Hɔ̀dɔ́m̀pa 9

Weèdi nà Ìsìdàyɛ́dì nìku.

¹ N kó wɛɛ́-sà yòǹ wɛbeèdi-dà mìì tee-sá n yòǹ Kídísì kóoó-dà, n pú báńtí. Weèdi Sèdi n cakú-ma n yàma mɛhɛká è yɔ̀ n wɛì-sa yòǹ bemú-dà. ² N yàma-dà cɔ̰háà dɛ́dɛ́í, k'yè n kɔkapú wɔ̀ka wɛǹni. ³ K'yè de cédí, n de kó n'kpɛ̀i Weèdi é n wɛ̰́ha-á-ma é n cɛ́dá-nà Kídísì, n kúcàpa suumá kpɛ́mú. Pà yòǹ n bookú kpɛ́ɛpá-dà, ⁴ Ìsìdàyɛ́dìpa. Mɛmpá-dà Weèdi de ta̰kadà-ma, kà pà yòǹ ni bííhí, é pà bɛka ni wɛhimú sá̰á̰pu, é pà pa̰á̰-nà múnáma, é pà kɔ̰́ɔ̰́ kpɛ̰́ńtìnùka, é pà bɛka pà té kó nì dùǹkàma kú bookú, é pà hḭ́ná nùka, ⁵ é pà pa̰a̰ yààpa kà pa yèka wɛhi. Kídísì niìfòùma bɛ́ka, ò yɛ̀ni pa fùdi mɛhɛká-dà. Ò yòǹ Weèdi-dà, è wɛhi-nà niìi wɛǹni. T'óò fa̰nta k'yé n'kɔ́ɔ́ yɔ̀ɔmá. K'yé mà n'yòǹ!

⁶ Kà n wɛì mɛma, n pú kpɛ̀i é n'yɔ̀ Weèdi de hḭ́nà-di nùdi hḭn hécí, è yá̰á̰ Ìsìdàyɛ́dì yaàbíiká wɛǹni baà pú yòǹ Ìsìdàyɛ́dìpa mɔ́mpá Weèdi yìhìka. ⁷ Àbààhám̀ yaàbíiká wɛǹni mɛ̀ɛ pú yòǹ o bííhí mɔ́nhí Weèdi yìhìka, è yá̰á̰ nì d'oò cakáà è yɔ̀: Ìsáákì kú bííhí fùdi cɔ̰́ɔ̰̀di-dà kó n'yòǹ a yaàbíiká. ⁸ Yè kpɛ̀i é caka è yɔ̀, bííhí pà pɛháà-hi dɔɔ̀o nà poòo hɔ̰́ hḭmpú pú yòǹ Weèdi bííhí. Àmá bííhí Weèdi hḭ́nà nùdi è yɔ̀ pà kó pɛdá-hi, mɛnhí-dà yòǹ ni yaàbíiká mɔ́nká. ⁹ Ǹtɛ wɛnɔ̀di Weèdi de hḭ́nà-di: N tóńti-ní fòùma sá̰mà kú wɔ̀ni, yè mɛ̀ɛ kó n'hɔ̰́tà Sàdáà pɛdà bíidatá-dà.

¹⁰ Sá̰à̰di há̰ pú dɛɛ. Hèdèbékà tá, yè mɛ̀ɛ té de hḭmpú-dà, k'ó pɛɛ́-nà ti yàdo Ìsáákì bíidahí hìdɛ́ɛ́, kà hì yòǹ kpɛ́kahí. ^11-12 Weèdi há̰ káá nì hɔ̰mpú-dà è ta̰kù nìpa. Nì pú pà ta̰kù k'yè péé-nà-ni pa mɔ́mpá kú pa̰á̰ma pesá, àmá yè péé-nà-ní, mɛní mɛ̀nì pà ta̰kù-di pesá-dà. Nì há̰ de kpɛ̀i-má kà nì hḭ́nà-sa é pa̰ná tá, mɛmá-dà kà nì de caka Hèdèbékà, k'ò mun pú pɛɛ̀ ye bííhí, kà hì mɛ̀ɛ mun pú pa̰à̰ suumá yoo sḭ̀ḭ̀ma, è yɔ̀: Kpɛ̰́ǹn kó wáńtá é n'yòǹ sḭ̀mɔ́ǹn núǹn-dà. ¹³ Ye kú wɛnɔ̀dì nɔɔ̀-nà wɛnɔ̀di tɔɔ̀di-dà pà wà̰tà-di Weèdi pɔ̀kàta mɛhɛká, kà nì tonà: N dɔ́káà Sàkɔ́pù-dà é yeda Èsàyúù.

¹⁴ Ye kú pa̰á̰mà hḭ́ǹka, ti kó n'yɔ̀ badà? Ti kó n'yɔ̀ Weèdi pú pa̰kú k'yè coó nkɛ́ɛ̀? Fɔ́ú! ¹⁵ Nì de cakáà Mɔ̀yísì è yɔ̀: N kó n'káá séèma n kpɛ̀i é kɔń-ko-dà séèma, é n'sudi n kpɛ̀i é n'suu-kó kú kpɛ́mú. ¹⁶ Ye kú kpɛ́mú, kà Weèdi ta̰kadà nìdo, yè pú péé-nà-ní ye yaǹn kpɛ̀imá pesá yoo o wɛ̰́ɛ̰́ma pesá, àmá yè péé-nà-ní Weèdi mɛ̀nì kɔǹ-di séèma cɔ̰́ɔ̰̀di pesá-dà. ¹⁷ Weèdi pɔ̀kàhi mɛhɛká, Weèdi de cakáà Èsípútì wódo è yɔ̀: N hédà k'á hḭn wódo, è kpɛ̀i nà fɔ̰́ń kú pesá, ń bɛka n kpeèti sá̰á̰pu-dà, k'yé teha kà n yèdi é pidá teǹka wɛǹni hḭ́ǹka. ¹⁸ Ti kó dɛ́há-ní n'ɛ̀ɛ pesà-dà è yɔ̀, Weèdi hɔ̰́ kɔń séèma nì kpɛ̀i é kɔń-ko-dà, é kpekàna toòka nì kpɛ̀i é kpekàna-kó kú toòka.

Weèdi fɔ̰́di nà ni séèma kɔń-ma.

¹⁹ A kó nɛɛ́ n béka-á-ma è yɔ̀: Yè yòǹ-mà mɛma, baà tee kà Weèdi tṵ́mà kɔ̰̀ǹti-nà nìpa è yɔ̀ pà pa̰kú-sa pú sudi? Wodà kó nɛɛ́ nì yɔ̰́ń-nà nì kpɛ̀i-sá kú hḭ́ǹka? ²⁰ Fɔ̰́ń héé wodà nìdì fɔ̰́ń, k'à kó nɔ̀hì nà Weèdi? Kṵ́mpoòta kó nɛɛ́ é béka-á-dà mɛ̀ǹǹ tà maá-ko, mìì tee-sá k'ó tà madí kà tà yòǹ mɛmà kú bookú? ²¹ Kṵ́ḿpomato pú kó nɛɛ́ pa̰á̰ ò kpɛ̀i-sá nà kpeèti? Nà kpeèti ti cɔ̰́ɔ̰̀di, ò kó nɛɛ́ pa̰á̰-dà daasàka caàka yoo ó pa̰á̰ daahécíka caàka.

²² M̀mɔ́ńya̰-dà há̰ dìi fɔ̰́ń, kà Weèdi kpɛ̀i é bɛka ni fɔ̰́di, é hédá kà nìpa bantá ni kpeèti sá̰á̰pu? Ye kú kpɛ́mú, nì pa̰kú mùyɔ̰ sào-dà nà mɛ̀m̀pà hèǹtà-pa ni fɔ̰́di, k'yè sànà ní pà fíɔ́wá. ²³ Weèdi de kpɛ̀i, kà nìpa nì kɔǹ-pa séèma-dà é yá̰dá ni wɛhimú sá̰á̰pu. Nì de pà dɔ̀haà sɔ̀do nà daadí è yɔ̀ pá dúú ye wɛhimú mɛhɛká-dà. ²⁴ Tḭ́ńti-dà mɛ̀ɛ héé ye nìpa. Nì pú ti yíí Sùwífùpa cɔ̰́ɔ̰̀di mɛhɛká, àmá nì ti yíí nà mɛ̀m̀pà pú yòǹ-pa Sùwífùpa mɛhɛká-dà. ²⁵ Nì mɛ̀ɛ wɛdà-sa-dà Weèdi wɛtɛ̰́náko Òséè pɔ̀kàta mɛhɛká è yɔ̀:

Nìpa mɛ̀m̀pà de pú yòǹ-pa n kpɛ́ɛpá,

n kó pà yíí n kpɛ́ɛpá-dà.

Bookú n de pú dɔ́sí-ku,

n kó kù yíí bookú n dɔ́sí-ku-dà.

²⁶ Bɛ̀m̀bɛ̀ni pà de pà yíí-di

è yɔ̀ pà pú yòǹ n nìpa,

pà kó pà yíí è yɔ̀ pà yòǹ

Weèdi mɛ̀nì fòù-di bííhí-dà.

²⁷ Mìì héé-sa Ìsìdàyɛ́dìpa bɛ́ka, Weèdi wɛtɛ̰́náko Èsàyíì de wɛdà-á-ma pa hḭ́ǹka è yɔ̀:

Bá kà Ìsìdàyɛ́dì bííhí wɛhikáà

è yònà dàmɛ́dì bíìdi,

pa cɛ̰́masí-dà Weèdi kó fḭ́hìna-má sá̰à̰di.

²⁸ Bateó kó pa̰á̰-ma pɛ́pɛ́í nà feǹfem̀ma ò hḭ́n ò kó pa̰á̰-sa wɛǹni teǹka hḭ́ǹka. ²⁹ Èsàyíì de tṵ́mà yɔ̀ɔ wɛdápu-dà-ho è yɔ̀:

Kà Bateó mɛ̀ǹǹ wódí-ko fòùku hḭ́ǹka

de pú ti sɔ̰́ńtà yaàbíiká kàcɔ̰́,

ti kpɛ́ɛmá de kó n'yɔ̀ɔ-ɔ́-ma é n'yònà Sòdɔ́m̀ kpɛ́ɛpá,

ti de pú kó n'kaá é yònà Kòmɔ́ɔ̀ kpɛ́ɛpá.

Ìsìdàyɛ́dìpa nà fḭ́hìnamá mɛ̀mà péé-nà-ma-ní dandaní pesá.

³⁰ Miya̰ cakú badà? Yè cakú è yɔ̀, boocí tɔcí mɛ̀ǹcì de pú pɛnti-cí é n'coó Weèdi yìhìka, Weèdi cì dìdà è yɔ̀ cì coó nà ci dandaní kpɛ́mú-dà. ³¹ Ìsìdàyɛ́dìpa mɛ̀m̀pà há̰ de pɛnti-pá Weèdi é pà dìda niìcoópa, nà kpɛ̰́ńtìnùka pà tṵ̀n-ká kpɛ́mú, pà pú nɛɛ̀ é nɛǹta pà bɔ̀hɔ̀ta-sá. ³² Baà tee mɛma? Yè yòm̀pu kpɛ́mú-dà, pà de pɛháà ye coóma Weèdi yìhìka nà pà pa̰á̰ma mɛhɛká, pà pú mà pɛháà nà dandaní hḭ́ǹka. Mɛmá-dà pà de téúdà-ma tá̰à̰di mɛ̀nì hán-dí, ³³ tá̰à̰di pà wɛì-di kú wɛmá Weèdi pɔ̀kàta mɛhɛká, kà Weèdi yɔ̀:

Ǹtɛ-nà kà n hḭ́nì Sìyɔ̰́ɔ̰̀ yɔtí mɛhɛká,

tá̰à̰di mɛ̀nì kó n'tee-dí

kà nìpa téúhú è dɔdì.

Há̰kà, mɛ̀ǹǹ kó taàa-kó

o dandaní ni hḭ́ǹka,

ye yaǹn pú kó dii fɛ̀ci.