Hɔ̀dɔ́m̀pa 11

Weèdi pú wɛ́i Ìsìdàyɛ́dìpa

¹ N tṵ́mà békú békàma tɔɔ̀ma-dà: Yè yòǹ-mà mɛma, Weèdi há̰ wɛ́i-í-dà ni nìku Ìsìdàyɛ́dìpa? Fɔ́ú, è yá̰á̰ n mɔ́ńǹ, n yòǹ Ìsìdàyɛ́dì kóoó-dà. N yòǹ Àbààhám̀ yaàbíidí-dà, è yɛ̀ni Bɛ̀ǹsàmɛ́ɛ̀ nahàku. ² Weèdi pú wɛ́i ni nìku nì bàtà-ku nà daanì. Nɛ yá̰á̰-dà-ma pà wà̰tà-sa Weèdi pɔ̀kàta mɛhɛká, Èdíì de kɔń-nà-sa Weèdi Ìsìdàyɛ́dìpa hḭ́ǹka è yɔ̀: ³ N Bateù, pà kɔ̀ù a wɛtɛ̰́nápa-dà, é pɔ́u a dɔ̀hàdi cɔ̰̀ǹcɔ̰̀ka. Mmí kú cɔ̰́ɔ̰̀di-dà kadí àà tṵ̀n, kà pà kpɛ̀i è mɛ̀ɛ té n kɔ̀ù. ⁴ Weèdi há̰ de ò tɛ̰́nà è yɔ̀ ba? Nì de yɔ̀: N sɔ̰́ńtà n kpɛ́mú nìpa tohìka kàyehì-dà, kà pà pú hìu wàfa pà toò-fa Bàádì fɔ̰̀di.

⁵ Yè mɛ̀ɛ té yòm̀pu-dà yenì kpɛ́ɛ́dì-ní. Nìpa cɛ̰́masí kaá-ma Weèdi ta̰kadà-pa ni pa̰á̰suumá mɛhɛká. ⁶ Ni pa̰á̰suumá-dà tee kà ní pà ta̰kadá, yè pú yòǹ pa tɔná kpɛ́mú-dà tee. Kà mɛma dɔ Weèdi pa̰á̰suumá koò pú kó n'yòǹ pa̰á̰suumá.

⁷ Mii kpɛ̀i é n'yɔ̀ ba? Ìsdàyɛ́dì nìpa pú dɛ́tà pà de pɛnti-sá. Weèdi ta̰kadà-pa cɔ̰́ɔ̰̀di-dà yè dɛ́tà. Tɔɔ̀pa mɛmpa, kà ní kpekàna pa toòka, ⁸ é n'yònà pà wà̰tà Weèdi pɔ̀kàta mɛhɛká è yɔ̀pu. Pà yɔ̀:

Weèdi-dà kɔ̀ù pa yàma

kà mà koò pú nikàdi n'ɛ̀ɛ̀cḭ́ḭ̀,

nì kpanà pa nɔ̀ǹci-dà è yɔ̀ cì dá dɛ́há,

é kpená pa toòka è yɔ̀ kà dá yekà

k'yè mà yòǹ háá nà yenì.

⁹ Wódo Dàfítì mɛ̀ɛ té de wɛdà è yɔ̀:

Pa dikàdikú é kpáńtá pa kpɛ́mú máàka nà fɔ̰̀dìka

pà kó n'dɔdì-ka kú mɛhɛká.

Pá yɔ̰́ń pa toòka k'yé n'sànà pà pa̰à̰-sa.

¹⁰ Pa nɔ̀ǹci é yɔ̀n,

kà pà koò dá n'dìi.

Héé kà pa náńkú pà yɛ̰̀ḭ kà pá m'bo-boí.

¹¹ N békú-ma: Kà Sùwífùpa téúdà é dɔdi, pà dɔdi k'yè yɔ̀ɔ-ɔ́-dà? Ṵ́ṵ̀, yè pú yɔ̀a. Há̰kà, pa yetáma kpɛ́mú-dà tee kà boocí tɔcí é dɛ́tá fḭ́hìnamá. Weèdi pa̰à̰ miya̰ è kpɛ̀i é heǹta pa yantimú-dà. ¹² Sùwífùpa yetáma kpɛ́mú-dà tee fòùku boocí tɔcí dɛ́tà-ma pa̰á̰suumá sàma. Pa hɛ̰kàma kpɛ́mú-dà tee, mɛ̀m̀pà pú yòǹ-pa Sùwífùpa dɛ́tà-ma pa̰á̰suumá sàma. Kà Sùwífùpa wɛǹni há̰ dɛ́tà fḭ́hìnamá, Weèdi pa̰á̰suumá kó dɔ̀hà é wɛhika-á-ma.

Weèdi fḭ́hìnà-ma kú bookú mɛ̀m̀pà pú yòǹ-pa Sùwífùpa

¹³ Wɔ̀nì mɛnì, n kó wɛɛ́-nà nɛ́na mɛ̀m̀pà pú yòǹ-pa-dà Sùwífùpa. N yòǹ Weèdi wɛtɛ̰́náko-dà, nì tɔn-kó-ní nɛ́na mɛ̀m̀pà pú yòǹ-pa Sùwífùpa pesá. Ye kú kpɛ́mú-dà tee k'yè n naa dɛ́dɛ́í nà tɔmú nì n kɔ̰́ɔ̰̀-pu, ¹⁴ kà n mù pa̰kú, è kpɛ̀i k'yè kó teha ká n heǹta n bookú kpɛ́ɛpá yantimú, kà pa pàcɔ̰́ é dɛ́tá fḭ́táma. ¹⁵ Weèdi de dínà Ìsìdàyɛ́dìpa bɛ́ɛ́kú, é tɛ̰́ná-ní boocí tɔcí-dà ni bɛ́ka kà pá naaka. Nì kó tṵ́má pà tà̰ǹta tḭ́ń daadí m̀mɔ́nya̰-dà kó pa̰ná? Mɛ̀m̀pà de kpíi-pá kó tón é foùda-á-ma-ní.

¹⁶ Kà pɛ̰́ɛ̰̀ yòmu pɛ̰́ɛ̰̀pa cecepá yòǹ Weèdi kpɛ́ɛpá, ye yòmu wɛǹni mɛ̀ɛ té yòǹ ni kpɛ́mú-dà. Kà tepú cɛ̰̀ǹci mɛ̀ɛ yòǹ Weèdi kpɛ́cí, mu dɛ̀ɛcí mɛ̀ɛ té yòǹ Weèdi kpɛ́cí-dà. ¹⁷ Ìsìdàyɛ́dì nìku yònà Òdífù tepú-dà pà céu-pú kú dɛ̀ɛcí cìcɔ̰́. Ci fɛ̀ùdi, kà pá tóó-ní, nɛ́na mɛ̀m̀pà yònà-pa foǹni tepú dɛ̀ɛcí, é tɛ̀ni é nɛ tukaná. Sá̰mà-ní, kà nɛ mɛ̀ɛ té dɛ́hù mu cɛ̰̀ǹci yɔ̰́ǹ-ma nɛ́ɛmá è mà dìkànì mu hḭ́ǹka. ¹⁸ Mɛmá-dà tee a pú yònà-ma é yɔ̰́sa dɛ̀ɛcí pà céu-cí. Ntɛ́ a kó hḭmà é cì fóń-nà? A yònà é n'yá̰á̰ è yɔ̀ fɔ̰́ń pú toó cɛ̰̀ǹci, àmá cɛ̰̀ǹci-dà a toó.

¹⁹ K'yè púdí a kó nɛɛ́-ma é n'yɔ̀: Pà céu ye dɛ̀ɛcì è kpɛ̀i é tukaná fɔ̰́ń-dà. ²⁰ Mɔ́ma-dà. Pà cì céu è yɔ̀pu kpɛ́mú-dà cì pú dań. Fɔ̰́ń mɛ̀ɛkà, a tusí n'ɛ̀ɛ tepù, è yɔ̀pu kpɛ́mú-dà a dań. A há̰ pú yònà é n'fóǹ, a múńtà yònà é n'wani-í-ma, ²¹ mìì tee-sá, Weèdi pú yeéè-sa Sùwífùpa céupú, mɛmpá mɛ̀m̀pà yòǹ-pa tedɛ̀ɛcí mɔ́ncí, nì mɛ̀ɛ té pú kó yeda a cédápu. ²² Seká Weèdi bɛkú-ma kú bookú ni pa̰á̰suumá nà nì dɔǹ-ma. Nì dɔǹ-ń-ma nà mɛ̀m̀pà dɔɔ-pá ni cɔ̀ku mɛhɛká, àmá è pa̰kú fɔ̰́ń ni pa̰á̰suumá k'à sɔ̰ncí è fòù ma mɛhɛká. Kà mɛma dɔ, a mɛ̀ɛ té yòǹ cédá-ko-dà. ²³ Mɛ̀ɛtékà, kà daadí pɛdà kà Sùwífùpa tón è tàà pa dandaní Sèsíì hḭ́ǹka, Weèdi kó tón é pà tukaná-ma, mìì tee-sá nì káá-ma nɔɔ̀ti è kó nɛɛ́ tṵ́má pà tukaná. ²⁴ Fɔ̰́ń, a de yòǹ foǹni òdífùpu dɛ̀ɛkú-dà pà cédà-ku é tɛ̀ni é kù tukaná nà hɔ̰́ɔ̰̀ta kpɛ́mú kpɛ́kú. A de pú sànà tukanápu. Sùwífùpa mɛmpa, pà yòǹ hɔ̰́ɔ̰̀ta òdífùpu dɛ̀ɛcí-dà. Weèdi kó nɛɛ́-ma é tón é cì tukaná ci tepú hḭ́ǹka.

Weèdi kó fḭ́hìna-á-ma Ìsìdàyɛ́dì nìku.

²⁵ N kúcàpa nà n potɔ̰ɔ̰̀pa-nà, n pú kpɛ̀i nɛ́ m'binì-nà Weèdi hḭ́nà-sa k'yè sɔ̀di, k'yé teha kà nɛ dá n'tonà nɛ káá yaǹfòùma. Ìsìdàyɛ́dì nìku kùcɔ̰́ kó yee-é-ma kù kó n'dań-ma, háá kà boocí tɔcí é dɛ́tá fḭ́táma. ²⁶ Ye kú wɔ̀ni, Weèdi kó fḭ́hìna-á-ma Ìsìdàyɛ́dì nìku wɛǹni, é n'yònà pà wà̰tà Weèdi pɔ̀kàta mɛhɛká è yɔ̀pu. Pà wà̰tà è yɔ̀:

Fḭ́hìnɔ kó yɛɛ̀ni nà Sìyɔ̰́ɔ̰̀-dà^a,

é tɛ̀ni é deèda,

Sàkɔ́pù yaàbíiká sḭ̀ḭ̀ma.

²⁷ Ǹtɛ múnáma n kó pa̰á̰-ma nà mɛmpá,

n kó pà dèdà tḭ́ń wɔ̀ni pa sḭ̀ìma.

²⁸ Pà yedáà Weèdi wɛnaamá, é hḭn ni kà̰à̰tɔɔ̀pa nɛ kú suumá kpɛ́mú-dà. Há̰kà, Weèdi-dà de pà ta̰kadà kà pà yòǹ ni nìku. Nì baà káà pà dɔ́sí-ma nà pa yààpa kpɛ́mú, ²⁹ è yá̰á̰ Weèdi pú hɔ̰́ ta̰ǹta nì pɛ̰ḭ-sá, nì mɛ̀ɛ pú wán nì yíí-pa. ³⁰ Nà wɔ̀nì-hɔ̰, nɛ de kpekáà-nà toòka-dà Weèdi. Sá̰mà-ní, kà Weèdi é nɛ kɔń séèma mìì tee-sá, Sùwífùpa nì kpekáà-nà toòka. ³¹ Yè mɛ̀ɛ té kó n'yòǹ-pu-dà pa bɛ́ka. Wɔ̀nì mɛnì, pà kpekáà-nà Weèdi-dà toòka, k'yé n'tee kà ní nɛ kɔń séèma. Sá̰mà-ní, yè békú Weèdi-dà mɛ̀ɛ té pà kɔń séèma. ³² Weèdi hédà kà nìpa wɛǹni é nì kpeka-nà toòka, è kpɛ̀i é pà kɔń séèma-dà pa wɛǹni.

Weèdi wɛhi-í-ma.

³³ Weèdi pa̰á̰suumá wɛhi sàma-dà. Ni yaǹfòùma cṵmpu dɛ́dɛ́í-dà, kà ni yá̰á̰ma pɛsì sàma. Òcɔ̰́ǹ pú kó nɛɛ́ yá̰dá nì ta̰kadà-sa ni yàma mɛhɛká, òcɔ̰́ǹ mɛ̀ɛ pú kó nɛɛ́ yá̰dá nì kpɛ̀i é pa̰á̰-sa. ³⁴ Pà wà̰tà Weèdi pɔ̀kàta mɛhɛká è yɔ̀:

Woò mɔ́ńn-dà yá̰á̰ Bateó yam̀màhàdi?

Woò mɔ́ńn-dà yòǹ o teńko?

³⁵ Woò mɔ́ńn-dà yòǹ cecedó óò pa̰a̰ yècḭ́ḭ̀,

k'òò bàǹ k'yè békú óò bodá?

³⁶ Mɛnń-dà pa̰nà niìi wɛǹni, èè púsí ye wɛǹni, k'yè péé o kpɛ́mú. O yèdi é wɛhika k'yé n'kɔ́ɔ́ yɔ̀ɔmá. K'yé mà n'yòǹ.