Hɔ̀dɔ́m̀pa 8

Weèdi Sèdi kɔ̰́nì-pu fòùmu nìpa.

¹ Sá̰mà-ní, Weèdi koò pú kó sída é kɔ̰́ɔ̰́ yetádi mɛ̀m̀pà múń-nà-pa Sèsí-Kídísì, ² è yá̰á̰ kà nìdo múń nà Sèsí-Kídísì, Weèdi Sèdi mɛ̀nì ti kɔ̰́nì-di fòùmu-dà héé o kpɛ̰́ńtìnùdi. Ye kú kpɛ̰́ńtìnùdi-dà a fḭ́hìnà sḭ̀ḭ̀ma nà kṵ́mú kpɛ̰́ńtìnùka mɛhɛká. ³ Weèdi pa̰à̰ Mɔ̀yísì kpɛ̰́ńtìnùka de pú kó nɛɛ́ é pa̰á̰-sa-dà, mìì tee-sá nìpa sɔ̰̀ǹti-dà de kà kpanì. Nì de tɔn-ní ni mɔ́nní kú bíitá-dà, kà tá tɛ̀ni wɔ̰̀ǹku mɛ̀ǹkù yònà-ku niìsḭ̀m̀ma kpɛ́kú mɛhɛká, è kó pà fèda sḭ̀ḭ̀ma nɔ̀ku mɛhɛká. Ye kú pa̰á̰mà-dà bɛkú, è yɔ̀ Weèdi sídáà sḭ̀ḭ̀ma mɛ̀mà dehú-ma nìpa mɛhɛká. ⁴ Nì pa̰à̰ miya̰, è kpɛ̀i tí nɛɛ́ m'pa̰kú kpɛ̰́ńtìnùka hḭ́mpú-dà dɛ́dɛ́í. Ye wɔ̀ni ti koò pú kó n'fòù ti wɔ̰̀ǹku kpɛ̀i-sá mɛhɛká, àmá Weèdi Sèdi-dà kó ti túdí. ⁵ Mɛ̀m̀pà fòù-pa pa wɔ̰̀ǹku kpɛ̀i-sá kú mɛhɛká, hɔ̰́ m'bɔhɔ̀ta kù kpɛ̀i-sá-dà. Mɛ̀m̀pà há̰ fòù-pa Weèdi Sèdi kpɛ̀i-sá kú mɛhɛká, hɔ̰́ m'bɔhɔ̀ta nì kpɛ̀i-sá-dà. ⁶ Kà nìi bɔhɔ̀ta wɔ̰̀ǹku kpɛ̀i-sá, yè hɔ̰́ ò kònà kṵ́mú mɛhɛká-dà. Kà nìi mɛ̀ɛ bɔhɔ̀ta Weèdi Sèdi kpɛ̀i-sá, k'yè té ò kònà fòùmu nà wɛ̀ɛ̀di mɛhɛká. ⁷ Mɛ̀m̀pà bɔ̀hɔ̀ta-pá wɔ̰̀ǹku kpɛ̀i-sá wɛǹni, yòǹ Weèdi kà̰à̰tɔɔ̀pa-dà. Pà pú tṵ̀n ni kpɛ̰́ńtìnùka hḭ́mpú, pà múńtà pú kó nɛɛ́ kà tṵ̀na. ⁸ Mɛ̀m̀pà fòù-pa wɔ̰̀ǹku kpɛ̀i-sá mɛhɛká, pú kó nɛɛ́ é pa̰á̰ k'yé naaka Weèdi.

⁹ Àmá nɛ́na, nɛ pú fòù wɔ̰̀ǹku kpɛ̀i-sá mɛhɛká, nɛ fòù kà Weèdi Sèdi-dà nɛ túdí, mìì tee-sá nì péé nɛ mɛhɛká. Kà Kídísì Sèdi pú péé nìi mɛhɛká, ò pú yòǹ o kóoó. ¹⁰ Kà Kídísì péé nɛ mɛhɛká, nɛ wɔ̰̀ǹku baà kó kpíí-ma nà sḭ̀ḭ̀ma kpɛ́mú. Há̰kà, Weèdi nɛ kpáhìnà-mà niìcoópa ni yìhìka, ni Sèdi kó nɛ pa̰a̰-á̰-ma fòùmu. ¹¹ Tṵ́màkaà, Weèdi mɛ̀nì yá̰hìnà-di Sèsíì, kà ni Sèdi péé nɛ mɛhɛká, nì mɛ̀ɛ té kó wáńtá yá̰hìna-á-ma nɛ wɔ̰̀ǹku mɛ̀ǹkù kó kpíí-ku. Nì kó wáńtá éè pa̰á̰-ma, nà ni Sèdi mɛ̀nì péé-di nɛ mɛhɛká kú nɔɔ̀ti.

¹² Yè yòǹ-mà mɛma n kúcàpa nà n potɔ̰ɔ̰̀pa-nà, yè békú tí n'fòù Weèdi Sèdi kpɛ̀kaàma-dà, ti dá n'fòù ti wɔ̰̀ǹku kpɛ̀kaàma. ¹³ Kà nɛ tṵ̀n wɔ̰̀ǹku kpɛ̀kaàma, nɛ kó kpíí-ma. Àmá, kà nɛ hédà nɛ wɔ̰̀ǹku pa̰á̰ma, nà Weèdi Sèdi kú nɔɔ̀ti, nɛ kó n'fòù-ú-ma. ¹⁴ Weèdi Sèdi túdí-pa wɛǹni yòǹ Weèdi bííhí-dà. ¹⁵ Weèdi Sèdi nɛ dɛ́tà-di pú yòǹ Sèdi mɛ̀nì nɛ kpáhìnì-di núm̀ma, è tṵ́mà nɛ sṵ́nì wantafɔ̰̀di. Àmá nì yòǹ Sèdi mɛ̀nì héù-di-dà kà nɛ hɔ̰n Weèdi bííhí, è tṵ́mà héù kà ti yún Weèdi è tonà: Ti Báà! Ti Báà! ¹⁶ Weèdi Sèdi mɔ́nní-dà ti cakú ti yàma mɛhɛká è yɔ̀ ti yòǹ Weèdi bííhí. ¹⁷ Ti yòǹ-sa kpɛ́mú ni bííhí, nì kó wáńtá ti kɔ̰́ɔ̰́-ma káma nì hḭ́nà-ma ti kpɛ́mú. Tḭ́ńti nà Kídísì-dà kó mà teeka, mìì tee-sá ti pɛ́ɛ̀ òò yon-nà náńkú, è kó wáńtá pɛ́ɛ́ óò m'péé-nà o wɛhimú mɛhɛká.

Weèdi kpɛ̀i kà nìpa wáńtá m'péé ni wɛhimú mɛhɛká-dà.

¹⁸ N yá̰á̰-ma è yɔ̀ náńkú ti yon-kú yenì, kù pú yòǹ yècḭ́ḭ̀ Weèdi kó wáńtá ti fohìna-pú wɛhimú yìhìka. ¹⁹ Weèdi pa̰à̰-sa niìya̰ wɛǹni fòùku mɛhɛká ceí-ma k'yèè cákádí, wɔ̀ni Weèdi kó fohìna-dí ni bííhí wɛhimú. ²⁰ Ye fòùku niìya̰ há̰ péé niìya̰ mìì yòǹ-sa hécí kpeèti mɛhɛká-dà. Ye mɔ́nyá̰ de pú kpɛ̀i mɛma, àmá Weèdi-dà yè tàà ye kú kpeetì mɛhɛká. Há̰kà, daḿma baà káà kaá-ma ye fòùku niìya̰ kpɛ́mú. ²¹ Daadí kó pɛdá kà Weèdi é fḭ́hìna-á-ma nì pa̰à̰-sa wɛǹni. Nɔɔ̀ti mɛ̀ǹtì yè fíɔ́nì-ti è yè kpáhìnì núm̀ma, nì k'éè fèda-á-ma ti nɔ̀hi mɛhɛká. Nì pa̰à̰-sa wɛǹni kó wáńtá dɛ́tá-ma foóma, Weèdi bííhí kó wáńtá n'káá-ma ni wɛhimú mɛhɛká. ²² Ti há̰ yá̰á̰-ma è yɔ̀ háá nà yenì, Weèdi pa̰à̰-sa wɛǹni káà kṵ́hú-ma, è you dɔnkú é yònà poòo mɛ̀ǹǹ kó pɛdá-ko. ²³ Ye kú cɔ̰́ɔ̰̀di há̰ pú kù you. É pɛ́ɛ́-nà tḭ́ńti Weèdi pɛ̰ḭ-pá ni Sèdi, kà nì yòǹ pa̰cecedí ni pa̰ká mɛhɛká, ti mɛ̀ɛ té kṵ́hú-ma ti yàma mɛhɛká, è ceí-nà Weèdi kó ti kpáhìna-má ni bííhí mɔ́nhí, é dontá ti wɔ̰̀ǹku dɛ́dɛ́í. ²⁴ Weèdi ti fḭ́hìnà-á-ma, àmá ti káà péé daḿma mɛhɛká cɔ̰́ɔ̰̀di-dà è ceí-nà. K'à há̰ dɛ́hà a de ceí-sa, a koò pú hɔ̰́ tṵ́má é n'yɔ̀ n ceí miì. Niìya̰ a mádí-sá n'àa nɔ̀ǹfa, a hɔ̰́ tṵ́má n'káà yè ceí-ma? ²⁵ Kà ti há̰ pú mádí ti ceí-sa, ti hɔ̰́ yè n'ceí nà mùyɔ-dà̰. ²⁶ Ma kú bookú-dà Weèdi Sèdi mɛ̀ɛ té hɔ̰́ tɛ̀ni é ti tempa-nà-ma, tḭ́ńti mɛ̀m̀pà sɔ̰̀ǹ-pa Weèdi cɔ̀ku mɛhɛká. Ti pú yá̰á̰ ti yònà é cɔhà-sa é cɔhà ye hḭ́ǹka sukú, àmá Weèdi Sèdi-dà cɔ̀hu ti kpɛ́mú, nà sɛ́úkàma nùdi pú kó nɛɛ́ wɛdá-ma. ²⁷ Weèdi yá̰á̰-ma mìì péé-sa nìpa yàma mɛhɛká, è yá̰á̰ ni Sèdi kpɛ̀i é cɔhà-sa. Weèdi Sèdi-dà cɔ̀hu k'yè nɔɔ̀-nà Weèdi kpɛ̀kaàma Weèdi kpɛ́ɛpá kpɛ́mú.

²⁸ Tṵ́màkaà, ti yá̰á̰-ma è yɔ̀ mìì tɛ̀hu-sá-ní wɛǹni mɛ̀m̀pà dɔ́sí-pa Weèdi, yè tɛ̀hu-ní pa suumá kpɛ́mú-dà, mɛmpá nì yíí-pa è de mà hḭ́nà nà daadí. ²⁹ Weèdi de ta̰kadà-pa nà daadí, nì de pà ta̰kadà è kpɛ̀i é pà kpáhìna kà pá n'yònà ni Bíitá-dà, k'yé teha kà tá n'yòǹ pɔ̀ɔ é n'káá ya̰nhí dɔ́ɔ́di. ³⁰ Weèdi ta̰kadà-pa nà daadí, nì mɛ̀ɛ pà yíí-ma. Nì mɛ̀ɛ yíí-pa, nì pà kpáhìnà-á-ma niìcoópa ni yìhìka. Nì kpáhìnà-pa niìcoópa, kà nì mɛ̀ɛ té pà kɔ̰́ɔ̰́ ni wɛhimú.

Yècɛ̰́ɛ̰̀ pú kó nɛɛ́ ti yaàta nà Weèdi dɔ́kàma.

³¹ Ti kó tṵ́má é n'yɔ̀ ba? Kà Weèdi ti péé-nà wodà kó nɛɛ́ ti n'sɛ̰ɛ̰́? ³² Weèdi pú yehènà ni bíitá mɔ́ntá náńkú, nì tà tɔn-ń-ma-ní è yɔ̀ tá tɛ̀ni é kpíí ti wɛǹni kpɛ́mú. Ntɛ́ nì kó hḭmà è pú ti m'pɛ̰ḭ tɔɔ̀sa wɛǹni nà mɛntá? ³³ Wodà kó nɛɛ́ é pṵ́á̰ Weèdi batà-pa yècḭ́ḭ̀? Weèdi mɔ́nní-dà hḭ́n pà yòǹ niìcoópa. ³⁴ Woò mɔ́ńn-dà kó nɛɛ́ pà kɔ̰́ɔ̰́ yetádi? Ye yaǹn kɔ́ɔ́, è yá̰á̰ Sèsí-Kídísì kpíi. Mìì dɔ̀haà é ha̰tá-sa, ò yá̰ńtà kṵ́mú mɛhɛká, é taá kaàdi Weèdi nɔ̀kàǹheùma, è cɔ̀hu ti kpɛ́mú. ³⁵ Wodà kó nɛɛ́ ti yaàta nà dɔ́kàma Kídísì káá-ma ti hḭ́ǹka? Náńkú-dà nkɛ́ɛ̀ bɔɔ̀pùukú? Fá̰kápàma-dà nkɛ́ɛ̀ kòni, nkɛ́ɛ̀ sɔ̰̀ǹti? Sḭ̀mu-dà nkɛ́ɛ̀ kṵ́mú? Ye yècḭ́ḭ̀ pú kó nɛɛ́ ti yaàta nà Kídísì dɔ́kàma. ³⁶ Pà wà̰ta Weèdi pɔ̀kàta mɛhɛká è yɔ̀:

A kú kpɛ́mú-dà tee Teù,

kà pà ti pɛnti weǹtṵ́nní wɛǹni mɛhɛká

è kó ti kɔ̀ù. Nìpa yìhìka, kà ti yònà hɔ̰̀ci

pà kɔ́ɔ́-nà-ci kɔ̀ùpu.

³⁷ Àmá nà mii kú wɛnnì, kà ti káá nɛdáma sàma nà mɛ̀ǹǹ ti dɔ́sí-ko kú nɔɔ̀ti. ³⁸ N yá̰á̰-ma nà mɔ́ma, è yɔ̀ yècḭ́ḭ̀ pú kó nɛɛ́ ti yaàta n'ɔ̀ɔ dɔ́kàma. Báà kṵ́mú, yoo fòùmu, yoo hḭ́ǹka tɔntɔndipá, yoo seèsḭ̀ǹka, yoo sá̰kù kú pemá, yoo ká̰ńweǹni kpɛ́ɛmá, ³⁹ yoo mìì káá-sa nɔɔ̀ti, yoo hḭ́ǹka kpeèti nà tenkà kpɛ́ɛtí, yoo Weèdi pa̰à̰-sa tɔɔ̀sa, ye yècḭ́ḭ̀ pú kó nɛɛ́ ti yaàta-nà dɔ́kàma Weèdi bɛkáà-ma ti Teó Sèsí-Kídísì hḭ́ǹka.