Hɔ̀dɔ́m̀pa 7

Kpɛ̰́ńtìnùka koò pú káá nɔɔ̀ti ti hḭ́ǹka

¹ N kúcàpa nà n potɔ̰ɔ̰̀pa-nà, nɛ yá̰á̰-ma sukú n kpɛ̀i é nɛ caka-sá, mìì tee-sá nɛ wekáà-nà-á-dà kpɛ̰́ńtìnùka. Kpɛ̰́ńtìnùka káá nɔɔ̀ti nìi hḭ́ǹka ò káà fòù tḭ́ń wɔ̀ni-dà. ² K'yé n'yònà poòo tódà dɔɔ̀o. Kpɛ̰́ńtìnùka hɔ̰́ ò m'boú n'ɔ̀ɔ dɔɔ̀o, k'òo dɔɔ̀o-dà káà fòù. K'òo dɔɔ̀o há̰ kpíi, kpɛ̰́ńtìnùka koò pú hɔ̰́ ò m'boú nà mɛnń. ³ K'òo dɔɔ̀o káà fòù, k'ò yídà è taá è yan dɔɔ̀o tɔɔ̀o, pà hɔ̰́ n'yɔ̀ ò cɔ̰hú dɔɔdí-dà. Amá k'òo dɔɔ̀o kpíi, ò káá-ma foóma è kó nɛɛ́ yan dɔɔ̀o tɔɔ̀o, ye wɔ̀ni ò pú cɔ̰hú dɔɔdí. ⁴ Ma cɔ̰́ɔ̰̀di-dà mɛ̀ɛtékà nà nɛ́na n kúcàpa nà n potɔ̰ɔ̰̀pa-nà. Kpɛ̰́ńtìnùka yìhìka, nɛ yònà kpíípa-dà, è yá̰á̰ kṵ́mú Kídísì kpíi-pú kpíidɔkú hḭ́ǹka nɛ múnà nà mɛnń. Nɛ yòǹ tɔɔ̀o òcɔ̰́ǹ kú kpɛ́ɛpá-dà, ye tɔɔ̀o òcɔ̰́ǹ-dà mɛ̀ɛ héé, mɛ̀ǹǹ yá̰ńtà-ko kpíípa mɛhɛká, è kpɛ̀i tí m'pa̰kú mìì suu-sá Weèdi kpɛ́mú. ⁵ Ti de káà fòù tḭ́ń daadí ti yàma kpɛ̀kaàma, kpɛ̰́ńtìnùka de hemù ti mɛhɛká ti kpɛ̀i-sá-dà k'yè pú sudi, kà ti yè pa̰kú, k'yè ti kɔ́dì-nà kṵ́mú mɛhɛká. ⁶ Àmá sá̰mà-ní, kpɛ̰́ńtìnùka koò pú ti tee, è yá̰á̰ ti kpíi-í-ma mɛnká mɛ̀ǹkà de ti núńtí-ka yìhìka. Ti kó nɛɛ́-ma é deha sá̰kù Weèdi kpɛ́mú nà pa̰á̰pààma, kà ni Sèdi ti túdí. Ti koò pú dehú Weèdi kpɛ́mú, nà pa̰á̰kpɛ̰́m̀ma è tṵ̀n kpɛ̰́ńtìnùka hḭ́mpú.

Kpɛ̰́ńtìnùka pú kó nɛɛ́ é fḭ́hìna nìdo sḭ̀ḭ̀ma mɛhɛká.

⁷ Ti kó n'yɔ̀ badà sá̰mà? Ti kó n'yɔ̀ kpɛ̰́ńtìnùka-dà tee sḭ̀ḭ̀ma? Fɔ́ú! Àmá kpɛ̰́ńtìnùka-dà tee ká n yá̰dá sḭ̀ḭ̀ma héé-sa. N de pú kó yá̰dá pà toò-sa bìnɔ sḭ̀ḭ̀ma, kà pà de pú wa̰tà kpɛ̰́ńtìnùka mɛhɛká è yɔ̀: Dá pa̰ná bìnɔ tɔɔ̀o kpɛ́ɛsá hḭ́ǹka. ⁸ Sḭ̀ḭ̀ma dɛ́tà ye kú bòdì-dà, è yɛ̰̀ḭ kpɛ̰́ńtìnùka hḭ́ǹka, ye wɔ̀ni é heǹta n mɛhɛká bìnɔ kpɛ́ɛsá wɛǹni. Kà kpɛ̰́ńtìnùka kɔ́ɔ́, sḭ̀ḭ̀ma kpíi-í-dà. ⁹ N de mun pú yá̰á̰ tḭ́ń wɔ̀ni kpɛ̰́ńtìnùka, n de fòù n kpɛ̀i-má-dà. Àmá kpɛ̰́ńtìnùka há̰ tɛ̀ni-má-ní, kà sḭ̀ḭ̀ma-dà é foùda, ¹⁰ kà mmí há̰ kpíí Weèdi cɔ̀ku mɛhɛká. Ye wɔ̀ni, kpɛ̰́ńtìnùka mɛ̀ǹkà de yònà é n túdí-ka fòùmu mɛhɛká, kà ká n túdí kṵ́mú mɛhɛká. ¹¹ Sḭ̀ḭ̀ma dɛ́tà ye kú bòdì-dà, é yḭncí kpɛ̰́ńtìnùka hḭ́ǹka, é n yehèna, é n kɔ̀ù. ¹² Há̰kà, kpɛ̰́ńtìnùka nà hɔ̰́ɔ̰wencí nùka péé-nà-ní Weèdi pesá-dà. Hɔ̰́ɔ̰wencí nùka mɛ̀ɛ coó-ma, è sudi.

¹³ Niìya̰ mìì suu-sá há̰ kó nɛɛ́ hḭn-ń-dà n kɔ̀ù-sa? Fɔ́ú! Sḭ̀ḭ̀ma yɛɛ̀ nà mìì suu-sá-dà é n kɔ̰́ɔ̰́ kṵ́mú. Ma kú bookú-dà hɔ̰́ɔ̰wencí nùka héè-ma ká n bantá è yɔ̀ sḭ̀ḭ̀ma pú sudi, nà mà sḭ̀ǹ k'yè sá̰á̰pu.

Sḭ̀ḭ̀ma-dà nɔn niìfòùo.

¹⁴ Ti yá̰á̰-ma è yɔ̀ kpɛ̰́ńtìnùka yɛɛ̀ni nà Weèdi pesá-dà. Mmí há̰ yòǹ niìfòùo-dà, kà pà n yɛɛ́ɛ̀-nà sḭ̀ḭ̀ma, kà n yòǹ ma núǹn. ¹⁵ N pú yá̰á̰ n pa̰kú-sa. N pú pa̰kú n kpɛ̀i-sá, n múńtà pa̰kú n pú kpɛ̀i-sá-dà. ¹⁶ Kà n pa̰nà n pú kpɛ̀i-sá, n hɔ̰́ bantá ye pesá-dà è yɔ̀ kpɛ̰́ńtìnùka sudi. ¹⁷ Ye wɔ̀ni, mmí p'éè pa̰nà, àmá sḭ̀ḭ̀ma mɛ̀mà péé-ma n mɛhɛká-dà yè pa̰nà. ¹⁸ N yá̰á̰-ma è yɔ̀ suumá kɔ́ɔ́ n mɛhɛká, n wɛì mmí nìdo nà n dàa-dà. Há̰kà, é m'bɔhɔ̀ta suumá pa̰á̰ma, yè péé-ma n mɛhɛká, amá n kó hḭmá é mà pa̰ná, mií-dà n dɔǹ-nà. ¹⁹ Suumá n kpɛ̀i-má, n pú hɔ̰́ nɛɛ́ mà pa̰á̰, àmá sḭ̀ḭ̀ma n pú kpɛ̀i-má, mɛmá-dà n pa̰kú-ma. ²⁰ Kà n pa̰nà n pú kpɛ̀i-sá, ye wɔ̀ni mmí pú yè pa̰nà, sḭ̀ḭ̀ma mɛ̀mà péé-ma n mɛhɛká-dà yè pa̰nà.

²¹ Ye wɔ̀ni-dà, n bantà-ma pa̰á̰mà mɛmà: Kà n kpɛ̀i é pa̰á̰ suumá, n hɔ̰́ n'hɔ̰́tà sḭ̀ḭ̀ma-dà n wɔɔ́ wɔɔ́ kà n mà pa̰kú. ²² N mɔ́nń, n mɛhɛká, n naanà-á-ma Weèdi kpɛ̰́ńtìnùka. ²³ Àmá n mɛhɛká, n dɛ́hà kpɛ̰́ńtìnùdi tɔɔ̀di-dà kà nì ceń, è mɔ̀ù-nà n yam̀màhàsuudí múń-nà-di. Ye kpɛ̰́ńtìnùdi-dà n kpáhìnà sḭ̀ḭ̀ma mɛ̀mà dehú-ma n mɛhɛká, ma kpenáku. ²⁴ N seǹ-ń-ma! Wodà kó n fḭ́hìna wɔ̰̀ǹkù mɛnkù kú mɛhɛká? Kù n kṵnti-nà kṵ́mú mɛhɛká-dà. ²⁵ Tí tɔná Weèdi mɛ̀nì n fḭ́hìnà-di, nà ti Teó Sèsí-Kídísì yèdi.

Ye wɔ̀ni, nà n mɔ́nń kú yam̀màhàdi, n yòǹ Weèdi kpɛ̰́ńtìnùka núǹn-dà. N há̰ yòǹ-mà niìfòùo, n yòǹ sḭ̀ḭ̀ma núǹn-dà.