dà tee kà kṵ́mú hadì nìpa, n'ɔ̀ɔ kú cɔ̰́ɔ̰̀di kpɛ́mú. Àmá nà Sèsí-Kídísì mɛnn, Weèdi pɔ̰n nìpa niìi dɔ́ɔ́di-dà. O kú kpɛ́mú-dà tee kà Weèdi pà pɔ̰n ni pa̰á̰suumá, è pà kpáhìnì niìcoópa ni yìhìka. Nà mɛnń, pà kó wáńtá pɛ́ɛ́ n'fòù-ú-ma, é pɛ́ɛ́ óò n'wódí-nà.

¹⁸ Ye wɔ̀ni, é n'yònà nìdo òcɔ̰́ kú sḭ̀ḭ̀ma tɛɛ̀-ma-ní nìpa wɛǹni toyɔ̰́ńti, ma cɔ̰́ɔ̰̀di-dà nìdo òcɔ̰́ pa̰à̰-ma k'yè coó, é fḭ́hìna nìpa wɛǹni, é pà pa̰a̰ fòùmu. ¹⁹ Nìdo òcɔ̰́-dà de yetà-nà Weèdi, ye wɔ̀ni kà nìpa wɛǹni é hḭn niìsḭ̀m̀ma. Ma cɔ̰́ɔ̰̀di hḭ́ǹka, nìi òcɔ̰́-dà mɛ̀ɛ té yeèkaà-nà Weèdi toodí, kà nìpa dɔ́ɔ́di é kpáńtá niìcoópa ni yìhìka.

²⁰ Kpɛ̰́ńtìnùka-dà dúú-ní, kà sḭ̀ḭ̀ma é dɔ̀hà é wɛ́dá. Àmá sḭ̀ḭ̀ma wɛ́ní-sa, Weèdi pa̰á̰suumá hɔ̰́ dɔ̀hà é wɛhika-sá-dà. ²¹ Ye wɔ̀ni, é n'yònà sḭ̀ḭ̀ma de kákáàma kpeèti è kó nɛɛ́ é kɔ̀ù nìpa, mɛmá-dà Weèdi pa̰á̰suumá mɛ̀ɛ té káá-ma kpeèti è kó nɛɛ́ kpáhìna nìpa kà pá hḭn niìcoópa, ye wɔ̀ni é dɛ́tá fòùmu mɛ̀mù bá yɔ̀ɔpú, nà ti Teó Sèsí-Kídísì yèdi.