Hɔ̀dɔ́m̀pa 6

Ti kpíi-í-ma sḭ̀ḭ̀ma yìhìka, àmá è fòù nà Kídísì.

¹ Kà mɛmá-dà, ti kó mà kɔ̀ù é n'yɔ̀ ba? Ti kó n'yɔ̀ tí n'sɔ̰ncí-dà sḭ̀ḭ̀ma mɛhɛká k'yé teha kà Weèdi pa̰á̰suumá é dɔ̀hà é wɛhika? ² Fɔ́ú! Tḭ́ńti mɛ̀m̀pà kpíi-pá sḭ̀ḭ̀ma yìhìka, ntɛ́ ti kó hḭmà é tṵ́má é n'fòù ma mɛhɛká? ³ Nɛ pú yá̰á̰ è yɔ̀ tḭ́ńti mɛ̀m̀pà tásí-nà-pa Sèsí-Kídísì kà pá ti cóńtá, ti pɛ́ɛ̀ óò kpíí-nà-á-dà o kṵ́mú mɛhɛká? ⁴ Nà cóǹti ti pa̰à̰-ti, ti pɛ́ɛ̀ óò kpíí-nà-á-ma o kṵ́mú mɛhɛká. Àmá Weèdi kpeèti sàti ò yá̰hìnà-á-ma-ní kpíípa mɛhɛká, k'yé teha kà ti mɛ̀ɛ té n'fòù fòùmu pàmu mɛhɛká.

⁵ Bemú-dà ti de ò múnà-nà-ma tenten, ti de pɛ́ɛ̀ óò kpíí-nà tḭ́ń wɔ̀ni. Ma cɔ̰́ɔ̰̀di-dà mɛ̀ɛ té dɛɛ̀, ti k'óò m'múń-nà-ma ti kó yá̰ńtá tḭ́ń daadí é n'yònà mɛnń. ⁶ Ti yònà é n'yá̰á̰ è yɔ̀, nìdo ti de yòǹ-ko dekáà, pà pɛ́ɛ̀ óò kpɛ̰́ḭ́-ma kpíidɔkú hḭ́ǹka nà Kídísì, è kpɛ̀i kà ti dàa mɛ̀ǹǹ ti tee-nà-ko sḭ̀ḭ̀ma pa̰á̰ma é kpíí, kà ti koò dá n'yòǹ sḭ̀ḭ̀ma núm̀ma, ⁷ è yá̰á̰ mɛ̀ǹǹ kpíi-kó, ò fḭ́tà-á-dà sḭ̀ḭ̀ma nɔ̀ku mɛhɛká. ⁸ Kà ti kpíi nà Kídísì, ti dań-ma è yɔ̀ ti kó tṵ́má pɛ́ɛ́ óò n'fòù-nà. ⁹ Ti yá̰á̰-ma è yɔ̀ Kídísì yá̰ńtà-mà kpíípà mɛhɛkà, ò koò pú kó kpíí daadí yènì, kṵ́mú mɛ̀ɛ koò pú káá nɔɔ̀ti o hḭ́ǹka. ¹⁰ Ò kpíi sḭ̀ḭ̀ma kpɛ́mú-dà cɔ̀ku màcɔ̰́ sá̰à̰di. Àmá sá̰mà, ò fòù-ú-ma, ò mɛ̀ɛ fòù Weèdi kpɛ́mú-dà. ¹¹ Nɛ́na mɛ̀ɛtékà, nɛ́ tódá nɛ cɔ̰́ɔ̰̀di kpíípa sḭ̀ḭ̀ma yìhìka, é tódá nɛ cɔ̰́ɔ̰̀di fòùpa Weèdi kpɛ́mú nà múnáma nɛ káá-ma nà Sèsí-Kídísì. ¹² Yè yòǹ-mà mɛma, nɛ koò dá teha kà sḭ̀ḭ̀ma é teeka nɛ wɔ̰̀ǹku mɛ̀ǹkù kó kpíí-ku daadí yènì, nɛ mɛ̀ɛ koò dá kɔ̰́ɔ̰́ nɛ cɔ̰́ɔ̰̀di nɛnsḭ̀ǹya̰ kù kpɛ̀i-sá. ¹³ Nɛ koò dá n'tóńkú nɛ wɔ̰̀ǹku bɛ̀m̀bɛ̀ka é kà m'pa̰kú-nà sḭ̀ḭ̀ma, nɛ dá kà kpáhìna niìya̰ nɛ kó m'pa̰kú-nà-sa kpákpààma. Àmá, nɛ́ kɔ̰́ɔ̰́ nɛ cɔ̰́ɔ̰̀di Weèdi, é n'yònà mɛ̀m̀pà de kpíi-pá é tón é yá̰ńtá-ní. Nɛ́ kɔ̰́ɔ̰́ nɛ wɔ̰̀ǹku wɛǹni Weèdi, kà kú n'yòǹ niìya̰ nɛ pa̰kú-nà-sa suumá. ¹⁴ Sḭ̀ḭ̀ma koò kɔ́ɔ́ kpeèti nɛ hḭ́ǹka, mìì tee-sá nɛ koò pú péé kpɛ̰́ńtìnùka mɛhɛká, àmá nɛ péé Weèdi pa̰á̰suumá mɛhɛká-dà.

Yɛ̀dì sḭ̀ḭ̀ma núǹti mɛhɛká é hḭn Weèdi deho.

¹⁵ Kà mɛmá-dà, ti kó nɛɛ́-dà é n'yɔ̀, kpɛ̰́ńtìnùka koò pú ti túdí-mà, ti kó nɛɛ́-dà é m'pa̰kú sḭ̀ḭ̀ma mìì tee-sá ti péé Weèdi pa̰á̰suumá mɛhɛká? Fɔ́ú! ¹⁶ Nɛ pú yá̰á̰ è yɔ̀ kà nɛ dehú nìi kpɛ́mú è yòǹ o núm̀ma, è pa̰kú ò hḭ́mpú, nɛ hɔ̰́ kpáńtá ye yaǹn núm̀ma-dà? Kà sḭ̀ḭ̀ma-dà, mà kó nɛ kònà kṵ́mú mɛhɛká-dà. Kà nɛ mɛ̀ɛ you-nà Weèdi-dà toòka, k'yé nɛ kònà fòùmu mɛ̀mù coó-pu mɛhɛká. ¹⁷ Tí múńtá sɛɛ Weèdi nà nɛ kpɛ́mú! Nɛ de yòǹ sḭ̀ḭ̀ma núm̀ma-dà dekáà wɔ̀ni. Sá̰mà-ní, kà nɛ́ teha nà nɛ yàma wɛǹni, biɔhànamá pà nɛ kɔ̰́ɔ̰̀-ma, è tṵ̀n mà hḭ́mpú. ¹⁸ Nɛ yɛɛ̀ sḭ̀ḭ̀ma núǹti mɛhɛká-dà, é hḭn sá̰mà coóma núm̀ma. ¹⁹ N wɛì miì nìpa wɛkúma, mìì tee-sá nɛ yòǹ nìpa-dà kà nɛ yekàma mun pú wɛhi. Dekáà, nɛ de kɔ̰́ɔ̰̀ nɛ cɔ̰́ɔ̰̀di è yòǹ yɔ́hɔmú nà kpákpààma pa̰á̰ma núm̀ma-dà, kà nɛ fòùmu yòǹ sɔ̀kací. Sá̰mà-ní, nɛ́ kɔ̰́ɔ̰́ ma kú bookú nɛ cɔ̰́ɔ̰̀di, é n'yòǹ coóma núm̀ma, k'yé teha kà nɛ fòùmu ní n'dɛ́hi Weèdi yìhìka.

²⁰ Nɛ de káà yòǹ tḭ́ń wɔ̀ni sḭ̀ḭ̀ma núm̀ma, coóma pa̰á̰ma de pú nɛ yɛ̰̀ḭ. ²¹ Ye kú wɔ̀ni-hɔ̰, nɛ de cɔ́ńtì m̀mɔ́ńya̰-dà ye kú pa̰á̰mà mɛhɛkà? Yenì kpɛ́ɛ́dì, kà nɛ dentà-ní ye pa̰á̰ma, yè hɔ̰́ nɛ n'yònà fɛ̀ci-dà, mìì tee-sá mà nɛ kṵǹ-nà kṵ́mú mɛhɛká-dà. ²² Àmá sá̰mà-ní, Weèdi nɛ denà-ní sḭ̀ḭ̀ma mɛhɛká, kà nɛ́ kpáńtá ni núm̀ma-dà. Ye wɔ̀ni, cɔ́ǹti nɛ káá-ti ye mɛhɛká, héé nɛ pa̰á̰ma-dà é n'weni Weèdi yìhìka, kà nɛ́ wáńtá dɛ́tá dadèǹdèni daadí fòùmu mɛ̀mù bá yɔ̀ɔ-pú, ²³ è yá̰á̰ sḭ̀ḭ̀ma boutí héé kṵ́mú-dà, àmá pa̰dí Weèdi pɔ̰n-dí fàdà, yòǹ fòùmu mɛ̀mù bá yɔ̀ɔ-pú-dà, ti kó taá m'péé-pu kú mɛhɛká, è múń nà ti Teó Sèsí-Kídísì.