Hɔ̀dɔ́m̀pa 10

¹ N kúcàpa nà n potɔ̰ɔ̰̀pa-nà, nà n yàma wɛǹni-dà n dɔ́sí-ma Weèdi é fḭ́hìna Sùwífùpa. N mɛ̀ɛ cɔɔ̀hu-ú-ma Weèdi sàma ye kpɛ́mú. ² N kó nɛɛ́-ma é wɛdá pa hḭ́ǹka è yɔ̀ pà káá wɔ̰ǹyahití Weèdi kpɛ́mú, há̰kà pà pú káá yá̰á̰ma mɔ́mmá. ³ Pà pú yá̰á̰ Weèdi hɔ̰mpú è kpáhìnì nìpa niìcoópa ni yìhìka. Ye wɔ̀ni kà pá pɛha pa mɔ́mpá kó n'hɔ̰mpú é mà n'yòǹ. Mɛmá-dà pà yeéè-ma cɔ̀ku Weèdi tṵnì-ku è pà kpáhìnì niìcoópa. ⁴ N wɛì mɛma mìì tee-sá, Kídísì tɛ̀ni é dehà kpɛ̰́ńtìnùka de bɔhɔ̀ta-sá-dà. Sá̰mà-ní, mɛ̀m̀pà kú wɛnnì dań-pa o hḭ́ǹka, Weèdi diìhu-pá-dà niìcoópa ni yìhìka.

Weèdi fḭ́hìnì mɛ̀m̀pà kú wɛnnì dań-pa-dà Teó.

⁵ Ǹtɛ Mɔ̀yísì wà̰haà-sa coóma mɛ̀mà péé-nà-ma-ní kpɛ̰́ńtìnùka pesá hḭ́ǹka. Ò de yɔ̀: Mɛ̀ǹǹ kó tṵṵ̀na-kó kpɛ̰́ńtìnùka hḭ́mpú wɛǹni, ye yaǹn kó n'fòù nà mɛnká-dà. ⁶ Há̰ ǹtɛ ò wɛkáàma, coóma mɛ̀mà péé-nà-ma-ní dandaní pesá, hḭ́ǹka. Ò de yɔ̀: A dá béka a cɔ̰́ɔ̰̀di è yɔ̀: Wodà kó dìsi hḭ́ǹka? Yè kpɛ̀i é n'yɔ̀, é dìsi é cúhìna-ní Kídísì-dà. ⁷ A mɛ̀ɛ dá béka a cɔ̰́ɔ̰̀di è yɔ̀: Wodà kó cútá kpííku mɛhɛká? Yè kpɛ̀i é n'yɔ̀ é cútá é deèna-ní Kídísì kpíípa mɛhɛká-dà. ⁸ Weèdi pɔ̀kàta hḭ́n badà múńdìkaà coóma hḭ́ǹka? Tà yɔ̀: Weèdi wɛmá a hɛ́dí-nà-á-ma, è péé a nùdi mɛhɛká, n'àa yàma mɛhɛká. Ye wɛmá yòǹ dandaní kpɛ́ɛmá-dà kà ti mà cakú. ⁹ K'à wɛdà n'àa nùdi è hḭ́n Sèsíì-dà yòǹ Teó, è dań a yàma mɛhɛká è yɔ̀ Weèdi ò yá̰hìnà kpíípa mɛhɛká, a kó fḭ́tá-ma, ¹⁰ è yá̰á̰ yàma mɛhɛká-dà pà hɔ̰́ n'dań-ma, kà Weèdi áa diìda niìcoóko ni yìhìka. Nùdi mɛhɛká-dà pà hɔ̰́ wɛɛ́-ma é fohìna a dandaní, kà Weèdi áa fḭ́hìna. ¹¹ Pà wà̰tà Weèdi pɔ̀kàta mɛhɛká è yɔ̀: Mɛ̀ǹǹ kú wɛnnì dań-ko o hḭ́ǹka, ò pú kó dii fɛ̀ci daadí yènì. ¹² Mɛma, mɛ̀m̀pà yòǹ-pa Sùwífùpa nà mɛ̀m̀pà pú yòǹ-pa Sùwífùpa, cenáma màcɔ̰́mà kɔ́ɔ́ pa cɔhɔ̀ka. Pa wɛǹni káá Teó òcɔ̰́-dà, k'ò pa̰kú o suumá mɛ̀m̀pà kú wɛnnì ò yún-pá, ¹³ è yá̰á̰ pà wà̰tà Weèdi pɔ̀kàta mɛhɛká è yɔ̀:

Mɛ̀ǹǹ kú wɛnnì kó yíí-ko Teó yèdi,

ò k'óò fḭ́hìna-á-ma.

¹⁴ Há̰ ntɛ́ pà kó hḭmà óò yíí, kà pà pú dań o hḭ́ǹka? Ntɛ́ pà kó hḭmà é n'dań o hḭ́ǹka, kà pà pú yeèkaà o kpɛ́mú? Ntɛ́ pà kó hḭmà é yekà o kpɛ́mú, k'òòcɔ̰́ǹ pú pà cakáà o wɛmá? ¹⁵ Ntɛ́ pà kó hḭmà é caka o wɛmá, kà Weèdi pú tɔn nìpa ye kú kpɛ́mú? Pà wà̰tà Weèdi pɔ̀kàta mɛhɛká è yɔ̀:

Pà cèǹtì taànaaká-dà,

mɛ̀m̀pà cakú-pa wɛnaamá páàti wɛǹni.

¹⁶ Àmá mɛ̀m̀pà bekù-pa ye wɛnaamá, pa wɛǹni pú mà teháà. Weèdi wɛtɛ̰́náko Èsàyíì de mà yɔ̀ɔ wɛdápu-dà è yɔ̀: N Bateù, woò mɔ́ńn-dà teháà wɛmá ti cakú-ma? ¹⁷ Kà mɛmá-dà, dandaní hɔ̰́ cetá n'àa yeèkaà-ma wɛmá-dà kà pà mà cakú. Ye wɛmá-dà mɛ̀ɛ héé Kídísì wɛmá.

¹⁸ N há̰ békú-ma: Ìsìdàyɛ́dìpà de pú yeèkaà kà pà cakú ye wɛnnaamà-n'áa? Pà mà yèkaà sukú, è yá̰á̰ pà wà̰tà Weèdi pɔ̀kàta mɛhɛká è yɔ̀:

Pà yèkaà-á-ma pa boòku

teǹka wɛǹni hḭ́ǹka.

Pa wɛmá ta̰ntà-á-ma

teǹka kpɛ̰kpɛ̰kahí wɛǹni.

¹⁹ N tṵ́mà békú-ma: Ìsìdàyɛ́dìpà de pú yèkaà mà tonàpu-a? Pà de mà yèkaà sukú. Ǹtɛ Weèdi de cedí é wɛɛ́-sa-ho nà Mɔ̀yísì nùdi: Nì de yɔ̀:

N kó hédá kà nɛ́ n'yantí-ma,

nà mɛ̀m̀pà pú yòǹ-pa n nìku mɔ́nkú.

N kó cɔkàda nɛ fɔ̰́di-dà,

nà nìku mɛ̀ǹkù pú káá-ku yàma kpɛ́mú.

²⁰ Weèdi múńtà de héè kà Èsàyíì é wɛdá è yɔ̀:

Mɛ̀m̀pà de pú n pɛnti-pá,

mɛmpá-dà n dɛ́hà.

Mɛ̀m̀pà de pú n cɔɔ̀hu-pá yècḭ́ḭ̀,

n bɛkáà-pa-dà n cɔ̰́ɔ̰̀di.

²¹ Àmá Ìsìdàyɛ́dìpa hḭ́ǹka, Weèdi de tuɛhà è yɔ̀:

Weǹtṵ́ṵní wɛǹni,

n hɔ̰́ ca̰à̰na n nɔ̀hi,

nìku mɛ̀ǹkù pú bekù-ku bɛ́ka-dà,

è kù yún,

kù mɛ̀ɛ pú you toòka.